১৬. একধম্মপাল়ি

১. পঠমৰগ্গো

২৯৬. ‘‘একধম্মো, ভিক্খৰে, ভাৰিতো বহুলীকতো একন্তনিব্বিদায ৰিরাগায নিরোধায উপসমায অভিঞ্ঞায সম্বোধায নিব্বানায সংৰত্ততি. কতমো একধম্মো? বুদ্ধানুস্সতি. অযং খো, ভিক্খৰে, একধম্মো ভাৰিতো বহুলীকতো একন্তনিব্বিদায ৰিরাগায নিরোধায উপসমায অভিঞ্ঞায সম্বোধায নিব্বানায সংৰত্ততী’’তি.

২৯৭. ‘‘একধম্মো, ভিক্খৰে, ভাৰিতো বহুলীকতো একন্তনিব্বিদায ৰিরাগায নিরোধায উপসমায অভিঞ্ঞায সম্বোধায নিব্বানায সংৰত্ততি. কতমো একধম্মো? ধম্মানুস্সতি…পে… সঙ্ঘানুস্সতি… সীলানুস্সতি… চাগানুস্সতি… দেৰতানুস্সতি… আনাপানস্সতি… মরণস্সতি… কাযগতাসতি… উপসমানুস্সতি. অযং খো, ভিক্খৰে, একধম্মো ভাৰিতো বহুলীকতো একন্তনিব্বিদায ৰিরাগায নিরোধায উপসমায অভিঞ্ঞায সম্বোধায নিব্বানায সংৰত্ততী’’তি.

ৰগ্গো পঠমো.

২. দুতিযৰগ্গো

২৯৮. ‘‘নাহং, ভিক্খৰে, অঞ্ঞং একধম্মম্পি সমনুপস্সামি যেন অনুপ্পন্না ৰা অকুসলা ধম্মা উপ্পজ্জন্তি উপ্পন্না ৰা অকুসলা ধম্মা ভিয্যোভাৰায ৰেপুল্লায সংৰত্তন্তি যথযিদং, ভিক্খৰে, মিচ্ছাদিট্ঠি. মিচ্ছাদিট্ঠিকস্স, ভিক্খৰে, অনুপ্পন্না চেৰ অকুসলা ধম্মা উপ্পজ্জন্তি উপ্পন্না চ অকুসলা ধম্মা ভিয্যোভাৰায ৰেপুল্লায সংৰত্তন্তী’’তি.

২৯৯. ‘‘নাহং, ভিক্খৰে, অঞ্ঞং একধম্মম্পি সমনুপস্সামি যেন অনুপ্পন্না ৰা কুসলা ধম্মা উপ্পজ্জন্তি উপ্পন্না ৰা কুসলা ধম্মা ভিয্যোভাৰায ৰেপুল্লায সংৰত্তন্তি যথযিদং, ভিক্খৰে, সম্মাদিট্ঠি. সম্মাদিট্ঠিকস্স, ভিক্খৰে, অনুপ্পন্না চেৰ কুসলা ধম্মা উপ্পজ্জন্তি উপ্পন্না চ কুসলা ধম্মা ভিয্যোভাৰায ৰেপুল্লায সংৰত্তন্তী’’তি.

৩০০. ‘‘নাহং, ভিক্খৰে, অঞ্ঞং একধম্মম্পি সমনুপস্সামি যেন অনুপ্পন্না ৰা কুসলা ধম্মা নুপ্পজ্জন্তি উপ্পন্না ৰা কুসলা ধম্মা পরিহাযন্তি যথযিদং, ভিক্খৰে, মিচ্ছাদিট্ঠি. মিচ্ছাদিট্ঠিকস্স, ভিক্খৰে, অনুপ্পন্না চেৰ কুসলা ধম্মা নুপ্পজ্জন্তি উপ্পন্না চ কুসলা ধম্মা পরিহাযন্তী’’তি.

৩০১. ‘‘নাহং, ভিক্খৰে, অঞ্ঞং একধম্মম্পি সমনুপস্সামি যেন অনুপ্পন্না ৰা অকুসলা ধম্মা নুপ্পজ্জন্তি উপ্পন্না ৰা অকুসলা ধম্মা পরিহাযন্তি যথযিদং, ভিক্খৰে, সম্মাদিট্ঠি. সম্মাদিট্ঠিকস্স, ভিক্খৰে, অনুপ্পন্না চেৰ অকুসলা ধম্মা নুপ্পজ্জন্তি উপ্পন্না চ অকুসলা ধম্মা পরিহাযন্তী’’তি.

