২. দুতিযৰগ্গো

২৭৮. ‘‘অট্ঠানমেতং, ভিক্খৰে, অনৰকাসো যং একিস্সা লোকধাতুযা দ্ৰে রাজানো চক্কৰত্তী অপুব্বং অচরিমং উপ্পজ্জেয্যুং. নেতং ঠানং ৰিজ্জতি. ঠানঞ্চ খো এতং, ভিক্খৰে, ৰিজ্জতি যং একিস্সা লোকধাতুযা একো রাজা চক্কৰত্তী উপ্পজ্জেয্য. ঠানমেতং ৰিজ্জতী’’তি.

২৭৯. ‘‘অট্ঠানমেতং, ভিক্খৰে, অনৰকাসো যং ইত্থী অরহং অস্স সম্মাসম্বুদ্ধো. নেতং ঠানং ৰিজ্জতি. ঠানঞ্চ খো, এতং, ভিক্খৰে, ৰিজ্জতি যং পুরিসো অরহং অস্স সম্মাসম্বুদ্ধো. ঠানমেতং ৰিজ্জতী’’তি.

২৮০. ‘‘অট্ঠানমেতং, ভিক্খৰে, অনৰকাসো যং ইত্থী রাজা অস্স চক্কৰত্তী. নেতং ঠানং ৰিজ্জতি. ঠানঞ্চ খো এতং, ভিক্খৰে, ৰিজ্জতি যং পুরিসো রাজা অস্স চক্কৰত্তী. ঠানমেতং ৰিজ্জতী’’তি.

২৮১-২৮৩. ‘‘অট্ঠানমেতং, ভিক্খৰে, অনৰকাসো যং ইত্থী সক্কত্তং কারেয্য…পে… মারত্তং কারেয্য…পে… ব্রহ্মত্তং কারেয্য. নেতং ঠানং ৰিজ্জতি. ঠানঞ্চ খো এতং, ভিক্খৰে, ৰিজ্জতি যং পুরিসো সক্কত্তং কারেয্য…পে… মারত্তং কারেয্য…পে… ব্রহ্মত্তং কারেয্য. ঠানমেতং ৰিজ্জতী’’তি.

২৮৪. ‘‘অট্ঠানমেতং, ভিক্খৰে, অনৰকাসো যং কাযদুচ্চরিতস্স ইট্ঠো কন্তো মনাপো ৰিপাকো নিব্বত্তেয্য. নেতং ঠানং ৰিজ্জতি. ঠানঞ্চ খো এতং, ভিক্খৰে, ৰিজ্জতি যং কাযদুচ্চরিতস্স অনিট্ঠো অকন্তো অমনাপো ৰিপাকো নিব্বত্তেয্য. ঠানমেতং ৰিজ্জতী’’তি.

২৮৫-২৮৬. ‘‘অট্ঠানমেতং, ভিক্খৰে, অনৰকাসো যং ৰচীদুচ্চরিতস্স…পে… যং মনোদুচ্চরিতস্স ইট্ঠো কন্তো মনাপো ৰিপাকো নিব্বত্তেয্য. নেতং ঠানং ৰিজ্জতি. ঠানঞ্চ খো এতং, ভিক্খৰে, ৰিজ্জতি যং মনোদুচ্চরিতস্স অনিট্ঠো অকন্তো অমনাপো ৰিপাকো নিব্বত্তেয্য. ঠানমেতং ৰিজ্জতী’’তি.

ৰগ্গো দুতিযো.