৩. পাচিত্তিযং

৪৭৬. কতি পাচিত্তিযানি, সব্বানি নানাৱত্থুকানি;

অপুব্বং অচৰিমং, আপজ্জেয্য একতো.

পঞ্চ পাচিত্তিযানি, সব্বানি নানাৱত্থুকানি;

অপুব্বং অচৰিমং, আপজ্জেয্য একতো.

কতি পাচিত্তিযানি, সব্বানি নানাৱত্থুকানি;

অপুব্বং অচৰিমং, আপজ্জেয্য একতো.

ন পাচিত্তিযানি, সব্বানি নানাৱত্থুকানি;

অপুব্বং অচৰিমং, আপজ্জেয্য একতো.

কতি পাচিত্তিযানি, সব্বানি নানাৱত্থুকানি;

কতি ৱাচায দেসেয্য, ৱুত্তা আদিচ্চবন্ধুনা.

পঞ্চ পাচিত্তিযানি, সব্বানি নানাৱত্থুকানি;

একৱাচায দেসেয্য, ৱুত্তা আদিচ্চবন্ধুনা.

কতি পাচিত্তিযানি, সব্বানি নানাৱত্থুকানি;

কতি ৱাচায দেসেয্য, ৱুত্তা আদিচ্চবন্ধুনা.

নৱ পাচিত্তিযানি, সব্বানি নানাৱত্থুকানি;

একৱাচায দেসেয্য, ৱুত্তা আদিচ্চবন্ধুনা.

কতি পাচিত্তিযানি, সব্বানি নানাৱত্থুকানি;

কিঞ্চ কিত্তেত্ৱা দেসেয্য, ৱুত্তা আদিচ্চবন্ধুনা.

পঞ্চ পাচিত্তিযানি, সব্বানি নানাৱত্থুকানি;

ৱত্থুং কিত্তেত্ৱা দেসেয্য, ৱুত্তা আদিচ্চবন্ধুনা.

কতি পাচিত্তিযানি, সব্বানি নানাৱত্থুকানি;

কিঞ্চ কিত্তেত্ৱা দেসেয্য, ৱুত্তা আদিচ্চবন্ধুনা.

নৱ পাচিত্তিযানি, সব্বানি নানাৱত্থুকানি;

ৱত্থুং কিত্তেত্ৱা দেসেয্য, ৱুত্তা আদিচ্চবন্ধুনা.

যাৱততিযকে কতি আপত্তিযো, কতি ৱোহাৰপচ্চযা;

খাদন্তস্স কতি আপত্তিযো, কতি ভোজনপচ্চযা.

যাৱততিযকে তিস্সো আপত্তিযো, ছ ৱোহাৰপচ্চযা;

খাদন্তস্স তিস্সো আপত্তিযো, পঞ্চ ভোজনপচ্চযা.

সব্বা যাৱততিযকা, কতি ঠানানি গচ্ছন্তি;

কতিনঞ্চেৱ আপত্তি, কতিনং অধিকৰণেন চ.

সব্বা যাৱততিযকা, পঞ্চ ঠানানি গচ্ছন্তি;

পঞ্চন্নঞ্চেৱ আপত্তি, পঞ্চন্নং অধিকৰণেন চ.

কতিনং ৱিনিচ্ছযো হোতি, কতিনং ৱূপসমেন চ;

কতিনঞ্চেৱ অনাপত্তি, কতিহি ঠানেহি সোভতি.

পঞ্চন্নং ৱিনিচ্ছযো হোতি, পঞ্চন্নং ৱূপসমেন চ;

পঞ্চন্নঞ্চেৱ অনাপত্তি, তীহি ঠানেহি সোভতি.

কতি কাযিকা ৰত্তিং, কতি কাযিকা দিৱা;

নিজ্ঝাযন্তস্স কতি আপত্তি, কতি পিণ্ডপাতপচ্চযা.

দ্ৱে কাযিকা ৰত্তিং, দ্ৱে কাযিকা দিৱা;

নিজ্ঝাযন্তস্স একা আপত্তি, একা পিণ্ডপাতপচ্চযা.

কতানিসংসে সম্পস্সং, পৰেসং সদ্ধায দেসযে;

উক্খিত্তকা কতি ৱুত্তা, কতি সম্মাৱত্তনা.

অট্ঠানিসংসে সম্পস্সং, পৰেসং সদ্ধায দেসযে;

উক্খিত্তকা তযো ৱুত্তা, তেচত্তালীস সম্মাৱত্তনা.

কতি ঠানে মুসাৱাদো, কতি পৰমন্তি ৱুচ্চতি;

কতি পাটিদেসনীযা, কতিনং দেসনায চ.

পঞ্চ ঠানে মুসাৱাদো, চুদ্দস পৰমন্তি ৱুচ্চতি;

দ্ৱাদস পাটিদেসনীযা, চতুন্নং দেসনায চ.

কতঙ্গিকো মুসাৱাদো, কতি উপোসথঙ্গানি;

কতি দূতেয্যঙ্গানি, কতি তিত্থিযৱত্তনা.

অট্ঠঙ্গিকো মুসাৱাদো, অট্ঠ উপোসথঙ্গানি;

অট্ঠ দূতেয্যঙ্গানি, অট্ঠ তিত্থিযৱত্তনা.

কতিৱাচিকা উপসম্পদা, কতিনং পচ্চুট্ঠাতব্বং;

কতিনং আসনং দাতব্বং, ভিক্খুনোৱাদকো কতিহি.

অট্ঠৱাচিকা উপসম্পদা, অট্ঠন্নং পচ্চুট্ঠাতব্বং;

অট্ঠন্নং আসনং দাতব্বং, ভিক্খুনোৱাদকো অট্ঠহি.

কতিনং ছেজ্জং হোতি, কতিনং থুল্লচ্চযং;

কতিনঞ্চেৱ অনাপত্তি, সব্বেসং একৱত্থুকা.

একস্স ছেজ্জং হোতি, চতুন্নং থুল্লচ্চযং;

চতুন্নঞ্চেৱ অনাপত্তি, সব্বেসং একৱত্থুকা.

কতি আঘাতৱত্থূনি, কতিহি সঙ্ঘো ভিজ্জতি;

কতেত্থ পঠমাপত্তিকা, ঞত্তিযা কৰণা কতি.

নৱ আঘাতৱত্থূনি, নৱহি সঙ্ঘো ভিজ্জতি;

নৱেত্থ পঠমাপত্তিকা, ঞত্তিযা কৰণা নৱ.