২০. অমতৰগ্গো

৬০০. ‘‘অমতং তে, ভিক্খৰে, ন পরিভুঞ্জন্তি যে কাযগতাসতিং ন পরিভুঞ্জন্তি. অমতং তে, ভিক্খৰে, পরিভুঞ্জন্তি যে কাযগতাসতিং পরিভুঞ্জন্তী’’তি.

৬০১. ‘‘অমতং তেসং, ভিক্খৰে, অপরিভুত্তং যেসং কাযগতাসতি অপরিভুত্তা. অমতং তেসং, ভিক্খৰে, পরিভুত্তং যেসং কাযগতাসতি পরিভুত্তা’’তি.

৬০২. ‘‘অমতং তেসং, ভিক্খৰে, পরিহীনং যেসং কাযগতাসতি পরিহীনা. অমতং তেসং, ভিক্খৰে, অপরিহীনং যেসং কাযগতাসতি অপরিহীনা’’তি.

৬০৩. ‘‘অমতং তেসং, ভিক্খৰে, ৰিরদ্ধং যেসং কাযগতাসতি ৰিরদ্ধা. অমতং তেসং, ভিক্খৰে, আরদ্ধং [অৰিরদ্ধং (ক.)] যেসং কাযগতাসতি আরদ্ধা’’তি.

৬০৪. ‘‘অমতং তে, ভিক্খৰে, পমাদিংসু যে কাযগতাসতিং পমাদিংসু. অমতং তে, ভিক্খৰে, ন পমাদিংসু যে কাযগতাসতিং ন পমাদিংসু’’.

৬০৫. ‘‘অমতং তেসং, ভিক্খৰে, পমুট্ঠং যেসং কাযগতাসতি পমুট্ঠা. অমতং তেসং, ভিক্খৰে, অপ্পমুট্ঠং যেসং কাযগতাসতি অপ্পমুট্ঠা’’তি.

৬০৬. ‘‘অমতং তেসং, ভিক্খৰে, অনাসেৰিতং যেসং কাযগতাসতি অনাসেৰিতা. অমতং তেসং, ভিক্খৰে, আসেৰিতং যেসং কাযগতাসতি আসেৰিতা’’তি.

৬০৭. ‘‘অমতং তেসং, ভিক্খৰে, অভাৰিতং যেসং কাযগতাসতি অভাৰিতা. অমতং তেসং, ভিক্খৰে, ভাৰিতং যেসং কাযগতাসতি ভাৰিতা’’তি.

৬০৮. ‘‘অমতং তেসং, ভিক্খৰে, অবহুলীকতং যেসং কাযগতাসতি অবহুলীকতা. অমতং তেসং, ভিক্খৰে, বহুলীকতং যেসং কাযগতাসতি বহুলীকতা’’তি.

৬০৯. ‘‘অমতং তেসং, ভিক্খৰে, অনভিঞ্ঞাতং যেসং কাযগতাসতি অনভিঞ্ঞাতা. অমতং তেসং, ভিক্খৰে, অভিঞ্ঞাতং যেসং কাযগতাসতি অভিঞ্ঞাতা’’তি.

৬১০. ‘‘অমতং তেসং, ভিক্খৰে, অপরিঞ্ঞাতং যেসং কাযগতাসতি অপরিঞ্ঞাতা. অমতং তেসং, ভিক্খৰে, পরিঞ্ঞাতং যেসং কাযগতাসতি পরিঞ্ঞাতা’’তি.

৬১১. ‘‘অমতং তেসং, ভিক্খৰে, অসচ্ছিকতং যেসং কাযগতাসতি অসচ্ছিকতা. অমতং তেসং, ভিক্খৰে, সচ্ছিকতং যেসং কাযগতাসতি সচ্ছিকতা’’তি. (….) [(এককনিপাতস্স সুত্তসহস্সং সমত্তং.) (সী. স্যা. কং. পী.)]

(ইদমৰোচ ভগৰা. অত্তমনা তে ভিক্খূ ভগৰতো ভাসিতং অভিনন্দুন্তি.) [( ) এত্থন্তরে পাঠো সী. স্যা. কং. পী. পোত্থকেসু নত্থি]

অমতৰগ্গো ৰীসতিমো.