৩০২. ‘‘নাহং, ভিক্খৰে, অঞ্ঞং একধম্মম্পি সমনুপস্সামি যেন অনুপ্পন্না ৰা মিচ্ছাদিট্ঠি উপ্পজ্জতি উপ্পন্না ৰা মিচ্ছাদিট্ঠি পৰড্ঢতি যথযিদং, ভিক্খৰে, অযোনিসোমনসিকারো. অযোনিসো, ভিক্খৰে, মনসি করোতো অনুপ্পন্না চেৰ মিচ্ছাদিট্ঠি উপ্পজ্জতি উপ্পন্না চ মিচ্ছাদিট্ঠি পৰড্ঢতী’’তি.

৩০৩. ‘‘নাহং, ভিক্খৰে, অঞ্ঞং একধম্মম্পি সমনুপস্সামি যেন অনুপ্পন্না ৰা সম্মাদিট্ঠি উপ্পজ্জতি উপ্পন্না ৰা সম্মাদিট্ঠি পৰড্ঢতি যথযিদং, ভিক্খৰে, যোনিসোমনসিকারো. যোনিসো, ভিক্খৰে, মনসি করোতো অনুপ্পন্না চেৰ সম্মাদিট্ঠি উপ্পজ্জতি উপ্পন্না চ সম্মাদিট্ঠি পৰড্ঢতী’’তি.

৩০৪. ‘‘নাহং, ভিক্খৰে, অঞ্ঞং একধম্মম্পি সমনুপস্সামি যেন [যেনেৰং (সী. স্যা. কং. পী.)] সত্তা কাযস্স ভেদা পরং মরণা অপাযং দুগ্গতিং ৰিনিপাতং নিরযং উপপজ্জন্তি যথযিদং, ভিক্খৰে, মিচ্ছাদিট্ঠি. মিচ্ছাদিট্ঠিযা, ভিক্খৰে, সমন্নাগতা সত্তা কাযস্স ভেদা পরং মরণা অপাযং দুগ্গতিং ৰিনিপাতং নিরযং উপপজ্জন্তী’’তি.

৩০৫. ‘‘নাহং, ভিক্খৰে, অঞ্ঞং একধম্মম্পি সমনুপস্সামি যেন সত্তা কাযস্স ভেদা পরং মরণা সুগতিং সগ্গং লোকং উপপজ্জন্তি যথযিদং, ভিক্খৰে, সম্মাদিট্ঠি. সম্মাদিট্ঠিযা, ভিক্খৰে, সমন্নাগতা সত্তা কাযস্স ভেদা পরং মরণা সুগতিং সগ্গং লোকং উপপজ্জন্তী’’তি.

৩০৬. ‘‘মিচ্ছাদিট্ঠিকস্স, ভিক্খৰে, পুরিসপুগ্গলস্স যঞ্চেৰ কাযকম্মং যথাদিট্ঠি সমত্তং সমাদিন্নং যঞ্চ ৰচীকম্মং…পে… যঞ্চ মনোকম্মং যথাদিট্ঠি সমত্তং সমাদিন্নং যা চ চেতনা যা চ পত্থনা যো চ পণিধি যে চ সঙ্খারা সব্বে তে ধম্মা অনিট্ঠায অকন্তায অমনাপায অহিতায দুক্খায সংৰত্তন্তি. তং কিস্স হেতু? দিট্ঠি হিস্স [দিট্ঠি হি (সী. স্যা. কং. পী.)], ভিক্খৰে, পাপিকা. সেয্যথাপি, ভিক্খৰে, নিম্ববীজং ৰা কোসাতকিবীজং ৰা তিত্তকলাবুবীজং ৰা অল্লায পথৰিযা [পঠৰিযা (সী. স্যা. কং. পী.)] নিক্খিত্তং যঞ্চেৰ পথৰিরসং উপাদিযতি যঞ্চ আপোরসং উপাদিযতি সব্বং তং তিত্তকত্তায কটুকত্তায অসাতত্তায সংৰত্ততি. তং কিস্স হেতু? বীজং হিস্স [ৰীজং (সী. স্যা. কং. পী.)], ভিক্খৰে, পাপকং. এৰমেৰং খো, ভিক্খৰে, মিচ্ছাদিট্ঠিকস্স পুরিসপুগ্গলস্স যঞ্চেৰ কাযকম্মং যথাদিট্ঠি সমত্তং সমাদিন্নং যঞ্চ ৰচীকম্মং…পে… যঞ্চ মনোকম্মং যথাদিট্ঠি সমত্তং সমাদিন্নং যা চ চেতনা যা চ পত্থনা যো চ পণিধি যে চ সঙ্খারা সব্বে তে ধম্মা অনিট্ঠায অকন্তায অমনাপায অহিতায দুক্খায সংৰত্তন্তি. তং কিস্স হেতু? দিট্ঠি হিস্স, ভিক্খৰে, পাপিকা’’তি.

