অত্থাপত্তিসমুট্ঠানং

১. পাৰাজিকং

৪৭০. অত্থাপত্তি অচিত্তকো আপজ্জতি, সচিত্তকো ৱুট্ঠাতি. অত্থাপত্তি সচিত্তকো আপজ্জতি, অচিত্তকো ৱুট্ঠাতি. অত্থাপত্তি অচিত্তকো আপজ্জতি, অচিত্তকো ৱুট্ঠাতি. অত্থাপত্তি সচিত্তকো আপজ্জতি, সচিত্তকো ৱুট্ঠাতি. অত্থাপত্তি কুসলচিত্তো আপজ্জতি, কুসলচিত্তো ৱুট্ঠাতি. অত্থাপত্তি কুসলচিত্তো আপজ্জতি, অকুসলচিত্তো ৱুট্ঠাতি. অত্থাপত্তি কুসলচিত্তো আপজ্জতি, অব্যাকতচিত্তো ৱুট্ঠাতি. অত্থাপত্তি অকুসলচিত্তো আপজ্জতি, কুসলচিত্তো ৱুট্ঠাতি. অত্থাপত্তি অকুসলচিত্তো আপজ্জতি, অকুসলচিত্তো ৱুট্ঠাতি. অত্থাপত্তি অকুসলচিত্তো আপজ্জতি, অব্যাকতচিত্তো ৱুট্ঠাতি. অত্থাপত্তি অব্যাকতচিত্তো আপজ্জতি, কুসলচিত্তো ৱুট্ঠাতি. অত্থাপত্তি অব্যাকতচিত্তো আপজ্জতি, অকুসলচিত্তো ৱুট্ঠাতি. অত্থাপত্তি অব্যাকতচিত্তো আপজ্জতি, অব্যাকতচিত্তো ৱুট্ঠাতি.

পঠমং পাৰাজিকং কতিহি সমুট্ঠানেহি সমুট্ঠাতি? পঠমং পাৰাজিকং একেন সমুট্ঠানেন সমুট্ঠাতি. কাযতো চ চিত্ততো চ সমুট্ঠাতি, ন ৱাচতো.

দুতিযং পাৰাজিকং কতিহি সমুট্ঠানেহি সমুট্ঠাতি? দুতিযং পাৰাজিকং তীহি সমুট্ঠানেহি সমুট্ঠাতি – সিযা কাযতো চ চিত্ততো চ সমুট্ঠাতি, ন ৱাচতো; সিযা ৱাচতো চ চিত্ততো চ সমুট্ঠাতি, ন কাযতো; সিযা কাযতো চ ৱাচতো চ চিত্ততো চ সমুট্ঠাতি.

ততিযং পাৰাজিকং কতিহি সমুট্ঠানেহি সমুট্ঠাতি? ততিযং পাৰাজিকং তীহি সমুট্ঠানেহি সমুট্ঠাতি – সিযা কাযতো চ চিত্ততো চ সমুট্ঠাতি, ন ৱাচতো; সিযা ৱাচতো চ চিত্ততো চ সমুট্ঠাতি, ন কাযতো; সিযা কাযতো চ ৱাচতো চ চিত্ততো চ সমুট্ঠাতি.

চতুত্থং পাৰাজিকং কতিহি সমুট্ঠানেহি সমুট্ঠাতি? চতুত্থং পাৰাজিকং তীহি সমুট্ঠানেহি সমুট্ঠাতি – সিযা কাযতো চ চিত্ততো চ সমুট্ঠাতি, ন ৱাচতো; সিযা ৱাচতো চ চিত্ততো চ সমুট্ঠাতি, ন কাযতো; সিযা কাযতো চ ৱাচতো চ চিত্ততো চ সমুট্ঠাতি.

চত্তাৰো পাৰাজিকা নিট্ঠিতা.

২. সঙ্ঘাদিসেসং

৪৭১. উপক্কমিত্ৱা অসুচিং মোচেন্তস্স সঙ্ঘাদিসেসো কতিহি সমুট্ঠানেহি সমুট্ঠাতি? উপক্কমিত্ৱা অসুচিং মোচেন্তস্স সঙ্ঘাদিসেসো একেন সমুট্ঠানেন সমুট্ঠাতি – কাযতো চ চিত্ততো চ সমুট্ঠাতি, ন ৱাচতো.

