৩. ৱস্সূপনাযিকক্খন্ধকো

১০৭. ৱস্সূপনাযিকানুজাননা

১৮৪. তেন সমযেন বুদ্ধো ভগৱা ৰাজগহে ৱিহৰতি ৱেড়ুৱনে কলন্দকনিৱাপে. তেন খো পন সমযেন ভগৱতা ভিক্খূনং ৱস্সাৱাসো অপঞ্ঞত্তো হোতি. তেইধ ভিক্খূ হেমন্তম্পি গিম্হম্পি ৱস্সম্পি চাৰিকং চৰন্তি. মনুস্সা উজ্ঝাযন্তি খিয্যন্তি ৱিপাচেন্তি – ‘‘কথঞ্হি নাম সমণা সক্যপুত্তিযা হেমন্তম্পি গিম্হম্পি ৱস্সম্পি চাৰিকং চৰিস্সন্তি, হৰিতানি তিণানি সম্মদ্দন্তা, একিন্দ্ৰিযং জীৱং ৱিহেঠেন্তা, বহূ খুদ্দকে পাণে সঙ্ঘাতং আপাদেন্তা. ইমে হি নাম অঞ্ঞতিত্থিযা দুৰক্খাতধম্মা ৱস্সাৱাসং অল্লীযিস্সন্তি সঙ্কসাযিস্সন্তি. ইমে হি নাম সকুন্তকা ৰুক্খগ্গেসু কুলাৱকানি কৰিত্ৱা ৱস্সাৱাসং অল্লীযিস্সন্তি সঙ্কসাযিস্সন্তি [সঙ্কাসযিস্সন্তি (সী. স্যা.)]. ইমে পন সমণা সক্যপুত্তিযা হেমন্তম্পি গিম্হম্পি ৱস্সম্পি চাৰিকং চৰন্তি, হৰিতানি তিণানি সম্মদ্দন্তা, একিন্দ্ৰিযং জীৱং ৱিহেঠেন্তা, বহূ খুদ্দকে পাণে সঙ্ঘাতং আপাদেন্তা’’তি. অস্সোসুং খো ভিক্খূ তেসং মনুস্সানং উজ্ঝাযন্তানং খিয্যন্তানং ৱিপাচেন্তানং. অথ খো তে ভিক্খূ ভগৱতো এতমত্থং আৰোচেসুং. অথ খো ভগৱা এতস্মিং নিদানে এতস্মিং পকৰণে ধম্মিং কথং কত্ৱা ভিক্খূ আমন্তেসি – ‘‘অনুজানামি, ভিক্খৱে, ৱস্সং উপগন্তু’’ন্তি. অথ খো ভিক্খূনং এতদহোসি – ‘‘কদা নু খো ৱস্সং উপগন্তব্ব’’ন্তি? ভগৱতো এতমত্থং আৰোচেসুং. অনুজানামি, ভিক্খৱে, ৱস্সানে ৱস্সং উপগন্তুন্তি.

অথ খো ভিক্খূনং এতদহোসি – ‘‘কতি নু খো ৱস্সূপনাযিকা’’তি? ভগৱতো এতমত্থং

আৰোচেসুং. দ্ৱেমা, ভিক্খৱে, ৱস্সূপনাযিকা – পুৰিমিকা, পচ্ছিমিকা. অপৰজ্জুগতায আসাড়্হিযা পুৰিমিকা উপগন্তব্বা, মাসগতায আসাড়্হিযা পচ্ছিমিকা উপগন্তব্বা – ইমা খো, ভিক্খৱে, দ্ৱে ৱস্সূপনাযিকাতি.

ৱস্সূপনাযিকানুজাননা নিট্ঠিতা.

১০৮. ৱস্সানে চাৰিকাপটিক্খেপাদি

১৮৫. তেন খো পন সমযেন ছব্বগ্গিযা ভিক্খূ ৱস্সং উপগন্ত্ৱা অন্তৰাৱস্সং চাৰিকং চৰন্তি. মনুস্সা তথেৱ উজ্ঝাযন্তি খিয্যন্তি ৱিপাচেন্তি – ‘‘কথঞ্হি নাম সমণা সক্যপুত্তিযা হেমন্তম্পি গিম্হম্পি ৱস্সম্পি চাৰিকং চৰিস্সন্তি, হৰিতানি তিণানি সম্মদ্দন্তা, একিন্দ্ৰিযং জীৱং ৱিহেঠেন্তা, বহূ খুদ্দকে পাণে সঙ্ঘাতং আপাদেন্তা. ইমে হি নাম অঞ্ঞতিত্থিযা দুৰক্খাতধম্মা ৱস্সাৱাসং অল্লীযিস্সন্তি সঙ্কসাযিস্সন্তি. ইমে হি নাম সকুন্তকা ৰুক্খগ্গেসু কুলাৱকানি কৰিত্ৱা ৱস্সাৱাসং অল্লীযিস্সন্তি সঙ্কসাযিস্সন্তি. ইমে পন সমণা সক্যপুত্তিযা হেমন্তম্পি গিম্হম্পি ৱস্সম্পি চাৰিকং চৰন্তি, হৰিতানি তিণানি সম্মদ্দন্তা, একিন্দ্ৰিযং জীৱং ৱিহেঠেন্তা, বহূ খুদ্দকে পাণে সঙ্ঘাতং আপাদেন্তা’’তি. অস্সোসুং খো ভিক্খূ তেসং মনুস্সানং উজ্ঝাযন্তানং খিয্যন্তানং ৱিপাচেন্তানং. যে তে ভিক্খূ অপ্পিচ্ছা…পে… তে উজ্ঝাযন্তি খিয্যন্তি ৱিপাচেন্তি – ‘‘কথঞ্হি নাম ছব্বগ্গিযা ভিক্খূ ৱস্সং উপগন্ত্ৱা অন্তৰাৱস্সং চাৰিকং চৰিস্সন্তী’’তি? অথ খো তে ভিক্খূ ভগৱতো এতমত্থং আৰোচেসুং. অথ খো ভগৱা এতস্মিং নিদানে এতস্মিং পকৰণে ধম্মিং কথং কত্ৱা ভিক্খূ আমন্তেসি – ‘‘ন, ভিক্খৱে, ৱস্সং উপগন্ত্ৱা পুৰিমং ৱা তেমাসং পচ্ছিমং ৱা তেমাসং অৱসিত্ৱা চাৰিকা পক্কমিতব্বা. যো পক্কমেয্য, আপত্তি দুক্কটস্সা’’তি.

১৮৬. তেন খো পন সমযেন ছব্বগ্গিযা ভিক্খূ ন ইচ্ছন্তি ৱস্সং উপগন্তুং. ভগৱতো এতমত্থং আৰোচেসুং. ন, ভিক্খৱে, ৱস্সং ন উপগন্তব্বং. যো ন উপগচ্ছেয্য, আপত্তি দুক্কটস্সাতি.

তেন খো পন সমযেন ছব্বগ্গিযা ভিক্খূ তদহু ৱস্সূপনাযিকায ৱস্সং অনুপগন্তুকামা সঞ্চিচ্চ আৱাসং অতিক্কমন্তি. ভগৱতো এতমত্থং আৰোচেসুং. ন, ভিক্খৱে, তদহু ৱস্সূপনাযিকায ৱস্সং অনুপগন্তুকামেন সঞ্চিচ্চ আৱাসো অতিক্কমিতব্বো. যো অতিক্কমেয্য, আপত্তি দুক্কটস্সাতি.

তেন খো পন সমযেন ৰাজা মাগধো সেনিযো বিম্বিসাৰো ৱস্সং উক্কড্ঢিতুকামো

ভিক্খূনং সন্তিকে দূতং পাহেসি – যদি পনায্যা আগমে জুণ্হে ৱস্সং উপগচ্ছেয্যুন্তি. ভগৱতো এতমত্থং আৰোচেসুং. অনুজানামি, ভিক্খৱে, ৰাজূনং অনুৱত্তিতুন্তি.