৩০৭. ‘‘সম্মাদিট্ঠিকস্স, ভিক্খৰে, পুরিসপুগ্গলস্স যঞ্চেৰ কাযকম্মং যথাদিট্ঠি সমত্তং সমাদিন্নং যঞ্চ ৰচীকম্মং…পে… যঞ্চ মনোকম্মং যথাদিট্ঠি সমত্তং সমাদিন্নং যা চ চেতনা যা চ পত্থনা যো চ পণিধি যে চ সঙ্খারা সব্বে তে ধম্মা ইট্ঠায কন্তায মনাপায হিতায সুখায সংৰত্তন্তি. তং কিস্স হেতু? দিট্ঠি হিস্স, ভিক্খৰে, ভদ্দিকা. সেয্যথাপি, ভিক্খৰে, উচ্ছুবীজং ৰা সালিবীজং ৰা মুদ্দিকাবীজং ৰা অল্লায পথৰিযা নিক্খিত্তং যঞ্চেৰ পথৰিরসং উপাদিযতি যঞ্চ আপোরসং উপাদিযতি সব্বং তং মধুরত্তায সাতত্তায অসেচনকত্তায সংৰত্ততি. তং কিস্স হেতু? বীজং হিস্স, ভিক্খৰে, ভদ্দকং. এৰমেৰং খো, ভিক্খৰে, সম্মাদিট্ঠিকস্স পুরিসপুগ্গলস্স যঞ্চেৰ কাযকম্মং যথাদিট্ঠি সমত্তং সমাদিন্নং যঞ্চ ৰচীকম্মং…পে… যঞ্চ মনোকম্মং যথাদিট্ঠি সমত্তং সমাদিন্নং যা চ চেতনা যা চ পত্থনা যো চ পণিধি যে চ সঙ্খারা সব্বে তে ধম্মা ইট্ঠায কন্তায মনাপায হিতায সুখায সংৰত্তন্তি. তং কিস্স হেতু? দিট্ঠি হিস্স, ভিক্খৰে, ভদ্দিকা’’তি.

ৰগ্গো দুতিযো.

৩. ততিযৰগ্গো

৩০৮. ‘‘একপুগ্গলো, ভিক্খৰে, লোকে উপ্পজ্জমানো উপ্পজ্জতি বহুজনঅহিতায বহুজনঅসুখায, বহুনো জনস্স অনত্থায অহিতায দুক্খায দেৰমনুস্সানং. কতমো একপুগ্গলো? মিচ্ছাদিট্ঠিকো হোতি ৰিপরীতদস্সনো. সো বহুজনং সদ্ধম্মা ৰুট্ঠাপেত্ৰা অসদ্ধম্মে পতিট্ঠাপেতি. অযং খো, ভিক্খৰে, একপুগ্গলো লোকে উপ্পজ্জমানো উপ্পজ্জতি বহুজনঅহিতায বহুজনঅসুখায, বহুনো জনস্স অনত্থায অহিতায দুক্খায দেৰমনুস্সান’’ন্তি.

৩০৯. ‘‘একপুগ্গলো, ভিক্খৰে, লোকে উপ্পজ্জমানো উপ্পজ্জতি বহুজনহিতায বহুজনসুখায, বহুনো জনস্স অত্থায হিতায সুখায দেৰমনুস্সানং. কতমো একপুগ্গলো? সম্মাদিট্ঠিকো হোতি অৰিপরীতদস্সনো. সো বহুজনং অসদ্ধম্মা ৰুট্ঠাপেত্ৰা সদ্ধম্মে পতিট্ঠাপেতি. অযং খো, ভিক্খৰে, একপুগ্গলো লোকে উপপজ্জমানো উপ্পজ্জতি বহুজনহিতায বহুজনসুখায, বহুনো জনস্স অত্থায হিতায সুখায দেৰমনুস্সান’’ন্তি.