মাতুগামেন সদ্ধিং কাযসংসগ্গং সমাপজ্জন্তস্স সঙ্ঘাদিসেসো কতিহি সমুট্ঠানেহি সমুট্ঠাতি? মাতুগামেন সদ্ধিং কাযসংসগ্গং সমাপজ্জন্তস্স সঙ্ঘাদিসেসো একেন সমুট্ঠানেন সমুট্ঠাতি – কাযতো চ চিত্ততো চ সমুট্ঠাতি, ন ৱাচতো.

মাতুগামং দুট্ঠুল্লাহি ৱাচাহি ওভাসেন্তস্স সঙ্ঘাদিসেসো কতিহি সমুট্ঠানেহি সমুট্ঠাতি? মাতুগামং দুট্ঠুল্লাহি ৱাচাহি ওভাসেন্তস্স সঙ্ঘাদিসেসো তীহি সমুট্ঠানেহি সমুট্ঠাতি – সিযা কাযতো চ চিত্ততো চ সমুট্ঠাতি ন ৱাচতো; সিযা ৱাচতো চ চিত্ততো চ সমুট্ঠাতি, ন কাযতো; সিযা কাযতো চ ৱাচতো চ চিত্ততো চ সমুট্ঠাতি.

মাতুগামস্স সন্তিকে অত্তকামপাৰিচৰিযায ৱণ্ণং ভাসন্তস্স সঙ্ঘাদিসেসো কতিহি সমুট্ঠানেহি সমুট্ঠাতি? মাতুগামস্স সন্তিকে অত্তকামপাৰিচৰিযায ৱণ্ণং ভাসন্তস্স সঙ্ঘাদিসেসো তীহি সমুট্ঠানেহি সমুট্ঠাতি…পে….

সঞ্চৰিত্তং সমাপজ্জন্তস্স সঙ্ঘাদিসেসো কতিহি সমুট্ঠানেহি সমুট্ঠাতি? সঞ্চৰিত্তং সমাপজ্জন্তস্স সঙ্ঘাদিসেসো ছহি সমুট্ঠানেহি সমুট্ঠাতি – সিযা কাযতো সমুট্ঠাতি, ন ৱাচতো ন চিত্ততো; সিযা ৱাচতো সমুট্ঠাতি, ন কাযতো ন চিত্ততো; সিযা কাযতো চ ৱাচতো চ সমুট্ঠাতি, ন চিত্ততো; সিযা কাযতো চ চিত্ততো চ সমুট্ঠাতি, ন ৱাচতো; সিযা ৱাচতো চ চিত্ততো চ সমুট্ঠাতি, ন কাযতো; সিযা কাযতো চ ৱাচতো চ চিত্ততো চ সমুট্ঠাতি.

সঞ্ঞাচিকায কুটিং কাৰাপেন্তস্স সঙ্ঘাদিসেসো কতিহি সমুট্ঠানেহি সমুট্ঠাতি? সঞ্ঞাচিকায কুটিং কাৰাপেন্তস্স সঙ্ঘাদিসেসো ছহি সমুট্ঠানেহি সমুট্ঠাতি…পে….

মহল্লকং ৱিহাৰং কাৰাপেন্তস্স সঙ্ঘাদিসেসো কতিহি সমুট্ঠানেহি সমুট্ঠাতি? মহল্লকং ৱিহাৰং কাৰাপেন্তস্স সঙ্ঘাদিসেসো ছহি সমুট্ঠানেহি সমুট্ঠাতি…পে….

ভিক্খুং অমূলকেন পাৰাজিকেন ধম্মেন অনুদ্ধংসেন্তস্স সঙ্ঘাদিসেসো কতিহি সমুট্ঠানেহি সমুট্ঠাতি? ভিক্খুং অমূলকেন পাৰাজিকেন ধম্মেন অনুদ্ধংসেন্তস্স সঙ্ঘাদিসেসো তীহি সমুট্ঠানেহি সমুট্ঠাতি…পে….

ভিক্খুং অঞ্ঞভাগিযস্স অধিকৰণস্স কিঞ্চি দেসং লেসমত্তং উপাদায পাৰাজিকেন ধম্মেন অনুদ্ধংসেন্তস্স সঙ্ঘাদিসেসো কতিহি সমুট্ঠানেহি সমুট্ঠাতি? ভিক্খুং অঞ্ঞভাগিযস্স অধিকৰণস্স কিঞ্চি দেসং লেসমত্তং উপাদায পাৰাজিকেন ধম্মেন অনুদ্ধংসেন্তস্স সঙ্ঘাদিসেসো তীহি সমুট্ঠানেহি সমুট্ঠাতি…পে….