ৱস্সানে চাৰিকাপটিক্খেপাদি নিট্ঠিতা.

১০৯. সত্তাহকৰণীযানুজাননা

১৮৭. অথ খো ভগৱা ৰাজগহে যথাভিৰন্তং ৱিহৰিত্ৱা যেন সাৱত্থি তেন চাৰিকং পক্কামি. অনুপুব্বেন চাৰিকং চৰমানো যেন সাৱত্থি তদৱসৰি. তত্ৰ সুদং ভগৱা সাৱত্থিযং ৱিহৰতি জেতৱনে অনাথপিণ্ডিকস্স আৰামে. তেন খো পন সমযেন কোসলেসু জনপদে উদেনেন উপাসকেন সঙ্ঘং উদ্দিস্স ৱিহাৰো কাৰাপিতো হোতি. সো ভিক্খূনং সন্তিকে দূতং পাহেসি – ‘‘আগচ্ছন্তু ভদন্তা, ইচ্ছামি দানঞ্চ দাতুং, ধম্মঞ্চ সোতুং, ভিক্খূ চ পস্সিতু’’ন্তি. ভিক্খূ এৱমাহংসু – ‘‘ভগৱতা, আৱুসো, পঞ্ঞত্তং ‘ন ৱস্সং উপগন্ত্ৱা পুৰিমং ৱা তেমাসং পচ্ছিমং ৱা তেমাসং অৱসিত্ৱা চাৰিকা পক্কমিতব্বা’তি. আগমেতু উদেনো উপাসকো, যাৱ ভিক্খূ ৱস্সং ৱসন্তি. ৱস্সংৱুট্ঠা আগমিস্সন্তি. সচে পনস্স অচ্চাযিকং কৰণীযং, তত্থেৱ আৱাসিকানং ভিক্খূনং সন্তিকে ৱিহাৰং পতিট্ঠাপেতূ’’তি. উদেনো উপাসকো উজ্ঝাযতি খিয্যতি ৱিপাচেতি – ‘‘কথঞ্হি নাম ভদন্তা মযা পহিতে ন আগচ্ছিস্সন্তি. অহঞ্হি দাযকো কাৰকো সঙ্ঘুপট্ঠাকো’’তি. অস্সোসুং খো ভিক্খূ উদেনস্স উপাসকস্স উজ্ঝাযন্তস্স খিয্যন্তস্স ৱিপাচেন্তস্স. অথ খো তে ভিক্খূ ভগৱতো এতমত্থং আৰোচেসুং. অথ খো ভগৱা এতস্মিং নিদানে এতস্মিং পকৰণে ধম্মিং কথং কত্ৱা ভিক্খূ আমন্তেসি – ‘‘অনুজানামি, ভিক্খৱে, সত্তন্নং সত্তাহকৰণীযেন পহিতে গন্তুং, ন ত্ৱেৱ অপ্পহিতে. ভিক্খুস্স, ভিক্খুনিযা, সিক্খমানায, সামণেৰস্স, সামণেৰিযা, উপাসকস্স, উপাসিকায – অনুজানামি, ভিক্খৱে, ইমেসং সত্তন্নং সত্তাহকৰণীযেন পহিতে গন্তুং, ন ত্ৱেৱ অপ্পহিতে. সত্তাহং সন্নিৱত্তো কাতব্বো’’.

১৮৮. ইধ পন, ভিক্খৱে, উপাসকেন সঙ্ঘং উদ্দিস্স ৱিহাৰো কাৰাপিতো হোতি. সো চে ভিক্খূনং সন্তিকে দূতং পহিণেয্য – ‘‘আগচ্ছন্তু ভদন্তা, ইচ্ছামি দানঞ্চ দাতুং, ধম্মঞ্চ সোতুং, ভিক্খূ চ পস্সিতু’’ন্তি, গন্তব্বং, ভিক্খৱে, সত্তাহকৰণীযেন, পহিতে, ন ত্ৱেৱ অপ্পহিতে. সত্তাহং সন্নিৱত্তো কাতব্বো.

ইধ পন, ভিক্খৱে, উপাসকেন সঙ্ঘং উদ্দিস্স অড্ঢযোগো কাৰাপিতো হোতি…পে… পাসাদো কাৰাপিতো হোতি… হম্মিযং কাৰাপিতং হোতি… গুহা কাৰাপিতা হোতি… পৰিৱেণং কাৰাপিতং হোতি… কোট্ঠকো কাৰাপিতো হোতি… উপট্ঠানসালা কাৰাপিতা হোতি… অগ্গিসালা কাৰাপিতা হোতি… কপ্পিযকুটি কাৰাপিতা হোতি… ৱচ্চকুটি কাৰাপিতা হোতি… চঙ্কমো কাৰাপিতো হোতি … চঙ্কমনসালা কাৰাপিতা হোতি… উদপানো কাৰাপিতো হোতি … উদপানসালা কাৰাপিতা হোতি… জন্তাঘৰং কাৰাপিতং হোতি… জন্তাঘৰসালা কাৰাপিতা হোতি… পোক্খৰণী কাৰাপিতা হোতি… মণ্ডপো কাৰাপিতো হোতি… আৰামো কাৰাপিতো হোতি… আৰামৱত্থু কাৰাপিতং হোতি. সো চে ভিক্খূনং সন্তিকে দূতং পহিণেয্য – ‘‘আগচ্ছন্তু ভদন্তা, ইচ্ছামি দানঞ্চ দাতুং, ধম্মঞ্চ সোতুং, ভিক্খূ চ পস্সিতু’’ন্তি, গন্তব্বং, ভিক্খৱে, সত্তাহকৰণীযেন, পহিতে, ন ত্ৱেৱ অপ্পহিতে. সত্তাহং সন্নিৱত্তো কাতব্বো.

ইধ পন, ভিক্খৱে, উপাসকেন সম্বহুলে ভিক্খূ উদ্দিস্স…পে… একং ভিক্খুং উদ্দিস্স ৱিহাৰো কাৰাপিতো হোতি… অড্ঢযোগো কাৰাপিতো হোতি… পাসাদো কাৰাপিতো হোতি … হম্মিযং কাৰাপিতং হোতি… গুহা কাৰাপিতা হোতি… পৰিৱেণং কাৰাপিতং হোতি… কোট্ঠকো কাৰাপিতো হোতি… উপট্ঠানসালা কাৰাপিতা হোতি… অগ্গিসালা কাৰাপিতা হোতি… কপ্পিযকুটি কাৰাপিতা হোতি… ৱচ্চকুটি কাৰাপিতা হোতি… চঙ্কমো কাৰাপিতো হোতি… চঙ্কমনসালা কাৰাপিতা হোতি… উদপানো কাৰাপিতো হোতি… উদপানসালা কাৰাপিতা হোতি… জন্তাঘৰং কাৰাপিতং হোতি… জন্তাঘৰসালা কাৰাপিতা হোতি… পোক্খৰণী কাৰাপিতা হোতি… মণ্ডপো কাৰাপিতো হোতি… আৰামো কাৰাপিতো হোতি… আৰামৱত্থু কাৰাপিতং হোতি. সো চে ভিক্খূনং সন্তিকে দূতং পহিণেয্য – ‘‘আগচ্ছন্তু ভদন্তা, ইচ্ছামি দানঞ্চ দাতুং, ধম্মঞ্চ সোতুং, ভিক্খূ চ পস্সিতু’’ন্তি, গন্তব্বং, ভিক্খৱে, সত্তাহকৰণীযেন, পহিতে, ন ত্ৱেৱ অপ্পহিতে. সত্তাহং সন্নিৱত্তো কাতব্বো.

