১২০. অফাসুকৱিহাৰো

২০৯. তেন সমযেন বুদ্ধো ভগৱা সাৱত্থিযং ৱিহৰতি জেতৱনে অনাথপিণ্ডিকস্স আৰামে. তেন খো পন সমযেন সম্বহুলা সন্দিট্ঠা সম্ভত্তা ভিক্খূ কোসলেসু জনপদে অঞ্ঞতৰস্মিং আৱাসে ৱস্সং উপগচ্ছিংসু. অথ খো তেসং ভিক্খূনং এতদহোসি – ‘‘কেন নু খো মযং উপাযেন সমগ্গা সম্মোদমানা অৱিৱদমানা ফাসুকং ৱস্সং ৱসেয্যাম, ন চ পিণ্ডকেন কিলমেয্যামা’’তি. অথ খো তেসং ভিক্খূনং এতদহোসি – ‘‘সচে খো মযং অঞ্ঞমঞ্ঞং নেৱ আলপেয্যাম ন সল্লপেয্যাম – যো পঠমং গামতো পিণ্ডায পটিক্কমেয্য সো আসনং পঞ্ঞপেয্য, পাদোদকং পাদপীঠং পাদকথলিকং উপনিক্খিপেয্য, অৱক্কাৰপাতিং ধোৱিত্ৱা উপট্ঠাপেয্য, পানীযং পৰিভোজনীযং উপট্ঠাপেয্য; যো পচ্ছা গামতো পিণ্ডায পটিক্কমেয্য, সচস্স ভুত্তাৱসেসো, সচে আকঙ্খেয্য ভুঞ্জেয্য, নো চে আকঙ্খেয্য অপ্পহৰিতে ৱা ছড্ডেয্য, অপ্পাণকে ৱা উদকে ওপিলাপেয্য; সো আসনং উদ্ধৰেয্য, পাদোদকং পাদপীঠং পাদকথলিকং পটিসামেয্য, অৱক্কাৰপাতিং ধোৱিত্ৱা পটিসামেয্য, পানীযং পৰিভোজনীযং পটিসামেয্য, ভত্তগ্গং সম্মজ্জেয্য; যো পস্সেয্য পানীযঘটং ৱা পৰিভোজনীযঘটং ৱা ৱচ্চঘটং ৱা ৰিত্তং তুচ্ছং সো উপট্ঠাপেয্য; সচস্স হোতি অৱিসয্হং, হত্থৱিকাৰেন দুতিযং আমন্তেত্ৱা হত্থৱিলঙ্ঘকেন উপট্ঠাপেয্য; ন ত্ৱেৱ তপ্পচ্চযা ৱাচং ভিন্দেয্য – এৱং খো মযং সমগ্গা সম্মোদমানা অৱিৱদমানা ফাসুকং ৱস্সং ৱসেয্যাম, ন চ পিণ্ডকেন কিলমেয্যামা’’তি. অথ খো তে ভিক্খূ অঞ্ঞমঞ্ঞং নেৱ আলপিংসু, ন সল্লপিংসু. যো পঠমং গামতো পিণ্ডায পটিক্কমতি, সো আসনং পঞ্ঞপেতি, পাদোদকং পাদপীঠং পাদকথলিকং উপনিক্খিপতি, অৱক্কাৰপাতিং ধোৱিত্ৱা উপট্ঠাপেতি, পানীযং পৰিভোজনীযং উপট্ঠাপেতি. যো পচ্ছা গামতো পিণ্ডায পটিক্কমতি, সচে হোতি ভুত্তাৱসেসো, সচে আকঙ্খতি ভুঞ্জতি, নো চে আকঙ্খতি অপ্পহৰিতে ৱা ছড্ডেতি, অপ্পাণকে ৱা উদকে ওপিলাপেতি; সো আসনং উদ্ধৰতি, পাদোদকং পাদপীঠং পাদকথলিকং পটিসামেতি, অৱক্কাৰপাতিং ধোৱিত্ৱা পটিসামেতি, পানীযং পৰিভোজনীযং পটিসামেতি, ভত্তগ্গং সম্মজ্জতি. যো পস্সতি পানীযঘটং ৱা পৰিভোজনীযঘটং ৱা ৱচ্চঘটং ৱা ৰিত্তং তুচ্ছং সো উপট্ঠাপেতি. সচস্স হোতি অৱিসয্হং, হত্থৱিকাৰেন দুতিযং আমন্তেত্ৱা হত্থৱিলঙ্ঘকেন উপট্ঠাপেতি, ন ত্ৱেৱ তপ্পচ্চযা ৱাচং ভিন্দতি.