সঙ্ঘভেদকস্স ভিক্খুনো যাৱততিযং সমনুভাসনায ন পটিনিস্সজ্জন্তস্স সঙ্ঘাদিসেসো কতিহি সমুট্ঠানেহি সমুট্ঠাতি? সঙ্ঘভেদকস্স ভিক্খুনো যাৱততিযং সমনুভাসনায ন পটিনিস্সজ্জন্তস্স সঙ্ঘাদিসেসো একেন সমুট্ঠানেন সমুট্ঠাতি – কাযতো চ ৱাচতো চ চিত্ততো চ সমুট্ঠাতি.

ভেদকানুৱত্তকানং ভিক্খূনং যাৱততিযং সমনুভাসনায ন পটিনিস্সজ্জন্তানং সঙ্ঘাদিসেসো কতিহি সমুট্ঠানেহি সমুট্ঠাতি? ভেদকানুৱত্তকানং ভিক্খূনং যাৱততিযং সমনুভাসনায ন পটিনিস্সজ্জন্তানং সঙ্ঘাদিসেসো একেন সমুট্ঠানেন সমুট্ঠাতি – কাযতো চ ৱাচতো চ চিত্ততো চ সমুট্ঠাতি.

দুব্বচস্স ভিক্খুনো যাৱততিযং সমনুভাসনায ন পটিনিস্সজ্জন্তস্স সঙ্ঘাদিসেসো কতিহি সমুট্ঠানেহি সমুট্ঠাতি? দুব্বচস্স ভিক্খুনো যাৱততিযং সমনুভাসনায ন পটিনিস্সজ্জন্তস্স সঙ্ঘাদিসেসো একেন সমুট্ঠানেন সমুট্ঠাতি – কাযতো চ ৱাচতো চ চিত্ততো চ সমুট্ঠাতি.

কুলদূসকস্স ভিক্খুনো যাৱততিযং সমনুভাসনায ন পটিনিস্সজ্জন্তস্স সঙ্ঘাদিসেসো কতিহি সমুট্ঠানেহি সমুট্ঠাতি? কুলদূসকস্স ভিক্খুনো যাৱততিযং সমনুভাসনায ন পটিনিস্সজ্জন্তস্স সঙ্ঘাদিসেসো একেন সমুট্ঠানেন সমুট্ঠাতি – কাযতো চ ৱাচতো চ চিত্ততো চ সমুট্ঠাতি.

তেৰস সঙ্ঘাদিসেসা নিট্ঠিতা.

৪৭২. …পে… অনাদৰিযং পটিচ্চ উদকে উচ্চাৰং ৱা পস্সাৱং ৱা খেড়ং ৱা কৰোন্তস্স দুক্কটং কতিহি সমুট্ঠানেহি সমুট্ঠাতি? অনাদৰিযং পটিচ্চ উদকে উচ্চাৰং ৱা পস্সাৱং ৱা খেড়ং ৱা কৰোন্তস্স দুক্কটং একেন সমুট্ঠানেন সমুট্ঠাতি – কাযতো চ চিত্ততো চ সমুট্ঠাতি, ন ৱাচতো.

সেখিযা নিট্ঠিতা.

৩. পাৰাজিকাদি

৪৭৩. চত্তাৰো পাৰাজিকা কতিহি সমুট্ঠানেহি সমুট্ঠন্তি? চত্তাৰো পাৰাজিকা তীহি সমুট্ঠানেহি সমুট্ঠন্তি – সিযা কাযতো চ চিত্ততো চ সমুট্ঠন্তি, ন ৱাচতো; সিযা ৱাচতো চ চিত্ততো চ সমুট্ঠন্তি, ন কাযতো; সিযা কাযতো চ ৱাচতো চ চিত্ততো চ সমুট্ঠন্তি.

