২. কতাপত্তিৱাৰো

১. পাৰাজিককণ্ডং

১৯৩. মেথুনং ধম্মং পটিসেৱনপচ্চযা কতি আপত্তিযো আপজ্জতি? মেথুনং ধম্মং পটিসেৱনপচ্চযা চতস্সো আপত্তিযো আপজ্জতি – অক্খাযিতে সৰীৰে মেথুনং ধম্মং পটিসেৱতি, আপত্তি পাৰাজিকস্স; যেভুয্যেন খাযিতে সৰীৰে মেথুনং ধম্মং পটিসেৱতি, আপত্তি থুল্লচ্চযস্স; ৱট্টকতে মুখে অচ্ছুপন্তং অঙ্গজাতং পৱেসেতি, আপত্তি দুক্কটস্স; জতুমট্ঠকে পাচিত্তিযং – মেথুনং ধম্মং পটিসেৱনপচ্চযা ইমা চতস্সো আপত্তিযো আপজ্জতি.

অদিন্নং আদিযনপচ্চযা কতি আপত্তিযো আপজ্জতি? অদিন্নং আদিযনপচ্চযা তিস্সো আপত্তিযো আপজ্জতি. পঞ্চমাসকং ৱা অতিৰেকপঞ্চমাসকং ৱা অগ্ঘনকং অদিন্নং থেয্যসঙ্খাতং আদিযতি, আপত্তি পাৰাজিকস্স; অতিৰেকমাসকং ৱা ঊনপঞ্চমাসকং ৱা অগ্ঘনকং অদিন্নং থেয্যসঙ্খাতং আদিযতি, আপত্তি থুল্লচ্চযস্স; মাসকং ৱা ঊনমাসকং ৱা অগ্ঘনকং অদিন্নং থেয্যসঙ্খাতং আদিযতি, আপত্তি দুক্কটস্স – অদিন্নং আদিযনপচ্চযা ইমা তিস্সো আপত্তিযো আপজ্জতি.

সঞ্চিচ্চ মনুস্সৱিগ্গহং জীৱিতা ৱোৰোপনপচ্চযা কতি আপত্তিযো আপজ্জতি? সঞ্চিচ্চ মনুস্সৱিগ্গহং জীৱিতা ৱোৰোপনপচ্চযা তিস্সো আপত্তিযো আপজ্জতি. মনুস্সং ওদিস্স ওপাতং খণতি ‘‘পপতিত্ৱা মৰিস্সতী’’তি, আপত্তি দুক্কটস্স; পপতিতে দুক্খা ৱেদনা উপ্পজ্জতি, আপত্তি থুল্লচ্চযস্স; মৰতি, আপত্তি পাৰাজিকস্স – সঞ্চিচ্চ মনুস্সৱিগ্গহং জীৱিতা ৱোৰোপনপচ্চযা ইমা তিস্সো আপত্তিযো আপজ্জতি.

অসন্তং অভূতং উত্তৰিমনুস্সধম্মং উল্লপনপচ্চযা কতি আপত্তিযো আপজ্জতি? অসন্তং অভূতং উত্তৰিমনুস্সধম্মং উল্লপনপচ্চযা তিস্সো আপত্তিযো আপজ্জতি – পাপিচ্ছো ইচ্ছাপকতো অসন্তং অভূতং উত্তৰিমনুস্সধম্মং উল্লপতি, আপত্তি পাৰাজিকস্স, ‘‘যো তে ৱিহাৰে ৱসতি সো ভিক্খু অৰহা’’তি ভণতি, পটিৱিজানন্তস্স আপত্তি থুল্লচ্চযস্স; ন পটিৱিজানন্তস্স আপত্তি দুক্কটস্স – অসন্তং অভূতং উত্তৰিমনুস্সধম্মং উল্লপনপচ্চযা ইমা তিস্সো আপত্তিযো আপজ্জতি.

চত্তাৰো পাৰাজিকা নিট্ঠিতা.