৩১০. ‘‘নাহং, ভিক্খৰে, অঞ্ঞং একধম্মম্পি সমনুপস্সামি যং এৰং মহাসাৰজ্জং যথযিদং, ভিক্খৰে, মিচ্ছাদিট্ঠি. মিচ্ছাদিট্ঠিপরমানি, ভিক্খৰে, মহাসাৰজ্জানী’’তি [ৰজ্জানীতি (সী. স্যা. কং.)].

৩১১. ‘‘নাহং, ভিক্খৰে, অঞ্ঞং একপুগ্গলম্পি সমনুপস্সামি যো এৰং বহুজনঅহিতায পটিপন্নো বহুজনঅসুখায, বহুনো জনস্স অনত্থায অহিতায দুক্খায দেৰমনুস্সানং যথযিদং, ভিক্খৰে, মক্খলি মোঘপুরিসো. সেয্যথাপি, ভিক্খৰে, নদীমুখে খিপ্পং [খিপং (সী. স্যা. কং. পী.)] উড্ডেয্য [ওড্ডেয্য (সী.), উজ্ঝেয্য (ক.)] বহূনং মচ্ছানং অহিতায দুক্খায অনযায ব্যসনায; এৰমেৰং খো, ভিক্খৰে, মক্খলি মোঘপুরিসো মনুস্সখিপ্পং মঞ্ঞে লোকে উপ্পন্নো বহূনং সত্তানং অহিতায দুক্খায অনযায ব্যসনাযা’’তি.

৩১২. ‘‘দুরক্খাতে, ভিক্খৰে, ধম্মৰিনযে যো চ সমাদপেতি [সমাদাপেতি (?)] যঞ্চ সমাদপেতি যো চ সমাদপিতো তথত্তায পটিপজ্জতি সব্বে তে বহুং অপুঞ্ঞং পসৰন্তি. তং কিস্স হেতু? দুরক্খাতত্তা, ভিক্খৰে, ধম্মস্সা’’তি.

৩১৩. ‘‘স্ৰাক্খাতে, ভিক্খৰে, ধম্মৰিনযে যো চ সমাদপেতি যঞ্চ সমাদপেতি যো চ সমাদপিতো তথত্তায পটিপজ্জতি সব্বে তে বহুং পুঞ্ঞং পসৰন্তি. তং কিস্স হেতু? স্ৰাক্খাতত্তা, ভিক্খৰে, ধম্মস্সা’’তি.

৩১৪. ‘‘দুরক্খাতে, ভিক্খৰে, ধম্মৰিনযে দাযকেন মত্তা জানিতব্বা, নো পটিগ্গাহকেন. তং কিস্স হেতু? দুরক্খাতত্তা, ভিক্খৰে, ধম্মস্সা’’তি.

৩১৫. ‘‘স্ৰাক্খাতে, ভিক্খৰে, ধম্মৰিনযে পটিগ্গাহকেন মত্তা জানিতব্বা, নো দাযকেন. তং কিস্স হেতু? স্ৰাক্খাতত্তা, ভিক্খৰে, ধম্মস্সা’’তি.

৩১৬. ‘‘দুরক্খাতে, ভিক্খৰে, ধম্মৰিনযে যো আরদ্ধৰীরিযো সো দুক্খং ৰিহরতি. তং কিস্স হেতু? দুরক্খাতত্তা, ভিক্খৰে, ধম্মস্সা’’তি.

৩১৭. ‘‘স্ৰাক্খাতে, ভিক্খৰে, ধম্মৰিনযে যো কুসীতো সো দুক্খং ৰিহরতি. তং কিস্স হেতু? স্ৰাক্খাতত্তা, ভিক্খৰে, ধম্মস্সা’’তি.

৩১৮. ‘‘দুরক্খাতে, ভিক্খৰে, ধম্মৰিনযে যো কুসীতো সো সুখং ৰিহরতি. তং কিস্স হেতু? দুরক্খাতত্তা, ভিক্খৰে, ধম্মস্সা’’তি.

৩১৯. ‘‘স্ৰাক্খাতে, ভিক্খৰে, ধম্মৰিনযে যো আরদ্ধৰীরিযো সো সুখং ৰিহরতি. তং কিস্স হেতু? স্ৰাক্খাতত্তা, ভিক্খৰে, ধম্মস্সা’’তি.

