২৫৭. নিযস্সকম্মৱিৱাদকথা

৪৩৪. ইধ পন, ভিক্খৱে, ভিক্খু বালো হোতি অব্যত্তো আপত্তিবহুলো অনপদানো, গিহিসংসট্ঠো ৱিহৰতি অননুলোমিকেহি গিহিসংসগ্গেহি. তত্ৰ চে ভিক্খূনং এৱং হোতি – ‘‘অযং খো, আৱুসো, ভিক্খু বালো অব্যত্তো আপত্তিবহুলো অনপদানো, গিহিসংসট্ঠো ৱিহৰতি অননুলোমিকেহি গিহিসংসগ্গেহি. হন্দস্স মযং নিযস্সকম্মং কৰোমা’’তি. তে তস্স নিযস্সকম্মং কৰোন্তি – অধম্মেন ৱগ্গা…পে… অধম্মেন সমগ্গা… ধম্মেন ৱগ্গা… ধম্মপতিৰূপকেন ৱগ্গা… ধম্মপতিৰূপকেন সমগ্গা. তত্ৰট্ঠো সঙ্ঘো ৱিৱদতি – ‘‘অধম্মেন ৱগ্গকম্মং, অধম্মেন সমগ্গকম্মং, ধম্মেন ৱগ্গকম্মং, ধম্মপতিৰূপকেন ৱগ্গকম্মং, ধম্মপতিৰূপকেন সমগ্গকম্মং, অকতং কম্মং দুক্কটং কম্মং পুন কাতব্বং কম্ম’’ন্তি. তত্ৰ, ভিক্খৱে, যে তে ভিক্খূ এৱমাহংসু – ‘‘ধম্মপতিৰূপকেন সমগ্গকম্ম’’ন্তি, যে চ তে ভিক্খূ এৱমাহংসু – ‘‘অকতং কম্মং দুক্কটং কম্মং পুন কাতব্বং কম্ম’’ন্তি, ইমে তত্থ ভিক্খূ ধম্মৱাদিনো. ইমে পঞ্চ ৱাৰা সংখিত্তা.

নিযস্সকম্মৱিৱাদকথা নিট্ঠিতা.