২. সঙ্ঘাদিসেসকণ্ডং

২০৬. যং তেন ভগৱতা জানতা পস্সতা অৰহতা সম্মাসম্বুদ্ধেন উস্সযৱাদিকায ভিক্খুনিযা অড্ডং কৰোন্তিযা সঙ্ঘাদিসেসো কত্থ পঞ্ঞত্তো? কং আৰব্ভ? কিস্মিং ৱত্থুস্মিং…পে… কেনাভতন্তি?

২০৭. যং তেন ভগৱতা জানতা পস্সতা অৰহতা সম্মাসম্বুদ্ধেন উস্সযৱাদিকায ভিক্খুনিযা অড্ডং কৰোন্তিযা সঙ্ঘাদিসেসো কত্থ পঞ্ঞত্তোতি? সাৱত্থিযং পঞ্ঞত্তো. কং আৰব্ভাতি? থুল্লনন্দং ভিক্খুনিং আৰব্ভ. কিস্মিং ৱত্থুস্মিন্তি? থুল্লনন্দা ভিক্খুনী উস্সযৱাদিকা ৱিহৰি, তস্মিং ৱত্থুস্মিং. অত্থি তত্থ পঞ্ঞত্তি, অনুপঞ্ঞত্তি, অনুপ্পন্নপঞ্ঞত্তীতি? একা পঞ্ঞত্তি. অনুপঞ্ঞত্তি অনুপ্পন্নপঞ্ঞত্তি তস্মিং নত্থি. সব্বত্থপঞ্ঞত্তি, পদেসপঞ্ঞত্তীতি? সব্বত্থপঞ্ঞত্তি. সাধাৰণপঞ্ঞত্তি, অসাধাৰণপঞ্ঞত্তীতি? অসাধাৰণপঞ্ঞত্তি. একতোপঞ্ঞত্তি, উভতোপঞ্ঞত্তীতি? একতোপঞ্ঞত্তি. চতুন্নং পাতিমোক্খুদ্দেসানং কত্থোগধং কত্থ পৰিযাপন্নন্তি? নিদানোগধং নিদানপৰিযাপন্নং. কতমেন উদ্দেসেন উদ্দেসং আগচ্ছতীতি? ততিযেন উদ্দেসেন উদ্দেসং আগচ্ছতি. চতুন্নং ৱিপত্তীনং কতমা ৱিপত্তীতি? সীলৱিপত্তি. সত্তন্নং আপত্তিক্খন্ধানং কতমো আপত্তিক্খন্ধোতি? সঙ্ঘাদিসেসাপত্তিক্খন্ধো. ছন্নং আপত্তিসমুট্ঠানানং কতিহি সমুট্ঠানেহি সমুট্ঠাতীতি? দ্ৱীহি সমুট্ঠানেহি সমুট্ঠাতি – সিযা কাযতো চ ৱাচতো চ সমুট্ঠাতি, ন চিত্ততো; সিযা কাযতো চ ৱাচতো চ চিত্ততো চ সমুট্ঠাতি…পে… কেনাভতন্তি? পৰম্পৰাভতং –

উপালি দাসকো চেৱ, সোণকো সিগ্গৱো তথা;

মোগ্গলিপুত্তেন পঞ্চমা, এতে জম্বুসিৰিৱ্হযে. …পে…;

এতে নাগা মহাপঞ্ঞা, ৱিনযঞ্ঞূ মগ্গকোৱিদা;

ৱিনযং দীপে পকাসেসুং, পিটকং তম্বপণ্ণিযাতি.

২০৮. চোৰিং ৱুট্ঠাপেন্তিযা সঙ্ঘাদিসেসো কত্থ পঞ্ঞত্তোতি? সাৱত্থিযং পঞ্ঞত্তো. কং আৰব্ভাতি? থুল্লনন্দং ভিক্খুনিং আৰব্ভ. কিস্মিং ৱত্থুস্মিন্তি? থুল্লনন্দা ভিক্খুনী চোৰিং ৱুট্ঠাপেসি, তস্মিং ৱত্থুস্মিং. একা পঞ্ঞত্তি. ছন্নং আপত্তিসমুট্ঠানানং দ্ৱীহি সমুট্ঠানেহি সমুট্ঠাতি – সিযা ৱাচতো চ চিত্ততো চ সমুট্ঠাতি, ন কাযতো; সিযা কাযতো চ ৱাচতো চ চিত্ততো চ সমুট্ঠাতি…পে….

