৫. পাটিদেসনীযকণ্ডং

১৭৪. অঞ্ঞাতিকায ভিক্খুনিযা অন্তৰঘৰং পৱিট্ঠায হত্থতো খাদনীযং ৱা ভোজনীযং ৱা সহত্থা পটিগ্গহেত্ৱা ভুঞ্জন্তো কতি আপত্তিযো আপজ্জতি? অঞ্ঞাতিকায ভিক্খুনিযা অন্তৰঘৰং পৱিট্ঠায হত্থতো খাদনীযং ৱা ভোজনীযং ৱা সহত্থা পটিগ্গহেত্ৱা ভুঞ্জন্তো দ্ৱে আপত্তিযো আপজ্জতি. ভুঞ্জিস্সামীতি পটিগ্গণ্হাতি, আপত্তি দুক্কটস্স; অজ্ঝোহাৰে অজ্ঝোহাৰে আপত্তি পাটিদেসনীযস্স – অঞ্ঞাতিকায ভিক্খুনিযা অন্তৰঘৰং পৱিট্ঠায হত্থতো খাদনীযং ৱা ভোজনীযং ৱা সহত্থা পটিগ্গহেত্ৱা ভুঞ্জন্তো ইমা দ্ৱে আপত্তিযো আপজ্জতি.

ভিক্খুনিযা ৱোসাসন্তিযা ন নিৱাৰেত্ৱা ভুঞ্জন্তো দ্ৱে আপত্তিযো আপজ্জতি. ভুঞ্জিস্সামীতি পটিগ্গণ্হাতি, আপত্তি দুক্কটস্স; অজ্ঝোহাৰে অজ্ঝোহাৰে আপত্তি পাটিদেসনীযস্স.

সেক্খসম্মতেসু কুলেসু খাদনীযং ৱা ভোজনীযং ৱা সহত্থা পটিগ্গহেত্ৱা ভুঞ্জন্তো দ্ৱে আপত্তিযো আপজ্জতি. ভুঞ্জিস্সামীতি পটিগ্গণ্হাতি, আপত্তি দুক্কটস্স; অজ্ঝোহাৰে অজ্ঝোহাৰে আপত্তি পাটিদেসনীযস্স.

আৰঞ্ঞকেসু সেনাসনেসু পুব্বে অপ্পটিসংৱিদিতং খাদনীযং ৱা ভোজনীযং ৱা অজ্ঝাৰামে সহত্থা পটিগ্গহেত্ৱা ভুঞ্জন্তো কতি আপত্তিযো আপজ্জতি? আৰঞ্ঞকেসু সেনাসনেসু পুব্বে অপ্পটিসংৱিদিতং খাদনীযং ৱা ভোজনীযং ৱা অজ্ঝাৰামে সহত্থা পটিগ্গহেত্ৱা ভুঞ্জন্তো দ্ৱে আপত্তিযো আপজ্জতি. ভুঞ্জিস্সামীতি পটিগ্গণ্হাতি, আপত্তি দুক্কটস্স; অজ্ঝোহাৰে অজ্ঝোহাৰে আপত্তি পাটিদেসনীযস্স – আৰঞ্ঞকেসু সেনাসনেসু পুব্বে অপ্পটিসংৱিদিতং খাদনীযং ৱা ভোজনীযং ৱা অজ্ঝাৰামে সহত্থা পটিগ্গহেত্ৱা ভুঞ্জন্তো ইমা দ্ৱে আপত্তিযো আপজ্জতি.

চত্তাৰো পাটিদেসনীযা নিট্ঠিতা.