৫. চিত্তাগাৰৱগ্গো

২২২. ৰাজাগাৰং ৱা চিত্তাগাৰং ৱা আৰামং ৱা উয্যানং ৱা পোক্খৰণিং ৱা দস্সনায গচ্ছন্তিযা পাচিত্তিযং কত্থ পঞ্ঞত্তন্তি? সাৱত্থিযং পঞ্ঞত্তং. কং আৰব্ভাতি? ছব্বগ্গিযা ভিক্খুনিযো আৰব্ভ. কিস্মিং ৱত্থুস্মিন্তি? ছব্বগ্গিযা ভিক্খুনিযো ৰাজাগাৰম্পি চিত্তাগাৰম্পি দস্সনায অগমংসু, তস্মিং ৱত্থুস্মিং. একা পঞ্ঞত্তি. ছন্নং আপত্তিসমুট্ঠানানং দ্ৱীহি সমুট্ঠানেহি সমুট্ঠাতি – এড়কলোমকে…পে….

আসন্দিং ৱা পল্লঙ্কং ৱা পৰিভুঞ্জন্তিযা পাচিত্তিযং কত্থ পঞ্ঞত্তন্তি? সাৱত্থিযং পঞ্ঞত্তং. কং আৰব্ভাতি? সম্বহুলা ভিক্খুনিযো আৰব্ভ. কিস্মিং ৱত্থুস্মিন্তি? সম্বহুলা ভিক্খুনিযো আসন্দিম্পি পল্লঙ্কম্পি পৰিভুঞ্জিংসু, তস্মিং ৱত্থুস্মিং. একা পঞ্ঞত্তি. ছন্নং আপত্তিসমুট্ঠানানং দ্ৱীহি সমুট্ঠানেহি সমুট্ঠাতি – এড়কলোমকে…পে….

সুত্তং কন্তন্তিযা পাচিত্তিযং কত্থ পঞ্ঞত্তন্তি? সাৱত্থিযং পঞ্ঞত্তং. কং আৰব্ভাতি? ছব্বগ্গিযা ভিক্খুনিযো আৰব্ভ. কিস্মিং ৱত্থুস্মিন্তি? ছব্বগ্গিযা ভিক্খুনিযো সুত্তং কন্তিংসু, তস্মিং ৱত্থুস্মিং. একা পঞ্ঞত্তি. ছন্নং আপত্তিসমুট্ঠানানং দ্ৱীহি সমুট্ঠানেহি সমুট্ঠাতি – এড়কলোমকে…পে….

গিহিৱেয্যাৱচ্চং কৰোন্তিযা পাচিত্তিযং কত্থ পঞ্ঞত্তন্তি? সাৱত্থিযং পঞ্ঞত্তং. কং আৰব্ভাতি? সম্বহুলা ভিক্খুনিযো আৰব্ভ. কিস্মিং ৱত্থুস্মিন্তি? সম্বহুলা ভিক্খুনিযো গিহিৱেয্যাৱচ্চং অকংসু, তস্মিং ৱত্থুস্মিং. একা পঞ্ঞত্তি. ছন্নং আপত্তিসমুট্ঠানানং দ্ৱীহি সমুট্ঠানেহি সমুট্ঠাতি – এড়কলোমকে…পে….

ভিক্খুনিযা ‘‘এহায্যে ইমং অধিকৰণং ৱূপসমেহী’’তি ৱুচ্চমানায ‘‘সাধূ’’তি পটিস্সুণিত্ৱা নেৱ ৱূপসমেন্তিযা ন ৱূপসমায উস্সুক্কং কৰোন্তিযা পাচিত্তিযং কত্থ পঞ্ঞত্তন্তি? সাৱত্থিযং পঞ্ঞত্তং. কং আৰব্ভাতি? থুল্লনন্দং ভিক্খুনিং আৰব্ভ. কিস্মিং ৱত্থুস্মিন্তি? থুল্লনন্দা ভিক্খুনী ভিক্খুনিযা – ‘‘এহায্যে, ইমং অধিকৰণং ৱূপসমেহী’’তি ৱুচ্চমানা ‘‘সাধূ’’তি পটিস্সুণিত্ৱা নেৱ ৱূপসমেসি ন ৱূপসমায উস্সুক্কং অকাসি, তস্মিং ৱত্থুস্মিং. একা পঞ্ঞত্তি. ছন্নং আপত্তিসমুট্ঠানানং একেন সমুট্ঠানেন সমুট্ঠাতি – ধুৰনিক্খেপে…পে….

