১. লসুণৱগ্গো

২৩১. লসুণং খাদন্তী দ্ৱে আপত্তিযো আপজ্জতি. খাদিস্সামীতি পটিগ্গণ্হাতি, আপত্তি দুক্কটস্স; অজ্ঝোহাৰে অজ্ঝোহাৰে আপত্তি পাচিত্তিযস্স.

সম্বাধে লোমং সংহৰাপেন্তী দ্ৱে আপত্তিযো আপজ্জতি. সংহৰাপেতি, পযোগে দুক্কটং; সংহৰাপিতে আপত্তি পাচিত্তিযস্স.

তলঘাতকং কৰোন্তী দ্ৱে আপত্তিযো আপজ্জতি. কৰোতি, পযোগে দুক্কটং; কতে আপত্তি পাচিত্তিযস্স.

জতুমট্ঠকং আদিযন্তী দ্ৱে আপত্তিযো আপজ্জতি. আদিযতি, পযোগে দুক্কটং, আদিন্নে আপত্তি পাচিত্তিযস্স.

অতিৰেকদ্ৱঙ্গুলপব্বপৰমং উদকসুদ্ধিকং আদিযন্তী দ্ৱে আপত্তিযো আপজ্জতি. আদিযতি, পযোগে দুক্কটং; আদিন্নে আপত্তি পাচিত্তিযস্স.

ভিক্খুস্স ভুঞ্জন্তস্স পানীযেন ৱা ৱিধূপনেন ৱা উপতিট্ঠন্তী দ্ৱে আপত্তিযো আপজ্জতি. হত্থপাসে তিট্ঠতি, আপত্তি পাচিত্তিযস্স; হত্থপাসং ৱিজহিত্ৱা তিট্ঠতি, আপত্তি দুক্কটস্স.

আমকধঞ্ঞং ৱিঞ্ঞাপেত্ৱা ভুঞ্জন্তী দ্ৱে আপত্তিযো আপজ্জতি. ভুঞ্জিস্সামীতি পটিগ্গণ্হাতি, আপত্তি দুক্কটস্স; অজ্ঝোহাৰে অজ্ঝোহাৰে আপত্তি পাচিত্তিযস্স.

উচ্চাৰং ৱা পস্সাৱং ৱা সঙ্কাৰং ৱা ৱিঘাসং ৱা তিৰোকুট্টে ৱা তিৰোপাকাৰে ৱা ছড্ডেন্তী দ্ৱে আপত্তিযো আপজ্জতি. ছড্ডেতি, পযোগে দুক্কটং; ছড্ডিতে আপত্তি পাচিত্তিযস্স.

উচ্চাৰং ৱা পস্সাৱং ৱা সঙ্কাৰং ৱা ৱিঘাসং ৱা হৰিতে ছড্ডেন্তী দ্ৱে আপত্তিযো আপজ্জতি. ছড্ডেতি, পযোগে দুক্কটং; ছড্ডিতে আপত্তি পাচিত্তিযস্স.

নচ্চং ৱা গীতং ৱা ৱাদিতং ৱা দস্সনায গচ্ছন্তী দ্ৱে আপত্তিযো আপজ্জতি. গচ্ছতি, আপত্তি দুক্কটস্স; যত্থ ঠিতা পস্সতি ৱা সুণাতি ৱা, আপত্তি পাচিত্তিযস্স.

লসুণৱগ্গো পঠমো.