চূড়সঙ্গামো

১. অনুৱিজ্জকস্সপটিপত্তি

৩৬৫. [পৰি. ৪২১] সঙ্গামাৱচৰে ভিক্খুনা সঙ্ঘং উপসঙ্কমন্তেন নীচচিত্তেন সঙ্ঘো উপসঙ্কমিতব্বো ৰজোহৰণসমেন চিত্তেন; আসনকুসলেন ভৱিতব্বং নিসজ্জকুসলেন; থেৰে ভিক্খূ অনুপখজ্জন্তেন, নৱে ভিক্খূ আসনেন অপ্পটিবাহন্তেন, যথাপতিৰূপে আসনে নিসীদিতব্বং; অনানাকথিকেন ভৱিতব্বং অতিৰচ্ছানকথিকেন; সামং ৱা ধম্মো ভাসিতব্বো পৰো ৱা অজ্ঝেসিতব্বো অৰিযো ৱা তুণ্হীভাৱো নাতিমঞ্ঞিতব্বো.

সঙ্ঘেন অনুমতেন পুগ্গলেন অনুৱিজ্জকেন অনুৱিজ্জিতুকামেন ন উপজ্ঝাযো পুচ্ছিতব্বো, ন আচৰিযো পুচ্ছিতব্বো, ন সদ্ধিৱিহাৰিকো পুচ্ছিতব্বো, ন অন্তেৱাসিকো পুচ্ছিতব্বো, ন সমানুপজ্ঝাযকো পুচ্ছিতব্বো, ন সমানাচৰিযকো পুচ্ছিতব্বো, ন জাতি পুচ্ছিতব্বা, ন নামং পুচ্ছিতব্বং, ন গোত্তং পুচ্ছিতব্বং, ন আগমো পুচ্ছিতব্বো, ন কুলপদেসো পুচ্ছিতব্বো, ন জাতিভূমি পুচ্ছিতব্বা. তং কিং কাৰণা? অত্ৰস্স পেমং ৱা দোসো ৱা. পেমে ৱা সতি দোসে ৱা, ছন্দাপি গচ্ছেয্য দোসাপি গচ্ছেয্য মোহাপি গচ্ছেয্য ভযাপি গচ্ছেয্য.

সঙ্ঘেন অনুমতেন পুগ্গলেন অনুৱিজ্জকেন অনুৱিজ্জিতুকামেন সঙ্ঘগৰুকেন ভৱিতব্বং নো পুগ্গলগৰুকেন, সদ্ধম্মগৰুকেন ভৱিতব্বং নো আমিসগৰুকেন, অত্থৱসিকেন ভৱিতব্বং নো পৰিসকপ্পিকেন, কালেন অনুৱিজ্জিতব্বং নো অকালেন, ভূতেন অনুৱিজ্জিতব্বং নো অভূতেন, সণ্হেন অনুৱিজ্জিতব্বং নো ফৰুসেন, অত্থসংহিতেন অনুৱিজ্জিতব্বং নো অনত্থসংহিতেন, মেত্তাচিত্তেন অনুৱিজ্জিতব্বং নো দোসন্তৰেন, ন উপকণ্ণকজপ্পিনা ভৱিতব্বং, ন জিম্হং পেক্খিতব্বং, ন অক্খি নিখণিতব্বং, ন ভমুকং উক্খিপিতব্বং, ন সীসং উক্খিপিতব্বং, ন হত্থৱিকাৰো কাতব্বো, ন হত্থমুদ্দা দস্সেতব্বা.

আসনকুসলেন ভৱিতব্বং নিসজ্জকুসলেন, যুগমত্তং পেক্খন্তেন অত্থং অনুৱিধিযন্তেন সকে আসনে নিসীদিতব্বং, ন চ আসনা ৱুট্ঠাতব্বং, ন ৱীতিহাতব্বং, ন কুম্মগ্গো সেৱিতব্বো, ন বাহাৱিক্খেপকং [ন ৱাচা ৱিক্খেপকং (স্যা.)] ভণিতব্বং, অতুৰিতেন ভৱিতব্বং অসাহসিকেন, অচণ্ডিকতেন ভৱিতব্বং ৱচনক্খমে, মেত্তাচিত্তেন ভৱিতব্বং হিতানুকম্পিনা, কাৰুণিকেন ভৱিতব্বং হিতপৰিসক্কিনা, অসম্ফপ্পলাপিনা ভৱিতব্বং পৰিযন্তভাণিনা, অৱেৰৱসিকেন ভৱিতব্বং অনসুৰুত্তেন, অত্তা পৰিগ্গহেতব্বো, পৰো পৰিগ্গহেতব্বো, চোদকো পৰিগ্গহেতব্বো, চুদিতকো পৰিগ্গহেতব্বো, অধম্মচোদকো পৰিগ্গহেতব্বো, অধম্মচুদিতকো পৰিগ্গহেতব্বো, ধম্মচোদকো পৰিগ্গহেতব্বো, ধম্মচুদিতকো পৰিগ্গহেতব্বো, ৱুত্তং অহাপেন্তেন অৱুত্তং অপকাসেন্তেন ওতিণ্ণানি পদব্যঞ্জনানি সাধুকং পৰিগ্গহেত্ৱা পৰো পটিপুচ্ছিত্ৱা যথা পটিঞ্ঞায কাৰেতব্বো, মন্দো হাসেতব্বো [ৱেপো পহাসেতব্বো (স্যা.)], ভীৰূ অস্সাসেতব্বো, চণ্ডো নিসেধেতব্বো, অসুচি ৱিভাৱেতব্বো, উজুমদ্দৱেন ন ছন্দাগতিং গন্তব্বং, ন দোসাগতিং গন্তব্বং, ন মোহাগতিং গন্তব্বং, ন ভযাগতিং গন্তব্বং, মজ্ঝত্তেন ভৱিতব্বং ধম্মেসু চ পুগ্গলেসু চ. এৱঞ্চ পন অনুৱিজ্জকো অনুৱিজ্জমানো সত্থু চেৱ সাসনকৰো হোতি, ৱিঞ্ঞূনঞ্চ সব্ৰহ্মচাৰীনং পিযো চ হোতি মনাপো চ গৰু চ ভাৱনীযো চ.

