᭓. ᬯᬶᬧᬵᬓᬢ᭄ᬢᬶᬓᬂ

᭑᭐᭔᭐. ᬧᬜ᭄ᬘᬦ᭄ᬦᬂ ᬔᬦ᭄ᬥᬵᬦᬂ ᬓᬢᬶ ᬯᬶᬧᬵᬓᬵ, ᬓᬢᬶ ᬯᬶᬧᬵᬓᬥᬫ᭄ᬫᬥᬫ᭄ᬫᬵ, ᬓᬢᬶ ᬦᬾᬯᬯᬶᬧᬵᬓᬦᬯᬶᬧᬵᬓᬥᬫ᭄ᬫᬥᬫ᭄ᬫᬵ…ᬧᬾ… ᬲᬢ᭄ᬢᬦ᭄ᬦᬂ ᬘᬶᬢ᭄ᬢᬵᬦᬂ ᬓᬢᬶ ᬯᬶᬧᬵᬓᬵ, ᬓᬢᬶ ᬯᬶᬧᬵᬓᬥᬫ᭄ᬫᬥᬫ᭄ᬫᬵ, ᬓᬢᬶ ᬦᬾᬯᬯᬶᬧᬵᬓᬦᬯᬶᬧᬵᬓᬥᬫ᭄ᬫᬥᬫ᭄ᬫᬵ?

ᬭᬹᬧᬓ᭄ᬔᬦ᭄ᬥᭀ ᬦᬾᬯᬯᬶᬧᬵᬓᬦᬯᬶᬧᬵᬓᬥᬫ᭄ᬫᬥᬫ᭄ᬫᭀ. ᬘᬢ᭄ᬢᬵᬭᭀ ᬔᬦ᭄ᬥᬵ ᬲᬶᬬᬵ ᬯᬶᬧᬵᬓᬵ, ᬲᬶᬬᬵ ᬯᬶᬧᬵᬓᬥᬫ᭄ᬫᬥᬫ᭄ᬫᬵ, ᬲᬶᬬᬵ ᬦᬾᬯᬯᬶᬧᬵᬓᬦᬯᬶᬧᬵᬓᬥᬫ᭄ᬫᬥᬫ᭄ᬫᬵ.

ᬤᬲᬵᬬᬢᬦᬵ ᬦᬾᬯᬯᬶᬧᬵᬓᬦᬯᬶᬧᬵᬓᬥᬫ᭄ᬫᬥᬫ᭄ᬫᬵ. ᬤ᭄ᬯᬵᬬᬢᬦᬵ ᬲᬶᬬᬵ ᬯᬶᬧᬵᬓᬵ, ᬲᬶᬬᬵ ᬯᬶᬧᬵᬓᬥᬫ᭄ᬫᬥᬫ᭄ᬫᬵ, ᬲᬶᬬᬵ ᬦᬾᬯᬯᬶᬧᬵᬓᬦᬯᬶᬧᬵᬓᬥᬫ᭄ᬫᬥᬫ᭄ᬫᬵ.

ᬤᬲ ᬥᬵᬢᬸᬬᭀ ᬦᬾᬯᬯᬶᬧᬵᬓᬦᬯᬶᬧᬵᬓᬥᬫ᭄ᬫᬥᬫ᭄ᬫᬵ. ᬧᬜ᭄ᬘ ᬥᬵᬢᬸᬬᭀ ᬯᬶᬧᬵᬓᬵ. ᬫᬦᭀᬥᬵᬢᬸ ᬲᬶᬬᬵ ᬯᬶᬧᬵᬓᬵ, ᬲᬶᬬᬵ ᬦᬾᬯᬯᬶᬧᬵᬓᬦᬯᬶᬧᬵᬓᬥᬫ᭄ᬫᬥᬫ᭄ᬫᬵ. ᬤ᭄ᬯᬾ ᬥᬵᬢᬸᬬᭀ ᬲᬶᬬᬵ ᬯᬶᬧᬵᬓᬵ ᬲᬶᬬᬵ ᬯᬶᬧᬵᬓᬥᬫ᭄ᬫᬥᬫ᭄ᬫᬵ, ᬲᬶᬬᬵ ᬦᬾᬯᬯᬶᬧᬵᬓᬦᬯᬶᬧᬵᬓᬥᬫ᭄ᬫᬥᬫ᭄ᬫᬵ.

ᬤ᭄ᬯᬾ ᬲᬘ᭄ᬘᬵ ᬯᬶᬧᬵᬓᬥᬫ᭄ᬫᬥᬫ᭄ᬫᬵ. ᬦᬶᬭᭀᬥᬲᬘ᭄ᬘᬂ ᬦᬾᬯᬯᬶᬧᬵᬓᬦᬯᬶᬧᬵᬓᬥᬫ᭄ᬫᬥᬫ᭄ᬫᬂ. ᬤᬸᬓ᭄ᬔᬲᬘ᭄ᬘᬂ ᬲᬶᬬᬵ ᬯᬶᬧᬵᬓᬂ, ᬲᬶᬬᬵ ᬯᬶᬧᬵᬓᬥᬫ᭄ᬫᬥᬫ᭄ᬫᬂ, ᬲᬶᬬᬵ ᬦᬾᬯᬯᬶᬧᬵᬓᬦᬯᬶᬧᬵᬓᬥᬫ᭄ᬫᬥᬫ᭄ᬫᬂ.

