ৱিনীতৱত্থু

২২৩. তেন খো পন সমযেন অঞ্ঞতৰো ভিক্খু অধিমানেন অঞ্ঞং ব্যাকাসি. তস্স কুক্কুচ্চং অহোসি – ‘‘ভগৱতা সিক্খাপদং পঞ্ঞত্তং. কচ্চি নু খো অহং পাৰাজিকং আপত্তিং আপন্নো’’তি? ভগৱতো এতমত্থং আৰোচেসি. ‘‘অনাপত্তি, ভিক্খু, অধিমানেনা’’তি.

তেন খো পন সমযেন অঞ্ঞতৰো ভিক্খু পণিধায অৰঞ্ঞে ৱিহৰতি – ‘‘এৱং মং জনো সম্ভাৱেস্সতী’’তি. তং জনো সম্ভাৱেসি. তস্স কুক্কুচ্চং অহোসি…পে… ‘‘অনাপত্তি, ভিক্খু, পাৰাজিকস্স. ন চ, ভিক্খৱে, পণিধায অৰঞ্ঞে ৱত্থব্বং. যো ৱসেয্য, আপত্তি দুক্কটস্সা’’তি.

তেন খো পন সমযেন অঞ্ঞতৰো ভিক্খু পণিধায পিণ্ডায চৰতি – ‘‘এৱং মং জনো সম্ভাৱেস্সতী’’তি. তং জনো সম্ভাৱেসি. তস্স কুক্কুচ্চং অহোসি…পে… ‘‘অনাপত্তি, ভিক্খু, পাৰাজিকস্স. ন চ, ভিক্খৱে, পণিধায পিণ্ডায চৰিতব্বং. যো চৰেয্য, আপত্তি দুক্কটস্সা’’তি.

তেন খো পন সমযেন অঞ্ঞতৰো ভিক্খু অঞ্ঞতৰং ভিক্খুং এতদৱোচ – ‘‘যে, আৱুসো, অম্হাকং উপজ্ঝাযস্স সদ্ধিৱিহাৰিকা সব্বেৱ অৰহন্তো’’তি. তস্স কুক্কুচ্চং অহোসি…পে… ‘‘কিংচিত্তো ত্ৱং, ভিক্খূ’’তি? ‘‘উল্লপনাধিপ্পাযো অহং, ভগৱা’’তি. ‘‘অনাপত্তি, ভিক্খু, পাৰাজিকস্স; আপত্তি থুল্লচ্চযস্সা’’তি.

তেন খো পন সমযেন অঞ্ঞতৰো ভিক্খু অঞ্ঞতৰং ভিক্খুং এতদৱোচ – ‘‘যে, আৱুসো, অম্হাকং উপজ্ঝাযস্স অন্তেৱাসিকা সব্বেৱ মহিদ্ধিকা মহানুভাৱা’’তি. তস্স কুক্কুচ্চং অহোসি…পে… ‘‘কিংচিত্তো ত্ৱং, ভিক্খূ’’তি? ‘‘উল্লপনাধিপ্পাযো অহং, ভগৱা’’তি. ‘‘অনাপত্তি, ভিক্খু, পাৰাজিকস্স; আপত্তি থুল্লচ্চযস্সা’’তি.

তেন খো পন সমযেন অঞ্ঞতৰো ভিক্খু পণিধায চঙ্কমতি… পণিধায তিট্ঠতি… পণিধায নিসীদতি… পণিধায সেয্যং কপ্পেতি – ‘‘এৱং মং জনো সম্ভাৱেস্সতী’’তি. তং জনো সম্ভাৱেসি. তস্স কুক্কুচ্চং অহোসি…পে… ‘‘অনাপত্তি, ভিক্খু, পাৰাজিকস্স. ন চ, ভিক্খৱে, পণিধায সেয্যা কপ্পেতব্বা. যো কপ্পেয্য, আপত্তি দুক্কটস্সা’’তি.

তেন খো পন সমযেন অঞ্ঞতৰো ভিক্খু অঞ্ঞতৰস্স ভিক্খুনো উত্তৰিমনুস্সধম্মং উল্লপতি. সোপি এৱমাহ – ‘‘ময্হম্পি, আৱুসো, সংযোজনা পহীনা’’তি. তস্স কুক্কুচ্চং অহোসি…পে… ‘‘আপত্তিং ত্ৱং, ভিক্খু, আপন্নো পাৰাজিক’’ন্তি.

২২৪. তেন খো পন সমযেন অঞ্ঞতৰো ভিক্খু ৰহোগতো উত্তৰিমনুস্সধম্মং উল্লপতি. পৰচিত্তৱিদূ ভিক্খু তং ভিক্খুং অপসাদেসি – ‘‘মা, আৱুসো, এৱৰূপং অভণি. নত্থেসো তুয্হ’’ন্তি. তস্স কুক্কুচ্চং অহোসি…পে… ‘‘অনাপত্তি, ভিক্খু, পাৰাজিকস্স; আপত্তি দুক্কটস্সা’’তি.

তেন খো পন সমযেন অঞ্ঞতৰো ভিক্খু ৰহোগতো উত্তৰিমনুস্সধম্মং উল্লপতি. দেৱতা তং ভিক্খুং অপসাদেসি – ‘‘মা, ভন্তে, এৱৰূপং অভণি. নত্থেসো তুয্হ’’ন্তি. তস্স কুক্কুচ্চং অহোসি…পে… ‘‘অনাপত্তি, ভিক্খু, পাৰাজিকস্স; আপত্তি দুক্কটস্সা’’তি.

