৬. সুৰামেৰযৱগ্গো

১৭০. মজ্জং পিৱন্তো দ্ৱে আপত্তিযো আপজ্জতি. ‘‘পিৱিস্সামী’’তি পটিগ্গণ্হাতি, আপত্তি দুক্কটস্স; অজ্ঝোহাৰে অজ্ঝোহাৰে আপত্তি পাচিত্তিযস্স.

ভিক্খুং অঙ্গুলিপতোদকেন হাসেন্তো দ্ৱে আপত্তিযো আপজ্জতি. হাসেতি, পযোগে দুক্কটং; হসিতে আপত্তি পাচিত্তিযস্স.

উদকে কীড়ন্তো দ্ৱে আপত্তিযো আপজ্জতি. হেট্ঠাগোপ্ফকে উদকে কীড়তি, আপত্তি দুক্কটস্স; উপৰিগোপ্ফকে কীড়তি, আপত্তি পাচিত্তিযস্স.

অনাদৰিযং কৰোন্তো দ্ৱে আপত্তিযো আপজ্জতি. কৰোতি, পযোগে দুক্কটং; কতে আপত্তি পাচিত্তিযস্স.

ভিক্খুং ভিংসাপেন্তো দ্ৱে আপত্তিযো আপজ্জতি. ভিংসাপেতি, পযোগে দুক্কটং; ভিংসাপিতে আপত্তি পাচিত্তিযস্স.

জোতিং সমাদহিত্ৱা ৱিসিব্বেন্তো দ্ৱে আপত্তিযো আপজ্জতি. সমাদহতি, পযোগে দুক্কটং; সমাদহিতে আপত্তি পাচিত্তিযস্স.

ওৰেনদ্ধমাসং নহাযন্তো দ্ৱে আপত্তিযো আপজ্জতি. নহাযতি, পযোগে দুক্কটং; নহানপৰিযোসানে আপত্তি পাচিত্তিযস্স.

অনাদিযিত্ৱা তিণ্ণং দুব্বণ্ণকৰণানং অঞ্ঞতৰং দুব্বণ্ণকৰণং নৱং চীৱৰং পৰিভুঞ্জন্তো দ্ৱে আপত্তিযো আপজ্জতি. পৰিভুঞ্জতি, পযোগে দুক্কটং; পৰিভুত্তে আপত্তি পাচিত্তিযস্স.

ভিক্খুস্স ৱা ভিক্খুনিযা ৱা সিক্খমানায ৱা সামণেৰস্স ৱা সামণেৰিযা ৱা সামং চীৱৰং ৱিকপ্পেত্ৱা অপ্পচ্চুদ্ধাৰণং পৰিভুঞ্জন্তো দ্ৱে আপত্তিযো আপজ্জতি. পৰিভুঞ্জতি, পযোগে দুক্কটং; পৰিভুত্তে আপত্তি পাচিত্তিযস্স.

ভিক্খুস্স পত্তং ৱা চীৱৰং ৱা নিসীদনং ৱা সূচিঘৰং ৱা কাযবন্ধনং ৱা অপনিধেন্তো দ্ৱে আপত্তিযো আপজ্জতি. অপনিধেতি, পযোগে দুক্কটং; অপনিধিতে আপত্তি পাচিত্তিযস্স.

সুৰামেৰযৱগ্গো ছট্ঠো.