১. পাৰাজিককণ্ডং

১৯৩. মেথুনং ধম্মং পটিসেৱনপচ্চযা কতি আপত্তিযো আপজ্জতি? মেথুনং ধম্মং পটিসেৱনপচ্চযা চতস্সো আপত্তিযো আপজ্জতি – অক্খাযিতে সৰীৰে মেথুনং ধম্মং পটিসেৱতি, আপত্তি পাৰাজিকস্স; যেভুয্যেন খাযিতে সৰীৰে মেথুনং ধম্মং পটিসেৱতি, আপত্তি থুল্লচ্চযস্স; ৱট্টকতে মুখে অচ্ছুপন্তং অঙ্গজাতং পৱেসেতি, আপত্তি দুক্কটস্স; জতুমট্ঠকে পাচিত্তিযং – মেথুনং ধম্মং পটিসেৱনপচ্চযা ইমা চতস্সো আপত্তিযো আপজ্জতি.

অদিন্নং আদিযনপচ্চযা কতি আপত্তিযো আপজ্জতি? অদিন্নং আদিযনপচ্চযা তিস্সো আপত্তিযো আপজ্জতি. পঞ্চমাসকং ৱা অতিৰেকপঞ্চমাসকং ৱা অগ্ঘনকং অদিন্নং থেয্যসঙ্খাতং আদিযতি, আপত্তি পাৰাজিকস্স; অতিৰেকমাসকং ৱা ঊনপঞ্চমাসকং ৱা অগ্ঘনকং অদিন্নং থেয্যসঙ্খাতং আদিযতি, আপত্তি থুল্লচ্চযস্স; মাসকং ৱা ঊনমাসকং ৱা অগ্ঘনকং অদিন্নং থেয্যসঙ্খাতং আদিযতি, আপত্তি দুক্কটস্স – অদিন্নং আদিযনপচ্চযা ইমা তিস্সো আপত্তিযো আপজ্জতি.

সঞ্চিচ্চ মনুস্সৱিগ্গহং জীৱিতা ৱোৰোপনপচ্চযা কতি আপত্তিযো আপজ্জতি? সঞ্চিচ্চ মনুস্সৱিগ্গহং জীৱিতা ৱোৰোপনপচ্চযা তিস্সো আপত্তিযো আপজ্জতি. মনুস্সং ওদিস্স ওপাতং খণতি ‘‘পপতিত্ৱা মৰিস্সতী’’তি, আপত্তি দুক্কটস্স; পপতিতে দুক্খা ৱেদনা উপ্পজ্জতি, আপত্তি থুল্লচ্চযস্স; মৰতি, আপত্তি পাৰাজিকস্স – সঞ্চিচ্চ মনুস্সৱিগ্গহং জীৱিতা ৱোৰোপনপচ্চযা ইমা তিস্সো আপত্তিযো আপজ্জতি.

অসন্তং অভূতং উত্তৰিমনুস্সধম্মং উল্লপনপচ্চযা কতি আপত্তিযো আপজ্জতি? অসন্তং অভূতং উত্তৰিমনুস্সধম্মং উল্লপনপচ্চযা তিস্সো আপত্তিযো আপজ্জতি – পাপিচ্ছো ইচ্ছাপকতো অসন্তং অভূতং উত্তৰিমনুস্সধম্মং উল্লপতি, আপত্তি পাৰাজিকস্স, ‘‘যো তে ৱিহাৰে ৱসতি সো ভিক্খু অৰহা’’তি ভণতি, পটিৱিজানন্তস্স আপত্তি থুল্লচ্চযস্স; ন পটিৱিজানন্তস্স আপত্তি দুক্কটস্স – অসন্তং অভূতং উত্তৰিমনুস্সধম্মং উল্লপনপচ্চযা ইমা তিস্সো আপত্তিযো আপজ্জতি.

চত্তাৰো পাৰাজিকা নিট্ঠিতা.