সেদমোচনগাথা

১. অৱিপ্পৱাসপঞ্হা

৪৭৯. অসংৱাসো ভিক্খূহি চ ভিক্খুনীহি চ;

সম্ভোগো একচ্চো তহিং ন লব্ভতি;

অৱিপ্পৱাসেন অনাপত্তি;

পঞ্হা মেসা কুসলেহি চিন্তিতা.

অৱিস্সজ্জিযং অৱেভঙ্গিযং;

পঞ্চ ৱুত্তা মহেসিনা;

ৱিস্সজ্জন্তস্স পৰিভুঞ্জন্তস্স অনাপত্তি;

পঞ্হা মেসা কুসলেহি চিন্তিতা.

দস পুগ্গলে ন ৱদামি, একাদস ৱিৱজ্জিয;

ৱুড্ঢং ৱন্দন্তস্স আপত্তি, পঞ্হা মেসা কুসলেহি চিন্তিতা.

ন উক্খিত্তকো ন চ পন পাৰিৱাসিকো;

ন সঙ্ঘভিন্নো ন চ পন পক্খসঙ্কন্তো;

সমানসংৱাসকভূমিযা ঠিতো;

কথং নু সিক্খায অসাধাৰণো সিযা;

পঞ্হা মেসা কুসলেহি চিন্তিতা.

উপেতি ধম্মং পৰিপুচ্ছমানো, কুসলং অত্থূপসঞ্হিতং;

ন জীৱতি ন মতো ন নিব্বুতো, তং পুগ্গলং কতমং ৱদন্তি বুদ্ধা;

পঞ্হা মেসা কুসলেহি চিন্তিতা.

উব্ভক্খকে ন ৱদামি, অধো নাভিং ৱিৱজ্জিয;

মেথুনধম্মপচ্চযা, কথং পাৰাজিকো সিযা;

পঞ্হা মেসা কুসলেহি চিন্তিতা.

ভিক্খু সঞ্ঞাচিকায কুটিং কৰোতি;

অদেসিতৱত্থুকং পমাণাতিক্কন্তং;

সাৰম্ভং অপৰিক্কমনং অনাপত্তি;

পঞ্হা মেসা কুসলেহি চিন্তিতা.

ভিক্খু সঞ্ঞাচিকায কুটিং কৰোতি;

দেসিতৱত্থুকং পমাণিকং;

অনাৰম্ভং সপৰিক্কমনং আপত্তি;

পঞ্হা মেসা কুসলেহি চিন্তিতা.

ন কাযিকং কিঞ্চি পযোগমাচৰে;

ন চাপি ৱাচায পৰে ভণেয্য;

আপজ্জেয্য গৰুকং ছেজ্জৱত্থুং;

পঞ্হা মেসা কুসলেহি চিন্তিতা.

ন কাযিকং ৱাচসিকঞ্চ কিঞ্চি;

মনসাপি সন্তো ন কৰেয্য পাপং;

সো নাসিতো কিন্তি সুনাসিতো ভৱে;

পঞ্হা মেসা কুসলেহি চিন্তিতা.

অনালপন্তো মনুজেন কেনচি;

ৱাচাগিৰং নো চ পৰে ভণেয্য;

আপজ্জেয্য ৱাচসিকং ন কাযিকং;

পঞ্হা মেসা কুসলেহি চিন্তিতা.

সিক্খাপদা বুদ্ধৱৰেন ৱণ্ণিতা;

সঙ্ঘাদিসেসা চতুৰো ভৱেয্যুং;

আপজ্জেয্য একপযোগেন সব্বে;

পঞ্হা মেসা কুসলেহি চিন্তিতা.

উভো একতো উপসম্পন্না;

উভিন্নং হত্থতো চীৱৰং পটিগ্গণ্হেয্য;

সিযা আপত্তিযো নানা;

পঞ্হা মেসা কুসলেহি চিন্তিতা.

চতুৰো জনা সংৱিধায;

গৰুভণ্ডং অৱাহৰুং;

তযো পাৰাজিকা একো ন পাৰাজিকো;

পঞ্হা মেসা কুসলেহি চিন্তিতা.

২. পাৰাজিকাদিপঞ্হা

৪৮০. ইত্থী চ অব্ভন্তৰে সিযা,

ভিক্খু চ বহিদ্ধা সিযা;

ছিদ্দং তস্মিং ঘৰে নত্থি;

মেথুনধম্মপচ্চযা;

কথং পাৰাজিকো সিযা;

পঞ্হা মেসা কুসলেহি চিন্তিতা.

তেলং মধুং ফাণিতঞ্চাপি সপ্পিং;

সামং গহেত্ৱান নিক্খিপেয্য;

অৱীতিৱত্তে সত্তাহে;

সতি পচ্চযে পৰিভুঞ্জন্তস্স আপত্তি;

পঞ্হা মেসা কুসলেহি চিন্তিতা.

নিস্সগ্গিযেন আপত্তি;

সুদ্ধকেন পাচিত্তিযং;

আপজ্জন্তস্স একতো;

পঞ্হা মেসা কুসলেহি চিন্তিতা.

ভিক্খূ সিযা ৱীসতিযা সমাগতা;

কম্মং কৰেয্যুং সমগ্গসঞ্ঞিনো;

ভিক্খু সিযা দ্ৱাদসযোজনে ঠিতো;

কম্মঞ্চ তং কুপ্পেয্য ৱগ্গপচ্চযা;

পঞ্হা মেসা কুসলেহি চিন্তিতা.

