২. কোসিযৱগ্গো

১৬৩. কোসিযমিস্সকং সন্থতং কাৰাপেন্তো দ্ৱে আপত্তিযো আপজ্জতি. কাৰাপেতি, পযোগে দুক্কটং; কাৰাপিতে নিস্সগ্গিযং পাচিত্তিযং.

সুদ্ধকাড়কানং এড়কলোমানং সন্থতং কাৰাপেন্তো দ্ৱে আপত্তিযো আপজ্জতি. কাৰাপেতি, পযোগে দুক্কটং; কাৰাপিতে নিস্সগ্গিযং পাচিত্তিযং.

অনাদিযিত্ৱা তুলং ওদাতানং তুলং গোচৰিযানং নৱং সন্থতং কাৰাপেন্তো দ্ৱে আপত্তিযো আপজ্জতি. কাৰাপেতি, পযোগে দুক্কটং; কাৰাপিতে নিস্সগ্গিযং পাচিত্তিযং.

অনুৱস্সং সন্থতং কাৰাপেন্তো দ্ৱে আপত্তিযো আপজ্জতি. কাৰাপেতি, পযোগে দুক্কটং; কাৰাপিতে নিস্সগ্গিযং পাচিত্তিযং.

অনাদিযিত্ৱা পুৰাণসন্থতস্স সামন্তা সুগতৱিদত্থিং নৱং নিসীদনসন্থতং কাৰাপেন্তো দ্ৱে আপত্তিযো আপজ্জতি. কাৰাপেতি, পযোগে দুক্কটং; কাৰাপিতে নিস্সগ্গিযং পাচিত্তিযং.

এড়কলোমানি পটিগ্গহেত্ৱা তিযোজনং অতিক্কামেন্তো দ্ৱে আপত্তিযো আপজ্জতি. পঠমং পাদং তিযোজনং অতিক্কামেতি, আপত্তি দুক্কটস্স; দুতিযং পাদং অতিক্কামেতি, নিস্সগ্গিযং পাচিত্তিযং.

অঞ্ঞাতিকায ভিক্খুনিযা এড়কলোমানি ধোৱাপেন্তো দ্ৱে আপত্তিযো আপজ্জতি. ধোৱাপেতি, পযোগে দুক্কটং; ধোৱাপিতে নিস্সগ্গিযং পাচিত্তিযং.

ৰূপিযং পটিগ্গণ্হন্তো দ্ৱে আপত্তিযো আপজ্জতি. গণ্হাতি, পযোগে দুক্কটং; গহিতে নিস্সগ্গিযং পাচিত্তিযং.

নানপ্পকাৰকং ৰূপিযসংৱোহাৰং সমাপজ্জন্তো দ্ৱে আপত্তিযো আপজ্জতি. সমাপজ্জতি, পযোগে দুক্কটং; সমাপন্নে নিস্সগ্গিযং পাচিত্তিযং.

নানপ্পকাৰকং কযৱিক্কযং সমাপজ্জন্তো দ্ৱে আপত্তিযো আপজ্জতি. সমাপজ্জতি, পযোগে দুক্কটং; সমাপন্নে নিস্সগ্গিযং পাচিত্তিযং.

কোসিযৱগ্গো দুতিযো.