২. উজ্জগ্ঘিকৱগ্গো

১৫১. অনাদৰিযং পটিচ্চ উজ্জগ্ঘিকায অন্তৰঘৰে গচ্ছন্তস্স দুক্কটং কত্থ পঞ্ঞত্তন্তি? সাৱত্থিযং পঞ্ঞত্তং. কং আৰব্ভাতি? ছব্বগ্গিযে ভিক্খূ আৰব্ভ. কিস্মিং ৱত্থুস্মিন্তি? ছব্বগ্গিযা ভিক্খূ মহাহসিতং হসন্তা অন্তৰঘৰে গচ্ছিংসু, তস্মিং ৱত্থুস্মিং. একা পঞ্ঞত্তি. ছন্নং আপত্তিসমুট্ঠানানং একেন সমুট্ঠানেন সমুট্ঠাতি – কাযতো চ ৱাচতো চ চিত্ততো চ সমুট্ঠাতি…পে….

অনাদৰিযং পটিচ্চ উজ্জগ্ঘিকায অন্তৰঘৰে নিসীদন্তস্স দুক্কটং কত্থ পঞ্ঞত্তন্তি? সাৱত্থিযং পঞ্ঞত্তং. কং আৰব্ভাতি? ছব্বগ্গিযে ভিক্খূ আৰব্ভ. কিস্মিং ৱত্থুস্মিন্তি? ছব্বগ্গিযা ভিক্খূ মহাহসিতং হসন্তা অন্তৰঘৰে নিসীদিংসু, তস্মিং ৱত্থুস্মিং. একা পঞ্ঞত্তি. ছন্নং আপত্তিসমুট্ঠানানং একেন সমুট্ঠানেন সমুট্ঠাতি – কাযতো চ ৱাচতো চ চিত্ততো চ সমুট্ঠাতি…পে….

অনাদৰিযং পটিচ্চ উচ্চাসদ্দং মহাসদ্দং কৰোন্তেন অন্তৰঘৰে গচ্ছন্তস্স দুক্কটং কত্থ পঞ্ঞত্তন্তি? সাৱত্থিযং পঞ্ঞত্তং. কং আৰব্ভাতি? ছব্বগ্গিযে ভিক্খূ আৰব্ভ. কিস্মিং ৱত্থুস্মিন্তি? ছব্বগ্গিযা ভিক্খূ উচ্চাসদ্দং মহাসদ্দং কৰোন্তা অন্তৰঘৰে গচ্ছিংসু, তস্মিং ৱত্থুস্মিং. একা পঞ্ঞত্তি. ছন্নং আপত্তিসমুট্ঠানানং একেন সমুট্ঠানেন সমুট্ঠাতি – কাযতো চ ৱাচতো চ চিত্ততো চ সমুট্ঠাতি…পে….

অনাদৰিযং পটিচ্চ উচ্চাসদ্দং মহাসদ্দং কৰোন্তেন অন্তৰঘৰে নিসীদন্তস্স দুক্কটং কত্থ পঞ্ঞত্তন্তি? সাৱত্থিযং পঞ্ঞত্তং. কং আৰব্ভাতি? ছব্বগ্গিযে ভিক্খূ আৰব্ভ. কিস্মিং ৱত্থুস্মিন্তি? ছব্বগ্গিযা ভিক্খূ উচ্চাসদ্দং মহাসদ্দং কৰোন্তা অন্তৰঘৰে নিসীদিংসু, তস্মিং ৱত্থুস্মিং. একা পঞ্ঞত্তি. ছন্নং আপত্তিসমুট্ঠানানং একেন সমুট্ঠানেন সমুট্ঠাতি – কাযতো চ ৱাচতো চ চিত্ততো চ সমুট্ঠাতি…পে….

অনাদৰিযং পটিচ্চ কাযপ্পচালকং অন্তৰঘৰে গচ্ছন্তস্স দুক্কটং…পে… একা পঞ্ঞত্তি. একেন সমুট্ঠানেন সমুট্ঠাতি – কাযতো চ চিত্ততো চ সমুট্ঠাতি, ন ৱাচতো…পে….

অনাদৰিযং পটিচ্চ কাযপ্পচালকং অন্তৰঘৰে নিসীদন্তস্স দুক্কটং…পে… একা পঞ্ঞত্তি. একেন সমুট্ঠানেন সমুট্ঠাতি – কাযতো চ চিত্ততো চ সমুট্ঠাতি, ন ৱাচতো…পে….

অনাদৰিযং পটিচ্চ বাহুপ্পচালকং অন্তৰঘৰে গচ্ছন্তস্স দুক্কটং…পে… একা পঞ্ঞত্তি. একেন সমুট্ঠানেন সমুট্ঠাতি – কাযতো চ চিত্ততো চ সমুট্ঠাতি, ন ৱাচতো…পে….

অনাদৰিযং পটিচ্চ বাহুপ্পচালকং অন্তৰঘৰে নিসীদন্তস্স দুক্কটং…পে… একা পঞ্ঞত্তি. একেন সমুট্ঠানেন সমুট্ঠাতি – কাযতো চ চিত্ততো চ সমুট্ঠাতি, ন ৱাচতো…পে….

অনাদৰিযং পটিচ্চ সীসপ্পচালকং অন্তৰঘৰে গচ্ছন্তস্স দুক্কটং…পে… একা পঞ্ঞত্তি. একেন সমুট্ঠানেন সমুট্ঠাতি – কাযতো চ চিত্ততো চ সমুট্ঠাতি, ন ৱাচতো…পে….

অনাদৰিযং পটিচ্চ সীসপ্পচালকং অন্তৰঘৰে নিসীদন্তস্স দুক্কটং…পে… একা পঞ্ঞত্তি. একেন সমুট্ঠানেন সমুট্ঠাতি – কাযতো চ চিত্ততো চ সমুট্ঠাতি, ন ৱাচতো…পে….

উজ্জগ্ঘিকৱগ্গো দুতিযো.