৩২০. ‘‘সেয্যথাপি, ভিক্খৰে, অপ্পমত্তকোপি গূথো দুগ্গন্ধো হোতি; এৰমেৰং খো অহং, ভিক্খৰে, অপ্পমত্তকম্পি ভৰং ন ৰণ্ণেমি, অন্তমসো অচ্ছরাসঙ্ঘাতমত্তম্পি’’.

৩২১. ‘‘সেয্যথাপি, ভিক্খৰে, অপ্পমত্তকম্পি মুত্তং দুগ্গন্ধং হোতি… অপ্পমত্তকোপি খেল়ো দুগ্গন্ধো হোতি… অপ্পমত্তকোপি পুব্বো দুগ্গন্ধো হোতি… অপ্পমত্তকম্পি লোহিতং দুগ্গন্ধং হোতি; এৰমেৰং খো অহং, ভিক্খৰে, অপ্পমত্তকম্পি ভৰং ন ৰণ্ণেমি, অন্তমসো অচ্ছরাসঙ্ঘাতমত্তম্পি’’.

ৰগ্গো ততিযো.

৪. চতুত্থৰগ্গো

৩২২. ‘‘সেয্যথাপি, ভিক্খৰে, অপ্পমত্তকং ইমস্মিং জম্বুদীপে আরামরামণেয্যকং ৰনরামণেয্যকং ভূমিরামণেয্যকং পোক্খরণিরামণেয্যকং; অথ খো এতদেৰ বহুতরং যদিদং উক্কূলৰিকূলং নদীৰিদুগ্গং খাণুকণ্টকট্ঠানং [খাণুকণ্ডকধানং (সী. পী.)] পব্বতৰিসমং; এৰমেৰং খো, ভিক্খৰে, অপ্পকা তে সত্তা যে থলজা, অথ খো এতেৰ সত্তা বহুতরা যে ওদকা’’.

৩২৩. … এৰমেৰং খো, ভিক্খৰে, অপ্পকা তে সত্তা যে মনুস্সেসু পচ্চাজাযন্তি; অথ খো এতেৰ সত্তা বহুতরা যে অঞ্ঞত্র মনুস্সেহি পচ্চাজাযন্তি.

… এৰমেৰং খো, ভিক্খৰে, অপ্পকা তে সত্তা যে মজ্ঝিমেসু জনপদেসু পচ্চাজাযন্তি; অথ খো এতেৰ সত্তা বহুতরা যে পচ্চন্তিমেসু জনপদেসু পচ্চাজাযন্তি অৰিঞ্ঞাতারেসু মিলক্খেসু [মিলক্খূসু (ক.)].

৩২৪. … এৰমেৰং খো, ভিক্খৰে, অপ্পকা তে সত্তা যে পঞ্ঞৰন্তো অজল়া অনেল়মূগা পটিবলা সুভাসিতদুব্ভাসিতস্স অত্থমঞ্ঞাতুং; অথ খো এতেৰ সত্তা বহুতরা যে দুপ্পঞ্ঞা জল়া এল়মূগা ন পটিবলা সুভাসিতদুব্ভাসিতস্স অত্থমঞ্ঞাতুং.

৩২৫. … এৰমেৰং খো, ভিক্খৰে, অপ্পকা তে সত্তা যে অরিযেন পঞ্ঞাচক্খুনা সমন্নাগতা; অথ খো এতেৰ সত্তা বহুতরা যে অৰিজ্জাগতা সম্মূল়্হা.

৩২৬. … এৰমেৰং খো, ভিক্খৰে, অপ্পকা তে সত্তা যে লভন্তি তথাগতং দস্সনায; অথ খো এতেৰ সত্তা বহুতরা যে ন লভন্তি তথাগতং দস্সনায.

৩২৭. … এৰমেৰং খো, ভিক্খৰে, অপ্পকা তে সত্তা যে লভন্তি তথাগতপ্পৰেদিতং ধম্মৰিনযং সৰনায; অথ খো এতেৰ সত্তা বহুতরা যে ন লভন্তি তথাগতপ্পৰেদিতং ধম্মৰিনযং সৰনায.

৩২৮. … এৰমেৰং খো, ভিক্খৰে, অপ্পকা তে সত্তা যে সুত্ৰা ধম্মং ধারেন্তি; অথ খো এতেৰ সত্তা বহুতরা যে সুত্ৰা ধম্মং ন ধারেন্তি.

