২৬২. অপ্পটিনিস্সগ্গে উক্খেপনীযকম্মৱিৱাদকথা

৪৩৯. ইধ পন, ভিক্খৱে, ভিক্খু ন ইচ্ছতি পাপিকং দিট্ঠিং পটিনিস্সজ্জিতুং. তত্ৰ চে ভিক্খূনং এৱং হোতি – ‘‘অযং খো, আৱুসো, ভিক্খু ন ইচ্ছতি পাপিকং দিট্ঠিং পটিনিস্সজ্জিতুং. হন্দস্স মযং পাপিকায দিট্ঠিযা অপ্পটিনিস্সগ্গে উক্খেপনীযকম্মং কৰোমা’’তি. তে তস্স পাপিকায দিট্ঠিযা অপ্পটিনিস্সগ্গে উক্খেপনীযকম্মং কৰোন্তি – অধম্মেন ৱগ্গা…পে… অধম্মেন সমগ্গা… ধম্মেন ৱগ্গা… ধম্মপতিৰূপকেন ৱগ্গা… ধম্মপতিৰূপকেন সমগ্গা. তত্ৰট্ঠো সঙ্ঘো ৱিৱদতি – ‘‘অধম্মেন ৱগ্গকম্মং, অধম্মেন সমগ্গকম্মং, ধম্মেন ৱগ্গকম্মং, ধম্মপতিৰূপকেন ৱগ্গকম্মং, ধম্মপতিৰূপকেন সমগ্গকম্মং, অকতং কম্মং দুক্কটং কম্মং পুন কাতব্বং কম্ম’’ন্তি. তত্ৰ, ভিক্খৱে, যে তে ভিক্খূ এৱমাহংসু – ‘‘ধম্মপতিৰূপকেন সমগ্গকম্ম’’ন্তি, যে চ তে ভিক্খূ এৱমাহংসু – ‘‘অকতং কম্মং দুক্কটং কম্মং পুন কাতব্বং কম্ম’’ন্তি, ইমে তত্থ ভিক্খূ ধম্মৱাদিনো. ইমে পঞ্চ ৱাৰা সংখিত্তা.

অপ্পটিনিস্সগ্গে উক্খেপনীযকম্মৱিৱাদকথা নিট্ঠিতা.