ইধ পন, ভিক্খৱে, উপাসকেন ভিক্খুনিসঙ্ঘং উদ্দিস্স…পে… সম্বহুলা ভিক্খুনিযো উদ্দিস্স…পে… একং ভিক্খুনিং উদ্দিস্স…পে… সম্বহুলা সিক্খমানাযো উদ্দিস্স…পে… একং সিক্খমানং উদ্দিস্স…পে… সম্বহুলে সামণেৰে উদ্দিস্স…পে… একং সামণেৰং উদ্দিস্স…পে… সম্বহুলা সামণেৰিযো উদ্দিস্স…পে… একং সামণেৰিং উদ্দিস্স ৱিহাৰো কাৰাপিতো হোতি…পে… অড্ঢযোগো কাৰাপিতো হোতি… পাসাদো কাৰাপিতো হোতি… হম্মিযং কাৰাপিতং হোতি… গুহা কাৰাপিতা হোতি… পৰিৱেণং কাৰাপিতং হোতি… কোট্ঠকো কাৰাপিতো হোতি… উপট্ঠানসালা কাৰাপিতা হোতি… অগ্গিসালা কাৰাপিতা হোতি … কপ্পিযকুটি কাৰাপিতা হোতি… চঙ্কমো কাৰাপিতো হোতি… চঙ্কমনসালা কাৰাপিতা হোতি… উদপানো কাৰাপিতো হোতি… উদপানসালা কাৰাপিতা হোতি… পোক্খৰণী কাৰাপিতা হোতি… মণ্ডপো কাৰাপিতো হোতি… আৰামো কাৰাপিতো হোতি… আৰামৱত্থু কাৰাপিতং হোতি. সো চে ভিক্খূনং সন্তিকে দূতং পহিণেয্য – ‘‘আগচ্ছন্তু ভদন্তা, ইচ্ছামি দানঞ্চ দাতুং, ধম্মঞ্চ সোতুং, ভিক্খূ চ পস্সিতু’’ন্তি, গন্তব্বং, ভিক্খৱে, সত্তাহকৰণীযেন, পহিতে, ন ত্ৱেৱ অপ্পহিতে. সত্তাহং সন্নিৱত্তো কাতব্বো.

১৮৯. ইধ পন, ভিক্খৱে, উপাসকেন অত্তনো অত্থায নিৱেসনং কাৰাপিতং হোতি…পে… সযনিঘৰং কাৰাপিতং হোতি… উদোসিতো কাৰাপিতো হোতি… অট্টো কাৰাপিতো হোতি… মাড়ো কাৰাপিতো হোতি… আপণো কাৰাপিতো হোতি… আপণসালা কাৰাপিতা হোতি… পাসাদো কাৰাপিতো হোতি… হম্মিযং কাৰাপিতং হোতি… গুহা কাৰাপিতা হোতি… পৰিৱেণং কাৰাপিতং হোতি… কোট্ঠকো কাৰাপিতো হোতি… উপট্ঠানসালা কাৰাপিতা হোতি… অগ্গিসালা কাৰাপিতা হোতি… ৰসৱতী কাৰাপিতা হোতি… চঙ্কমো কাৰাপিতো হোতি… চঙ্কমনসালা কাৰাপিতা হোতি… উদপানো কাৰাপিতো হোতি… উদপানসালা কাৰাপিতা হোতি… পোক্খৰণী কাৰাপিতা হোতি… মণ্ডপো কাৰাপিতো হোতি… আৰামো কাৰাপিতো হোতি … আৰামৱত্থু কাৰাপিতং হোতি… পুত্তস্স ৱা ৱাৰেয্যং হোতি… ধীতুযা ৱা ৱাৰেয্যং হোতি… গিলানো ৱা হোতি… অভিঞ্ঞাতং ৱা সুত্তন্তং ভণতি. সো চে ভিক্খূনং সন্তিকে দূতং পহিণেয্য – ‘আগচ্ছন্তু ভদন্তা, ইমং সুত্তন্তং পৰিযাপুণিস্সন্তি, পুৰাযং সুত্তন্তো ন পলুজ্জতী’তি. অঞ্ঞতৰং ৱা পনস্স কিচ্চং হোতি – কৰণীযং ৱা, সো চে ভিক্খূনং সন্তিকে দূতং পহিণেয্য – ‘‘আগচ্ছন্তু ভদন্তা, ইচ্ছামি দানঞ্চ দাতুং, ধম্মঞ্চ সোতুং, ভিক্খূ চ পস্সিতু’’ন্তি, গন্তব্বং, ভিক্খৱে, সত্তাহকৰণীযেন, পহিতে, ন ত্ৱেৱ অপ্পহিতে. সত্তাহং সন্নিৱত্তো কাতব্বো.

১৯০. ইধ পন, ভিক্খৱে, উপাসিকায সঙ্ঘং উদ্দিস্স ৱিহাৰো কাৰাপিতো হোতি. সা চে ভিক্খূনং সন্তিকে দূতং পহিণেয্য – ‘‘আগচ্ছন্তু অয্যা, ইচ্ছামি দানঞ্চ দাতুং, ধম্মঞ্চ সোতুং, ভিক্খূ চ পস্সিতু’’ন্তি, গন্তব্বং, ভিক্খৱে, সত্তাহকৰণীযেন, পহিতে, ন ত্ৱেৱ অপ্পহিতে. সত্তাহং সন্নিৱত্তো কাতব্বো.

ইধ পন, ভিক্খৱে, উপাসিকায সঙ্ঘং উদ্দিস্স অড্ঢযোগো কাৰাপিতো হোতি…পে… পাসাদো কাৰাপিতো হোতি… হম্মিযং কাৰাপিতং হোতি… গুহা কাৰাপিতা হোতি… পৰিৱেণং কাৰাপিতং হোতি… কোট্ঠকো কাৰাপিতো হোতি… উপট্ঠানসালা কাৰাপিতা হোতি… অগ্গিসালা কাৰাপিতা হোতি… কপ্পিযকুটি কাৰাপিতা হোতি… ৱচ্চকুটি কাৰাপিতা হোতি… চঙ্কমো কাৰাপিতো হোতি… চঙ্কমনসালা কাৰাপিতা হোতি… উদপানো কাৰাপিতো হোতি… উদপানসালা কাৰাপিতা হোতি… জন্তাঘৰং কাৰাপিতং হোতি… জন্তাঘৰসালা কাৰাপিতা হোতি… পোক্খৰণী কাৰাপিতা হোতি… মণ্ডপো কাৰাপিতো হোতি… আৰামো কাৰাপিতো হোতি… আৰামৱত্থু কাৰাপিতং হোতি. সা চে ভিক্খূনং সন্তিকে দূতং পহিণেয্য – ‘‘আগচ্ছন্তু অয্যা, ইচ্ছামি দানঞ্চ দাতুং, ধম্মঞ্চ সোতুং, ভিক্খূ চ পস্সিতু’’ন্তি, গন্তব্বং, ভিক্খৱে, সত্তাহকৰণীযেন, পহিতে, ন ত্ৱেৱ অপ্পহিতে. সত্তাহং সন্নিৱত্তো কাতব্বো.

ইধ পন, ভিক্খৱে, উপাসিকায সম্বহুলে ভিক্খূ উদ্দিস্স…পে… একং ভিক্খুং উদ্দিস্স…পে… ভিক্খুনিসঙ্ঘং উদ্দিস্স…পে… সম্বহুলা ভিক্খুনিযো উদ্দিস্স…পে… একং ভিক্খুনিং উদ্দিস্স…পে… সম্বহুলা সিক্খমানাযো উদ্দিস্স…পে… একং সিক্খমানং উদ্দিস্স…পে… সম্বহুলে সামণেৰে উদ্দিস্স…পে… একং সামণেৰং উদ্দিস্স…পে… সম্বহুলা সামণেৰিযো উদ্দিস্স…পে… একং সামণেৰিং উদ্দিস্স…পে….