২. সঙ্ঘাদিসেসকণ্ডাদি

১৯৪. উপক্কমিত্ৱা অসুচিং মোচনপচ্চযা কতি আপত্তিযো আপজ্জতি? উপক্কমিত্ৱা অসুচিমোচনপচ্চযা তিস্সো আপত্তিযো আপজ্জতি – চেতেতি উপক্কমতি মুচ্চতি, আপত্তি সঙ্ঘাদিসেসস্স; চেতেতি উপক্কমতি ন মুচ্চতি, আপত্তি থুল্লচ্চযস্স; পযোগে দুক্কটং – উপক্কমিত্ৱা অসুচিমোচনপচ্চযা ইমা তিস্সো আপত্তিযো আপজ্জতি.

কাযসংসগ্গং সমাপজ্জনপচ্চযা কতি আপত্তিযো আপজ্জতি? কাযসংসগ্গং সমাপজ্জনপচ্চযা পঞ্চ আপত্তিযো আপজ্জতি – অৱস্সুতা ভিক্খুনী অৱস্সুতস্স পুৰিসপুগ্গলস্স অধক্খকং উব্ভজাণুমণ্ডলং গহণং সাদিযতি, আপত্তি পাৰাজিকস্স; ভিক্খু কাযেন কাযং আমসতি, আপত্তি সঙ্ঘাদিসেসস্স; কাযেন কাযপটিবদ্ধং আমসতি, আপত্তি থুল্লচ্চযস্স; কাযপটিবদ্ধেন কাযপটিবদ্ধং আমসতি, আপত্তি দুক্কটস্স; অঙ্গুলিপতোদকে পাচিত্তিযং – কাযসংসগ্গং সমাপজ্জনপচ্চযা ইমা পঞ্চ আপত্তিযো আপজ্জতি.

মাতুগামং দুট্ঠুল্লাহি ৱাচাহি ওভাসনপচ্চযা তিস্সো আপত্তিযো আপজ্জতি – ৱচ্চমগ্গং পস্সাৱমগ্গং আদিস্স ৱণ্ণম্পি ভণতি অৱণ্ণম্পি ভণতি, আপত্তি সঙ্ঘাদিসেসস্স; ৱচ্চমগ্গং পস্সাৱমগ্গং ঠপেত্ৱা অধক্খকং উব্ভজাণুমণ্ডলং আদিস্স ৱণ্ণম্পি ভণতি অৱণ্ণম্পি ভণতি, আপত্তি থুল্লচ্চযস্স; কাযপটিবদ্ধং আদিস্স ৱণ্ণম্পি ভণতি অৱণ্ণম্পি ভণতি, আপত্তি দুক্কটস্স.

অত্তকামপাৰিচৰিযায ৱণ্ণং ভাসনপচ্চযা তিস্সো আপত্তিযো আপজ্জতি – মাতুগামস্স সন্তিকে অত্তকামপাৰিচৰিযায ৱণ্ণং ভাসতি, আপত্তি সঙ্ঘাদিসেসস্স; পণ্ডকস্স সন্তিকে অত্তকামপাৰিচৰিযায ৱণ্ণং ভাসতি, আপত্তি থুল্লচ্চযস্স; তিৰচ্ছানগতস্স সন্তিকে অত্তকামপাৰিচৰিযায ৱণ্ণং ভাসতি, আপত্তি দুক্কটস্স.

সঞ্চৰিত্তং সমাপজ্জনপচ্চযা তিস্সো আপত্তিযো আপজ্জতি – পটিগ্গণ্হাতি ৱীমংসতি পচ্চাহৰতি, আপত্তি সঙ্ঘাদিসেসস্স; পটিগ্গণ্হাতি ৱীমংসতি ন পচ্চাহৰতি, আপত্তি থুল্লচ্চযস্স; পটিগ্গণ্হাতি ন ৱীমংসতি ন পচ্চাহৰতি, আপত্তি দুক্কটস্স.

সঞ্ঞাচিকায কুটিং কাৰাপনপচ্চযা তিস্সো আপত্তিযো আপজ্জতি – কাৰাপেতি, পযোগে দুক্কটং; একং পিণ্ডং [একপিণ্ডে (স্যা.)] অনাগতে আপত্তি থুল্লচ্চযস্স; তস্মিং পিণ্ডে আগতে আপত্তি সঙ্ঘাদিসেসস্স.