পদৱীতিহাৰমত্তেন ৱাচায ভণিতেন চ;

সব্বানি গৰুকানি সপ্পটিকম্মানি;

চতুসট্ঠি আপত্তিযো আপজ্জেয্য একতো;

পঞ্হা মেসা কুসলেহি চিন্তিতা.

নিৱত্থো অন্তৰৱাসকেন;

দিগুণং সঙ্ঘাটিং পাৰুতো;

সব্বানি তানি নিস্সগ্গিযানি হোন্তি;

পঞ্হা মেসা কুসলেহি চিন্তিতা.

ন চাপি ঞত্তি ন চ পন কম্মৱাচা;

ন চেহি ভিক্খূতি জিনো অৱোচ;

সৰণগমনম্পি ন তস্স অত্থি;

উপসম্পদা চস্স অকুপ্পা;

পঞ্হা মেসা কুসলেহি চিন্তিতা.

ইত্থিং হনে ন মাতৰং, পুৰিসঞ্চ ন পিতৰং হনে;

হনেয্য অনৰিযং মন্দো, তেন চানন্তৰং ফুসে;

পঞ্হা মেসা কুসলেহি চিন্তিতা.

ইত্থিং হনে চ মাতৰং, পুৰিসঞ্চ পিতৰং হনে;

মাতৰং পিতৰং হন্ত্ৱা, ন তেনানন্তৰং ফুসে;

পঞ্হা মেসা কুসলেহি চিন্তিতা.

অচোদযিত্ৱা অস্সাৰযিত্ৱা;

অসম্মুখীভূতস্স কৰেয্য কম্মং;

কতঞ্চ কম্মং সুকতং ভৱেয্য;

কাৰকো চ সঙ্ঘো অনাপত্তিকো সিযা;

পঞ্হা মেসা কুসলেহি চিন্তিতা.

চোদযিত্ৱা সাৰযিত্ৱা;

সম্মুখীভূতস্স কৰেয্য কম্মং;

কতঞ্চ কম্মং অকতং ভৱেয্য;

কাৰকো চ সঙ্ঘো সাপত্তিকো সিযা;

পঞ্হা মেসা কুসলেহি চিন্তিতা.

ছিন্দন্তস্স আপত্তি, ছিন্দন্তস্স অনাপত্তি;

ছাদেন্তস্স আপত্তি, ছাদেন্তস্স অনাপত্তি;

পঞ্হা মেসা কুসলেহি চিন্তিতা.

সচ্চং ভণন্তো গৰুকং, মুসা চ লহু ভাসতো;

মুসা ভণন্তো গৰুকং, সচ্চঞ্চ লহু ভাসতো;

পঞ্হা মেসা কুসলেহি চিন্তিতা.

৩. পাচিত্তিযাদিপঞ্হা

৪৮১. অধিট্ঠিতং ৰজনায ৰত্তং;

কপ্পকতম্পি সন্তং;

পৰিভুঞ্জন্তস্স আপত্তি;

পঞ্হা মেসা কুসলেহি চিন্তিতা.

অত্থঙ্গতে সূৰিযে ভিক্খু মংসানি খাদতি;

ন উম্মত্তকো ন চ পন খিত্তচিত্তো;

ন চাপি সো ৱেদনাট্টো ভৱেয্য;

ন চস্স হোতি আপত্তি;

সো চ ধম্মো সুগতেন দেসিতো;

পঞ্হা মেসা কুসলেহি চিন্তিতা.

ন ৰত্তচিত্তো ন চ পন থেয্যচিত্তো;

ন চাপি সো পৰং মৰণায চেতযি;

সলাকং দেন্তস্স হোতি ছেজ্জং;

পটিগ্গণ্হন্তস্স থুল্লচ্চযং;

পঞ্হা মেসা কুসলেহি চিন্তিতা.

ন চাপি আৰঞ্ঞকং সাসঙ্কসম্মতং;

ন চাপি সঙ্ঘেন সম্মুতি দিন্না;

ন চস্স কথিনং অত্থতং তত্থেৱ;

চীৱৰং নিক্খিপিত্ৱা গচ্ছেয্য অড্ঢযোজনং;

তত্থেৱ অৰুণং উগ্গচ্ছন্তস্স অনাপত্তি;

পঞ্হা মেসা কুসলেহি চিন্তিতা.

কাযিকানি ন ৱাচসিকানি;

সব্বানি নানাৱত্থুকানি;

অপুব্বং অচৰিমং আপজ্জেয্য একতো;

পঞ্হা মেসা কুসলেহি চিন্তিতা.

ৱাচসিকানি ন কাযিকানি;

সব্বানি নানাৱত্থুকানি;

অপুব্বং অচৰিমং আপজ্জেয্য একতো;

পঞ্হা মেসা কুসলেহি চিন্তিতা.

তিস্সিত্থিযো মেথুনং তং ন সেৱে;

তযো পুৰিসে তযো অনৰিযপণ্ডকে;

ন চাচৰে মেথুনং ব্যঞ্জনস্মিং;

ছেজ্জং সিযা মেথুনধম্মপচ্চযা;

পঞ্হা মেসা কুসলেহি চিন্তিতা.

মাতৰং চীৱৰং যাচে, নো চ সঙ্ঘে [নো সংঘস্স (ক.), নো চ সংঘস্স (স্যা.), নো চে সংঘস্স (সী.)] পৰিণতং;

কেনস্স হোতি আপত্তি, অনাপত্তি চ ঞাতকে;

পঞ্হা মেসা কুসলেহি চিন্তিতা.

কুদ্ধো আৰাধকো হোতি, কুদ্ধো হোতি গৰহিযো;