২. ভূতগামৱগ্গো

১৬৬. ভূতগামং পাতেন্তো দ্ৱে আপত্তিযো আপজ্জতি. পাতেতি, পযোগে দুক্কটং; পহাৰে পহাৰে আপত্তি পাচিত্তিযস্স.

অঞ্ঞেনঞ্ঞং পটিচৰন্তো দ্ৱে আপত্তিযো আপজ্জতি. অনাৰোপিতে অঞ্ঞৱাদকে অঞ্ঞেনঞ্ঞং পটিচৰতি, আপত্তি দুক্কটস্স; আৰোপিতে অঞ্ঞৱাদকে অঞ্ঞেনঞ্ঞং পটিচৰতি, আপত্তি পাচিত্তিযস্স.

ভিক্খুং উজ্ঝাপেন্তো দ্ৱে আপত্তিযো আপজ্জতি. উজ্ঝাপেতি, পযোগে দুক্কটং; উজ্ঝাপিতে আপত্তি পাচিত্তিযস্স.

সঙ্ঘিকং মঞ্চং ৱা পীঠং ৱা ভিসিং ৱা কোচ্ছং ৱা অজ্ঝোকাসে সন্থৰিত্ৱা অনুদ্ধৰিত্ৱা অনাপুচ্ছা পক্কমন্তো দ্ৱে আপত্তিযো আপজ্জতি. পঠমং পাদং লেড্ডুপাতং অতিক্কামেতি, আপত্তি দুক্কটস্স; দুতিযং পাদং অতিক্কামেতি, আপত্তি পাচিত্তিযস্স.

সঙ্ঘিকে ৱিহাৰে সেয্যং সন্থৰিত্ৱা অনুদ্ধৰিত্ৱা অনাপুচ্ছা পক্কমন্তো দ্ৱে আপত্তিযো আপজ্জতি. পঠমং পাদং পৰিক্খেপং অতিক্কামেতি, আপত্তি দুক্কটস্স; দুতিযং পাদং অতিক্কামেতি, আপত্তি পাচিত্তিযস্স.

সঙ্ঘিকে ৱিহাৰে জানং পুব্বুপগতং ভিক্খুং অনুপখজ্জ সেয্যং কপ্পেন্তো দ্ৱে আপত্তিযো আপজ্জতি. নিপজ্জতি, পযোগে দুক্কটং; নিপন্নে আপত্তি পাচিত্তিযস্স.

ভিক্খুং কুপিতো অনত্তমনো সঙ্ঘিকা ৱিহাৰা নিক্কড্ঢেন্তো দ্ৱে আপত্তিযো আপজ্জতি. নিক্কড্ঢতি, পযোগে দুক্কটং; নিক্কড্ঢিতে আপত্তি পাচিত্তিযস্স.

সঙ্ঘিকে ৱিহাৰে উপৰিৱেহাসকুটিযা আহচ্চপাদকং মঞ্চং ৱা পীঠং ৱা অভিনিসীদন্তো দ্ৱে আপত্তিযো আপজ্জতি. অভিনিসীদতি, পযোগে দুক্কটং; অভিনিসিন্নে আপত্তি পাচিত্তিযস্স.

দ্ৱত্তিপৰিযাযে অধিট্ঠহিত্ৱা ততুত্তৰি অধিট্ঠহন্তো দ্ৱে আপত্তিযো আপজ্জতি. অধিট্ঠেতি, পযোগে দুক্কটং; অধিট্ঠিতে আপত্তি পাচিত্তিযস্স.

জানং সপ্পাণকং উদকং তিণং ৱা মত্তিকং ৱা সিঞ্চন্তো দ্ৱে আপত্তিযো আপজ্জতি. সিঞ্চতি, পযোগে দুক্কটং; সিঞ্চিতে আপত্তি পাচিত্তিযস্স.

ভূতগামৱগ্গো দুতিযো.