১৯১. ইধ পন, ভিক্খৱে, উপাসিকায অত্তনো অত্থায নিৱেসনং কাৰাপিতং হোতি…পে… সযনিঘৰং কাৰাপিতং হোতি… উদোসিতো কাৰাপিতো হোতি… অট্টো কাৰাপিতো হোতি… মাড়ো কাৰাপিতো হোতি… আপণো কাৰাপিতো হোতি… আপণসালা কাৰাপিতা হোতি… পাসাদো কাৰাপিতো হোতি… হম্মিযং কাৰাপিতং হোতি… গুহা কাৰাপিতা হোতি… পৰিৱেণং কাৰাপিতং হোতি… কোট্ঠকো কাৰাপিতো হোতি… উপট্ঠানসালা কাৰাপিতা হোতি… অগ্গিসালা কাৰাপিতা হোতি… ৰসৱতী কাৰাপিতা হোতি… চঙ্কমো কাৰাপিতো হোতি… চঙ্কমনসালা কাৰাপিতা হোতি… উদপানো কাৰাপিতো হোতি … উদপানসালা কাৰাপিতা হোতি… পোক্খৰণী কাৰাপিতা হোতি… মণ্ডপো কাৰাপিতো হোতি… আৰামো কাৰাপিতো হোতি… আৰামৱত্থু কাৰাপিতং হোতি… পুত্তস্স ৱা ৱাৰেয্যং হোতি… ধীতুযা ৱা ৱাৰেয্যং হোতি… গিলানা ৱা হোতি… অভিঞ্ঞাতং ৱা সুত্তন্তং ভণতি. সা চে ভিক্খূনং সন্তিকে দূতং পহিণেয্য – ‘‘আগচ্ছন্তু অয্যা, ইমং সুত্তন্তং পৰিযাপুণিস্সন্তি, পুৰাযং সুত্তন্তো পলুজ্জতী’’তি. অঞ্ঞতৰং ৱা পনস্সা কিচ্চং হোতি কৰণীযং ৱা, সা চে ভিক্খূনং সন্তিকে দূতং পহিণেয্য – ‘‘আগচ্ছন্তু অয্যা, ইচ্ছামি দানঞ্চ দাতুং, ধম্মঞ্চ সোতুং, ভিক্খূ চ পস্সিতু’’ন্তি, গন্তব্বং, ভিক্খৱে, সত্তাহকৰণীযেন, পহিতে, ন ত্ৱেৱ অপ্পহিতে. সত্তাহং সন্নিৱত্তো কাতব্বো.

১৯২. ইধ পন, ভিক্খৱে, ভিক্খুনা সঙ্ঘং উদ্দিস্স…পে… ভিক্খুনিযা সঙ্ঘং উদ্দিস্স… সিক্খমানায সঙ্ঘং উদ্দিস্স… সামণেৰেন সঙ্ঘং উদ্দিস্স… সামণেৰিযা সঙ্ঘং উদ্দিস্স … সম্বহুলে ভিক্খূ উদ্দিস্স… একং ভিক্খুং উদ্দিস্স… ভিক্খুনিসঙ্ঘং উদ্দিস্স… সম্বহুলা ভিক্খুনিযো উদ্দিস্স… একং ভিক্খুনিং উদ্দিস্স… সম্বহুলা সিক্খমানাযো উদ্দিস্স… একং সিক্খমানং উদ্দিস্স… সম্বহুলে সামণেৰে উদ্দিস্স… একং সামণেৰং উদ্দিস্স… সম্বহুলা সামণেৰিযো উদ্দিস্স… একং সামণেৰিং উদ্দিস্স… অত্তনো অত্থায ৱিহাৰো কাৰাপিতো হোতি…পে… অড্ঢযোগো কাৰাপিতো হোতি… পাসাদো কাৰাপিতো হোতি… হম্মিযং কাৰাপিতং হোতি… গুহা কাৰাপিতা হোতি… পৰিৱেণং কাৰাপিতং হোতি … কোট্ঠকো কাৰাপিতো হোতি… উপট্ঠানসালা কাৰাপিতা হোতি… অগ্গিসালা কাৰাপিতা হোতি… কপ্পিযকুটি কাৰাপিতা হোতি… চঙ্কমো কাৰাপিতো হোতি… চঙ্কমনসালা কাৰাপিতা হোতি… উদপানো কাৰাপিতো হোতি… উদপানসালা কাৰাপিতা হোতি… পোক্খৰণী কাৰাপিতা হোতি… মণ্ডপো কাৰাপিতো হোতি… আৰামো কাৰাপিতো হোতি… আৰামৱত্থু কাৰাপিতং হোতি. সা চে ভিক্খূনং সন্তিকে দূতং পহিণেয্য… ‘‘আগচ্ছন্তু অয্যা, ইচ্ছামি দানঞ্চ দাতুং, ধম্মঞ্চ সোতুং, ভিক্খূ চ পস্সিতু’’ন্তি, গন্তব্বং, ভিক্খৱে, সত্তাহকৰণীযেন, পহিতে, ন ত্ৱেৱ অপ্পহিতে. সত্তাহং সন্নিৱত্তো কাতব্বোতি.

সত্তাহকৰণীযানুজানতা নিট্ঠিতা.

১১০. পঞ্চন্নং অপ্পহিতেপি অনুজাননা

১৯৩. তেন খো পন সমযেন অঞ্ঞতৰো ভিক্খু গিলানো হোতি. সো ভিক্খূনং সন্তিকে দূতং পাহেসি – ‘‘অহঞ্হি গিলানো, আগচ্ছন্তু ভিক্খূ, ইচ্ছামি ভিক্খূনং আগত’’ন্তি. ভগৱতো এতমত্থং আৰোচেসুং. অনুজানামি, ভিক্খৱে, পঞ্চন্নং সত্তাহকৰণীযেন অপ্পহিতেপি গন্তুং, পগেৱ পহিতে. ভিক্খুস্স, ভিক্খুনিযা, সিক্খমানায, সামণেৰস্স, সামণেৰিযা – অনুজানামি, ভিক্খৱে, ইমেসং পঞ্চন্নং সত্তাহকৰণীযেন অপ্পহিতেপি গন্তুং, পগেৱ পহিতে. সত্তাহং সন্নিৱত্তো কাতব্বো.

ইধ পন, ভিক্খৱে, ভিক্খু গিলানো হোতি. সো চে ভিক্খূনং সন্তিকে দূতং পহিণেয্য – ‘‘অহঞ্হি গিলানো, আগচ্ছন্তু ভিক্খূ, ইচ্ছামি ভিক্খূনং আগত’’ন্তি, গন্তব্বং, ভিক্খৱে, সত্তাহকৰণীযেন, অপ্পহিতেপি, পগেৱ পহিতে – ‘‘গিলানভত্তং ৱা পৰিযেসিস্সামি, গিলানুপট্ঠাকভত্তং ৱা পৰিযেসিস্সামি, গিলানভেসজ্জং ৱা পৰিযেসিস্সামি, পুচ্ছিস্সামি ৱা, উপট্ঠহিস্সামি ৱা’’তি. সত্তাহং সন্নিৱত্তো কাতব্বো.

ইধ পন, ভিক্খৱে, ভিক্খুস্স অনভিৰতি উপ্পন্না হোতি. সো চে ভিক্খূনং সন্তিকে দূতং পহিণেয্য – ‘‘অনভিৰতি মে উপ্পন্না, আগচ্ছন্তু ভিক্খূ, ইচ্ছামি ভিক্খূনং আগত’’ন্তি, গন্তব্বং, ভিক্খৱে, সত্তাহকৰণীযেন, অপ্পহিতেপি, পগেৱ পহিতে – ‘‘অনভিৰতং ৱূপকাসেস্সামি ৱা, ৱূপকাসাপেস্সামি ৱা, ধম্মকথং ৱাস্স কৰিস্সামী’’তি. সত্তাহং সন্নিৱত্তো কাতব্বো.

