৩. সঞ্চৰিত্তসমুট্ঠানং

২৬০. সঞ্চৰী কুটি ৱিহাৰো, ধোৱনঞ্চ পটিগ্গহো;

ৱিঞ্ঞত্তুত্তৰি অভিহট্ঠুং, উভিন্নং দূতকেন চ.

কোসিযা সুদ্ধদ্ৱেভাগা, ছব্বস্সানি নিসীদনং;

ৰিঞ্চন্তি ৰূপিকা চেৱ, উভো নানপ্পকাৰকা.

ঊনবন্ধনৱস্সিকা, সুত্তং ৱিকপ্পনেন চ;

দ্ৱাৰদানসিব্বানি [দ্ৱাৰদানসিব্বিনী (সী. স্যা.)] চ, পূৱপচ্চযজোতি চ.

ৰতনং সূচি মঞ্চো চ, তূলং নিসীদনকণ্ডু চ;

ৱস্সিকা চ সুগতেন, ৱিঞ্ঞত্তি অঞ্ঞং চেতাপনা.

দ্ৱে সঙ্ঘিকা মহাজনিকা, দ্ৱে পুগ্গললহুকা গৰু;

দ্ৱে ৱিঘাসা সাটিকা চ, সমণচীৱৰেন চ.

সমপঞ্ঞাসিমে ধম্মা, ছহি ঠানেহি জাযৰে;

কাযতো ন ৱাচাচিত্তা, ৱাচতো ন কাযমনা.

কাযৱাচা ন চ চিত্তা [ন চিত্ততো (সী. স্যা.)], কাযচিত্তা ন ৱাচিকা [ন ৱাচতো (সী. স্যা.)];

ৱাচাচিত্তা ন কাযেন, তীহি দ্ৱাৰেহি [তীহি ঠানেহি (স্যা.)] জাযৰে.

ছসমুট্ঠানিকা এতে, সঞ্চৰিত্তেন সাদিসা.

সঞ্চৰিত্তসমুট্ঠানং নিট্ঠিতং.