তেন খো পন সমযেন অঞ্ঞতৰো ভিক্খু অঞ্ঞতৰং উপাসকং এতদৱোচ – ‘‘যো, আৱুসো, তুয্হং ৱিহাৰে ৱসতি সো ভিক্খু অৰহা’’তি. সো চ তস্স ৱিহাৰে ৱসতি. তস্স কুক্কুচ্চং অহোসি…পে… ‘‘কিংচিত্তো ত্ৱং, ভিক্খূ’’তি? ‘‘উল্লপনাধিপ্পাযো অহং, ভগৱা’’তি. ‘‘অনাপত্তি, ভিক্খু, পাৰাজিকস্স; আপত্তি থুল্লচ্চযস্সা’’তি.

তেন খো পন সমযেন অঞ্ঞতৰো ভিক্খু অঞ্ঞতৰং উপাসকং এতদৱোচ – ‘‘যং ত্ৱং, আৱুসো, উপট্ঠেসি চীৱৰপিণ্ডপাতসেনাসনগিলানপ্পচ্চযভেসজ্জপৰিক্খাৰেন সো ভিক্খু অৰহা’’তি. সো চ তং উপট্ঠেতি চীৱৰপিণ্ডপাতসেনাসনগিলানপ্পচ্চযভেসজ্জপৰিক্খাৰেন. তস্স কুক্কুচ্চং অহোসি…পে… ‘‘কিংচিত্তো ত্ৱং, ভিক্খূ’’তি? ‘‘উল্লপনাধিপ্পাযো অহং, ভগৱা’’তি. ‘‘অনাপত্তি, ভিক্খু, পাৰাজিকস্স; আপত্তি থুল্লচ্চযস্সা’’তি.

২২৫. তেন খো পন সমযেন অঞ্ঞতৰো ভিক্খু গিলানো হোতি. তং ভিক্খূ এতদৱোচুং – ‘‘অত্থাযস্মতো উত্তৰিমনুস্সধম্মো’’তি? ‘‘নাৱুসো, দুক্কৰং অঞ্ঞং ব্যাকাতু’’ন্তি. তস্স কুক্কুচ্চং অহোসি – ‘‘যে খো তে ভগৱতো সাৱকা তে এৱং ৱদেয্যুং. অহঞ্চম্হি ন ভগৱতো সাৱকো. কচ্চি নু খো অহং পাৰাজিকং আপত্তিং আপন্নো’’তি? ভগৱতো এতমত্থং আৰোচেসি. ‘‘কিংচিত্তো ত্ৱং, ভিক্খূ’’তি? ‘‘অনুল্লপনাধিপ্পাযো অহং, ভগৱা’’তি. ‘‘অনাপত্তি, ভিক্খু, অনুল্লপনাধিপ্পাযস্সা’’তি.

তেন খো পন সমযেন অঞ্ঞতৰো ভিক্খু গিলানো হোতি. তং ভিক্খূ এতদৱোচুং – ‘‘অত্থাযস্মতো উত্তৰিমনুস্সধম্মো’’তি? ‘‘আৰাধনীযো খো, আৱুসো, ধম্মো আৰদ্ধৱীৰিযেনা’’তি. তস্স কুক্কুচ্চং অহোসি…পে… ‘‘অনাপত্তি, ভিক্খু, অনুল্লপনাধিপ্পাযস্সা’’তি.

তেন খো পন সমযেন অঞ্ঞতৰো ভিক্খু গিলানো হোতি. তং ভিক্খূ এতদৱোচুং – ‘‘মা খো, আৱুসো, ভাযী’’তি. নাহং, আৱুসো, মচ্চুনো ভাযামী’’তি. তস্স কুক্কুচ্চং অহোসি…পে… ‘‘অনাপত্তি, ভিক্খু, অনুল্লপনাধিপ্পাযস্সা’’তি.

তেন খো পন সমযেন অঞ্ঞতৰো ভিক্খু গিলানো হোতি. তং ভিক্খূ এতদৱোচুং – ‘‘মা খো, আৱুসো, ভাযী’’তি. ‘‘যো নূনাৱুসো, ৱিপ্পটিসাৰী অস্স সো ভাযেয্যা’’তি. তস্স কুক্কুচ্চং অহোসি…পে… ‘‘অনাপত্তি, ভিক্খু, অনুল্লপনাধিপ্পাযস্সা’’তি.

তেন খো পন সমযেন অঞ্ঞতৰো ভিক্খু গিলানো হোতি. তং ভিক্খূ এতদৱোচুং – ‘‘অত্থাযস্মতো উত্তৰিমনুস্সধম্মো’’তি? ‘‘আৰাধনীযো খো, আৱুসো, ধম্মো সম্মাপযুত্তেনা’’তি. তস্স কুক্কুচ্চং অহোসি…পে… ‘‘অনাপত্তি, ভিক্খু, অনুল্লপনাধিপ্পাযস্সা’’তি.

তেন খো পন সমযেন অঞ্ঞতৰো ভিক্খু গিলানো হোতি. তং ভিক্খূ এতদৱোচুং – ‘‘অত্থাযস্মতো উত্তৰিমনুস্সধম্মো’’তি? ‘‘আৰাধনীযো খো, আৱুসো, ধম্মো যুত্তযোগেনা’’তি. তস্স কুক্কুচ্চং অহোসি…পে… ‘‘অনাপত্তি, ভিক্খু, অনুল্লপনাধিপ্পাযস্সা’’তি.

তেন খো পন সমযেন অঞ্ঞতৰো ভিক্খু গিলানো হোতি. তং ভিক্খূ এতদৱোচুং – ‘‘কচ্চাৱুসো, খমনীযং, কচ্চি যাপনীয’’ন্তি? ‘‘নাৱুসো, সক্কা যেন ৱা তেন ৱা অধিৱাসেতু’’ন্তি. তস্স কুক্কুচ্চং অহোসি…পে… ‘‘অনাপত্তি, ভিক্খু, অনুল্লপনাধিপ্পাযস্সা’’তি.

