দুতিযগাথাসঙ্গণিকং

১. কাযিকাদিআপত্তি

৪৭৪. কতি আপত্তিযো কাযিকা, কতি ৱাচসিকা কতা.

ছাদেন্তস্স কতি আপত্তিযো, কতি সংসগ্গপচ্চযা.

ছাপত্তিযো কাযিকা, ছ ৱাচসিকা কতা;

ছাদেন্তস্স তিস্সো আপত্তিযো, পঞ্চ সংসগ্গপচ্চযা.

অৰুণুগ্গে কতি আপত্তিযো, কতি যাৱততিযকা;

কতেত্থ অট্ঠ ৱত্থুকা, কতিহি সব্বসঙ্গহো.

অৰুণুগ্গে তিস্সো আপত্তিযো, দ্ৱে যাৱততিযকা;

একেত্থ অট্ঠ ৱত্থুকা, একেন সব্বসঙ্গহো.

ৱিনযস্স কতি মূলানি, যানি বুদ্ধেন পঞ্ঞত্তা;

ৱিনযগৰুকা কতি ৱুত্তা, দুট্ঠুল্লচ্ছাদনা কতি.

ৱিনযস্স দ্ৱে মূলানি, যানি বুদ্ধেন পঞ্ঞত্তা;

ৱিনযগৰুকা দ্ৱে ৱুত্তা, দ্ৱে দুট্ঠুল্লচ্ছাদনা.

গামন্তৰে কতি আপত্তিযো, কতি নদিপাৰপচ্চযা;

কতিমংসেসু থুল্লচ্চযং, কতিমংসেসু দুক্কটং.

গামন্তৰে চতস্সো আপত্তিযো, চতস্সো নদিপাৰপচ্চযা;

একমংসে থুল্লচ্চযং, নৱমংসেসু দুক্কটং.

কতি ৱাচসিকা ৰত্তিং, কতি ৱাচসিকা দিৱা;

দদমানস্স কতি আপত্তিযো, পটিগ্গণ্হন্তস্স কিত্তকা.

দ্ৱে ৱাচসিকা ৰত্তিং, দ্ৱে ৱাচসিকা দিৱা;

দদমানস্স তিস্সো আপত্তিযো, চত্তাৰো চ পটিগ্গহে.

২. দেসনাগামিনিযাদিআপত্তি

৪৭৫. কতি দেসনাগামিনিযো, কতি সপ্পটিকম্মা কতা;

কতেত্থ অপ্পটিকম্মা ৱুত্তা, বুদ্ধেনাদিচ্চবন্ধুনা.

পঞ্চ দেসনাগামিনিযো, ছ সপ্পটিকম্মা কতা;

একেত্থ অপ্পটিকম্মা ৱুত্তা, বুদ্ধেনাদিচ্চবন্ধুনা.

ৱিনযগৰুকা কতি ৱুত্তা, কাযৱাচসিকানি চ;

কতি ৱিকালে ধঞ্ঞৰসো, কতি ঞত্তিচতুত্থেন সম্মুতি.

ৱিনযগৰুকা দ্ৱে ৱুত্তা, কাযৱাচসিকানি চ;

একো ৱিকালে ধঞ্ঞৰসো, একা ঞত্তিচতুত্থেন সম্মুতি.

পাৰাজিকা কাযিকা কতি, কতি সংৱাসকভূমিযো;

কতিনং ৰত্তিচ্ছেদো, পঞ্ঞত্তা দ্ৱঙ্গুলা কতি.

পাৰাজিকা কাযিকা দ্ৱে, দ্ৱে সংৱাসকভূমিযো;

দ্ৱিন্নং ৰত্তিচ্ছেদো, পঞ্ঞত্তা দ্ৱঙ্গুলা দুৱে.

কতত্তানং ৱধিত্ৱান, কতিহি সঙ্ঘো ভিজ্জতি;

কতেত্থ পঠমাপত্তিকা, ঞত্তিযা কৰণা কতি.

দ্ৱে অত্তানং ৱধিত্ৱান, দ্ৱীহি সঙ্ঘো ভিজ্জতি;

দ্ৱেত্থ পঠমাপত্তিকা, ঞত্তিযা কৰণা দুৱে.

পাণাতিপাতে কতি আপত্তিযো, ৱাচা পাৰাজিকা কতি;

ওভাসনা কতি ৱুত্তা, সঞ্চৰিত্তেন ৱা কতি.

পাণাতিপাতে তিস্সো আপত্তিযো;

ৱাচা পাৰাজিকা তযো;

ওভাসনা তযো ৱুত্তা;

সঞ্চৰিত্তেন ৱা তযো.

কতি পুগ্গলা ন উপসম্পাদেতব্বা, কতি কম্মানং সঙ্গহা;

নাসিতকা কতি ৱুত্তা, কতিনং একৱাচিকা.

তযো পুগ্গলা ন উপসম্পাদেতব্বা, তযো কম্মানং সঙ্গহা;

নাসিতকা তযো ৱুত্তা, তিণ্ণন্নং একৱাচিকা.

অদিন্নাদানে কতি আপত্তিযো, কতি মেথুনপচ্চযা;

ছিন্দন্তস্স কতি আপত্তিযো, কতি ছড্ডিতপচ্চযা.

অদিন্নাদানে তিস্সো আপত্তিযো, চতস্সো মেথুনপচ্চযা;

ছিন্দন্তস্স তিস্সো আপত্তিযো, পঞ্চ ছড্ডিতপচ্চযা.

ভিক্খুনোৱাদকৱগ্গস্মিং, পাচিত্তিযেন দুক্কটা;

কতেত্থ নৱকা ৱুত্তা, কতিনং চীৱৰেন চ.

ভিক্খুনোৱাদকৱগ্গস্মিং, পাচিত্তিযেন দুক্কটা কতা;

চতুৰেত্থ নৱকা ৱুত্তা, দ্ৱিন্নং চীৱৰেন চ.

ভিক্খুনীনঞ্চ অক্খাতা, পাটিদেসনিযা কতি;

ভুঞ্জন্তামকধঞ্ঞেন, পাচিত্তিযেন দুক্কটা কতি.

ভিক্খুনীনঞ্চ অক্খাতা, অট্ঠ পাটিদেসনীযা কতা;

ভুঞ্জন্তামকধঞ্ঞেন, পাচিত্তিযেন দুক্কটা কতা.

গচ্ছন্তস্স কতি আপত্তিযো, ঠিতস্স চাপি কিত্তকা;

নিসিন্নস্স কতি আপত্তিযো, নিপন্নস্সাপি কিত্তকা.

গচ্ছন্তস্স চতস্সো আপত্তিযো, ঠিতস্স চাপি তত্তকা;

নিসিন্নস্স চতস্সো আপত্তিযো, নিপন্নস্সাপি তত্তকা.

৩. পাচিত্তিযং

৪৭৬. কতি পাচিত্তিযানি, সব্বানি নানাৱত্থুকানি;

অপুব্বং অচৰিমং, আপজ্জেয্য একতো.

পঞ্চ পাচিত্তিযানি, সব্বানি নানাৱত্থুকানি;

অপুব্বং অচৰিমং, আপজ্জেয্য একতো.