৩৬৬. সুত্তং সংসন্দনত্থায, ওপম্মং নিদস্সনত্থায, অত্থো ৱিঞ্ঞাপনত্থায, পটিপুচ্ছা ঠপনত্থায, ওকাসকম্মং চোদনত্থায, চোদনা সাৰণত্থায, সাৰণা সৱচনীযত্থায, সৱচনীযং পলিবোধত্থায, পলিবোধো ৱিনিচ্ছযত্থায, ৱিনিচ্ছযো সন্তীৰণত্থায, সন্তীৰণং ঠানাঠানগমনত্থায, ঠানাঠানগমনং দুম্মঙ্কূনং পুগ্গলানং নিগ্গহত্থায, পেসলানং ভিক্খূনং সম্পগ্গহত্থায, সঙ্ঘো সম্পৰিগ্গহসম্পটিচ্ছনত্থায, সঙ্ঘেন অনুমতা পুগ্গলা পচ্চেকট্ঠাযিনো অৱিসংৱাদকট্ঠাযিনো.

ৱিনযো সংৱৰত্থায, সংৱৰো অৱিপ্পটিসাৰত্থায, অৱিপ্পটিসাৰো পামুজ্জত্থায, পামুজ্জং পীতত্থায, পীতি পস্সদ্ধত্থায, পস্সদ্ধি সুখত্থায, সুখং সমাধত্থায, সমাধি যথাভূতঞাণদস্সনত্থায, যথাভূতঞাণদস্সনং নিব্বিদত্থায, নিব্বিদা ৱিৰাগত্থায, ৱিৰাগো ৱিমুত্তত্থায, ৱিমুত্তি ৱিমুত্তিঞাণদস্সনত্থায, ৱিমুত্তিঞাণদস্সনং অনুপাদাপৰিনিব্বানত্থায. এতদত্থা কথা, এতদত্থা মন্তনা, এতদত্থা উপনিসা, এতদত্থং সোতাৱধানং – যদিদং অনুপাদাচিত্তস্স ৱিমোক্খোতি.

৩৬৭. অনুযোগৱত্তং নিসাময, কুসলেন বুদ্ধিমতা কতং;

সুৱুত্তং সিক্খাপদানুলোমিকং, গতিং ন নাসেন্তো সম্পৰাযিকং.

ৱত্থুং ৱিপত্তিং আপত্তিং, নিদানং আকাৰঅকোৱিদো;

পুব্বাপৰং ন জানাতি, কতাকতং সমেন চ.

কম্মঞ্চ অধিকৰণঞ্চ, সমথে চাপি অকোৱিদো;

ৰত্তো দুট্ঠো চ মূড়্হো চ, ভযা মোহা চ গচ্ছতি.

ন চ সঞ্ঞত্তিকুসলো, নিজ্ঝত্তিযা চ অকোৱিদো;

লদ্ধপক্খো অহিৰিকো, কণ্হকম্মো অনাদৰো;

স ৱে [সচে (ক.)] তাদিসকো ভিক্খু, অপ্পটিক্খোতি ৱুচ্চতি.

ৱত্থুং ৱিপত্তিং আপত্তিং, নিদানং আকাৰকোৱিদো;

পুব্বাপৰঞ্চ জানাতি, কতাকতং সমেন চ.

কম্মঞ্চ অধিকৰণঞ্চ, সমথে চাপি কোৱিদো;

অৰত্তো অদুট্ঠো অমূড়্হো, ভযা মোহা ন গচ্ছতি.

সঞ্ঞত্তিযা চ কুসলো, নিজ্ঝত্তিযা চ কোৱিদো;

লদ্ধপক্খো হিৰিমনো, সুক্ককম্মো সগাৰৱো;

স ৱে তাদিসকো ভিক্খু, সপ্পটিক্খোতি ৱুচ্চতীতি.

চূড়সঙ্গামো নিট্ঠিতো.