তেন খো পন সমযেন অঞ্ঞতৰো ভিক্খু গিলানো হোতি. তং ভিক্খূ এতদৱোচুং – ‘‘কচ্চাৱুসো খমনীযং, কচ্চি যাপনীয’’ন্তি? ‘‘নাৱুসো, সক্কা পুথুজ্জনেন অধিৱাসেতু’’ন্তি. তস্স কুক্কুচ্চং অহোসি…পে… ‘‘কিংচিত্তো ত্ৱং, ভিক্খূ’’তি? ‘‘উল্লপনাধিপ্পাযো অহং, ভগৱা’’তি. ‘‘অনাপত্তি, ভিক্খু, পাৰাজিকস্স; আপত্তি থুল্লচ্চযস্সা’’তি.

২২৬. তেন খো পন সমযেন অঞ্ঞতৰো ব্ৰাহ্মণো ভিক্খূ নিমন্তেত্ৱা এতদৱোচ – ‘‘আযন্তু, ভোন্তো অৰহন্তো’’তি. তেসং কুক্কুচ্চং অহোসি – ‘‘মযঞ্চম্হ ন অৰহন্তো [অনৰহন্তো (সী.)]. অযঞ্চ ব্ৰাহ্মণো অম্হে অৰহন্তৱাদেন সমুদাচৰতি. কথং নু খো অম্হেহি পটিপজ্জিতব্ব’’ন্তি? ভগৱতো এতমত্থং আৰোচেসুং. ‘‘অনাপত্তি, ভিক্খৱে, পসাদভঞ্ঞে’’তি.

তেন খো পন সমযেন অঞ্ঞতৰো ব্ৰাহ্মণো ভিক্খূ নিমন্তেত্ৱা এতদৱোচ – ‘‘নিসীদন্তু, ভোন্তো অৰহন্তো’’তি… ‘‘ভুঞ্জন্তু, ভোন্তো অৰহন্তো’’তি… ‘‘তপ্পেন্তু, ভোন্তো অৰহন্তো’’তি… ‘‘গচ্ছন্তু, ভোন্তো অৰহন্তো’’তি. তেসং কুক্কুচ্চং অহোসি – ‘‘মযঞ্চম্হ ন অৰহন্তো. অযঞ্চ ব্ৰাহ্মণো অম্হে অৰহন্তৱাদেন সমুদাচৰতি. কথং নু খো অম্হেহি পটিপজ্জিতব্ব’’ন্তি? ভগৱতো এতমত্থং আৰোচেসুং. ‘‘অনাপত্তি, ভিক্খৱে, পসাদভঞ্ঞে’’তি.

তেন খো পন সমযেন অঞ্ঞতৰো ভিক্খু অঞ্ঞতৰস্স ভিক্খুনো উত্তৰিমনুস্সধম্মং উল্লপতি. সোপি এৱমাহ – ‘‘ময্হম্পি, আৱুসো, আসৱা পহীনা’’তি. তস্স কুক্কুচ্চং অহোসি…পে… ‘‘আপত্তিং ত্ৱং, ভিক্খু, আপন্নো পাৰাজিক’’ন্তি.

তেন খো পন সমযেন অঞ্ঞতৰো ভিক্খু অঞ্ঞতৰস্স ভিক্খুনো উত্তৰিমনুস্সধম্মং উল্লপতি. সোপি এৱমাহ – ‘‘ময্হম্পি, আৱুসো, এতে ধম্মা সংৱিজ্জন্তী’’তি. তস্স কুক্কুচ্চং অহোসি…পে… ‘‘আপত্তিং ত্ৱং, ভিক্খু, আপন্নো পাৰাজিক’’ন্তি.

তেন খো পন সমযেন অঞ্ঞতৰো ভিক্খু অঞ্ঞতৰস্স ভিক্খুনো উত্তৰিমনুস্সধম্মং উল্লপতি. সোপি এৱমাহ – ‘‘অহম্পাৱুসো, তেসু ধম্মেসু সন্দিস্সামী’’তি. তস্স কুক্কুচ্চং অহোসি…পে… ‘‘আপত্তিং ত্ৱং, ভিক্খু, আপন্নো পাৰাজিক’’ন্তি.

তেন খো পন সমযেন অঞ্ঞতৰং ভিক্খুং ঞাতকা এতদৱোচুং – ‘‘এহি, ভন্তে, অগাৰং অজ্ঝাৱসা’’তি. ‘‘অভব্বো খো, আৱুসো, মাদিসো অগাৰং অজ্ঝাৱসিতু’’ন্তি. তস্স কুক্কুচ্চং অহোসি…পে… ‘‘অনাপত্তি, ভিক্খু, অনুল্লপনাধিপ্পাযস্সা’’তি.

২২৭. তেন খো পন সমযেন অঞ্ঞতৰং ভিক্খুং ঞাতকা এতদৱোচুং – ‘‘এহি, ভন্তে, কামে পৰিভুঞ্জা’’তি. ‘‘আৱটা মে, আৱুসো, কামা’’তি. তস্স কুক্কুচ্চং অহোসি…পে… ‘‘অনাপত্তি, ভিক্খু, অনুল্লপনাধিপ্পাযস্সা’’তি.

