৫. অচেলকৱগ্গো

১৬৯. অচেলকস্স, ৱা পৰিব্বাজকস্স ৱা পৰিব্বাজিকায ৱা সহত্থা খাদনীযং ৱা ভোজনীযং ৱা দেন্তো দ্ৱে আপত্তিযো আপজ্জতি. দেতি, পযোগে দুক্কটং; দিন্নে আপত্তি পাচিত্তিযস্স.

ভিক্খুং – ‘‘এহাৱুসো, গামং ৱা নিগমং ৱা পিণ্ডায পৱিসিস্সামা’’তি তস্স দাপেত্ৱা ৱা অদাপেত্ৱা ৱা উয্যোজেন্তো দ্ৱে আপত্তিযো আপজ্জতি. উয্যোজেতি, পযোগে দুক্কটং; উয্যোজিতে আপত্তি পাচিত্তিযস্স.

সভোজনে কুলে অনুপখজ্জ নিসজ্জং কপ্পেন্তো দ্ৱে আপত্তিযো আপজ্জতি. নিসীদতি, পযোগে দুক্কটং; নিসিন্নে আপত্তি পাচিত্তিযস্স.

মাতুগামেন সদ্ধিং ৰহো পটিচ্ছন্নে আসনে নিসজ্জং কপ্পেন্তো দ্ৱে আপত্তিযো আপজ্জতি. নিসীদতি, পযোগে দুক্কটং; নিসিন্নে আপত্তি পাচিত্তিযস্স.

মাতুগামেন সদ্ধিং একো একায ৰহো নিসজ্জং কপ্পেন্তো দ্ৱে আপত্তিযো আপজ্জতি. নিসীদতি, পযোগে দুক্কটং; নিসিন্নে আপত্তি পাচিত্তিযস্স.

নিমন্তিতো সভত্তো সমানো পুৰেভত্তং পচ্ছাভত্তং কুলেসু চাৰিত্তং আপজ্জন্তো দ্ৱে আপত্তিযো আপজ্জতি. পঠমং পাদং উম্মাৰং অতিক্কামেতি, আপত্তি দুক্কটস্স; দুতিযং পাদং অতিক্কামেতি, আপত্তি পাচিত্তিযস্স.

ততুত্তৰি ভেসজ্জং ৱিঞ্ঞাপেন্তো দ্ৱে আপত্তিযো আপজ্জতি. ৱিঞ্ঞাপেতি, পযোগে দুক্কটং; ৱিঞ্ঞাপিতে আপত্তি পাচিত্তিযস্স.

উয্যুত্তং সেনং দস্সনায গচ্ছন্তো দ্ৱে আপত্তিযো আপজ্জতি. গচ্ছতি, আপত্তি দুক্কটস্স; যত্থ ঠিতো পস্সতি, আপত্তি পাচিত্তিযস্স.

অতিৰেকতিৰত্তং সেনায ৱসন্তো দ্ৱে আপত্তিযো আপজ্জতি. ৱসতি, পযোগে দুক্কটং; ৱসিতে আপত্তি পাচিত্তিযস্স.

উয্যোধিকং গচ্ছন্তো দ্ৱে আপত্তিযো আপজ্জতি. গচ্ছতি, আপত্তি দুক্কটস্স; যত্থ ঠিতো পস্সতি, আপত্তি পাচিত্তিযস্স.

অচেলকৱগ্গো পঞ্চমো.