২০৯. একায গামন্তৰং গচ্ছন্তিযা সঙ্ঘাদিসেসো কত্থ পঞ্ঞত্তোতি? সাৱত্থিযং পঞ্ঞত্তো. কং আৰব্ভাতি? অঞ্ঞতৰং ভিক্খুনিং আৰব্ভ. কিস্মিং ৱত্থুস্মিন্তি? অঞ্ঞতৰা ভিক্খুনী একা গামন্তৰং গচ্ছি, তস্মিং ৱত্থুস্মিং. একা পঞ্ঞত্তি, তিস্সো অনুপঞ্ঞত্তিযো. ছন্নং আপত্তিসমুট্ঠানানং একেন সমুট্ঠানেন সমুট্ঠাতি – পঠমপাৰাজিকে…পে….

২১০. সমগ্গেন সঙ্ঘেন উক্খিত্তং ভিক্খুনিং ধম্মেন ৱিনযেন সত্থুসাসনেন অনপলোকেত্ৱা কাৰকসঙ্ঘং অনঞ্ঞায গণস্স ছন্দং ওসাৰেন্তিযা সঙ্ঘাদিসেসো কত্থ পঞ্ঞত্তোতি? সাৱত্থিযং পঞ্ঞত্তো. কং আৰব্ভাতি? থুল্লনন্দং ভিক্খুনিং আৰব্ভ. কিস্মিং ৱত্থুস্মিন্তি? থুল্লনন্দা ভিক্খুনী সমগ্গেন সঙ্ঘেন উক্খিত্তং ভিক্খুনিং ধম্মেন ৱিনযেন সত্থুসাসনেন অনপলোকেত্ৱা কাৰকসঙ্ঘং অনঞ্ঞায গণস্স ছন্দং ওসাৰেসি, তস্মিং ৱত্থুস্মিং. একা পঞ্ঞত্তি. ছন্নং আপত্তিসমুট্ঠানানং একেন সমুট্ঠানেন সমুট্ঠাতি – ধুৰনিক্খেপে…পে….

২১১. অৱস্সুতায ভিক্খুনিযা অৱস্সুতস্স পুৰিসপুগ্গলস্স হত্থতো খাদনীযং ৱা ভোজনীযং ৱা সহত্থা পটিগ্গহেত্ৱা ভুঞ্জন্তিযা সঙ্ঘাদিসেসো কত্থ পঞ্ঞত্তোতি? সাৱত্থিযং পঞ্ঞত্তো. কং আৰব্ভাতি? সুন্দৰীনন্দং ভিক্খুনিং আৰব্ভ. কিস্মিং ৱত্থুস্মিন্তি? সুন্দৰীনন্দা ভিক্খুনী অৱস্সুতা অৱস্সুতস্স পুৰিসপুগ্গলস্স হত্থতো আমিসং পটিগ্গহেসি, তস্মিং ৱত্থুস্মিং. একা পঞ্ঞত্তি. ছন্নং আপত্তিসমুট্ঠানানং একেন সমুট্ঠানেন সমুট্ঠাতি – পঠমপাৰাজিকে…পে….

২১২. ‘‘কিং তে, অয্যে, এসো পুৰিসপুগ্গলো কৰিস্সতি অৱস্সুতো ৱা অনৱস্সুতো ৱা, যতো ত্ৱং অনৱস্সুতা! ইঙ্ঘ, অয্যে, যং তে এসো পুৰিসপুগ্গলো দেতি খাদনীযং ৱা ভোজনীযং ৱা, তং ত্ৱং সহত্থা পটিগ্গহেত্ৱা খাদ ৱা ভুঞ্জ ৱা’’তি উয্যোজেন্তিযা সঙ্ঘাদিসেসো কত্থ পঞ্ঞত্তোতি? সাৱত্থিযং পঞ্ঞত্তো. কং অৰব্ভাতি? অঞ্ঞতৰং ভিক্খুনিং আৰব্ভ. কিস্মিং ৱত্থুস্মিন্তি? অঞ্ঞতৰা ভিক্খুনী –‘‘কিং তে, অয্যে, এসো পুৰিসপুগ্গলো কৰিস্সতি অৱস্সুতো ৱা অনৱস্সুতো ৱা, যতো ত্ৱং অনৱস্সুতা! ইঙ্ঘ, অয্যে, যং তে এসো পুৰিসপুগ্গলো দেতি খাদনীযং ৱা ভোজনীযং ৱা, তং ত্ৱং সহত্থা পটিগ্গহেত্ৱা খাদ ৱা ভুঞ্জ ৱা’’তি উয্যোজেসি, তস্মিং ৱত্থুস্মিং. একা পঞ্ঞত্তি. ছন্নং আপত্তিসমুট্ঠানানং তীহি সমুট্ঠানেহি সমুট্ঠাতি…পে….