ᬲᬢ᭄ᬢᬶᬦ᭄ᬤ᭄ᬭᬶᬬᬵ ᬦᬾᬯᬯᬶᬧᬵᬓᬦᬯᬶᬧᬵᬓᬥᬫ᭄ᬫᬥᬫ᭄ᬫᬵ. ᬢᬷᬡᬶᬦ᭄ᬤ᭄ᬭᬶᬬᬵ ᬯᬶᬧᬵᬓᬵ. ᬤ᭄ᬯᬶᬦ᭄ᬤ᭄ᬭᬶᬬᬵ ᬯᬶᬧᬵᬓᬥᬫ᭄ᬫᬥᬫ᭄ᬫᬵ. ᬅᬜ᭄ᬜᬶᬦ᭄ᬤ᭄ᬭᬶᬬᬂ ᬲᬶᬬᬵ ᬯᬶᬧᬵᬓᬂ, ᬲᬶᬬᬵ ᬯᬶᬧᬵᬓᬥᬫ᭄ᬫᬥᬫ᭄ᬫᬂ. ᬦᬯᬶᬦ᭄ᬤ᭄ᬭᬶᬬᬵ ᬲᬶᬬᬵ ᬯᬶᬧᬵᬓᬵ, ᬲᬶᬬᬵ ᬯᬶᬧᬵᬓᬥᬫ᭄ᬫᬥᬫ᭄ᬫᬵ, ᬲᬶᬬᬵ ᬦᬾᬯᬯᬶᬧᬵᬓᬦᬯᬶᬧᬵᬓᬥᬫ᭄ᬫᬥᬫ᭄ᬫᬵ.

ᬙ ᬳᬾᬢᬹ ᬯᬶᬧᬵᬓᬥᬫ᭄ᬫᬥᬫ᭄ᬫᬵ. ᬢᬬᭀ ᬅᬩ᭄ᬬᬵᬓᬢᬳᬾᬢᬹ ᬲᬶᬬᬵ ᬯᬶᬧᬵᬓᬵ, ᬲᬶᬬᬵ ᬦᬾᬯᬯᬶᬧᬵᬓᬦᬯᬶᬧᬵᬓᬥᬫ᭄ᬫᬥᬫ᭄ᬫᬵ.

ᬓᬩᬮ᬴ᬷᬓᬵᬭᭀ ᬆᬳᬵᬭᭀ ᬦᬾᬯᬯᬶᬧᬵᬓᬦᬯᬶᬧᬵᬓᬥᬫ᭄ᬫᬥᬫ᭄ᬫᭀ. ᬢᬬᭀ ᬆᬳᬵᬭᬵ ᬲᬶᬬᬵ ᬯᬶᬧᬵᬓᬵ, ᬲᬶᬬᬵ ᬯᬶᬧᬵᬓᬥᬫ᭄ᬫᬥᬫ᭄ᬫᬵ, ᬲᬶᬬᬵ ᬦᬾᬯᬯᬶᬧᬵᬓᬦᬯᬶᬧᬵᬓᬥᬫ᭄ᬫᬥᬫ᭄ᬫᬵ. ᬧᬜ᭄ᬘ ᬨᬲ᭄ᬲᬵ ᬯᬶᬧᬵᬓᬵ. ᬫᬦᭀᬥᬵᬢᬸᬲᬫ᭄ᬨᬲ᭄ᬲᭀ ᬲᬶᬬᬵ ᬯᬶᬧᬵᬓᭀ, ᬲᬶᬬᬵ ᬦᬾᬯᬯᬶᬧᬵᬓᬦᬯᬶᬧᬵᬓᬥᬫ᭄ᬫᬥᬫ᭄ᬫᭀ. ᬫᬦᭀᬯᬶᬜ᭄ᬜᬵᬡᬥᬵᬢᬸᬲᬫ᭄ᬨᬲ᭄ᬲᭀ ᬲᬶᬬᬵ ᬯᬶᬧᬵᬓᭀ, ᬲᬶᬬᬵ ᬯᬶᬧᬵᬓᬥᬫ᭄ᬫᬥᬫ᭄ᬫᭀ, ᬲᬶᬬᬵ ᬦᬾᬯᬯᬶᬧᬵᬓᬦᬯᬶᬧᬵᬓᬥᬫ᭄ᬫᬥᬫ᭄ᬫᭀ. ᬧᬜ᭄ᬘ ᬯᬾᬤᬦᬵ… ᬧᬜ᭄ᬘ ᬲᬜ᭄ᬜᬵ… ᬧᬜ᭄ᬘ ᬘᬾᬢᬦᬵ… ᬧᬜ᭄ᬘ ᬘᬶᬢ᭄ᬢᬵ ᬯᬶᬧᬵᬓᬵ. ᬫᬦᭀᬥᬵᬢᬸ ᬲᬶᬬᬵ ᬯᬶᬧᬵᬓᬵ, ᬲᬶᬬᬵ ᬦᬾᬯᬯᬶᬧᬵᬓᬦᬯᬶᬧᬵᬓᬥᬫ᭄ᬫᬥᬫ᭄ᬫᬵ. ᬫᬦᭀᬯᬶᬜ᭄ᬜᬵᬡᬥᬵᬢᬸ ᬲᬶᬬᬵ ᬯᬶᬧᬵᬓᬵ, ᬲᬶᬬᬵ ᬯᬶᬧᬵᬓᬥᬫ᭄ᬫᬥᬫ᭄ᬫᬵ, ᬲᬶᬬᬵ ᬦᬾᬯᬯᬶᬧᬵᬓᬦᬯᬶᬧᬵᬓᬥᬫ᭄ᬫᬥᬫ᭄ᬫᬵ.