৩. পত্তৱগ্গো

১৬৪. অতিৰেকপত্তং দসাহং অতিক্কামেন্তো একং আপত্তিং আপজ্জতি. নিস্সগ্গিযং পাচিত্তিযং.

ঊনপঞ্চবন্ধনেন পত্তেন অঞ্ঞং নৱং পত্তং চেতাপেন্তো দ্ৱে আপত্তিযো আপজ্জতি. চেতাপেতি, পযোগে দুক্কটং; চেতাপিতে নিস্সগ্গিযং পাচিত্তিযং.

ভেসজ্জানি পটিগ্গহেত্ৱা সত্তাহং অতিক্কামেন্তো একং আপত্তিং আপজ্জতি. নিস্সগ্গিযং পাচিত্তিযং.

অতিৰেকমাসে সেসে গিম্হানে ৱস্সিকসাটিকচীৱৰং পৰিযেসন্তো দ্ৱে আপত্তিযো আপজ্জতি. পৰিযেসতি, পযোগে দুক্কটং; পৰিযিট্ঠে নিস্সগ্গিযং পাচিত্তিযং.

ভিক্খুস্স সামং চীৱৰং দত্ৱা কুপিতো অনত্তমনো অচ্ছিন্দন্তো দ্ৱে আপত্তিযো আপজ্জতি. অচ্ছিন্দতি, পযোগে দুক্কটং; অচ্ছিন্নে নিস্সগ্গিযং পাচিত্তিযং.

সামং সুত্তং ৱিঞ্ঞাপেত্ৱা তন্তৱাযেহি চীৱৰং ৱাযাপেন্তো দ্ৱে আপত্তিযো আপজ্জতি. ৱাযাপেতি, পযোগে দুক্কটং; ৱাযাপিতে নিস্সগ্গিযং পাচিত্তিযং.

পুব্বে অপ্পৱাৰিতো অঞ্ঞাতকস্স গহপতিকস্স তন্তৱাযে উপসঙ্কমিত্ৱা চীৱৰে ৱিকপ্পং আপজ্জন্তো দ্ৱে আপত্তিযো আপজ্জতি. ৱিকপ্পং আপজ্জতি, পযোগে দুক্কটং; ৱিকপ্পং আপন্নে নিস্সগ্গিযং পাচিত্তিযং.

অচ্চেকচীৱৰং পটিগ্গহেত্ৱা চীৱৰকালসমযং অতিক্কামেন্তো একং আপত্তিং আপজ্জতি. নিস্সগ্গিযং পাচিত্তিযং.

তিণ্ণং চীৱৰানং অঞ্ঞতৰং চীৱৰং অন্তৰঘৰে নিক্খিপিত্ৱা অতিৰেকছাৰত্তং ৱিপ্পৱসন্তো একং আপত্তিং আপজ্জতি. নিস্সগ্গিযং পাচিত্তিযং.

জানং সঙ্ঘিকং লাভং পৰিণতং অত্তনো পৰিণামেন্তো দ্ৱে আপত্তিযো আপজ্জতি. পৰিণামেতি, পযোগে দুক্কটং; পৰিণামিতে নিস্সগ্গিযং পাচিত্তিযং.

পত্তৱগ্গো ততিযো.

তিংস নিস্সগ্গিযা পাচিত্তিযা নিট্ঠিতা.