২. দুতিযাদিপাটিদেসনীযসিক্খাপদানি

১২৩৪. তেন সমযেন বুদ্ধো ভগৱা সাৱত্থিযং ৱিহৰতি জেতৱনে অনাথপিণ্ডিকস্স আৰামে. তেন খো পন সমযেন ছব্বগ্গিযা ভিক্খুনিযো তেলং ৱিঞ্ঞাপেত্ৱা ভুঞ্জন্তি…পে… মধুং ৱিঞ্ঞাপেত্ৱা ভুঞ্জন্তি…পে… ফাণিতং ৱিঞ্ঞাপেত্ৱা ভুঞ্জন্তি…পে… মচ্ছং ৱিঞ্ঞাপেত্ৱা ভুঞ্জন্তি…পে… মংসং ৱিঞ্ঞাপেত্ৱা ভুঞ্জন্তি…পে… খীৰং ৱিঞ্ঞাপেত্ৱা ভুঞ্জন্তি…পে… দধিং ৱিঞ্ঞাপেত্ৱা ভুঞ্জন্তি. মনুস্সা উজ্ঝাযন্তি খিয্যন্তি ৱিপাচেন্তি – ‘‘কথঞ্হি নাম ভিক্খুনিযো দধিং ৱিঞ্ঞাপেত্ৱা ভুঞ্জিস্সন্তি! কস্স সম্পন্নং ন মনাপং, কস্স সাদুং ন ৰুচ্চতী’’তি! অস্সোসুং খো ভিক্খুনিযো তেসং মনুস্সানং উজ্ঝাযন্তানং খিয্যন্তানং ৱিপাচেন্তানং. যা তা ভিক্খুনিযো অপ্পিচ্ছা…পে… তা উজ্ঝাযন্তি খিয্যন্তি ৱিপাচেন্তি – ‘‘কথঞ্হি নাম ছব্বগ্গিযা ভিক্খুনিযো দধিং ৱিঞ্ঞাপেত্ৱা ভুঞ্জিস্সন্তী’’তি…পে… সচ্চং কিৰ, ভিক্খৱে, ছব্বগ্গিযা ভিক্খুনিযো দধিং ৱিঞ্ঞাপেত্ৱা ভুঞ্জন্তীতি? ‘‘সচ্চং, ভগৱা’’তি. ৱিগৰহি বুদ্ধো ভগৱা…পে… কথঞ্হি নাম, ভিক্খৱে, ছব্বগ্গিযা ভিক্খুনিযো দধিং ৱিঞ্ঞাপেত্ৱা ভুঞ্জিস্সন্তি! নেতং, ভিক্খৱে, অপ্পসন্নানং ৱা পসাদায…পে… এৱঞ্চ পন ভিক্খৱে, ভিক্খুনিযো ইমং সিক্খাপদং উদ্দিসন্তু –

‘‘যা পন ভিক্খুনী দধিং ৱিঞ্ঞাপেত্ৱা ভুঞ্জেয্য, পটিদেসেতব্বং তায ভিক্খুনিযা – ‘গাৰয্হং, অয্যে, ধম্মং আপজ্জিং অসপ্পাযং পাটিদেসনীযং, তং পটিদেসেমী’’’তি.

এৱঞ্চিদং ভগৱতা ভিক্খুনীনং সিক্খাপদং পঞ্ঞত্তং হোতি.

১২৩৫. তেন খো পন সমযেন ভিক্খুনিযো গিলানা হোন্তি. গিলানপুচ্ছিকা ভিক্খুনিযো গিলানা ভিক্খুনিযো এতদৱোচুং – ‘‘কচ্চি, অয্যে, খমনীযং, কচ্চি যাপনীয’’ন্তি? ‘‘পুব্বে মযং, অয্যে, দধিং ৱিঞ্ঞাপেত্ৱা ভুঞ্জিম্হা, তেন নো ফাসু হোতি, ইদানি পন ‘‘ভগৱতা পটিক্খিত্ত’’ন্তি কুক্কুচ্চাযন্তা ন ৱিঞ্ঞাপেম, তেন নো ন ফাসু হোতী’’তি…পে… ভগৱতো এতমত্থং আৰোচেসুং…পে… অনুজানামি, ভিক্খৱে, গিলানায ভিক্খুনিযা দধিং ৱিঞ্ঞাপেত্ৱা ভুঞ্জিতুং. এৱঞ্চ পন, ভিক্খৱে, ভিক্খুনিযো ইমং সিক্খাপদং উদ্দিসন্তু –

