১. পাৰাজিককণ্ডং

১৫৭. মেথুনং ধম্মং পটিসেৱন্তো কতি আপত্তিযো আপজ্জতি? মেথুনং ধম্মং পটিসেৱন্তো তিস্সো আপত্তিযো আপজ্জতি. অক্খাযিতে সৰীৰে মেথুনং ধম্মং পটিসেৱতি, আপত্তি পাৰাজিকস্স; যেভুয্যেন খাযিতে সৰীৰে মেথুনং ধম্মং পটিসেৱতি, আপত্তি থুল্লচ্চযস্স; ৱট্টকতে [ৱিৱটকতে (স্যা.)] মুখে অচ্ছুপন্তং অঙ্গজাতং পৱেসেতি, আপত্তি দুক্কটস্স – মেথুনং ধম্মং পটিসেৱন্তো ইমা তিস্সো আপত্তিযো আপজ্জতি.

১৫৮. অদিন্নং আদিযন্তো কতি আপত্তিযো আপজ্জতি? অদিন্নং আদিযন্তো তিস্সো আপত্তিযো আপজ্জতি. পঞ্চমাসকং ৱা অতিৰেকপঞ্চমাসকং ৱা অগ্ঘনকং অদিন্নং থেয্যসঙ্খাতং আদিযতি, আপত্তি পাৰাজিকস্স; অতিৰেকমাসকং ৱা ঊনপঞ্চমাসকং ৱা অগ্ঘনকং অদিন্নং থেয্যসঙ্খাতং আদিযতি, আপত্তি থুল্লচ্চযস্স; মাসকং ৱা ঊনমাসকং ৱা অগ্ঘনকং অদিন্নং থেয্যসঙ্খাতং আদিযতি, আপত্তি দুক্কটস্স – অদিন্নং আদিযন্তো ইমা তিস্সো আপত্তিযো আপজ্জতি.

১৫৯. সঞ্চিচ্চ মনুস্সৱিগ্গহং জীৱিতা ৱোৰোপেন্তো কতি আপত্তিযো আপজ্জতি? সঞ্চিচ্চ মনুস্সৱিগ্গহং জীৱিতা ৱোৰোপেন্তো তিস্সো আপত্তিযো আপজ্জতি. মনুস্সং ওদিস্স ওপাতং খণতি ‘‘পপতিত্ৱা মৰিস্সতী’’তি, আপত্তি দুক্কটস্স; পপতিতে দুক্খা ৱেদনা উপ্পজ্জতি, আপত্তি থুল্লচ্চযস্স; মৰতি, আপত্তি পাৰাজিকস্স – সঞ্চিচ্চ মনুস্সৱিগ্গহং জীৱিতা ৱোৰোপেন্তো ইমা তিস্সো আপত্তিযো আপজ্জতি.

১৬০. অসন্তং অভূতং উত্তৰিমনুস্সধম্মং উল্লপন্তো কতি আপত্তিযো আপজ্জতি? অসন্তং অভূতং উত্তৰিমনুস্সধম্মং উল্লপন্তো তিস্সো আপত্তিযো আপজ্জতি. পাপিচ্ছো ইচ্ছাপকতো অসন্তং অভূতং উত্তৰিমনুস্সধম্মং উল্লপতি, আপত্তি পাৰাজিকস্স; ‘‘যো তে ৱিহাৰে ৱসতি, সো ভিক্খু অৰহা’’তি ভণতি, পটিৱিজানন্তস্স আপত্তি থুল্লচ্চযস্স; ন পটিৱিজানন্তস্স আপত্তি দুক্কটস্স – অসন্তং অভূতং উত্তৰিমনুস্সধম্মং উল্লপন্তো ইমা তিস্সো আপত্তিযো আপজ্জতি.

চত্তাৰো পাৰাজিকা নিট্ঠিতা.