তেন খো পন সমযেন অঞ্ঞতৰং ভিক্খুং ঞাতকা এতদৱোচুং – ‘‘অভিৰমসি, ভন্তে’’তি? ‘‘অভিৰতো অহং, আৱুসো, পৰমায অভিৰতিযা’’তি. তস্স কুক্কুচ্চং অহোসি. ‘‘যে খো তে ভগৱতো সাৱকা তে এৱং ৱদেয্যুং! অহঞ্চম্হি ন ভগৱতো সাৱকো. কচ্চি নু খো অহং পাৰাজিকং আপত্তিং আপন্নো’’তি? ভগৱতো এতমত্থং আৰোচেসি. ‘‘কিংচিত্তো ত্ৱং, ভিক্খূ’’তি? ‘‘অনুল্লপনাধিপ্পাযো অহং, ভগৱা’’তি. ‘‘অনাপত্তি, ভিক্খু, অনুল্লপনাধিপ্পাযস্সা’’তি.

তেন খো পন সমযেন সম্বহুলা ভিক্খূ কতিকং কত্ৱা অঞ্ঞতৰস্মিং আৱাসে ৱস্সং উপগচ্ছিংসু – ‘‘যো ইমম্হা আৱাসা পঠমং পক্কমিস্সতি তং মযং অৰহাতি জানিস্সামা’’তি. অঞ্ঞতৰো ভিক্খু – ‘‘মং অৰহাতি জানন্তূ’’তি, তম্হা আৱাসা পঠমং পক্কামি. তস্স কুক্কুচ্চং অহোসি…পে… ‘‘আপত্তিং ত্ৱং, ভিক্খু, আপন্নো পাৰাজিক’’ন্তি.

২২৮. [ইমানি ৱত্থুনি সং. নি. ২.২০২ আগতানি] তেন সমযেন বুদ্ধো ভগৱা ৰাজগহে ৱিহৰতি ৱেড়ুৱনে কলন্দকনিৱাপে. তেন খো পন সমযেন আযস্মা চ লক্খণো আযস্মা চ মহামোগ্গল্লানো গিজ্ঝকূটে পব্বতে ৱিহৰন্তি. অথ খো আযস্মা মহামোগ্গল্লানো পুব্বণ্হসমযং নিৱাসেত্ৱা পত্তচীৱৰং আদায যেনাযস্মা লক্খণো তেনুপসঙ্কমি; উপসঙ্কমিত্ৱা আযস্মন্তং লক্খণং এতদৱোচ – ‘‘আযামাৱুসো লক্খণ, ৰাজগহং পিণ্ডায পৱিসিস্সামা’’তি. ‘‘এৱমাৱুসো’’তি খো আযস্মা লক্খণো আযস্মতো মহামোগ্গল্লানস্স পচ্চস্সোসি. অথ খো আযস্মা মহামোগ্গল্লানো গিজ্ঝকূটা পব্বতা ওৰোহন্তো অঞ্ঞতৰস্মিং পদেসে সিতং পাত্ৱাকাসি. অথ খো আযস্মা লক্খণো আযস্মন্তং মহামোগ্গল্লানং এতদৱোচ – ‘‘কো নু খো, আৱুসো মোগ্গল্লান, হেতু কো পচ্চযো সিতস্স পাতুকম্মাযা’’তি? ‘‘অকালো খো, আৱুসো লক্খণ, এতস্স পঞ্হস্স [পঞ্হস্স ব্যাকৰণায (স্যা.)]. ভগৱতো মং সন্তিকে এতং পঞ্হং পুচ্ছাতি. অথ খো আযস্মা চ লক্খণো আযস্মা চ মহামোগ্গল্লানো ৰাজগহে পিণ্ডায চৰিত্ৱা পচ্ছাভত্তং পিণ্ডপাতপটিক্কন্তা যেন ভগৱা তেনুপসঙ্কমিংসু; উপসঙ্কমিত্ৱা ভগৱন্তং অভিৱাদেত্ৱা একমন্তং নিসীদিংসু. একমন্তং নিসিন্নো খো আযস্মা লক্খণো আযস্মন্তং মহামোগ্গল্লানং এতদৱোচ – ‘‘ইধাযস্মা মহামোগ্গল্লানো গিজ্ঝকূটা পব্বতা ওৰোহন্তো অঞ্ঞতৰস্মিং পদেসে সিতং পাত্ৱাকাসি. কো নু খো, আৱুসো মোগ্গল্লান, হেতু কো পচ্চযো সিতস্স পাতুকম্মাযা’’তি? ‘‘ইধাহং, আৱুসো, গিজ্ঝকূটা পব্বতা ওৰোহন্তো অদ্দসং অট্ঠিকসঙ্খলিকং ৱেহাসং গচ্ছন্তিং. তমেনং গিজ্ঝাপি কাকাপি কুললাপি অনুপতিত্ৱা অনুপতিত্ৱা ফাসুড়ন্তৰিকাহি ৱিতুডেন্তি [ৱিতুদেন্তি ৱিতচ্ছেন্তি ৱিৰাজেন্তি (স্যা.)]. সা সুদং অট্টস্সৰং কৰোতি. তস্স ময্হং, আৱুসো, এতদহোসি – ‘অচ্ছৰিযং ৱত ভো, অব্ভুতং ৱত ভো, এৱৰূপোপি নাম সত্তো ভৱিস্সতি! এৱৰূপোপি নাম যক্খো ভৱিস্সতি! এৱৰূপোপি নাম অত্তভাৱপ্পটিলাভো ভৱিস্সতী’’’তি! ভিক্খূ উজ্ঝাযন্তি খিয্যন্তি ৱিপাচেন্তি – ‘‘উত্তৰিমনুস্সধম্মং আযস্মা মহামোগ্গল্লানো উল্লপতী’’তি. অথ খো ভগৱা ভিক্খূ আমন্তেসি – ‘‘চক্খুভূতা ৱত, ভিক্খৱে, সাৱকা ৱিহৰন্তি. ঞাণভূতা ৱত, ভিক্খৱে, সাৱকা ৱিহৰন্তি. যত্ৰ হি নাম সাৱকো এৱৰূপং ঞস্সতি ৱা দক্খতি ৱা সক্খিং ৱা কৰিস্সতি. পুব্বেৱ মে সো, ভিক্খৱে, সত্তো দিট্ঠো অহোসি. অপি চাহং ন ব্যাকাসিং. অহঞ্চেতং ব্যাকৰেয্যং পৰে চ মে ন সদ্দহেয্যুং. যে মে ন সদ্দহেয্যুং তেসং তং অস্স দীঘৰত্তং অহিতায দুক্খায. এসো, ভিক্খৱে, সত্তো ইমস্মিংযেৱ ৰাজগহে গোঘাতকো অহোসি. সো তস্স কম্মস্স ৱিপাকেন বহূনি ৱস্সানি বহূনি ৱস্সসতানি বহূনি ৱস্সসহস্সানি বহূনি ৱস্সসতসহস্সানি নিৰযে পচ্চিত্ৱা তস্সেৱ কম্মস্স ৱিপাকাৱসেসেন এৱৰূপং অত্তভাৱপ্পটিলাভং পটিসংৱেদেতি. সচ্চং, ভিক্খৱে, মোগ্গল্লানো আহ. অনাপত্তি, ভিক্খৱে, মোগ্গল্লানস্সা’’তি.

