৭. সপ্পাণকৱগ্গো

১৭১. সঞ্চিচ্চ পাণং জীৱিতা ৱোৰোপেন্তো কতি আপত্তিযো আপজ্জতি? সঞ্চিচ্চ পাণং জীৱিতা ৱোৰোপেন্তো চতস্সো আপত্তিযো আপজ্জতি. অনোদিস্স ওপাতং খণতি – ‘‘যো কোচি পপতিত্ৱা মৰিস্সতী’’তি, আপত্তি দুক্কটস্স; মনুস্সো তস্মিং পপতিত্ৱা মৰতি, আপত্তি পাৰাজিকস্স; যক্খো ৱা পেতো ৱা তিৰচ্ছানগতমনুস্সৱিগ্গহো ৱা তস্মিং পপতিত্ৱা মৰতি, আপত্তি থুল্লচ্চযস্স; তিৰচ্ছানগতো তস্মিং পপতিত্ৱা মৰতি, আপত্তি পাচিত্তিযস্স – সঞ্চিচ্চ পাণং জীৱিতা ৱোৰোপেন্তো ইমা চতস্সো আপত্তিযো আপজ্জতি.

জানং সপ্পাণকং উদকং পৰিভুঞ্জন্তো দ্ৱে আপত্তিযো আপজ্জতি. পৰিভুঞ্জতি, পযোগে দুক্কটং; পৰিভুত্তে আপত্তি পাচিত্তিযস্স.

জানং যথাধম্মং নিহতাধিকৰণং পুনকম্মায উক্কোটেন্তো দ্ৱে আপত্তিযো আপজ্জতি. উক্কোটেতি, পযোগে দুক্কটং; উক্কোটিতে আপত্তি পাচিত্তিযস্স.

ভিক্খুস্স জানং দুট্ঠুল্লং আপত্তিং পটিচ্ছাদেন্তো একং আপত্তিং আপজ্জতি. পাচিত্তিযং.

জানং ঊনৱীসতিৱস্সং পুগ্গলং উপসম্পাদেন্তো দ্ৱে আপত্তিযো আপজ্জতি. উপসম্পাদেতি, পযোগে দুক্কটং; উপসম্পাদিতে আপত্তি পাচিত্তিযস্স.

জানং থেয্যসত্থেন সদ্ধিং সংৱিধায একদ্ধানমগ্গং পটিপজ্জন্তো দ্ৱে আপত্তিযো আপজ্জতি. পটিপজ্জতি, পযোগে দুক্কটং; পটিপন্নে আপত্তি পাচিত্তিযস্স.

মাতুগামেন সদ্ধিং সংৱিধায একদ্ধানমগ্গং পটিপজ্জন্তো দ্ৱে আপত্তিযো আপজ্জতি. পটিপজ্জতি, পযোগে দুক্কটং; পটিপন্নে আপত্তি পাচিত্তিযস্স.

পাপিকায দিট্ঠিযা যাৱততিযং সমনুভাসনায ন পটিনিস্সজ্জন্তো দ্ৱে আপত্তিযো আপজ্জতি. ঞত্তিযা দুক্কটং; কম্মৱাচাপৰিযোসানে আপত্তি পাচিত্তিযস্স.

জানং তথাৱাদিনা ভিক্খুনা অকটানুধম্মেন তং দিট্ঠিং অপ্পটিনিস্সট্ঠেন সদ্ধিং সম্ভুঞ্জন্তো দ্ৱে আপত্তিযো আপজ্জতি. সম্ভুঞ্জতি, পযোগে দুক্কটং; সম্ভুত্তে আপত্তি পাচিত্তিযস্স.

জানং তথানাসিতং সমণুদ্দেসং উপলাপেন্তো দ্ৱে আপত্তিযো আপজ্জতি. উপলাপেতি, পযোগে দুক্কটং; উপলাপিতে আপত্তি পাচিত্তিযস্স.

সপ্পাণকৱগ্গো সত্তমো.