২০৮. সিৱেয্যকদুস্সযুগকথা

৩৩৫. তেন খো পন সমযেন ৰঞ্ঞো পজ্জোতস্স সিৱেয্যকং দুস্সযুগং উপ্পন্নং হোতি – বহূনং [বহুন্নং (সী. স্যা.)] দুস্সানং বহূনং দুস্সযুগানং বহূনং দুস্সযুগসতানং বহূনং দুস্সযুগসহস্সানং বহূনং দুস্সযুগসতসহস্সানং অগ্গঞ্চ সেট্ঠঞ্চ মোক্খঞ্চ উত্তমঞ্চ পৱৰঞ্চ. অথ খো ৰাজা পজ্জোতো তং সিৱেয্যকং দুস্সযুগং জীৱকস্স কোমাৰভচ্চস্স পাহেসি. অথ খো জীৱকস্স কোমাৰভচ্চস্স এতদহোসি – ‘‘ইদং খো মে সিৱেয্যকং দুস্সযুগং ৰঞ্ঞা পজ্জোতেন পহিতং – বহূনং দুস্সানং বহূনং দুস্সযুগানং বহূনং দুস্সযুগসতানং বহূনং দুস্সযুগসহস্সানং বহূনং দুস্সযুগসতসহস্সানং অগ্গঞ্চ সেট্ঠঞ্চ মোক্খঞ্চ উত্তমঞ্চ পৱৰঞ্চ. নযিদং অঞ্ঞো কোচি পচ্চাৰহতি অঞ্ঞত্ৰ তেন ভগৱতা অৰহতা সম্মাসম্বুদ্ধেন, ৰঞ্ঞা ৱা মাগধেন সেনিযেন বিম্বিসাৰেনা’’তি.

সিৱেয্যকদুস্সযুগকথা নিট্ঠিতা.