৯. ৰাজৱগ্গো

১৭৩. পুব্বে অপ্পটিসংৱিদিতো ৰঞ্ঞো অন্তেপুৰং পৱিসন্তো দ্ৱে আপত্তিযো আপজ্জতি. পঠমং পাদং উম্মাৰং অতিক্কামেতি, আপত্তি দুক্কটস্স; দুতিযং পাদং অতিক্কামেতি, আপত্তি পাচিত্তিযস্স.

ৰতনং উগ্গণ্হন্তো দ্ৱে আপত্তিযো আপজ্জতি. গণ্হাতি, পযোগে দুক্কটং; গহিতে আপত্তি পাচিত্তিযস্স.

সন্তং ভিক্খুং অনাপুচ্ছা ৱিকালে গামং পৱিসন্তো দ্ৱে আপত্তিযো আপজ্জতি. পঠমং পাদং পৰিক্খেপং অতিক্কামেতি, আপত্তি দুক্কটস্স; দুতিযং পাদং অতিক্কামেতি, আপত্তি পাচিত্তিযস্স.

অট্ঠিমযং ৱা দন্তমযং ৱা ৱিসাণমযং ৱা সূচিঘৰং কাৰাপেন্তো দ্ৱে আপত্তিযো আপজ্জতি. কাৰাপেতি, পযোগে দুক্কটং; কাৰাপিতে আপত্তি পাচিত্তিযস্স.

পমাণাতিক্কন্তং মঞ্চং ৱা পীঠং ৱা কাৰাপেন্তো দ্ৱে আপত্তিযো আপজ্জতি. কাৰাপেতি, পযোগে দুক্কটং; কাৰাপিতে আপত্তি পাচিত্তিযস্স.

মঞ্চং ৱা পীঠং ৱা তূলোনদ্ধং কাৰাপেন্তো দ্ৱে আপত্তিযো আপজ্জতি. কাৰাপেতি, পযোগে দুক্কটং; কাৰাপিতে আপত্তি পাচিত্তিযস্স.

পমাণাতিক্কন্তং নিসীদনং কাৰাপেন্তো দ্ৱে আপত্তিযো আপজ্জতি. কাৰাপেতি, পযোগে দুক্কটং; কাৰাপিতে আপত্তি পাচিত্তিযস্স.

পমাণাতিক্কন্তং কণ্ডুপ্পটিচ্ছাদিং কাৰাপেন্তো দ্ৱে আপত্তিযো আপজ্জতি. কাৰাপেতি, পযোগে দুক্কটং; কাৰাপিতে আপত্তি পাচিত্তিযস্স.

পমাণাতিক্কন্তং ৱস্সিকসাটিকং কাৰাপেন্তো দ্ৱে আপত্তিযো আপজ্জতি. কাৰাপেতি, পযোগে দুক্কটং; কাৰাপিতে আপত্তি পাচিত্তিযস্স.

চীৱৰং কাৰাপেন্তো কতি আপত্তিযো আপজ্জতি? সুগতচীৱৰপ্পমাণং চীৱৰং কাৰাপেন্তো দ্ৱে আপত্তিযো আপজ্জতি. কাৰাপেতি, পযোগে দুক্কটং; কাৰাপিতে আপত্তি পাচিত্তিযস্স – সুগতচীৱৰপ্পমাণং চীৱৰং কাৰাপেন্তো ইমা দ্ৱে আপত্তিযো আপজ্জতি.

ৰাজৱগ্গো নৱমো. খুদ্দকা নিট্ঠিতা.