১২. অনাপত্তিৰগ্গো

১৫০. ‘‘যে তে, ভিক্খৰে, ভিক্খূ অনাপত্তিং আপত্তীতি দীপেন্তি তে, ভিক্খৰে, ভিক্খূ বহুজনঅহিতায পটিপন্না বহুজনঅসুখায, বহুনো জনস্স অনত্থায অহিতায দুক্খায দেৰমনুস্সানং. বহুঞ্চ তে, ভিক্খৰে, ভিক্খূ অপুঞ্ঞং পসৰন্তি, তে চিমং সদ্ধম্মং অন্তরধাপেন্তী’’তি. পঠমং.

১৫১. ‘‘যে তে, ভিক্খৰে, ভিক্খূ আপত্তিং অনাপত্তীতি দীপেন্তি তে, ভিক্খৰে, ভিক্খূ বহুজনঅহিতায পটিপন্না বহুজনঅসুখায, বহুনো জনস্স অনত্থায অহিতায দুক্খায দেৰমনুস্সানং. বহুঞ্চ তে, ভিক্খৰে, ভিক্খূ অপুঞ্ঞং পসৰন্তি, তে চিমং সদ্ধম্মং অন্তরধাপেন্তী’’তি. দুতিযং.

১৫২-১৫৯. ‘‘যে তে, ভিক্খৰে, ভিক্খূ লহুকং আপত্তিং গরুকা আপত্তীতি দীপেন্তি…পে… গরুকং আপত্তিং লহুকা আপত্তীতি দীপেন্তি…পে… দুট্ঠুল্লং আপত্তিং অদুট্ঠুল্লা আপত্তীতি দীপেন্তি…পে… অদুট্ঠুল্লং আপত্তিং দুট্ঠুল্লা আপত্তীতি দীপেন্তি…পে… সাৰসেসং আপত্তিং অনৰসেসা আপত্তীতি দীপেন্তি…পে… অনৰসেসং আপত্তিং সাৰসেসা আপত্তীতি দীপেন্তি…পে… সপ্পটিকম্মং আপত্তিং অপ্পটিকম্মা আপত্তীতি দীপেন্তি…পে… অপ্পটিকম্মং আপত্তিং সপ্পটিকম্মা আপত্তীতি দীপেন্তি তে, ভিক্খৰে, ভিক্খূ বহুজনঅহিতায পটিপন্না বহুজনঅসুখায, বহুনো জনস্স অনত্থায অহিতায দুক্খায দেৰমনুস্সানং. বহুঞ্চ তে, ভিক্খৰে, ভিক্খূ অপুঞ্ঞং পসৰন্তি, তে চিমং সদ্ধম্মং অন্তরধাপেন্তী’’তি. দসমং.

১৬০. ‘‘যে তে, ভিক্খৰে, ভিক্খূ অনাপত্তিং অনাপত্তীতি দীপেন্তি তে, ভিক্খৰে, ভিক্খূ বহুজনহিতায পটিপন্না বহুজনসুখায, বহুনো জনস্স অত্থায হিতায সুখায দেৰমনুস্সানং. বহুঞ্চ তে, ভিক্খৰে, ভিক্খূ পুঞ্ঞং পসৰন্তি, তে চিমং সদ্ধম্মং ঠপেন্তী’’তি. একাদসমং.

১৬১. ‘‘যে তে, ভিক্খৰে, ভিক্খূ আপত্তিং আপত্তীতি দীপেন্তি তে, ভিক্খৰে, ভিক্খূ বহুজনহিতায পটিপন্না বহুজনসুখায, বহুনো জনস্স অত্থায হিতায সুখায দেৰমনুস্সানং. বহুঞ্চ তে, ভিক্খৰে, ভিক্খূ পুঞ্ঞং পসৰন্তি, তে চিমং সদ্ধম্মং ঠপেন্তী’’তি. দ্ৰাদসমং.

১৬২-১৬৯. ‘‘যে তে, ভিক্খৰে, ভিক্খূ লহুকং আপত্তিং লহুকা আপত্তীতি দীপেন্তি… গরুকং আপত্তিং গরুকা আপত্তীতি দীপেন্তি… দুট্ঠুল্লং আপত্তিং দুট্ঠুল্লা আপত্তীতি দীপেন্তি… অদুট্ঠুল্লং আপত্তিং অদুট্ঠুল্লা আপত্তীতি দীপেন্তি… সাৰসেসং আপত্তিং সাৰসেসা আপত্তীতি দীপেন্তি… অনৰসেসং আপত্তিং অনৰসেসা আপত্তীতি দীপেন্তি… সপ্পটিকম্মং আপত্তিং সপ্পটিকম্মা আপত্তীতি দীপেন্তি… অপ্পটিকম্মং আপত্তিং অপ্পটিকম্মা আপত্তীতি দীপেন্তি তে, ভিক্খৰে, ভিক্খূ বহুজনহিতায পটিপন্না বহুজনসুখায, বহুনো জনস্স অত্থায হিতায সুখায দেৰমনুস্সানং. বহুঞ্চ তে, ভিক্খৰে, ভিক্খূ পুঞ্ঞং পসৰন্তি, তে চিমং সদ্ধম্মং ঠপেন্তী’’তি. ৰীসতিমং.

অনাপত্তিৰগ্গো দ্ৰাদসমো.