মহল্লকং ৱিহাৰং কাৰাপনপচ্চযা তিস্সো আপত্তিযো আপজ্জতি – কাৰাপেতি, পযোগে দুক্কটং; একং পিণ্ডং অনাগতে, আপত্তি থুল্লচ্চযস্স; তস্মিং পিণ্ডে আগতে আপত্তি সঙ্ঘাদিসেসস্স.

ভিক্খুং অমূলকেন পাৰাজিকেন ধম্মেন অনুদ্ধংসনপচ্চযা তিস্সো আপত্তিযো আপজ্জতি – অনোকাসং কাৰাপেত্ৱা চাৱনাধিপ্পাযো ৱদেতি, আপত্তি সঙ্ঘাদিসেসেন দুক্কটস্স; ওকাসং কাৰাপেত্ৱা অক্কোসাধিপ্পাযো ৱদেতি, আপত্তি ওমসৱাদস্স.

ভিক্খুং অঞ্ঞভাগিযস্স অধিকৰণস্স কিঞ্চি দেসং লেসমত্তং উপাদায পাৰাজিকেন ধম্মেন অনুদ্ধংসনপচ্চযা তিস্সো আপত্তিযো আপজ্জতি – অনোকাসং কাৰাপেত্ৱা চাৱনাধিপ্পাযো ৱদেতি, আপত্তি সঙ্ঘাদিসেসেন দুক্কটস্স; ওকাসং কাৰাপেত্ৱা অক্কোসাধিপ্পাযো ৱদেতি, আপত্তি ওমসৱাদস্স.

সঙ্ঘভেদকো ভিক্খু যাৱততিযং সমনুভাসনায ন পটিনিস্সজ্জনপচ্চযা তিস্সো আপত্তিযো আপজ্জতি – ঞত্তিযা দুক্কটং; দ্ৱীহি কম্মৱাচাহি থুল্লচ্চযা; কম্মৱাচাপৰিযোসানে আপত্তি সঙ্ঘাদিসেসস্স.

ভেদকানুৱত্তকা ভিক্খূ যাৱততিযং সমনুভাসনায ন পটিনিস্সজ্জনপচ্চযা তিস্সো আপত্তিযো আপজ্জতি – ঞত্তিযা দুক্কটং; দ্ৱীহি কম্মৱাচাহি থুল্লচ্চযা; কম্মৱাচাপৰিযোসানে আপত্তি সঙ্ঘাদিসেসস্স.

দুব্বচো ভিক্খু যাৱততিযং সমনুভাসনায ন পটিনিস্সজ্জনপচ্চযা তিস্সো আপত্তিযো আপজ্জতি – ঞত্তিযা দুক্কটং; দ্ৱীহি কম্মৱাচাহি থুল্লচ্চযা; কম্মৱাচাপৰিযোসানে আপত্তি সঙ্ঘাদিসেসস্স.

কুলদূসকো ভিক্খু যাৱততিযং সমনুভাসনায ন পটিনিস্সজ্জনপচ্চযা তিস্সো আপত্তিযো আপজ্জতি – ঞত্তিযা দুক্কটং; দ্ৱীহি কম্মৱাচাহি থুল্লচ্চযা; কম্মৱাচাপৰিযোসানে আপত্তি সঙ্ঘাদিসেসস্স…পে….

অনাদৰিযং পটিচ্চ উদকে উচ্চাৰং ৱা পস্সাৱং ৱা খেড়ং ৱা কৰণপচ্চযা কতি আপত্তিযো আপজ্জতি? অনাদৰিযং পটিচ্চ উদকে উচ্চাৰং ৱা পস্সাৱং ৱা খেড়ং ৱা কৰণপচ্চযা একং আপত্তিং আপজ্জতি. দুক্কটং – অনাদৰিযং পটিচ্চ উদকে উচ্চাৰং ৱা পস্সাৱং ৱা খেড়ং ৱা কৰণপচ্চযা ইমং একং আপত্তিং আপজ্জতি.

কতাপত্তিৱাৰো নিট্ঠিতো দুতিযো.