ইধ পন, ভিক্খৱে, ভিক্খুস্স কুক্কুচ্চং উপ্পন্নং হোতি. সো চে ভিক্খূনং সন্তিকে দূতং পহিণেয্য – ‘‘কুক্কুচ্চং মে উপ্পন্নং, আগচ্ছন্তু ভিক্খূ, ইচ্ছামি ভিক্খূনং আগত’’ন্তি, গন্তব্বং, ভিক্খৱে, সত্তাহকৰণীযেন, অপ্পহিতেপি, পগেৱ পহিতে – ‘‘কুক্কুচ্চং ৱিনোদেস্সামি ৱা, ৱিনোদাপেস্সামি ৱা, ধম্মকথং ৱাস্স কৰিস্সামী’’তি. সত্তাহং সন্নিৱত্তো কাতব্বো.

ইধ পন, ভিক্খৱে, ভিক্খুস্স দিট্ঠিগতং উপ্পন্নং হোতি. সো চে ভিক্খূনং সন্তিকে দূতং পহিণেয্য – ‘‘দিট্ঠিগতং মে উপ্পন্নং, আগচ্ছন্তু ভিক্খূ, ইচ্ছামি ভিক্খূনং আগত’’ন্তি, গন্তব্বং, ভিক্খৱে, সত্তাহকৰণীযেন, অপ্পহিতেপি, পগেৱ পহিতে – ‘‘দিট্ঠিগতং ৱিৱেচেস্সামি ৱা, ৱিৱেচাপেস্সামি ৱা, ধম্মকথং ৱাস্স কৰিস্সামী’’তি. সত্তাহং সন্নিৱত্তো কাতব্বো.

ইধ পন, ভিক্খৱে, ভিক্খু গৰুধম্মং অজ্ঝাপন্নো হোতি পৰিৱাসাৰহো. সো চে ভিক্খূনং সন্তিকে দূতং পহিণেয্য – ‘‘অহঞ্হি গৰুধম্মং অজ্ঝাপন্নো পৰিৱাসাৰহো, আগচ্ছন্তু ভিক্খূ, ইচ্ছামি ভিক্খূনং আগত’’ন্তি, গন্তব্বং, ভিক্খৱে, সত্তাহকৰণীযেন, অপ্পহিতেপি, পগেৱ পহিতে – ‘‘পৰিৱাসদানং উস্সুক্কং কৰিস্সামি ৱা, অনুস্সাৱেস্সামি ৱা, গণপূৰকো ৱা ভৱিস্সামী’’তি. সত্তাহং সন্নিৱত্তো কাতব্বো.

ইধ পন, ভিক্খৱে, ভিক্খু মূলায পটিকস্সনাৰহো হোতি. সো চে ভিক্খূনং সন্তিকে দূতং পহিণেয্য – ‘‘অহঞ্হি মূলায পটিকস্সনাৰহো, আগচ্ছন্তু ভিক্খূ, ইচ্ছামি ভিক্খূনং আগত’’ন্তি, গন্তব্বং, ভিক্খৱে, সত্তাহকৰণীযেন, অপ্পহিতেপি, পগেৱ পহিতে – ‘‘মূলায পটিকস্সনং উস্সুক্কং কৰিস্সামি ৱা, অনুস্সাৱেস্সামি ৱা, গণপূৰকো ৱা ভৱিস্সামী’’তি. সত্তাহং সন্নিৱত্তো কাতব্বো.

ইধ পন, ভিক্খৱে, ভিক্খু মানত্তাৰহো হোতি. সো চে ভিক্খূনং সন্তিকে দূতং পহিণেয্য – ‘‘অহঞ্হি মানত্তাৰহো, আগচ্ছন্তু ভিক্খূ, ইচ্ছামি ভিক্খূনং আগত’’ন্তি, গন্তব্বং, ভিক্খৱে, সত্তাহকৰণীযেন, অপ্পহিতেপি, পগেৱ পহিতে – ‘‘মানত্তদানং উস্সুক্কং কৰিস্সামি ৱা, অনুস্সাৱেস্সামি ৱা, গণপূৰকো ৱা ভৱিস্সামী’’তি. সত্তাহং সন্নিৱত্তো কাতব্বো.

ইধ পন, ভিক্খৱে, ভিক্খু অব্ভানাৰহো হোতি. সো চে ভিক্খূনং সন্তিকে দূতং পহিণেয্য – ‘‘অহঞ্হি অব্ভানাৰহো, আগচ্ছন্তু ভিক্খূ, ইচ্ছামি ভিক্খূনং আগত’’ন্তি, গন্তব্বং, ভিক্খৱে, সত্তাহকৰণীযেন, অপ্পহিতেপি, পগেৱ পহিতে – ‘‘অব্ভানং উস্সুক্কং কৰিস্সামি ৱা, অনুস্সাৱেস্সামি ৱা, গণপূৰকো ৱা ভৱিস্সামী’’তি. সত্তাহং সন্নিৱত্তো কাতব্বো.

ইধ পন, ভিক্খৱে, ভিক্খুস্স সঙ্ঘো কম্মং কত্তুকামো হোতি তজ্জনীযং ৱা, নিযস্সং ৱা, পব্বাজনীযং ৱা, পটিসাৰণীযং ৱা, উক্খেপনীযং ৱা. সো চে ভিক্খূনং সন্তিকে দূতং পহিণেয্য – ‘‘সঙ্ঘো মে কম্মং কত্তুকামো, আগচ্ছন্তু ভিক্খূ, ইচ্ছামি ভিক্খূনং আগত’’ন্তি, গন্তব্বং, ভিক্খৱে, সত্তাহকৰণীযেন, অপ্পহিতেপি, পগেৱ পহিতে – ‘‘কিন্তি নু খো সঙ্ঘো কম্মং ন কৰেয্য, লহুকায ৱা পৰিণামেয্যা’’তি. সত্তাহং সন্নিৱত্তো কাতব্বো.

কতং ৱা পনস্স হোতি সঙ্ঘেন কম্মং তজ্জনীযং ৱা নিযস্সং ৱা পব্বাজনীযং ৱা পটিসাৰণীযং ৱা উক্খেপনীযং ৱা. সো চে ভিক্খূনং সন্তিকে দূতং পহিণেয্য ‘‘সঙ্ঘো মে কম্মং অকাসি, আগচ্ছন্তু ভিক্খূ, ইচ্ছামি ভিক্খূনং আগত’’ন্তি, গন্তব্বং, ভিক্খৱে, সত্তাহকৰণীযেন, অপ্পহিতেপি, পগেৱ পহিতে – ‘‘কিন্তি নু খো সম্মা ৱত্তেয্য, লোমং পাতেয্য, নেত্থাৰং ৱত্তেয্য, সঙ্ঘো তং কম্মং পটিপ্পস্সম্ভেয্যা’’তি. সত্তাহং সন্নিৱত্তো কাতব্বো.

১৯৪. ইধ পন, ভিক্খৱে, ভিক্খুনী গিলানা হোতি. সা চে ভিক্খূনং সন্তিকে দূতং পহিণেয্য – ‘‘অহঞ্হি গিলানা, আগচ্ছন্তু অয্যা, ইচ্ছামি অয্যানং আগত’’ন্তি, গন্তব্বং, ভিক্খৱে, সত্তাহকৰণীযেন, অপ্পহিতেপি, পগেৱ পহিতে – ‘‘গিলানভত্তং ৱা পৰিযেসিস্সামি, গিলানুপট্ঠাকভত্তং ৱা পৰিযেসিস্সামি, গিলানভেসজ্জং ৱা পৰিযেসিস্সামি, পুচ্ছিস্সামি ৱা, উপট্ঠহিস্সামি ৱা’’তি. সত্তাহং সন্নিৱত্তো কাতব্বো.

ইধ পন, ভিক্খৱে, ভিক্খুনিযা অনভিৰতি উপ্পন্না হোতি. সা চে ভিক্খূনং সন্তিকে দূতং পহিণেয্য – ‘‘অনভিৰতি মে উপ্পন্না, আগচ্ছন্তু অয্যা, ইচ্ছামি অয্যানং আগত’’ন্তি, গন্তব্বং, ভিক্খৱে, সত্তাহকৰণীযেন, অপ্পহিতেপি, পগেৱ পহিতে – ‘‘অনভিৰতং ৱূপকাসেস্সামি ৱা, ৱূপকাসাপেস্সামি ৱা, ধম্মকথং ৱাস্সা কৰিস্সামী’’তি. সত্তাহং সন্নিৱত্তো কাতব্বো.