আচিণ্ণং খো পনেতং ৱস্সংৱুট্ঠানং ভিক্খূনং ভগৱন্তং দস্সনায উপসঙ্কমিতুং. অথ খো তে ভিক্খূ ৱস্সংৱুট্ঠা তেমাসচ্চযেন সেনাসনং সংসামেত্ৱা পত্তচীৱৰমাদায যেন সাৱত্থি তেন পক্কমিংসু. অনুপুব্বেন যেন সাৱত্থি জেতৱনং অনাথপিণ্ডিকস্স আৰামো যেন ভগৱা তেনুপসঙ্কমিংসু, উপসঙ্কমিত্ৱা ভগৱন্তং অভিৱাদেত্ৱা একমন্তং নিসীদিংসু. আচিণ্ণং খো পনেতং বুদ্ধানং ভগৱন্তানং আগন্তুকেহি ভিক্খূহি সদ্ধিং পটিসম্মোদিতুং. অথ খো ভগৱা তে ভিক্খূ এতদৱোচ – ‘‘কচ্চি, ভিক্খৱে, খমনীযং, কচ্চি যাপনীযং, কচ্চি সমগ্গা সম্মোদমানা অৱিৱদমানা ফাসুকং ৱস্সং ৱসিত্থ, ন চ পিণ্ডকেন কিলমিত্থা’’তি? ‘‘খমনীযং ভগৱা, যাপনীযং ভগৱা. সমগ্গা চ মযং, ভন্তে, সম্মোদমানা অৱিৱদমানা ফাসুকং ৱস্সং ৱসিম্হা, ন চ পিণ্ডকেন কিলমিম্হা’’তি. জানন্তাপি তথাগতা পুচ্ছন্তি, জানন্তাপি ন পুচ্ছন্তি. কালং ৱিদিত্ৱা পুচ্ছন্তি, কালং ৱিদিত্ৱা ন পুচ্ছন্তি. অত্থসংহিতং তথাগতা পুচ্ছন্তি, নো অনত্থসংহিতং. অনত্থসংহিতে সেতুঘাতো তথাগতানং. দ্ৱীহাকাৰেহি বুদ্ধা ভগৱন্তো ভিক্খূ পটিপুচ্ছন্তি – ধম্মং ৱা দেসেস্সাম, সাৱকানং ৱা সিক্খাপদং পঞ্ঞপেস্সামাতি. অথ খো ভগৱা তে ভিক্খূ এতদৱোচ – ‘‘যথাকথং পন তুম্হে, ভিক্খৱে, সমগ্গা সম্মোদমানা অৱিৱদমানা ফাসুকং ৱস্সং ৱসিত্থ, ন চ পিণ্ডকেন কিলমিত্থা’’তি.

