১. মুসাৱাদৱগ্গো

১৬৫. সম্পজানমুসাৱাদং ভাসন্তো কতি আপত্তিযো আপজ্জতি? সম্পজানমুসাৱাদং ভাসন্তো পঞ্চ আপত্তিযো আপজ্জতি. পাপিচ্ছো ইচ্ছাপকতো অসন্তং অভূতং উত্তৰিমনুস্সধম্মং উল্লপতি, আপত্তি পাৰাজিকস্স; ভিক্খুং অমূলকেন পাৰাজিকেন ধম্মেন অনুদ্ধংসেতি, আপত্তি সঙ্ঘাদিসেসস্স; ‘‘যো তে ৱিহাৰে ৱসতি, সো ভিক্খু অৰহা’’তি ভণতি, পটিৱিজানন্তস্স আপত্তি থুল্লচ্চযস্স; ন পটিৱিজানন্তস্স আপত্তি দুক্কটস্স; সম্পজানমুসাৱাদে পাচিত্তিযং – সম্পজানমুসাৱাদং ভাসন্তো ইমা পঞ্চ আপত্তিযো আপজ্জতি.

ওমসন্তো দ্ৱে আপত্তিযো আপজ্জতি. উপসম্পন্নং ওমসতি, আপত্তি পাচিত্তিযস্স; অনুপসম্পন্নং ওমসতি, আপত্তি দুক্কটস্স.

পেসুঞ্ঞং উপসংহৰন্তো দ্ৱে আপত্তিযো আপজ্জতি. উপসম্পন্নস্স পেসুঞ্ঞং উপসংহৰতি, আপত্তি পাচিত্তিযস্স; অনুপসম্পন্নস্স পেসুঞ্ঞং উপসংহৰতি, আপত্তি দুক্কটস্স.

অনুপসম্পন্নং পদসো ধম্মং ৱাচেন্তো দ্ৱে আপত্তিযো আপজ্জতি. ৱাচেতি, পযোগে দুক্কটং; পদে পদে আপত্তি পাচিত্তিযস্স.

অনুপসম্পন্নেন উত্তৰিদিৰত্ততিৰত্তং সহসেয্যং কপ্পেন্তো দ্ৱে আপত্তিযো আপজ্জতি. নিপজ্জতি, পযোগে দুক্কটং; নিপন্নে আপত্তি পাচিত্তিযস্স.

মাতুগামেন সহসেয্যং কপ্পেন্তো দ্ৱে আপত্তিযো আপজ্জতি. নিপজ্জতি, পযোগে দুক্কটং; নিপন্নে আপত্তি পাচিত্তিযস্স.

মাতুগামস্স উত্তৰিছপ্পঞ্চৱাচাহি ধম্মং দেসেন্তো দ্ৱে আপত্তিযো আপজ্জতি. দেসেতি, পযোগে দুক্কটং; পদে পদে আপত্তি পাচিত্তিযস্স.

অনুপসম্পন্নস্স উত্তৰিমনুস্সধম্মং ভূতং আৰোচেন্তো দ্ৱে আপত্তিযো আপজ্জতি. আৰোচেতি, পযোগে দুক্কটং; আৰোচিতে আপত্তি পাচিত্তিযস্স.

ভিক্খুস্স দুট্ঠুল্লং আপত্তিং অনুপসম্পন্নস্স আৰোচেন্তো দ্ৱে আপত্তিযো আপজ্জতি. আৰোচেতি, পযোগে দুক্কটং; আৰোচিতে আপত্তি পাচিত্তিযস্স.

পথৱিং খণন্তো দ্ৱে আপত্তিযো আপজ্জতি. খণতি, পযোগে দুক্কটং; পহাৰে পহাৰে আপত্তি পাচিত্তিযস্স.

মুসাৱাদৱগ্গো পঠমো.