ইধ পন, ভিক্খৱে, ভিক্খুনিযা কুক্কুচ্চং উপ্পন্নং হোতি. সা চে ভিক্খূনং সন্তিকে দূতং পহিণেয্য – ‘‘কুক্কুচ্চং মে উপ্পন্নং, আগচ্ছন্তু অয্যা, ইচ্ছামি অয্যানং আগত’’ন্তি, গন্তব্বং, ভিক্খৱে, সত্তাহকৰণীযেন, অপ্পহিতেপি, পগেৱ পহিতে – ‘‘কুক্কুচ্চং ৱিনোদেস্সামি ৱা, ৱিনোদাপেস্সামি ৱা, ধম্মকথং ৱাস্সা কৰিস্সামী’’তি. সত্তাহং সন্নিৱত্তো কাতব্বো.

ইধ পন, ভিক্খৱে, ভিক্খুনিযা দিট্ঠিগতং উপ্পন্নং হোতি. সা চে ভিক্খূনং সন্তিকে দূতং পহিণেয্য – ‘‘দিট্ঠিগতং মে উপ্পন্নং, আগচ্ছন্তু অয্যা, ইচ্ছামি অয্যানং আগত’’ন্তি, গন্তব্বং, ভিক্খৱে, সত্তাহকৰণীযেন, অপ্পহিতেপি, পগেৱ পহিতে – ‘‘দিট্ঠিগতং ৱিৱেচেস্সামি ৱা, ৱিৱেচাপেস্সামি ৱা, ধম্মকথং ৱাস্সা কৰিস্সামী’’তি. সত্তাহং সন্নিৱত্তো কাতব্বো.

ইধ পন, ভিক্খৱে, ভিক্খুনী গৰুধম্মং অজ্ঝাপন্না হোতি মানত্তাৰহা. সা চে ভিক্খূনং সন্তিকে দূতং পহিণেয্য – ‘‘অহঞ্হি গৰুধম্মং অজ্ঝাপন্না মানত্তাৰহা, আগচ্ছন্তু অয্যা, ইচ্ছামি অয্যানং আগত’’ন্তি, গন্তব্বং, ভিক্খৱে, সত্তাহকৰণীযেন, অপ্পহিতেপি, পগেৱ পহিতে – ‘‘মানত্তদানং উস্সুক্কং কৰিস্সামী’’তি. সত্তাহং সন্নিৱত্তো কাতব্বো.

ইধ পন, ভিক্খৱে, ভিক্খুনী মূলায পটিকস্সনাৰহা হোতি. সা চে ভিক্খূনং সন্তিকে দূতং পহিণেয্য – ‘‘অহঞ্হি মূলায পটিকস্সনাৰহা, আগচ্ছন্তু অয্যা, ইচ্ছামি অয্যানং আগত’’ন্তি, গন্তব্বং, ভিক্খৱে, সত্তাহকৰণীযেন, অপ্পহিতেপি, পগেৱ পহিতে – ‘‘মূলায পটিকস্সনং উস্সুক্কং কৰিস্সামী’’তি. সত্তাহং সন্নিৱত্তো কাতব্বো.

ইধ পন, ভিক্খৱে, ভিক্খুনী অব্ভানাৰহা হোতি. সা চে ভিক্খূনং সন্তিকে দূতং পহিণেয্য – ‘‘অহঞ্হি অব্ভানাৰহা, আগচ্ছন্তু অয্যা, ইচ্ছামি অয্যানং আগত’’ন্তি, গন্তব্বং, ভিক্খৱে, সত্তাহকৰণীযেন, অপ্পহিতেপি, পগেৱ পহিতে – ‘‘অব্ভানং উস্সুক্কং কৰিস্সামী’’তি. সত্তাহং সন্নিৱত্তো কাতব্বো.

ইধ পন, ভিক্খৱে, ভিক্খুনিযা সঙ্ঘো কম্মং কত্তুকামো হোতি – তজ্জনীযং ৱা, নিযস্সং ৱা, পব্বাজনীযং ৱা, পটিসাৰণীযং ৱা, উক্খেপনীযং ৱা. সা চে ভিক্খূনং সন্তিকে দূতং পহিণেয্য – ‘‘সঙ্ঘো মে কম্মং কত্তুকামো, আগচ্ছন্তু অয্যা, ইচ্ছামি অয্যানং আগত’’ন্তি, গন্তব্বং, ভিক্খৱে, সত্তাহকৰণীযেন, অপ্পহিতেপি, পগেৱ পহিতে – ‘‘কিন্তি নু খো সঙ্ঘো কম্মং ন কৰেয্য, লহুকায ৱা পৰিণামেয্যা’’তি. সত্তাহং সন্নিৱত্তো কাতব্বো.

কতং ৱা পনস্সা হোতি সঙ্ঘেন কম্মং – তজ্জনীযং ৱা, নিযস্সং ৱা, পব্বাজনীযং ৱা, পটিসাৰণীযং ৱা, উক্খেপনীযং ৱা. সা চে ভিক্খূনং সন্তিকে দূতং পহিণেয্য – ‘‘সঙ্ঘো মে কম্মং অকাসি, আগচ্ছন্তু অয্যা, ইচ্ছামি অয্যানং আগত’’ন্তি, গন্তব্বং, ভিক্খৱে, সত্তাহকৰণীযেন, অপ্পহিতেপি, পগেৱ পহিতে – ‘‘কিন্তি নু খো সম্মা ৱত্তেয্য, লোমং পাতেয্য, নেত্থাৰং ৱত্তেয্য, সঙ্ঘো তং কম্মং পটিপ্পস্সম্ভেয্যা’’তি. সত্তাহং সন্নিৱত্তো কাতব্বো.

১৯৫. ইধ পন, ভিক্খৱে, সিক্খমানা গিলানা হোতি. সা চে ভিক্খূনং সন্তিকে দূতং পহিণেয্য – ‘‘অহঞ্হি গিলানা, আগচ্ছন্তু অয্যা, ইচ্ছামি অয্যানং আগত’’ন্তি – গন্তব্বং, ভিক্খৱে, সত্তাহকৰণীযেন, অপ্পহিতেপি, পগেৱ পহিতে – ‘‘গিলানভত্তং ৱা পৰিযেসিস্সামি, গিলানুপট্ঠাকভত্তং ৱা পৰিযেসিস্সামি, গিলানভেসজ্জং ৱা পৰিযেসিস্সামি, পুচ্ছিস্সামি ৱা, উপট্ঠহিস্সামি ৱা’’তি. সত্তাহং সন্নিৱত্তো কাতব্বো.

ইধ পন, ভিক্খৱে, সিক্খমানায অনভিৰতি উপ্পন্না হোতি…পে… সিক্খমানায কুক্কুচ্চং উপ্পন্নং হোতি… সিক্খমানায দিট্ঠিগতং উপ্পন্নং হোতি… সিক্খমানায সিক্খা কুপিতা হোতি. সা চে ভিক্খূনং সন্তিকে দূতং পহিণেয্য – ‘‘সিক্খা মে কুপিতা, আগচ্ছন্তু অয্যা, ইচ্ছামি অয্যানং আগত’’ন্তি, গন্তব্বং, ভিক্খৱে, সত্তাহকৰণীযেন, অপ্পহিতেপি, পগেৱ পহিতে – ‘‘সিক্খাসমাদানং উস্সুক্কং কৰিস্সামী’’তি. সত্তাহং সন্নিৱত্তো কাতব্বো.