ইধ মযং, ভন্তে, সম্বহুলা সন্দিট্ঠা সম্ভত্তা ভিক্খূ কোসলেসু জনপদে অঞ্ঞতৰস্মিং আৱাসে ৱস্সং উপগচ্ছিম্হা. তেসং নো, ভন্তে, অম্হাকং এতদহোসি – ‘‘কেন নু খো মযং উপাযেন সমগ্গা সম্মোদমানা অৱিৱদমানা ফাসুকং ৱস্সং ৱসেয্যাম, ন চ পিণ্ডকেন কিলমেয্যামা’’তি. তেসং নো, ভন্তে, অম্হাকং এতদহোসি – ‘‘সচে খো মযং অঞ্ঞমঞ্ঞং নেৱ আলপেয্যাম ন সল্লপেয্যাম – যো পঠমং গামতো পিণ্ডায পটিক্কমেয্য সো আসনং পঞ্ঞপেয্য, পাদোদকং পাদপীঠং পাদকথলিকং উপনিক্খিপেয্য, অৱক্কাৰপাতিং ধোৱিত্ৱা উপট্ঠাপেয্য, পানীযং পৰিভোজনীযং উপট্ঠাপেয্য; যো পচ্ছা গামতো পিণ্ডায পটিক্কমেয্য, সচস্স ভুত্তাৱসেসো, সচে আকঙ্খেয্য ভুঞ্জেয্য, নো চে আকঙ্খেয্য অপ্পহৰিতে ৱা ছড্ডেয্য, অপ্পাণকে ৱা উদকে ওপিলাপেয্য; সো আসনং উদ্ধৰেয্য, পাদোদকং পাদপীঠং পাদকথলিকং পটিসামেয্য, অৱক্কাৰপাতিং ধোৱিত্ৱা পটিসামেয্য, পানীযং পৰিভোজনীযং পটিসামেয্য, ভত্তগ্গং সম্মজ্জেয্য; যো পস্সেয্য পানীযঘটং ৱা পৰিভোজনীযঘটং ৱা ৱচ্চঘটং ৱা ৰিত্তং তুচ্ছং সো উপট্ঠাপেয্য; সচস্স হোতি অৱিসয্হং, হত্থৱিকাৰেন দুতিযং আমন্তেত্ৱা হত্থৱিলঙ্ঘকেন উপট্ঠাপেয্য; ন ত্ৱেৱ তপ্পচ্চযা ৱাচং ভিন্দেয্য – এৱং খো মযং সমগ্গা সম্মোদমানা অৱিৱদমানা ফাসুকং ৱস্সং ৱসেয্যাম, ন চ পিণ্ডকেন কিলমেয্যামা’’তি. অথ খো মযং, ভন্তে, অঞ্ঞমঞ্ঞং নেৱ আলপিম্হা ন সল্লৱিম্হা. যো পঠমং গামতো পিণ্ডায পটিক্কমতি সো আসনং পঞ্ঞপেতি, পাদোদকং পাদপীঠং পাদকথলিকং উপনিক্খিপতি, অৱক্কাৰপাতিং ধোৱিত্ৱা উপট্ঠাপেতি, পানীযং পৰিভোজনীযং উপট্ঠাপেতি. যো পচ্ছা গামতো পিণ্ডায পটিক্কমতি, সচে হোতি ভুত্তাৱসেসো, সচে আকঙ্খতি ভুঞ্জতি, নো চে আকঙ্খতি অপ্পহৰিতে ৱা ছড্ডেতি, অপ্পাণকে ৱা উদকে ওপিলাপেতি, সো আসনং উদ্ধৰতি, পাদোদকং পাদপীঠং পাদকথলিকং পটিসামেতি, অৱক্কাৰপাতিং ধোৱিত্ৱা পটিসামেতি, পানীযং পৰিভোজনীযং পটিসামেতি, ভত্তগ্গং সম্মজ্জতি. যো পস্সতি পানীযঘটং ৱা পৰিভোজনীযঘটং ৱা ৱচ্চঘটং ৱা ৰিত্তং তুচ্ছং সো উপট্ঠাপেতি. সচস্স হোতি অৱিসয্হং, হত্থৱিকাৰেন দুতিযং আমন্তেত্ৱা হত্থৱিলঙ্ঘকেন উপট্ঠাপেতি, ন ত্ৱেৱ তপ্পচ্চযা ৱাচং ভিন্দতি. এৱং খো মযং, ভন্তে, সমগ্গা সম্মোদমানা অৱিৱদমানা ফাসুকং ৱস্সং ৱসিম্হা, ন চ পিণ্ডকেন কিলমিম্হাতি.

