২. সঙ্ঘাদিসেসকণ্ডং

১৬১. উপক্কমিত্ৱা অসুচিং মোচেন্তো তিস্সো আপত্তিযো আপজ্জতি. চেতেতি উপক্কমতি মুচ্চতি, আপত্তি সঙ্ঘাদিসেসস্স; চেতেতি উপক্কমতি ন মুচ্চতি, আপত্তি থুল্লচ্চযস্স; পযোগে দুক্কটং.

মাতুগামেন সদ্ধিং কাযসংসগ্গং সমাপজ্জন্তো তিস্সো আপত্তিযো আপজ্জতি. কাযেন কাযং আমসতি, আপত্তি সঙ্ঘাদিসেসস্স; কাযেন কাযপটিবদ্ধং আমসতি, আপত্তি থুল্লচ্চযস্স; কাযপটিবদ্ধেন কাযপটিবদ্ধং আমসতি, আপত্তি দুক্কটস্স.

মাতুগামং দুট্ঠুল্লাহি ৱাচাহি ওভাসেন্তো তিস্সো আপত্তিযো আপজ্জতি. ৱচ্চমগ্গং পস্সাৱমগ্গং আদিস্স ৱণ্ণম্পি ভণতি, অৱণ্ণম্পি ভণতি, আপত্তি সঙ্ঘাদিসেসস্স; ৱচ্চমগ্গং পস্সাৱমগ্গং ঠপেত্ৱা অধক্খকং উব্ভজাণুমণ্ডলং আদিস্স ৱণ্ণম্পি ভণতি অৱণ্ণম্পি ভণতি, আপত্তি থুল্লচ্চযস্স; কাযপটিবদ্ধং আদিস্স ৱণ্ণম্পি ভণতি অৱণ্ণম্পি ভণতি, আপত্তি দুক্কটস্স.

অত্তকামপাৰিচৰিযা ৱণ্ণং ভাসন্তো তিস্সো আপত্তিযো আপজ্জতি. মাতুগামস্স সন্তিকে অত্তকামপাৰিচৰিযায ৱণ্ণং ভাসতি, আপত্তি সঙ্ঘাদিসেসস্স; পণ্ডকস্স সন্তিকে অত্তকামপাৰিচৰিযায ৱণ্ণং ভাসতি, আপত্তি থুল্লচ্চযস্স; তিৰচ্ছানগতস্স সন্তিকে অত্তকামপাৰিচৰিযায ৱণ্ণং ভাসতি, আপত্তি দুক্কটস্স.

সঞ্চৰিত্তং সমাপজ্জন্তো তিস্সো আপত্তিযো আপজ্জতি. পটিগ্গণ্হাতি ৱীমংসতি পচ্চাহৰতি, আপত্তি সঙ্ঘাদিসেসস্স; পটিগ্গণ্হাতি ৱীমংসতি ন পচ্চাহৰতি, আপত্তি থুল্লচ্চযস্স; পটিগ্গণ্হাতি ন ৱীমংসতি ন পচ্চাহৰতি, আপত্তি দুক্কটস্স.

সঞ্ঞাচিকায কুটিং কাৰাপেন্তো তিস্সো আপত্তিযো আপজ্জতি. কাৰাপেতি, পযোগে দুক্কটং; একং পিণ্ডং অনাগতে, আপত্তি থুল্লচ্চযস্স; তস্মিং পিণ্ডে আগতে, আপত্তি সঙ্ঘাদিসেসস্স.

মহল্লকং ৱিহাৰং কাৰাপেন্তো তিস্সো আপত্তিযো আপজ্জতি. কাৰাপেতি, পযোগে দুক্কটং; একং পিণ্ডং অনাগতে, আপত্তি থুল্লচ্চযস্স; তস্মিং পিণ্ডে আগতে, আপত্তি সঙ্ঘাদিসেসস্স.

ভিক্খুং অমূলকেন পাৰাজিকেন ধম্মেন অনুদ্ধংসেন্তো তিস্সো আপত্তিযো আপজ্জতি. অনোকাসং কাৰাপেত্ৱা চাৱনাধিপ্পাযো ৱদেতি, আপত্তি সঙ্ঘাদিসেসেন দুক্কটস্স; ওকাসং কাৰাপেত্ৱা অক্কোসাধিপ্পাযো ৱদেতি, আপত্তি ওমসৱাদস্স.

ভিক্খুং অঞ্ঞভাগিযস্স অধিকৰণস্স কিঞ্চি দেসং লেসমত্তং উপাদায পাৰাজিকেন ধম্মেন অনুদ্ধংসেন্তো তিস্সো আপত্তিযো আপজ্জতি. অনোকাসং কাৰাপেত্ৱা চাৱনাধিপ্পাযো ৱদেতি, আপত্তি সঙ্ঘাদিসেসেন দুক্কটস্স; ওকাসং কাৰাপেত্ৱা অক্কোসাধিপ্পাযো ৱদেতি, আপত্তি ওমসৱাদস্স.

সঙ্ঘভেদকো ভিক্খু যাৱততিযং সমনুভাসনায ন পটিনিস্সজ্জন্তো তিস্সো আপত্তিযো আপজ্জতি. ঞত্তিযা দুক্কটং; দ্ৱীহি কম্মৱাচাহি থুল্লচ্চযা; কম্মৱাচাপৰিযোসানে আপত্তি সঙ্ঘাদিসেসস্স.

ভেদকানুৱত্তকা ভিক্খূ যাৱততিযং সমনুভাসনায [সমনুভাসিযমানা (স্যা.)] ন পটিনিস্সজ্জন্তা তিস্সো আপত্তিযো আপজ্জন্তি. ঞত্তিযা দুক্কটং; দ্ৱীহি কম্মৱাচাহি থুল্লচ্চযা; কম্মৱাচাপৰিযোসানে আপত্তি সঙ্ঘাদিসেসস্স.

দুব্বচো ভিক্খু যাৱততিযং সমনুভাসনায [সমনুভাসিযমানো (স্যা.)] ন পটিনিস্সজ্জন্তো তিস্সো আপত্তিযো আপজ্জতি. ঞত্তিযা দুক্কটং; দ্ৱীহি কম্মৱাচাহি থুল্লচ্চযা; কম্মৱাচাপৰিযোসানে আপত্তি সঙ্ঘাদিসেসস্স.

কুলদূসকো ভিক্খু যাৱততিযং সমনুভাসনায ন পটিনিস্সজ্জন্তো তিস্সো আপত্তিযো আপজ্জতি. ঞত্তিযা দুক্কটং; দ্ৱীহি কম্মৱাচাহি থুল্লচ্চযা; কম্মৱাচাপৰিযোসানে আপত্তি সঙ্ঘাদিসেসস্স.

তেৰস সঙ্ঘাদিসেসা নিট্ঠিতা.