ইধ পন, ভিক্খৱে, সিক্খমানা উপসম্পজ্জিতুকামা হোতি. সা চে ভিক্খূনং সন্তিকে দূতং পহিণেয্য – ‘‘অহঞ্হি উপসম্পজ্জিতুকামা, আগচ্ছন্তু অয্যা, ইচ্ছামি অয্যানং আগত’’ন্তি গন্তব্বং, ভিক্খৱে, সত্তাহকৰণীযেন, অপ্পহিতেপি, পগেৱ পহিতে – উপসম্পদং উস্সুক্কং কৰিস্সামি ৱা, অনুস্সাৱেস্সামি ৱা, গণপূৰকো ৱা ভৱিস্সামীতি. সত্তাহং সন্নিৱত্তো কাতব্বো.

১৯৬. ইধ পন, ভিক্খৱে, সামণেৰো গিলানো হোতি. সো চে ভিক্খূনং সন্তিকে দূতং পহিণেয্য – ‘‘অহঞ্হি গিলানো, আগচ্ছন্তু ভিক্খূ, ইচ্ছামি ভিক্খূনং আগত’’ন্তি, গন্তব্বং, ভিক্খৱে, সত্তাহকৰণীযেন, অপ্পহিতেপি, পগেৱ পহিতে – ‘‘গিলানভত্তং ৱা পৰিযেসিস্সামি, গিলানুপট্ঠাকভত্তং ৱা পৰিযেসিস্সামি, গিলানভেসজ্জং ৱা পৰিযেসিস্সামি, পুচ্ছিস্সামি ৱা, উপট্ঠহিস্সামি ৱা’’তি. সত্তাহং সন্নিৱত্তো কাতব্বো.

ইধ পন, ভিক্খৱে, সামণেৰস্স অনভিৰতি উপ্পন্না হোতি…পে… সামণেৰস্স কুক্কুচ্চং উপ্পন্নং হোতি… সামণেৰস্স দিট্ঠিগতং উপ্পন্নং হোতি… সামণেৰো ৱস্সং পুচ্ছিতুকামো হোতি. সো চে ভিক্খূনং সন্তিকে দূতং পহিণেয্য – ‘‘অহঞ্হি ৱস্সং পুচ্ছিতুকামো, আগচ্ছন্তু ভিক্খূ, ইচ্ছামি ভিক্খূনং আগত’’ন্তি, গন্তব্বং, ভিক্খৱে, সত্তাহকৰণীযেন, অপ্পহিতেপি, পগেৱ পহিতে – ‘‘পুচ্ছিস্সামি ৱা, আচিক্খিস্সামি ৱা’’তি. সত্তাহং সন্নিৱত্তো কাতব্বো.

ইধ পন, ভিক্খৱে, সামণেৰো উপসম্পজ্জিতুকামো হোতি. সো চে ভিক্খূনং সন্তিকে দূতং পহিণেয্য – ‘‘অহঞ্হি উপসম্পজ্জিতুকামো, আগচ্ছন্তু ভিক্খূ, ইচ্ছামি ভিক্খূনং আগত’’ন্তি, গন্তব্বং, ভিক্খৱে, সত্তাহকৰণীযেন, অপ্পহিতেপি, পগেৱ পহিতে – ‘‘উপসম্পদং উস্সুক্কং কৰিস্সামি ৱা, অনুস্সাৱেস্সামি ৱা, গণপূৰকো ৱা ভৱিস্সামী’’তি. সত্তাহং সন্নিৱত্তো কাতব্বো.

১৯৭. ইধ পন, ভিক্খৱে, সামণেৰী গিলানা হোতি. সা চে ভিক্খূনং সন্তিকে দূতং পহিণেয্য – ‘‘অহঞ্হি গিলানা, আগচ্ছন্তু অয্যা, ইচ্ছামি অয্যানং আগত’’ন্তি, গন্তব্বং, ভিক্খৱে, সত্তাহকৰণীযেন, অপ্পহিতেপি, পগেৱ পহিতে – ‘‘গিলানভত্তং ৱা পৰিযেসিস্সামি, গিলানুপট্ঠাকভত্তং ৱা পৰিযেসিস্সামি, গিলানভেসজ্জং ৱা পৰিযেসিস্সামি, পুচ্ছিস্সামি ৱা, উপট্ঠহিস্সামি ৱা’’তি. সত্তাহং সন্নিৱত্তো কাতব্বো.

ইধ পন, ভিক্খৱে, সামণেৰিযা অনভিৰতি উপ্পন্না হোতি…পে… সামণেৰিযা কুক্কুচ্চং উপ্পন্নং হোতি… সামণেৰিযা দিট্ঠিগতং উপ্পন্নং হোতি… সামণেৰী ৱস্সং পুচ্ছিতুকামা হোতি. সা চে ভিক্খূনং সন্তিকে দূতং পহিণেয্য – ‘‘অহঞ্হি ৱস্সং পুচ্ছিতুকামা, আগচ্ছন্তু অয্যা, ইচ্ছামি অয্যানং আগত’’ন্তি, গন্তব্বং, ভিক্খৱে, সত্তাহকৰণীযেন, অপ্পহিতেপি, পগেৱ পহিতে – ‘‘পুচ্ছিস্সামি ৱা, আচিক্খিস্সামি ৱা’’তি. সত্তাহং সন্নিৱত্তো কাতব্বো.

ইধ পন, ভিক্খৱে, সামণেৰী সিক্খং সমাদিযিতুকামা হোতি. সা চে ভিক্খূনং সন্তিকে দূতং পহিণেয্য – ‘‘অহঞ্হি সিক্খং সমাদিযিতুকামা, আগচ্ছন্তু অয্যা, ইচ্ছামি অয্যানং আগত’’ন্তি, গন্তব্বং, ভিক্খৱে, সত্তাহকৰণীযেন, অপ্পহিতেপি, পগেৱ পহিতে – ‘‘সিক্খাসমাদানং উস্সুক্কং কৰিস্সামী’’তি. সত্তাহং সন্নিৱত্তো কাতব্বোতি.

পঞ্চন্নং অপ্পহিতেপি অনুজাননা নিট্ঠিতা.

১১১. সত্তন্নং অপ্পহিতেপি অনুজাননা

১৯৮. তেন খো পন সমযেন অঞ্ঞতৰস্স ভিক্খুনো মাতা গিলানা হোতি. সা পুত্তস্স সন্তিকে দূতং পাহেসি – ‘‘অহঞ্হি গিলানা, আগচ্ছতু মে পুত্তো, ইচ্ছামি পুত্তস্স আগত’’ন্তি. অথ খো তস্স ভিক্খুনো এতদহোসি – ‘‘ভগৱতা পঞ্ঞত্তং সত্তন্নং সত্তাহকৰণীযেন পহিতে গন্তুং, ন ত্ৱেৱ অপ্পহিতে; পঞ্চন্নং সত্তাহকৰণীযেন অপ্পহিতেপি গন্তুং, পগেৱ পহিতেতি. অযঞ্চ মে মাতা গিলানা, সা চ অনুপাসিকা, কথং নু খো মযা পটিপজ্জিতব্ব’’ন্তি? ভগৱতো এতমত্থং আৰোচেসুং. অনুজানামি, ভিক্খৱে, সত্তন্নং সত্তাহকৰণীযেন অপ্পহিতেপি গন্তুং, পগেৱ পহিতে. ভিক্খুস্স, ভিক্খুনিযা, সিক্খমানায, সামণেৰস্স, সামণেৰিযা, মাতুযা চ পিতুস্স চ – অনুজানামি, ভিক্খৱে, ইমেসং সত্তন্নং সত্তাহকৰণীযেন অপ্পহিতেপি গন্তুং, পগেৱ পহিতে. সত্তাহং সন্নিৱত্তো কাতব্বো.

