অত্থৱসপকৰণং

৩৩৪. [অ. নি. ১০.৩৩৪; পৰি. ২২] দস অত্থৱসে পটিচ্চ তথাগতেন সাৱকানং সিক্খাপদং পঞ্ঞত্তং – সঙ্ঘসুট্ঠুতায, সঙ্ঘফাসুতায, দুম্মঙ্কূনং পুগ্গলানং নিগ্গহায, পেসলানং ভিক্খূনং ফাসুৱিহাৰায, দিট্ঠধম্মিকানং আসৱানং সংৱৰায, সম্পৰাযিকানং আসৱানং পটিঘাতায, অপ্পসন্নানং পসাদায, পসন্নানং ভিয্যোভাৱায, সদ্ধম্মট্ঠিতিযা ৱিনযানুগ্গহায.

যং সঙ্ঘসুট্ঠু তং সঙ্ঘফাসু. যং সঙ্ঘফাসু তং দুম্মঙ্কূনং পুগ্গলানং নিগ্গহায. যং দুম্মঙ্কূনং পুগ্গলানং নিগ্গহায তং পেসলানং ভিক্খূনং ফাসুৱিহাৰায. যং পেসলানং ভিক্খূনং ফাসুৱিহাৰায তং দিট্ঠধম্মিকানং আসৱানং সংৱৰায. যং দিট্ঠধম্মিকানং আসৱানং সংৱৰায তং সম্পৰাযিকানং আসৱানং পটিঘাতায. যং সম্পৰাযিকানং আসৱানং পটিঘাতায তং অপ্পসন্নানং পসাদায. যং অপ্পসন্নানং পসাদায তং পসন্নানং ভিয্যোভাৱায. যং পসন্নানং ভিয্যোভাৱায তং সদ্ধম্মট্ঠিতিযা. যং সদ্ধম্মট্ঠিতিযা তং ৱিনযানুগ্গহায.

যং সঙ্ঘসুট্ঠু তং সঙ্ঘফাসু. যং সঙ্ঘসুট্ঠু তং দুম্মঙ্কূনং পুগ্গলানং নিগ্গহায. যং সঙ্ঘসুট্ঠু তং পেসলানং ভিক্খূনং ফাসুৱিহাৰায. যং সঙ্ঘসুট্ঠু তং দিট্ঠধম্মিকানং আসৱানং সংৱৰায. যং সঙ্ঘসুট্ঠু তং সম্পৰাযিকানং আসৱানং পটিঘাতায. যং সঙ্ঘসুট্ঠু তং অপ্পসন্নানং পসাদায. যং সঙ্ঘসুট্ঠু তং পসন্নানং ভিয্যোভাৱায. যং সঙ্ঘসুট্ঠু তং সদ্ধম্মট্ঠিতিযা. যং সঙ্ঘসুট্ঠু তং ৱিনযানুগ্গহায.

যং সঙ্ঘফাসু তং দুম্মঙ্কূনং পুগ্গলানং নিগ্গহায. যং সঙ্ঘফাসু তং পেসলানং ভিক্খূনং ফাসুৱিহাৰায. যং সঙ্ঘফাসু তং দিট্ঠধম্মিকানং আসৱানং সংৱৰায. যং সঙ্ঘফাসু তং সম্পৰাযিকানং আসৱানং পটিঘাতায. যং সঙ্ঘফাসু তং অপ্পসন্নানং পসাদায. যং সঙ্ঘফাসু তং পসন্নানং ভিয্যোভাৱায. যং সঙ্ঘফাসু তং সদ্ধম্মট্ঠিতিযা. যং সঙ্ঘফাসু তং ৱিনযানুগ্গহায. যং সঙ্ঘফাসু তং সঙ্ঘসুট্ঠু.

যং দুম্মঙ্কূনং পুগ্গলানং নিগ্গহায…পে… যং পেসলানং ভিক্খূনং ফাসুৱিহাৰায… যং দিট্ঠধম্মিকানং আসৱানং সংৱৰায… যং সম্পৰাযিকানং আসৱানং পটিঘাতায… যং অপ্পসন্নানং পসাদায… যং পসন্নানং ভিয্যোভাৱায… যং সদ্ধম্মট্ঠিতিযা… যং ৱিনযানুগ্গহায তং সঙ্ঘসুট্ঠু. যং ৱিনযানুগ্গহায তং সঙ্ঘফাসু. যং ৱিনযানুগ্গহায তং দুম্মঙ্কূনং পুগ্গলানং নিগ্গহায. যং ৱিনযানুগ্গহায তং পেসলানং ভিক্খূনং ফাসুৱিহাৰায. যং ৱিনযানুগ্গহায তং দিট্ঠধম্মিকানং আসৱানং সংৱৰায. যং ৱিনযানুগ্গহায তং সম্পৰাযিকানং আসৱানং পটিঘাতায. যং ৱিনযানুগ্গহায তং অপ্পসন্নানং পসাদায. যং ৱিনযানুগ্গহায তং পসন্নানং ভিয্যোভাৱায. যং ৱিনযানুগ্গহায তং সদ্ধম্মট্ঠিতিযাতি.

অত্থসতং ধম্মসতং, দ্ৱে চ নিৰুত্তিসতানি;

চত্তাৰি ঞাণসতানি, অত্থৱসে পকৰণেতি.

অত্থৱসপকৰণং নিট্ঠিতং.

মহাৱগ্গো নিট্ঠিতো.

তস্সুদ্দানং –

পঠমং অট্ঠপুচ্ছাযং, পচ্চযেসু পুনট্ঠ চ;

ভিক্খূনং সোড়স এতে, ভিক্খুনীনঞ্চ সোড়স.

পেয্যালঅন্তৰা ভেদা, একুত্তৰিকমেৱ চ;

পৱাৰণত্থৱসিকা, মহাৱগ্গস্স সঙ্গহোতি.

অত্থৱসপকৰণং নিট্ঠিতং.