২২৯. ‘‘ইধাহং, আৱুসো, গিজ্ঝকূটা পব্বতা ওৰোহন্তো অদ্দসং মংসপেসিং ৱেহাসং গচ্ছন্তিং. তমেনং গিজ্ঝাপি কাকাপি কুললাপি অনুপতিত্ৱা অনুপতিত্ৱা ৱিতচ্ছেন্তি ৱিভজ্জেন্তি [ৱিতুদেন্তি ৱিতচ্ছেন্তি ৱিৰাজেন্তি (স্যা.)]. সা সুদং অট্টস্সৰং কৰোতি…পে… এসো, ভিক্খৱে, সত্তো ইমস্মিংযেৱ ৰাজগহে গোঘাতকো অহোসি…পে….

‘‘ইধাহং, আৱুসো, গিজ্ঝকূটা পব্বতা ওৰোহন্তো অদ্দসং মংসপিণ্ডং ৱেহাসং গচ্ছন্তং. তমেনং গিজ্ঝাপি কাকাপি কুললাপি অনুপতিত্ৱা অনুপতিত্ৱা ৱিতচ্ছেন্তি ৱিভজ্জেন্তি. সো সুদং অট্টস্সৰং কৰোতি…পে… এসো, ভিক্খৱে, সত্তো ইমস্মিংযেৱ ৰাজগহে সাকুণিকো অহোসি…পে….

‘‘ইধাহং, আৱুসো, গিজ্ঝকূটা পব্বতা ওৰোহন্তো অদ্দসং নিচ্ছৱিং পুৰিসং ৱেহাসং গচ্ছন্তং. তমেনং গিজ্ঝাপি কাকাপি কুললাপি অনুপতিত্ৱা অনুপতিত্ৱা ৱিতচ্ছেন্তি ৱিভজ্জেন্তি. সো সুদং অট্টস্সৰং কৰোতি…পে… এসো, ভিক্খৱে, সত্তো ইমস্মিংযেৱ ৰাজগহে ওৰব্ভিকো অহোসি…পে….

‘‘ইধাহং, আৱুসো, গিজ্ঝকূটা পব্বতা ওৰোহন্তো অদ্দসং অসিলোমং পুৰিসং ৱেহাসং গচ্ছন্তং. তস্স তে অসী উপ্পতিত্ৱা উপ্পতিত্ৱা তস্সেৱ কাযে নিপতন্তি. সো সুদং অট্টস্সৰং কৰোতি…পে… এসো, ভিক্খৱে, সত্তো ইমস্মিংযেৱ ৰাজগহে সূকৰিকো অহোসি…পে….

‘‘ইধাহং, আৱুসো, গিজ্ঝকূটা পব্বতা ওৰোহন্তো অদ্দসং সত্তিলোমং পুৰিসং ৱেহাসং গচ্ছন্তং. তস্স তা সত্তিযো উপ্পতিত্ৱা উপ্পতিত্ৱা তস্সেৱ কাযে নিপতন্তি. সো সুদং অট্টস্সৰং কৰোতি…পে… এসো, ভিক্খৱে, সত্তো ইমস্মিংযেৱ ৰাজগহে মাগৱিকো অহোসি…পে….

‘‘ইধাহং, আৱুসো, গিজ্ঝকূটা পব্বতা ওৰোহন্তো অদ্দসং উসুলোমং পুৰিসং ৱেহাসং গচ্ছন্তং. তস্স তে উসূ উপ্পতিত্ৱা উপ্পতিত্ৱা তস্সেৱ কাযে নিপতন্তি. সো সুদং অট্টস্সৰং কৰোতি…পে… এসো, ভিক্খৱে, সত্তো ইমস্মিংযেৱ ৰাজগহে কাৰণিকো অহোসি…পে….

‘‘ইধাহং, আৱুসো, গিজ্ঝকূটা পব্বতা ওৰোহন্তো অদ্দসং সূচিলোমং পুৰিসং ৱেহাসং গচ্ছন্তং. তস্স তা সূচিযো উপ্পতিত্ৱা উপ্পতিত্ৱা তস্সেৱ কাযে নিপতন্তি. সো সুদং অট্টস্সৰং কৰোতি…পে… এসো, ভিক্খৱে, সত্তো ইমস্মিংযেৱ ৰাজগহে সাৰথিকো অহোসি…পে….