১২৩৬. ‘‘যা পন ভিক্খুনী অগিলানা (তেলং…পে… মধুং…পে… ফাণিতং…পে… মচ্ছং…পে… মংসং…পে… খীৰং…পে…) দধিং ৱিঞ্ঞাপেত্ৱা ভুঞ্জেয্য , পটিদেসেতব্বং তায ভিক্খুনিযা – ‘গাৰয্হং, অয্যে, ধম্মং আপজ্জিং অসপ্পাযং পাটিদেসনীযং, তং পটিদেসেমী’’’তি.

১২৩৭. যা পনাতি যা যাদিসা…পে… ভিক্খুনীতি…পে… অযং ইমস্মিং অত্থে অধিপ্পেতা ভিক্খুনীতি.

অগিলানা নাম যস্সা ৱিনা দধিনা ফাসু হোতি.

গিলানা নাম যস্সা ৱিনা দধিনা ন ফাসু হোতি.

তেলং নাম তিলতেলং সাসপতেলং মধুকতেলং এৰণ্ডতেলং ৱসাতেলং.

মধু নাম মক্খিকামধু. ফাণিতং নাম উচ্ছুম্হা নিব্বত্তং. মচ্ছো নাম ওদকো ৱুচ্চতি. মংসং নাম যেসং মংসং কপ্পতি তেসং মংসং. খীৰং নাম গোখীৰং ৱা অজিকাখীৰং ৱা মহিংসখীৰং ৱা যেসং মংসং কপ্পতি তেসং খীৰং. দধি নাম তেসঞ্ঞেৱ দধি.

অগিলানা অত্তনো অত্থায ৱিঞ্ঞাপেতি, পযোগে দুক্কটং. পটিলাভেন ভুঞ্জিস্সামীতি পটিগ্গণ্হাতি, আপত্তি দুক্কটস্স. অজ্ঝোহাৰে অজ্ঝোহাৰে আপত্তি পাটিদেসনীযস্স.

১২৩৮. অগিলানা অগিলানসঞ্ঞা দধিং ৱিঞ্ঞাপেত্ৱা ভুঞ্জতি, আপত্তি পাটিদেসনীযস্স. অগিলানা ৱেমতিকা দধিং ৱিঞ্ঞাপেত্ৱা ভুঞ্জতি, আপত্তি পাটিদেসনীযস্স. অগিলানা গিলানসঞ্ঞা দধিং ৱিঞ্ঞাপেত্ৱা ভুঞ্জতি, আপত্তি পাটিদেসনীযস্স.

গিলানা অগিলানসঞ্ঞা, আপত্তি দুক্কটস্স. গিলানা ৱেমতিকা, আপত্তি দুক্কটস্স. গিলানা গিলানসঞ্ঞা অনাপত্তি.

১২৩৯. অনাপত্তি গিলানায, গিলানা হুত্ৱা ৱিঞ্ঞাপেত্ৱা অগিলানা ভুঞ্জতি, গিলানায সেসকং ভুঞ্জতি, ঞাতকানং পৱাৰিতানং, অঞ্ঞস্সত্থায, অত্তনো ধনেন, উম্মত্তিকায, আদিকম্মিকাযাতি.

অট্ঠমপাটিদেসনীযসিক্খাপদং নিট্ঠিতং.

উদ্দিট্ঠা খো, অয্যাযো, অট্ঠ পাটিদেসনীযা ধম্মা. তত্থায্যাযো পুচ্ছামি – ‘‘কচ্চিত্থ পৰিসুদ্ধা’’? দুতিযম্পি পুচ্ছামি – ‘‘কচ্চিত্থ পৰিসুদ্ধা’’? ততিযম্পি পুচ্ছামি – ‘‘কচ্চিত্থ পৰিসুদ্ধা’’? পৰিসুদ্ধেত্থায্যাযো, তস্মা তুণ্হী, এৱমেতং ধাৰযামীতি.

ভিক্খুনিৱিভঙ্গে পাটিদেসনীযকণ্ডং নিট্ঠিতং.