২১৩. কুপিতায অনত্তমনায ভিক্খুনিযা যাৱততিযং সমনুভাসনায ন পটিনিস্সজ্জন্তিযা সঙ্ঘাদিসেসো কত্থ পঞ্ঞত্তোতি? সাৱত্থিযং পঞ্ঞত্তো. কং আৰব্ভাতি? চণ্ডকাড়িং ভিক্খুনিং আৰব্ভ. কিস্মিং ৱত্থুস্মিন্তি? চণ্ডকাড়ী ভিক্খুনী কুপিতা অনত্তমনা এৱং অৱচ – ‘‘বুদ্ধং পচ্চাচিক্খামি, ধম্মং পচ্চাচিক্খামি, সঙ্ঘং পচ্চাচিক্খামি, সিক্খং পচ্চাচিক্খামী’’তি, তস্মিং ৱত্থুস্মিং. একা পঞ্ঞত্তি. ছন্নং আপত্তিসমুট্ঠানানং একেন সমুট্ঠানেন সমুট্ঠাতি – ধুৰনিক্খেপে…পে….

২১৪. কিস্মিঞ্চিদেৱ অধিকৰণে পচ্চাকতায ভিক্খুনিযা যাৱততিযং সমনুভাসনায ন পটিনিস্সজ্জন্তিযা সঙ্ঘাদিসেসো কত্থ পঞ্ঞত্তোতি? সাৱত্থিযং পঞ্ঞত্তো. কং আৰব্ভাতি? চণ্ডকাড়িং ভিক্খুনিং আৰব্ভ. কিস্মিং ৱত্থুস্মিন্তি? চণ্ডকাড়ী ভিক্খুনী কিস্মিঞ্চিদেৱ অধিকৰণে পচ্চাকতা কুপিতা অনত্তমনা এৱং অৱচ – ‘‘ছন্দগামিনিযো চ ভিক্খুনিযো, দোসগামিনিযো চ ভিক্খুনিযো, মোহগামিনিযো চ ভিক্খুনিযো, ভযগামিনিযো চ ভিক্খুনিযো’’তি, তস্মিং ৱত্থুস্মিং. একা পঞ্ঞত্তি. ছন্নং আপত্তিসমুট্ঠানানং একেন সমুট্ঠানেন সমুট্ঠাতি – ধুৰনিক্খেপে…পে….

২১৫. সংসট্ঠানং ভিক্খুনীনং যাৱততিযং সমনুভাসনায ন পটিনিস্সজ্জন্তীনং সঙ্ঘাদিসেসো কত্থ পঞ্ঞত্তোতি? সাৱত্থিযং পঞ্ঞত্তো. কং আৰব্ভাতি? সম্বহুলা ভিক্খুনিযো আৰব্ভ. কিস্মিং ৱত্থুস্মিন্তি? সম্বহুলা ভিক্খুনিযো সংসট্ঠা ৱিহৰিংসু, তস্মিং ৱত্থুস্মিং. একা পঞ্ঞত্তি. ছন্নং আপত্তিসমুট্ঠানানং একেন সমুট্ঠানেন সমুট্ঠাতি – ধুৰনিক্খেপে…পে….

২১৬. ‘‘সংসট্ঠাৱ, অয্যে, তুম্হে ৱিহৰথ. মা তুম্হে নানা ৱিহৰিত্থা’’তি উয্যোজেন্তিযা যাৱততিযং সমনুভাসনায ন পটিনিস্সজ্জন্তিযা সঙ্ঘাদিসেসো কত্থ পঞ্ঞত্তোতি? সাৱত্থিযং পঞ্ঞত্তো. কং আৰব্ভাতি? থুল্লনন্দং ভিক্খুনিং আৰব্ভ. কিস্মিং ৱত্থুস্মিন্তি? থুল্লনন্দা ভিক্খুনী – ‘‘সংসট্ঠাৱ অয্যে, তুম্হে ৱিহৰথ, মা তুম্হে নানা ৱিহৰিত্থা’’তি উয্যোজেসি, তস্মিং ৱত্থুস্মিং. একা পঞ্ঞত্তি. ছন্নং আপত্তিসমুট্ঠানানং একেন সমুট্ঠানেন সমুট্ঠাতি – ধুৰনিক্খেপে…পে….

দস সঙ্ঘাদিসেসা নিট্ঠিতা.

তস্সুদ্দানং –

উস্সযচোৰি গামন্তং, উক্খিত্তং খাদনেন চ;

কিং তে কুপিতা কিস্মিঞ্চি, সংসট্ঠা ঞাযতে দসাতি.