অথ খো ভগৱা ভিক্খূ আমন্তেসি – ‘‘অফাসুঞ্ঞেৱ [অফাসুকঞ্ঞেৱ (সী.)] কিৰমে [কিৰিমে (ক.)], ভিক্খৱে, মোঘপুৰিসা ৱুট্ঠা [ৱুত্থা (ক.)] সমানা ফাসুম্হা [ফাসুকম্হা (সী.)] ৱুট্ঠাতি পটিজানন্তি. পসুসংৱাসঞ্ঞেৱ কিৰমে, ভিক্খৱে, মোঘপুৰিসা ৱুট্ঠা সমানা ফাসুম্হা ৱুট্ঠাতি পটিজানন্তি. এড়কসংৱাসঞ্ঞেৱ কিৰমে, ভিক্খৱে, মোঘপুৰিসা ৱুট্ঠা সমানা ফাসুম্হা ৱুট্ঠাতি পটিজানন্তি. সপত্তসংৱাসঞ্ঞেৱ কিৰমে, ভিক্খৱে, মোঘপুৰিসা ৱুট্ঠা সমানা ফাসুম্হা ৱুট্ঠাতি পটিজানন্তি. কথঞ্হি নামিমে, ভিক্খৱে, মোঘপুৰিসা মূগব্বতং তিত্থিযসমাদানং সমাদিযিস্স’’ন্তি. নেতং, ভিক্খৱে, অপ্পসন্নানং ৱা পসাদায…পে… ৱিগৰহিত্ৱা ধম্মিং কথং কত্ৱা ভিক্খূ আমন্তেসি – ন, ভিক্খৱে, মূগব্বতং তিত্থিযসমাদানং সমাদিযিতব্বং. যো সমাদিযেয্য, আপত্তি দুক্কটস্স. অনুজানামি, ভিক্খৱে, ৱস্সংৱুট্ঠানং ভিক্খূনং তীহি ঠানেহি পৱাৰেতুং – দিট্ঠেন ৱা সুতেন ৱা পৰিসঙ্কায ৱা. সা ৱো ভৱিস্সতি অঞ্ঞমঞ্ঞানুলোমতা আপত্তিৱুট্ঠানতা ৱিনযপুৰেক্খাৰতা. এৱঞ্চ পন, ভিক্খৱে, পৱাৰেতব্বং. ব্যত্তেন ভিক্খুনা পটিবলেন সঙ্ঘো ঞাপেতব্বো –

২১০. ‘‘সুণাতু মে, ভন্তে, সঙ্ঘো. অজ্জ পৱাৰণা. যদি সঙ্ঘস্স পত্তকল্লং, সঙ্ঘো পৱাৰেয্যা’’তি.

থেৰেন ভিক্খুনা একংসং উত্তৰাসঙ্গং কৰিত্ৱা উক্কুটিকং নিসীদিত্ৱা অঞ্জলিং পগ্গহেত্ৱা এৱমস্স ৱচনীযো – ‘‘সঙ্ঘং, আৱুসো, পৱাৰেমি দিট্ঠেন ৱা সুতেন ৱা পৰিসঙ্কায ৱা. ৱদন্তু মং আযস্মন্তো অনুকম্পং উপাদায. পস্সন্তো পটিকৰিস্সামি. দুতিযম্পি, আৱুসো, সঙ্ঘং পৱাৰেমি দিট্ঠেন ৱা সুতেন ৱা পৰিসঙ্কায ৱা. ৱদন্তু মং আযস্মন্তো অনুকম্পং উপাদায. পস্সন্তো পটিকৰিস্সামি. ততিযম্পি, আৱুসো, সঙ্ঘং পৱাৰেমি দিট্ঠেন ৱা সুতেন ৱা পৰিসঙ্কায ৱা. ৱদন্তু মং আযস্মন্তো অনুকম্পং উপাদায. পস্সন্তো পটিকৰিস্সামী’’তি.