‘‘ইধাহং, আৱুসো, গিজ্ঝকূটা পব্বতা ওৰোহন্তো অদ্দসং সূচিলোমং পুৰিসং ৱেহাসং গচ্ছন্তং. তস্স তা সূচিযো সীসে পৱিসিত্ৱা মুখতো নিক্খমন্তি; মুখে পৱিসিত্ৱা উৰতো নিক্খমন্তি; উৰে পৱিসিত্ৱা উদৰতো নিক্খমন্তি; উদৰে পৱিসিত্ৱা ঊৰূহি নিক্খমন্তি; ঊৰূসু পৱিসিত্ৱা জঙ্ঘাহি নিক্খমন্তি; জঙ্ঘাসু পৱিসিত্ৱা পাদেহি নিক্খমন্তি. সো সুদং অট্টস্সৰং কৰোতি…পে… এসো, ভিক্খৱে, সত্তো ইমস্মিংযেৱ ৰাজগহে সূচকো অহোসি…পে….

‘‘ইধাহং, আৱুসো, গিজ্ঝকূটা পব্বতা ওৰোহন্তো অদ্দসং কুম্ভণ্ডং পুৰিসং ৱেহাসং গচ্ছন্তং. সো গচ্ছন্তোপি তেৱ অণ্ডে খন্ধে আৰোপেত্ৱা গচ্ছতি, নিসীদন্তোপি তেস্ৱেৱ অণ্ডেসু নিসীদতি. তমেনং গিজ্ঝাপি কাকাপি কুললাপি অনুপতিত্ৱা অনুপতিত্ৱা ৱিতচ্ছেন্তি ৱিভজ্জেন্তি. সো সুদং অট্টস্সৰং কৰোতি…পে… এসো, ভিক্খৱে, সত্তো ইমস্মিংযেৱ ৰাজগহে গামকূটো অহোসি…পে….

‘‘ইধাহং, আৱুসো, গিজ্ঝকূটা পব্বতা ওৰোহন্তো অদ্দসং পুৰিসং গূথকূপে সসীসকং নিমুগ্গং…পে… এসো, ভিক্খৱে, সত্তো ইমস্মিংযেৱ ৰাজগহে পাৰদাৰিকো অহোসি…পে….

‘‘ইধাহং, আৱুসো, গিজ্ঝকূটা পব্বতা ওৰোহন্তো অদ্দসং পুৰিসং গূথকূপে সসীসকং নিমুগ্গং উভোহি হত্থেহি গূথং খাদন্তং…পে… এসো, ভিক্খৱে, সত্তো ইমস্মিংযেৱ ৰাজগহে দুট্ঠব্ৰাহ্মণো অহোসি. সো কস্সপস্স সম্মাসম্বুদ্ধস্স পাৱচনে ভিক্খুসঙ্ঘং ভত্তেন নিমন্তেত্ৱা দোণিযো [দোণিযো (ইতিপি)] গূথস্স পূৰাপেত্ৱা কালং আৰোচাপেত্ৱা এতদৱোচ – ‘অতো [ইতো (স্যা.) অহো (ইতিপি)], ভোন্তো, যাৱদত্থং ভুঞ্জন্তু চেৱ হৰন্তু চা’’’তি…পে….

২৩০. ‘‘ইধাহং, আৱুসো, গিজ্ঝকূটা পব্বতা ওৰোহন্তো অদ্দসং নিচ্ছৱিং ইত্থিং ৱেহাসং গচ্ছন্তিং. তমেনং গিজ্ঝাপি কাকাপি কুললাপি অনুপতিত্ৱা অনুপতিত্ৱা ৱিতচ্ছেন্তি ৱিভজ্জেন্তি. সা সুদং অট্টস্সৰং কৰোতি…পে… এসা, ভিক্খৱে, ইত্থী ইমস্মিংযেৱ ৰাজগহে অতিচাৰিনী অহোসি…পে….

‘‘ইধাহং, আৱুসো, গিজ্ঝকূটা পব্বতা ওৰোহন্তো অদ্দসং ইত্থিং দুগ্গন্ধং মঙ্গুলিং ৱেহাসং গচ্ছন্তিং. তমেনং গিজ্ঝাপি কাকাপি কুললাপি অনুপতিত্ৱা অনুপতিত্ৱা ৱিতচ্ছেন্তি ৱিভজ্জেন্তি. সা সুদং অট্টস্সৰং কৰোতি…পে… এসা, ভিক্খৱে, ইত্থী ইমস্মিংযেৱ ৰাজগহে ইক্খণিকা অহোসি…পে….

‘‘ইধাহং, আৱুসো, গিজ্ঝকূটা পব্বতা ওৰোহন্তো অদ্দসং ইত্থিং উপ্পক্কং ওকিলিনিং ওকিৰিনিং ৱেহাসং গচ্ছন্তিং. সা সুদং অট্টস্সৰং কৰোতি…পে… এসা, ভিক্খৱে, ইত্থী কালিঙ্গস্স ৰঞ্ঞো অগ্গমহেসী অহোসি. সা ইস্সাপকতা সপত্তিং অঙ্গাৰকটাহেন ওকিৰি…পে….

‘‘ইধাহং, আৱুসো, গিজ্ঝকূটা পব্বতা ওৰোহন্তো অদ্দসং অসীসকং কবন্ধং ৱেহাসং গচ্ছন্তং. তস্স উৰে অক্খীনি চেৱ হোন্তি মুখঞ্চ. তমেনং গিজ্ঝাপি কাকাপি কুললাপি অনুপতিত্ৱা অনুপতিত্ৱা ৱিতচ্ছেন্তি ৱিভজ্জেন্তি. সো সুদং অট্টস্সৰং কৰোতি…পে… এসো, ভিক্খৱে, সত্তো ইমস্মিংযেৱ ৰাজগহে হাৰিকো নাম চোৰঘাতকো অহোসি…পে….