৩২৯. … এৰমেৰং খো, ভিক্খৰে, অপ্পকা তে সত্তা যে ধাতানং [ধতানং (সী. স্যা. কং. পী.)] ধম্মানং অত্থং উপপরিক্খন্তি; অথ খো এতেৰ সত্তা বহুতরা যে ধাতানং ধম্মানং অত্থং ন উপপরিক্খন্তি.

৩৩০. … এৰমেৰং খো, ভিক্খৰে, অপ্পকা তে সত্তা যে অত্থমঞ্ঞায ধম্মমঞ্ঞায ধম্মানুধম্মং পটিপজ্জন্তি; অথ খো এতেৰ সত্তা বহুতরা যে অত্থমঞ্ঞায ধম্মমঞ্ঞায ধম্মানুধম্মং ন পটিপজ্জন্তি.

৩৩১. … এৰমেৰং খো, ভিক্খৰে, অপ্পকা তে সত্তা যে সংৰেজনিযেসু ঠানেসু সংৰিজ্জন্তি; অথ খো এতেৰ সত্তা বহুতরা যে সংৰেজনিযেসু ঠানেসু ন সংৰিজ্জন্তি.

৩৩২. … এৰমেৰং খো, ভিক্খৰে, অপ্পকা তে সত্তা যে সংৰিগ্গা যোনিসো পদহন্তি; অথ খো এতেৰ সত্তা বহুতরা যে সংৰিগ্গা যোনিসো ন পদহন্তি.

৩৩৩. … এৰমেৰং খো, ভিক্খৰে, অপ্পকা তে সত্তা যে ৰৰস্সগ্গারম্মণং করিত্ৰা লভন্তি সমাধিং [চিত্তস্স সমাধিং (সী.)] লভন্তি চিত্তস্সেকগ্গতং [চিত্তস্সেকগ্গং (সী.)]; অথ খো এতেৰ সত্তা বহুতরা যে ৰৰস্সগ্গারম্মণং করিত্ৰা ন লভন্তি সমাধিং ন লভন্তি চিত্তস্সেকগ্গতং.

৩৩৪. … এৰমেৰং খো, ভিক্খৰে, অপ্পকা তে সত্তা যে অন্নগ্গরসগ্গানং লাভিনো; অথ খো এতেৰ সত্তা বহুতরা যে অন্নগ্গরসগ্গানং ন লাভিনো, উঞ্ছেন কপালাভতেন যাপেন্তি.

৩৩৫. … এৰমেৰং খো, ভিক্খৰে, অপ্পকা তে সত্তা যে অত্থরসস্স ধম্মরসস্স ৰিমুত্তিরসস্স লাভিনো; অথ খো এতেৰ সত্তা বহুতরা যে অত্থরসস্স ধম্মরসস্স ৰিমুত্তিরসস্স ন লাভিনো. তস্মাতিহ, ভিক্খৰে, এৰং সিক্খিতব্বং – অত্থরসস্স ধম্মরসস্স ৰিমুত্তিরসস্স লাভিনো ভৰিস্সামাতি. এৰঞ্হি ৰো, ভিক্খৰে, সিক্খিতব্বন্তি.

৩৩৬-৩৩৮. ‘‘সেয্যথাপি, ভিক্খৰে, অপ্পমত্তকং ইমস্মিং জম্বুদীপে আরামরামণেয্যকং ৰনরামণেয্যকং ভূমিরামণেয্যকং পোক্খরণিরামণেয্যকং; অথ খো এতদেৰ বহুতরং যদিদং উক্কূলৰিকূলং নদীৰিদুগ্গং খাণুকণ্টকট্ঠানং পব্বতৰিসমং. এৰমেৰং খো, ভিক্খৰে, অপ্পকা তে সত্তা যে মনুস্সা চুতা মনুস্সেসু পচ্চাজাযন্তি, অথ খো এতেৰ সত্তা বহুতরা যে মনুস্সা চুতা নিরযে পচ্চাজাযন্তি…পে… তিরচ্ছানযোনিযা পচ্চাজাযন্তি…পে… পেত্তিৰিসযে পচ্চাজাযন্তি’’.