অগাৰিকস্স ৱা পৰিব্বাজকস্স ৱা পৰিব্বাজিকায ৱা সহত্থা খাদনীযং ৱা ভোজনীযং ৱা দেন্তিযা পাচিত্তিযং কত্থ পঞ্ঞত্তন্তি? সাৱত্থিযং পঞ্ঞত্তং. কং আৰব্ভাতি? থুল্লনন্দং ভিক্খুনিং আৰব্ভ. কিস্মিং ৱত্থুস্মিন্তি? থুল্লনন্দা ভিক্খুনী অগাৰিকস্স সহত্থা খাদনীযম্পি ভোজনীযম্পি অদাসি, তস্মিং ৱত্থুস্মিং. একা পঞ্ঞত্তি. ছন্নং আপত্তিসমুট্ঠানানং দ্ৱীহি সমুট্ঠানেহি সমুট্ঠাতি – এড়কলোমকে…পে….

আৱসথচীৱৰং অনিস্সজ্জিত্ৱা পৰিভুঞ্জন্তিযা পাচিত্তিযং কত্থ পঞ্ঞত্তন্তি? সাৱত্থিযং পঞ্ঞত্তং. কং আৰব্ভাতি? থুল্লনন্দং ভিক্খুনিং আৰব্ভ. কিস্মিং ৱত্থুস্মিন্তি? থুল্লনন্দা ভিক্খুনী আৱসথচীৱৰং অনিস্সজ্জিত্ৱা পৰিভুঞ্জি, তস্মিং ৱত্থুস্মিং. একা পঞ্ঞত্তি. ছন্নং আপত্তিসমুট্ঠানানং দ্ৱীহি সমুট্ঠানেহি সমুট্ঠাতি – কথিনকে…পে….

আৱসথং অনিস্সজ্জিত্ৱা চাৰিকং পক্কমন্তিযা পাচিত্তিযং কত্থ পঞ্ঞত্তন্তি? সাৱত্থিযং পঞ্ঞত্তং. কং আৰব্ভাতি? থুল্লনন্দং ভিক্খুনিং আৰব্ভ. কিস্মিং ৱত্থুস্মিন্তি? থুল্লনন্দা ভিক্খুনী আৱসথং অনিস্সজ্জিত্ৱা চাৰিকং পক্কামি, তস্মিং ৱত্থুস্মিং. একা পঞ্ঞত্তি. ছন্নং আপত্তিসমুট্ঠানানং দ্ৱীহি সমুট্ঠানেহি সমুট্ঠাতি – কথিনকে…পে….

তিৰচ্ছানৱিজ্জং পৰিযাপুণন্তিযা পাচিত্তিযং কত্থ পঞ্ঞত্তন্তি? সাৱত্থিযং পঞ্ঞত্তং. কং আৰব্ভাতি? ছব্বগ্গিযা ভিক্খুনিযো আৰব্ভ. কিস্মিং ৱত্থুস্মিন্তি? ছব্বগ্গিযা ভিক্খুনিযো তিৰচ্ছানৱিজ্জং পৰিযাপুণিংসু, তস্মিং ৱত্থুস্মিং. একা পঞ্ঞত্তি. ছন্নং আপত্তিসমুট্ঠানানং দ্ৱীহি সমুট্ঠানেহি সমুট্ঠাতি – পদসোধম্মে…পে….

তিৰচ্ছানৱিজ্জং ৱাচেন্তিযা পাচিত্তিযং কত্থ পঞ্ঞত্তন্তি? সাৱত্থিযং পঞ্ঞত্তং. কং আৰব্ভাতি? ছব্বগ্গিযা ভিক্খুনিযো আৰব্ভ. কিস্মিং ৱত্থুস্মিন্তি. ছব্বগ্গিযা ভিক্খুনিযো তিৰচ্ছানৱিজ্জং ৱাচেসুং, তস্মিং ৱত্থুস্মিং. একা পঞ্ঞত্তি. ছন্নং আপত্তিসমুট্ঠানানং দ্ৱীহি সমুট্ঠানেহি সমুট্ঠাতি – পদসোধম্মে…পে….

চিত্তাগাৰৱগ্গো পঞ্চমো.