৪. ভোজনৱগ্গো

১৬৮. ততুত্তৰি আৱসথপিণ্ডং ভুঞ্জন্তো দ্ৱে আপত্তিযো আপজ্জতি. ভুঞ্জিস্সামীতি পটিগ্গণ্হাতি, আপত্তি দুক্কটস্স; অজ্ঝোহাৰে অজ্ঝোহাৰে আপত্তি পাচিত্তিযস্স.

গণভোজনং ভুঞ্জন্তো দ্ৱে আপত্তিযো আপজ্জতি. ভুঞ্জিস্সামীতি পটিগ্গণ্হাতি, আপত্তি দুক্কটস্স; অজ্ঝোহাৰে অজ্ঝোহাৰে আপত্তি পাচিত্তিযস্স.

পৰম্পৰভোজনং ভুঞ্জন্তো দ্ৱে আপত্তিযো আপজ্জতি. ভুঞ্জিস্সামীতি পটিগ্গণ্হাতি, আপত্তি দুক্কটস্স; অজ্ঝোহাৰে অজ্ঝোহাৰে আপত্তি পাচিত্তিযস্স.

দ্ৱত্তিপত্তপূৰে পূৱে পটিগ্গহেত্ৱা ততুত্তৰি পটিগ্গণ্হন্তো দ্ৱে আপত্তিযো আপজ্জতি. গণ্হাতি, পযোগে দুক্কটং; গহিতে আপত্তি পাচিত্তিযস্স.

ভুত্তাৱী পৱাৰিতো অনতিৰিত্তং খাদনীযং ৱা ভোজনীযং ৱা ভুঞ্জন্তো দ্ৱে আপত্তিযো আপজ্জতি. ভুঞ্জিস্সামীতি পটিগ্গণ্হাতি, আপত্তি দুক্কটস্স; অজ্ঝোহাৰে অজ্ঝোহাৰে আপত্তি পাচিত্তিযস্স.

ভিক্খুং ভুত্তাৱিং পৱাৰিতং অনতিৰিত্তেন খাদনীযেন ৱা ভোজনীযেন ৱা অভিহট্ঠুং পৱাৰেন্তো দ্ৱে আপত্তিযো আপজ্জতি. তস্স ৱচনেন খাদিস্সামি ভুঞ্জিস্সামীতি পটিগ্গণ্হাতি, আপত্তি দুক্কটস্স; ভোজনপৰিযোসানে আপত্তি পাচিত্তিযস্স.

ৱিকালে খাদনীযং ৱা ভোজনীযং ৱা ভুঞ্জন্তো দ্ৱে আপত্তিযো আপজ্জতি. খাদিস্সামি ভুঞ্জিস্সামীতি পটিগ্গণ্হাতি, আপত্তি দুক্কটস্স; অজ্ঝোহাৰে অজ্ঝোহাৰে আপত্তি পাচিত্তিযস্স.

সন্নিধিকাৰকং খাদনীযং ৱা ভোজনীযং ৱা ভুঞ্জন্তো দ্ৱে আপত্তিযো আপজ্জতি. খাদিস্সামি ভুঞ্জিস্সামীতি পটিগ্গণ্হাতি, আপত্তি দুক্কটস্স; অজ্ঝোহাৰে অজ্ঝোহাৰে আপত্তি পাচিত্তিযস্স.

পণীতভোজনানি অত্তনো অত্থায ৱিঞ্ঞাপেত্ৱা ভুঞ্জন্তো দ্ৱে আপত্তিযো আপজ্জতি. ভুঞ্জিস্সামীতি পটিগ্গণ্হাতি, আপত্তি দুক্কটস্স; অজ্ঝোহাৰে অজ্ঝোহাৰে আপত্তি পাচিত্তিযস্স.

অদিন্নং মুখদ্ৱাৰং আহাৰং আহৰন্তো দ্ৱে আপত্তিযো আপজ্জতি. ভুঞ্জিস্সামীতি পটিগ্গণ্হাতি, আপত্তি দুক্কটস্স; অজ্ঝোহাৰে অজ্ঝোহাৰে আপত্তি পাচিত্তিযস্স.

ভোজনৱগ্গো চতুত্থো.