‘‘ইধাহং, আৱুসো, গিজ্ঝকূটা পব্বতা ওৰোহন্তো অদ্দসং ভিক্খুং ৱেহাসং গচ্ছন্তং. তস্স সঙ্ঘাটিপি আদিত্তা সম্পজ্জলিতা সজোতিভূতা, পত্তোপি আদিত্তো সম্পজ্জলিতো সজোতিভূতো, কাযবন্ধনম্পি আদিত্তং সম্পজ্জলিতং সজোতিভূতং, কাযোপি আদিত্তো সম্পজ্জলিতো সজোতিভূতো. সো সুদং অট্টস্সৰং কৰোতি…পে… এসো, ভিক্খৱে, ভিক্খু কস্সপস্স সম্মাসম্বুদ্ধস্স পাৱচনে পাপভিক্খু অহোসি…পে….

‘‘ইধাহং, আৱুসো, গিজ্ঝকূটা পব্বতা ওৰোহন্তো অদ্দসং ভিক্খুনিং… অদ্দসং সিক্খমানং… অদ্দসং সামণেৰং… অদ্দসং সামণেৰিং ৱেহাসং গচ্ছন্তিং. তস্সা সঙ্ঘাটিপি আদিত্তা সম্পজ্জলিতা সজোতিভূতা, পত্তোপি আদিত্তো সম্পজ্জলিতো সজোতিভূতো, কাযবন্ধনম্পি আদিত্তং সম্পজ্জলিতং সজোতিভূতং, কাযোপি আদিত্তো সম্পজ্জলিতো সজোতিভূতো. সা সুদং অট্টস্সৰং কৰোতি. তস্স ময্হং, আৱুসো, এতদহোসি – ‘অচ্ছৰিযং ৱত ভো, অব্ভুতং ৱত ভো, এৱৰূপোপি নাম সত্তো ভৱিস্সতি! এৱৰূপোপি নাম যক্খো ভৱিস্সতি! এৱৰূপোপি নাম অত্তভাৱপ্পটিলাভো ভৱিস্সতী’’’তি! ভিক্খূ উজ্ঝাযন্তি খিয্যন্তি ৱিপাচেন্তি – ‘‘উত্তৰিমনুস্সধম্মং আযস্মা মহামোগ্গল্লানো উল্লপতী’’তি.

অথ খো ভগৱা ভিক্খূ আমন্তেসি – ‘‘চক্খুভূতা ৱত, ভিক্খৱে, সাৱকা ৱিহৰন্তি. ঞাণভূতা ৱত, ভিক্খৱে, সাৱকা ৱিহৰন্তি. যত্ৰ হি নাম সাৱকো এৱৰূপং ঞস্সতি ৱা দক্খতি ৱা সক্খিং ৱা কৰিস্সতি! পুব্বেৱ মে সা, ভিক্খৱে, সামণেৰী দিট্ঠা অহোসি. অপি চাহং ন ব্যাকাসিং. অহঞ্চেতং ব্যাকৰেয্যং পৰে চ মে ন সদ্দহেয্যুং. যে মে ন সদ্দহেয্যুং তেসং তং অস্স দীঘৰত্তং অহিতায দুক্খায. এসা, ভিক্খৱে, সামণেৰী কস্সপস্স সম্মাসম্বুদ্ধস্স পাৱচনে পাপসামণেৰী অহোসি. সা তস্স কম্মস্স ৱিপাকেন বহূনি ৱস্সানি বহূনি ৱস্সসতানি বহূনি ৱস্সসহস্সানি বহূনি ৱস্সসতসহস্সানি নিৰযে পচ্চিত্ৱা তস্সেৱ কম্মস্স ৱিপাকাৱসেসেন এৱৰূপং অত্তভাৱপ্পটিলাভং পটিসংৱেদেতি. সচ্চং, ভিক্খৱে, মোগ্গল্লানো আহ. অনাপত্তি, ভিক্খৱে, মোগ্গল্লানস্সা’’তি.

২৩১. অথ খো আযস্মা মহামোগ্গল্লানো ভিক্খূ আমন্তেসি – ‘‘যতাযং, আৱুসো, তপোদা সন্দতি সো দহো অচ্ছোদকো সীতোদকো সাতোদকো সেতকো সুপ্পতিত্থো ৰমণীযো পহূতমচ্ছকচ্ছপো চক্কমত্তানি চ পদুমানি পুপ্ফন্তী’’তি. ভিক্খূ উজ্ঝাযন্তি খিয্যন্তি ৱিপাচেন্তি – ‘‘কথঞ্হি নাম আযস্মা মহামোগ্গল্লানো এৱং ৱক্খতি – ‘যতাযং, আৱুসো, তপোদা সন্দতি সো দহো অচ্ছোদকো সীতোদকো সাতোদকো সেতকো সুপ্পতিত্থো ৰমণীযো পহূতমচ্ছকচ্ছপো চক্কমত্তানি চ পদুমানি পুপ্ফন্তী’তি. অথ চ পনাযং তপোদা কুথিতা সন্দতি. উত্তৰিমনুস্সধম্মং আযস্মা মহামোগ্গল্লানো উল্লপতী’’তি. ভগৱতো এতমত্থং আৰোচেসুং. ‘‘যতাযং, ভিক্খৱে, তপোদা সন্দতি সো দহো অচ্ছোদকো সীতোদকো সাতোদকো সেতকো সুপ্পতিত্থো ৰমণীযো পহূতমচ্ছকচ্ছপো চক্কমত্তানি চ পদুমানি পুপ্ফন্তি. অপি চাযং, ভিক্খৱে, তপোদা দ্ৱিন্নং মহানিৰযানং অন্তৰিকায আগচ্ছতি. তেনাযং তপোদা কুথিতা সন্দতি. সচ্চং, ভিক্খৱে, মোগ্গল্লানো আহ. অনাপত্তি, ভিক্খৱে, মোগ্গল্লানস্সা’’তি.

