৩. ওৱাদৱগ্গো

১৬৭. অসম্মতো ভিক্খুনিযো ওৱদন্তো দ্ৱে আপত্তিযো আপজ্জতি. ওৱদতি, পযোগে দুক্কটং; ওৱদিতে আপত্তি পাচিত্তিযস্স.

অত্থঙ্গতে সূৰিযে ভিক্খুনিযো ওৱদন্তো দ্ৱে আপত্তিযো আপজ্জতি. ওৱদতি, পযোগে দুক্কটং; ওৱদিতে আপত্তি পাচিত্তিযস্স.

ভিক্খুনুপস্সযং উপসঙ্কমিত্ৱা ভিক্খুনিযো ওৱদন্তো দ্ৱে আপত্তিযো আপজ্জতি. ওৱদতি, পযোগে দুক্কটং; ওৱদিতে আপত্তি পাচিত্তিযস্স.

‘‘আমিসহেতু ভিক্খূ ভিক্খুনিযো ওৱদন্তী’’তি ভণন্তো দ্ৱে আপত্তিযো আপজ্জতি. ভণতি, পযোগে দুক্কটং; ভণিতে আপত্তি পাচিত্তিযস্স.

অঞ্ঞাতিকায ভিক্খুনিযা চীৱৰং দেন্তো দ্ৱে আপত্তিযো আপজ্জতি. দেতি, পযোগে দুক্কটং; দিন্নে আপত্তি পাচিত্তিযস্স.

অঞ্ঞাতিকা ভিক্খুনিযা চীৱৰং সিব্বেন্তো দ্ৱে আপত্তিযো আপজ্জতি. সিব্বেতি, পযোগে দুক্কটং; আৰাপথে আৰাপথে আপত্তি পাচিত্তিযস্স.

ভিক্খুনিযা সদ্ধিং সংৱিধায একদ্ধানমগ্গং পটিপজ্জন্তো দ্ৱে আপত্তিযো আপজ্জতি. পটিপজ্জতি, পযোগে দুক্কটং; পটিপন্নে আপত্তি পাচিত্তিযস্স.

ভিক্খুনিযা সদ্ধিং সংৱিধায একং নাৱং অভিৰুহন্তো দ্ৱে আপত্তিযো আপজ্জতি. অভিৰুহতি, পযোগে দুক্কটং; অভিৰুড়্হে আপত্তি পাচিত্তিযস্স.

জানং ভিক্খুনিপৰিপাচিতং পিণ্ডপাতং ভুঞ্জন্তো দ্ৱে আপত্তিযো আপজ্জতি. ‘‘ভুঞ্জিস্সামী’’তি পটিগ্গণ্হাতি, আপত্তি দুক্কটস্স; অজ্ঝোহাৰে অজ্ঝোহাৰে আপত্তি পাচিত্তিযস্স.

ভিক্খুনিযা সদ্ধিং একো একায ৰহো নিসজ্জং কপ্পেন্তো দ্ৱে আপত্তিযো আপজ্জতি. নিসীদতি, পযোগে দুক্কটং; নিসিন্নে আপত্তি পাচিত্তিযস্স.

ওৱাদৱগ্গো ততিযো.