তেৰস সঙ্ঘাদিসেসা কতিহি সমুট্ঠানেহি সমুট্ঠন্তি? তেৰস সঙ্ঘাদিসেসা ছহি সমুট্ঠানেহি সমুট্ঠন্তি – সিযা কাযতো সমুট্ঠন্তি, ন ৱাচতো ন চিত্ততো; সিযা ৱাচতো সমুট্ঠন্তি, ন কাযতো ন চিত্ততো; সিযা কাযতো চ ৱাচতো ন সমুট্ঠন্তি, ন চিত্ততো; সিযা কাযতো চ চিত্ততো চ সমুট্ঠন্তি, ন ৱাচতো; সিযা ৱাচতো চ চিত্ততো চ সমুট্ঠন্তি, ন কাযতো; সিযা কাযতো চ ৱাচতো চ চিত্ততো চ সমুট্ঠন্তি.

দ্ৱে অনিযতা কতিহি সমুট্ঠানেহি সমুট্ঠন্তি? দ্ৱে অনিযতা তীহি সমুট্ঠানেহি সমুট্ঠন্তি – সিযা কাযতো চ চিত্ততো চ সমুট্ঠন্তি, ন ৱাচতো; সিযা ৱাচতো চ চিত্ততো চ সমুট্ঠন্তি, ন কাযতো; সিযা কাযতো চ ৱাচতো চ চিত্ততো চ সমুট্ঠন্তি.

তিংস নিস্সগ্গিযা পাচিত্তিযা কতিহি সমুট্ঠানেহি সমুট্ঠন্তি? তিংস নিস্সগ্গিযা পাচিত্তিযা ছহি সমুট্ঠানেহি সমুট্ঠন্তি – সিযা কাযতো সমুট্ঠন্তি, ন ৱাচতো ন চিত্ততো; সিযা ৱাচতো সমুট্ঠন্তি, ন কাযতো ন চিত্ততো; সিযা কাযতো চ ৱাচতো চ সমুট্ঠন্তি, ন চিত্ততো; সিযা কাযতো চ চিত্ততো চ সমুট্ঠন্তি, ন ৱাচতো; সিযা ৱাচতো চ চিত্ততো চ সমুট্ঠন্তি, ন কাযতো; সিযা কাযতো চ ৱাচতো চ চিত্ততো চ সমুট্ঠন্তি.

দ্ৱেনৱুতি পাচিত্তিযা কতিহি সমুট্ঠানেহি সমুট্ঠন্তি? দ্ৱেনৱুতি পাচিত্তিযা ছহি সমুট্ঠানেহি সমুট্ঠন্তি – সিযা কাযতো সমুট্ঠন্তি, ন ৱাচতো ন চিত্ততো; সিযা ৱাচতো সমুট্ঠন্তি, ন কাযতো ন চিত্ততো; সিযা কাযতো চ ৱাচতো চ সমুট্ঠন্তি, ন চিত্ততো; সিযা কাযতো চ চিত্ততো চ সমুট্ঠন্তি ন ৱাচতো; সিযা ৱাচতো চ চিত্ততো চ সমুট্ঠন্তি, ন কাযতো; সিযা কাযতো চ ৱাচতো চ চিত্ততো চ সমুট্ঠন্তি.

চত্তাৰো পাটিদেসনীযা কতিহি সমুট্ঠানেহি সমুট্ঠন্তি? চত্তাৰো পাটিদেসনীযা চতূহি সমুট্ঠানেহি সমুট্ঠন্তি – সিযা কাযতো সমুট্ঠন্তি, ন ৱাচতো ন চিত্ততো; সিযা কাযতো চ ৱাচতো চ সমুট্ঠন্তি, ন চিত্ততো; সিযা কাযতো চ চিত্ততো চ সমুট্ঠন্তি, ন ৱাচতো; সিযা কাযতো চ ৱাচতো চ চিত্ততো চ সমুট্ঠন্তি.

পঞ্চসত্ততি সেখিযা কতিহি সমুট্ঠানেহি সমুট্ঠন্তি? পঞ্চসত্ততি সেখিযা তীহি সমুট্ঠানেহি সমুট্ঠন্তি – সিযা কাযতো চ চিত্ততো চ সমুট্ঠন্তি, ন ৱাচতো; সিযা ৱাচতো চ চিত্ততো চ সমুট্ঠন্তি, ন কাযতো; সিযা কাযতো চ ৱাচতো চ চিত্ততো চ সমুট্ঠন্তি.

সমুট্ঠানং নিট্ঠিতং.