তেন খো পন সমযেন ৰাজা মাগধো সেনিযো বিম্বিসাৰো লিচ্ছৱীহি সদ্ধিং সঙ্গামেন্তো পভগ্গো অহোসি. অথ ৰাজা পচ্ছা সেনং সঙ্কড্ঢিত্ৱা লিচ্ছৱযো পৰাজেসি. সঙ্গামে চ নন্দি চৰতি – ‘‘ৰঞ্ঞা লিচ্ছৱী পভগ্গা’’তি. অথ খো আযস্মা মহামোগ্গল্লানো ভিক্খূ আমন্তেসি – ‘‘ৰাজা, আৱুসো, লিচ্ছৱীহি পভগ্গো’’তি. ভিক্খূ উজ্ঝাযন্তি খিয্যন্তি ৱিপাচেন্তি – ‘‘কথঞ্হি নাম আযস্মা মহামোগ্গল্লানো এৱং ৱক্খতি – ‘ৰাজা, আৱুসো, লিচ্ছৱীহি পভগ্গো’তি! সঙ্গামে চ নন্দিং চৰতি – ‘ৰঞ্ঞা লিচ্ছৱী পভগ্গা’তি! উত্তৰিমনুস্সধম্মং আযস্মা মহামোগ্গল্লানো উল্লপতী’’তি. ভগৱতো এতমত্থং আৰোচেসুং. ‘‘পঠমং, ভিক্খৱে, ৰাজা লিচ্ছৱীহি পভগ্গো. অথ ৰাজা পচ্ছা সেনং সঙ্কড্ঢিত্ৱা লিচ্ছৱযো পৰাজেসি. সচ্চং, ভিক্খৱে, মোগ্গল্লানো আহ. অনাপত্তি, ভিক্খৱে, মোগ্গল্লানস্সা’’তি.

২৩২. অথ খো আযস্মা মহামোগ্গল্লানো ভিক্খূ আমন্তেসি – ‘‘ইধাহং, আৱুসো, সপ্পিনিকায নদিযা তীৰে আনেঞ্জং সমাধিং সমাপন্নো নাগানং ওগয্হ উত্তৰন্তানং কোঞ্চং কৰোন্তানং সদ্দং অস্সোসি’’ন্তি. ভিক্খূ উজ্ঝাযন্তি খিয্যন্তি ৱিপাচেন্তি – ‘‘কথঞ্হি নাম আযস্মা মহামোগ্গল্লানো আনেঞ্জং সমাধিং সমাপন্নো সদ্দং সোস্সতি! উত্তৰিমনুস্সধম্মং আযস্মা মহামোগ্গল্লানো উল্লপতী’’তি. ভগৱতো এতমত্থং আৰোচেসুং. ‘‘অত্থেসো, ভিক্খৱে, সমাধি সো চ খো অপৰিসুদ্ধো. সচ্চং, ভিক্খৱে, মোগ্গল্লানো আহ. অনাপত্তি, ভিক্খৱে, মোগ্গল্লানস্সা’’তি.

অথ খো আযস্মা সোভিতো ভিক্খূ আমন্তেসি – ‘‘অহং, আৱুসো, পঞ্চ কপ্পসতানি অনুস্সৰামী’’তি. ভিক্খূ উজ্ঝাযন্তি খিয্যন্তি ৱিপাচেন্তি – ‘‘কথঞ্হি নাম আযস্মা সোভিতো এৱং ৱক্খতি – ‘অহং, আৱুসো, পঞ্চ কপ্পসতানি অনুস্সৰামী’তি! উত্তৰিমনুস্সধম্মং আযস্মা সোভিতো উল্লপতী’’তি. ভগৱতো এতমত্থং আৰোচেসুং. ‘‘অত্থেসা, ভিক্খৱে, সোভিতস্স. সা চ খো একাযেৱ জাতি. সচ্চং, ভিক্খৱে, সোভিতো আহ. অনাপত্তি, ভিক্খৱে, সোভিতস্সাতি.

চতুত্থপাৰাজিকং সমত্তং.

২৩৩. উদ্দিট্ঠা খো আযস্মন্তো চত্তাৰো পাৰাজিকা ধম্মা, যেসং ভিক্খু অঞ্ঞতৰং ৱা অঞ্ঞতৰং ৱা আপজ্জিত্ৱা ন লভতি ভিক্খূহি সদ্ধিং সংৱাসং, যথা পুৰে তথা পচ্ছা, পাৰাজিকো হোতি অসংৱাসো. তত্থাযস্মন্তে পুচ্ছামি – ‘‘কচ্চিত্থ পৰিসুদ্ধা’’? দুতিযম্পি পুচ্ছামি – ‘‘কচ্চিত্থ পৰিসুদ্ধা’’? ততিযম্পি পুচ্ছামি – ‘‘কচ্চিত্থ পৰিসুদ্ধা’’? পৰিসুদ্ধেত্থাযস্মন্তো, তস্মা তুণ্হী, এৱমেতং ধাৰযামীতি.

পাৰাজিকং নিট্ঠিতং.

তস্সুদ্দানং –

মেথুনাদিন্নাদানঞ্চ, মনুস্সৱিগ্গহুত্তৰি;

পাৰাজিকানি চত্তাৰি, ছেজ্জৱত্থূ অসংসযাতি.

পাৰাজিককণ্ডং নিট্ঠিতং.