নৱকেন ভিক্খুনা একংসং উত্তৰাসঙ্গং কৰিত্ৱা উক্কুটিকং নিসীদিত্ৱা অঞ্জলিং পগ্গহেত্ৱা এৱমস্স ৱচনীযো – ‘‘সঙ্ঘং, ভন্তে, পৱাৰেমি দিট্ঠেন ৱা সুতেন ৱা পৰিসঙ্কায ৱা. ৱদন্তু মং আযস্মন্তো অনুকম্পং উপাদায. পস্সন্তো পটিকৰিস্সামি. দুতিযম্পি, ভন্তে, সঙ্ঘং…পে… ততিযম্পি, ভন্তে, সঙ্ঘং পৱাৰেমি দিট্ঠেন ৱা সুতেন ৱা পৰিসঙ্কায ৱা. ৱদন্তু মং আযস্মন্তো অনুকম্পং উপাদায. পস্সন্তো পটিকৰিস্সামী’’তি.

২১১. তেন খো পন সমযেন ছব্বগ্গিযা ভিক্খূ থেৰেসু ভিক্খূসু উক্কুটিকং নিসিন্নেসু পৱাৰযমানেসু আসনেসু অচ্ছন্তি. যে তে ভিক্খূ অপ্পিচ্ছা…পে… তে উজ্ঝাযন্তি খিয্যন্তি ৱিপাচেন্তি – ‘‘কথঞ্হি নাম ছব্বগ্গিযা ভিক্খূ থেৰেসু ভিক্খূসু উক্কুটিকং নিসিন্নেসু পৱাৰযমানেসু আসনেসু অচ্ছিস্সন্তী’’তি. অথ খো তে ভিক্খূ ভগৱতো এতমত্থং আৰোচেসুং…পে… ‘‘সচ্চং কিৰ, ভিক্খৱে, ছব্বগ্গিযা ভিক্খূ থেৰেসু ভিক্খূসু উক্কুটিকং নিসিন্নেসু পৱাৰযমানেসু আসনেসু অচ্ছন্তী’’তি? ‘‘সচ্চং, ভগৱা’’তি. ৱিগৰহি বুদ্ধো ভগৱা…পে… ‘‘কথঞ্হি নাম তে, ভিক্খৱে, মোঘপুৰিসা থেৰেসু ভিক্খূসু উক্কুটিকং নিসিন্নেসু পৱাৰযমানেসু আসনেসু অচ্ছিস্স’’ন্তি. নেতং, ভিক্খৱে, অপ্পসন্নানং ৱা পসাদায, পসন্নানং ৱা ভিয্যোভাৱায…পে… ৱিগৰহিত্ৱা ধম্মিং কথং কত্ৱা ভিক্খূ আমন্তেসি – ‘‘ন, ভিক্খৱে, থেৰেসু ভিক্খূসু উক্কুটিকং নিসিন্নেসু পৱাৰযমানেসু আসনেসু অচ্ছিতব্বং. যো অচ্ছেয্য, আপত্তি দুক্কটস্স. অনুজানামি, ভিক্খৱে, সব্বেহেৱ উক্কুটিকং নিসিন্নেহি পৱাৰেতু’’ন্তি.

তেন খো পন সমযেন অঞ্ঞতৰো থেৰো জৰাদুব্বলো যাৱ সব্বে পৱাৰেন্তীতি [যাৱ সব্বে পৱাৰেন্তি (স্যা.)] উক্কুটিকং নিসিন্নো আগমযমানো মুচ্ছিতো পপতি. ভগৱতো এতমত্থং আৰোচেসুং. অনুজানামি, ভিক্খৱে, তদমন্তৰা উক্কুটিকং নিসীদিতুং যাৱ পৱাৰেতি, পৱাৰেত্ৱা আসনে নিসীদিতুন্তি.

অফাসুকৱিহাৰো নিট্ঠিতো.