১. কথিনৱগ্গো

১৬২. অতিৰেকচীৱৰং দসাহং অতিক্কামেন্তো একং আপত্তিং আপজ্জতি. নিস্সগ্গিযং পাচিত্তিযং.

একৰত্তং তিচীৱৰেন ৱিপ্পৱসন্তো একং আপত্তিং আপজ্জতি. নিস্সগ্গিযং পাচিত্তিযং.

অকালচীৱৰং পটিগ্গহেত্ৱা মাসং অতিক্কামেন্তো একং আপত্তিং আপজ্জতি. নিস্সগ্গিযং পাচিত্তিযং.

অঞ্ঞাতিকায ভিক্খুনিযা পুৰাণচীৱৰং ধোৱাপেন্তো দ্ৱে আপত্তিযো আপজ্জতি. ধোৱাপেতি, পযোগে দুক্কটং; ধোৱাপিতে নিস্সগ্গিযং পাচিত্তিযং.

অঞ্ঞাতিকায ভিক্খুনিযা হত্থতো চীৱৰং পটিগ্গণ্হন্তো দ্ৱে আপত্তিযো আপজ্জতি. গণ্হাতি, পযোগে দুক্কটং; গহিতে নিস্সগ্গিযং পাচিত্তিযং.

অঞ্ঞাতকং গহপতিং ৱা গহপতানিং ৱা চীৱৰং ৱিঞ্ঞাপেন্তো দ্ৱে আপত্তিযো আপজ্জতি. ৱিঞ্ঞাপেতি, পযোগে দুক্কটং; ৱিঞ্ঞাপিতে নিস্সগ্গিযং পাচিত্তিযং.

অঞ্ঞাতকং গহপতিং ৱা গহপতানিং ৱা ততুত্তৰি চীৱৰং ৱিঞ্ঞাপেন্তো দ্ৱে আপত্তিযো আপজ্জতি. ৱিঞ্ঞাপেতি, পযোগে দুক্কটং; ৱিঞ্ঞাপিতে নিস্সগ্গিযং পাচিত্তিযং.

পুব্বে অপ্পৱাৰিতো অঞ্ঞাতকং গহপতিকং উপসঙ্কমিত্ৱা চীৱৰে ৱিকপ্পং আপজ্জন্তো দ্ৱে আপত্তিযো আপজ্জতি. ৱিকপ্পং আপজ্জতি, পযোগে দুক্কটং; ৱিকপ্পং আপন্নে নিস্সগ্গিযং পাচিত্তিযং.

পুব্বে অপ্পৱাৰিতো অঞ্ঞাতকে গহপতিকে উপসঙ্কমিত্ৱা চীৱৰে ৱিকপ্পং আপজ্জন্তো দ্ৱে আপত্তিযো আপজ্জতি. ৱিকপ্পং আপজ্জতি, পযোগে দুক্কটং; ৱিকপ্পং আপন্নে নিস্সগ্গিযং পাচিত্তিযং.

অতিৰেকতিক্খত্তুং চোদনায অতিৰেকছক্খত্তুং ঠানেন চীৱৰং অভিনিপ্ফাদেন্তো দ্ৱে আপত্তিযো আপজ্জতি. অভিনিপ্ফাদেতি, পযোগে দুক্কটং; অভিনিপ্ফাদিতে নিস্সগ্গিযং পাচিত্তিযং.

কথিনৱগ্গো পঠমো.