৩৩৯-৩৪১. … এৰমেৰং খো, ভিক্খৰে, অপ্পকা তে সত্তা যে মনুস্সা চুতা দেৰেসু পচ্চাজাযন্তি; অথ খো এতেৰ সত্তা বহুতরা যে মনুস্সা চুতা নিরযে পচ্চাজাযন্তি… তিরচ্ছানযোনিযা পচ্চাজাযন্তি… পেত্তিৰিসযে পচ্চাজাযন্তি.

৩৪২-৩৪৪. … এৰমেৰং খো, ভিক্খৰে, অপ্পকা তে সত্তা যে দেৰা চুতা দেৰেসু পচ্চাজাযন্তি; অথ খো এতেৰ সত্তা বহুতরা যে দেৰা চুতা নিরযে পচ্চাজাযন্তি… তিরচ্ছানযোনিযা পচ্চাজাযন্তি… পেত্তিৰিসযে পচ্চাজাযন্তি.

৩৪৫-৩৪৭. … এৰমেৰং খো, ভিক্খৰে, অপ্পকা তে সত্তা যে দেৰা চুতা মনুস্সেসু পচ্চাজাযন্তি; অথ খো এতেৰ সত্তা বহুতরা যে দেৰা চুতা নিরযে পচ্চাজাযন্তি… তিরচ্ছানযোনিযা পচ্চাজাযন্তি… পেত্তিৰিসযে পচ্চাজাযন্তি.

৩৪৮-৩৫০. … এৰমেৰং খো, ভিক্খৰে, অপ্পকা তে সত্তা যে নিরযা চুতা মনুস্সেসু পচ্চাজাযন্তি; অথ খো এতেৰ সত্তা বহুতরা যে নিরযা চুতা নিরযে পচ্চাজাযন্তি… তিরচ্ছানযোনিযা পচ্চাজাযন্তি… পেত্তিৰিসযে পচ্চাজাযন্তি.

৩৫১-৩৫৩. … এৰমেৰং খো, ভিক্খৰে, অপ্পকা তে সত্তা যে নিরযা চুতা দেৰেসু পচ্চাজাযন্তি; অথ খো এতেৰ সত্তা বহুতরা যে নিরযা চুতা নিরযে পচ্চাজাযন্তি… তিরচ্ছানযোনিযা পচ্চাজাযন্তি… পেত্তিৰিসযে পচ্চাজাযন্তি.

৩৫৪-৩৫৬. … এৰমেৰং খো, ভিক্খৰে, অপ্পকা তে সত্তা যে তিরচ্ছানযোনিযা চুতা মনুস্সেসু পচ্চাজাযন্তি; অথ খো এতেৰ সত্তা বহুতরা যে তিরচ্ছানযোনিযা চুতা নিরযে পচ্চাজাযন্তি… তিরচ্ছানযোনিযা পচ্চাজাযন্তি… পেত্তিৰিসযে পচ্চাজাযন্তি.

৩৫৭-৩৫৯. … এৰমেৰং খো, ভিক্খৰে, অপ্পকা তে সত্তা যে তিরচ্ছানযোনিযা চুতা দেৰেসু পচ্চাজাযন্তি; অথ খো এতেৰ সত্তা বহুতরা যে তিরচ্ছানযোনিযা চুতা নিরযে পচ্চাজাযন্তি… তিরচ্ছানযোনিযা পচ্চাজাযন্তি… পেত্তিৰিসযে পচ্চাজাযন্তি.

৩৬০-৩৬২. … এৰমেৰং খো, ভিক্খৰে, অপ্পকা তে সত্তা যে পেত্তিৰিসযা চুতা মনুস্সেসু পচ্চাজাযন্তি; অথ খো এতেৰ সত্তা বহুতরা যে পেত্তিৰিসযা চুতা নিরযে পচ্চাজাযন্তি… তিরচ্ছানযোনিযা পচ্চাজাযন্তি… পেত্তিৰিসযে পচ্চাজাযন্তি.

৩৬৩-৩৬৫. … এৰমেৰং খো, ভিক্খৰে, অপ্পকা তে সত্তা যে পেত্তিৰিসযা চুতা দেৰেসু পচ্চাজাযন্তি; অথ খো এতেৰ সত্তা বহুতরা যে পেত্তিৰিসযা চুতা নিরযে পচ্চাজাযন্তি… তিরচ্ছানযোনিযা পচ্চাজাযন্তি… পেত্তিৰিসযে পচ্চাজাযন্তি.

ৰগ্গো চতুত্থো.

জম্বুদীপপেয্যালো নিট্ঠিতো.

একধম্মপাল়ি সোল়সমো.