ইধ পন, ভিক্খৱে, ভিক্খুস্স মাতা গিলানা হোতি. সা চে পুত্তস্স সন্তিকে দূতং পহিণেয্য – ‘‘অহঞ্হি গিলানা, আগচ্ছতু মে পুত্তো, ইচ্ছামি পুত্তস্স আগত’’ন্তি, গন্তব্বং, ভিক্খৱে, সত্তাহকৰণীযেন, অপ্পহিতেপি, পগেৱ পহিতে – ‘‘গিলানভত্তং ৱা পৰিযেসিস্সামি, গিলানুপট্ঠাকভত্তং ৱা পৰিযেসিস্সামি, গিলানভেসজ্জং ৱা পৰিযেসিস্সামি, পুচ্ছিস্সামি ৱা, উপট্ঠহিস্সামি ৱা’’তি. সত্তাহং সন্নিৱত্তো কাতব্বো.

ইধ পন, ভিক্খৱে, ভিক্খুস্স পিতা গিলানো হোতি. সো চে পুত্তস্স সন্তিকে দূতং পহিণেয্য – ‘‘অহঞ্হি গিলানো, আগচ্ছতু মে পুত্তো, ইচ্ছামি পুত্তস্স আগত’’ন্তি, গন্তব্বং, ভিক্খৱে, সত্তাহকৰণীযেন, অপ্পহিতেপি, পগেৱ পহিতে – ‘‘গিলানভত্তং ৱা পৰিযেসিস্সামি, গিলানুপট্ঠাকভত্তং ৱা পৰিযেসিস্সামি, গিলানভেসজ্জং ৱা পৰিযেসিস্সামি, পুচ্ছিস্সামি ৱা, উপট্ঠহিস্সামি ৱা’’তি. সত্তাহং সন্নিৱত্তো কাতব্বো.

সত্তন্নং অপ্পহিতেপি অনুজাননা নিট্ঠিতা.

১১২. পহিতেযেৱ অনুজাননা

১৯৯. ইধ পন, ভিক্খৱে, ভিক্খুস্স ভাতা গিলানো হোতি. সো চে ভাতুনো সন্তিকে দূতং পহিণেয্য – ‘‘অহঞ্হি গিলানো, আগচ্ছতু মে ভাতা, ইচ্ছামি ভাতুনো আগত’’ন্তি, গন্তব্বং, ভিক্খৱে, সত্তাহকৰণীযেন, পহিতে, ন ত্ৱেৱ অপ্পহিতে. সত্তাহং সন্নিৱত্তো কাতব্বো.

ইধ পন, ভিক্খৱে, ভিক্খুস্স ভগিনী গিলানা হোতি. সা চে ভাতুনো সন্তিকে দূতং পহিণেয্য – ‘‘অহঞ্হি গিলানা, আগচ্ছতু মে ভাতা, ইচ্ছামি ভাতুনো আগত’’ন্তি, গন্তব্বং, ভিক্খৱে, সত্তাহকৰণীযেন, পহিতে, ন ত্ৱেৱ অপ্পহিতে. সত্তাহং সন্নিৱত্তো কাতব্বো.

ইধ পন, ভিক্খৱে, ভিক্খুস্স ঞাতকো গিলানো হোতি. সো চে ভিক্খুস্স সন্তিকে দূতং পহিণেয্য – ‘‘অহঞ্হি গিলানো, আগচ্ছতু ভদন্তো, ইচ্ছামি ভদন্তস্স আগত’’ন্তি, গন্তব্বং, ভিক্খৱে, সত্তাহকৰণীযেন, পহিতে, ন ত্ৱেৱ অপ্পহিতে. সত্তাহং সন্নিৱত্তো কাতব্বো.

ইধ পন, ভিক্খৱে, ভিক্খুগতিকো গিলানো হোতি. সো চে ভিক্খূনং সন্তিকে দূতং পহিণেয্য – ‘‘অহঞ্হি গিলানো, আগচ্ছন্তু ভদন্তা, ইচ্ছামি ভদন্তানং আগত’’ন্তি, গন্তব্বং, ভিক্খৱে, সত্তাহকৰণীযেন, পহিতে, ন ত্ৱেৱ অপ্পহিতে. সত্তাহং সন্নিৱত্তো কাতব্বো.

তেন খো পন সমযেন সঙ্ঘস্স ৱিহাৰো উন্দ্ৰিযতি. অঞ্ঞতৰেন উপাসকেন অৰঞ্ঞে ভণ্ডং ছেদাপিতং হোতি. সো ভিক্খূনং সন্তিকে দূতং পাহেসি – ‘‘সচে ভদন্তা তং ভণ্ডং আৱহাপেয্যুং, দজ্জাহং তং ভণ্ড’’ন্তি. ভগৱতো এতমত্থং আৰোচেসুং. অনুজানামি, ভিক্খৱে, সঙ্ঘকৰণীযেন গন্তুং. সত্তাহং সন্নিৱত্তো কাতব্বোতি.

পহিতেযেৱ অনুজাননা নিট্ঠিতা.

ৱস্সাৱাসভাণৱাৰো নিট্ঠিতো.

১১৩. অন্তৰাযে অনাপত্তিৱস্সচ্ছেদৱাৰো

২০০. তেন খো পন সমযেন কোসলেসু জনপদে অঞ্ঞতৰস্মিং আৱাসে ৱস্সূপগতা ভিক্খূ ৱাড়েহি উব্বাড়্হা হোন্তি. গণ্হিংসুপি পৰিপাতিংসুপি. ভগৱতো এতমত্থং আৰোচেসুং.

ইধ পন, ভিক্খৱে, ৱস্সূপগতা ভিক্খূ ৱাড়েহি উব্বাড়্হা হোন্তি. গণ্হন্তিপি পৰিপাতেন্তিপি. এসেৱ অন্তৰাযোতি পক্কমিতব্বং. অনাপত্তি ৱস্সচ্ছেদস্স.

ইধ পন, ভিক্খৱে, ৱস্সূপগতা ভিক্খূ সৰীসপেহি উব্বাড়্হা হোন্তি. ডংসন্তিপি পৰিপাতেন্তিপি. এসেৱ অন্তৰাযোতি পক্কমিতব্বং. অনাপত্তি ৱস্সচ্ছেদস্স.

ইধ পন, ভিক্খৱে, ৱস্সূপগতা ভিক্খূ চোৰেহি উব্বাড়্হা হোন্তি. ৱিলুম্পন্তিপি আকোটেন্তিপি. এসেৱ অন্তৰাযোতি পক্কমিতব্বং. অনাপত্তি ৱস্সচ্ছেদস্স.

ইধ পন, ভিক্খৱে, ৱস্সূপগতা ভিক্খূ পিসাচেহি উব্বাড়্হা হোন্তি. আৱিসন্তিপি হনন্তিপি [ওজম্পি হৰন্তি (সী.), হৰন্তিপি (স্যা.)]. এসেৱ অন্তৰাযোতি পক্কমিতব্বং. অনাপত্তি ৱস্সচ্ছেদস্স.

ইধ পন, ভিক্খৱে, ৱস্সূপগতানং ভিক্খূনং গামো অগ্গিনা দড্ঢো হোতি. ভিক্খূ পিণ্ডকেন কিলমন্তি. এসেৱ অন্তৰাযোতি পক্কমিতব্বং. অনাপত্তি ৱস্সচ্ছেদস্স.

ইধ পন, ভিক্খৱে, ৱস্সূপগতানং ভিক্খূনং সেনাসনং অগ্গিনা দড্ঢং হোতি. ভিক্খূ সেনাসনেন কিলমন্তি. এসেৱ অন্তৰাযোতি পক্কমিতব্বং. অনাপত্তি ৱস্সচ্ছেদস্স.

ইধ পন, ভিক্খৱে, ৱস্সূপগতানং ভিক্খূনং গামো উদকেন ৱূড়্হো হোতি. ভিক্খূ পিণ্ডকেন কিলমন্তি. এসেৱ অন্তৰাযোতি পক্কমিতব্বং. অনাপত্তি ৱস্সচ্ছেদস্স.

ইধ পন, ভিক্খৱে, ৱস্সূপগতানং ভিক্খূনং সেনাসনং উদকেন ৱূড়্হং হোতি. ভিক্খূ সেনাসনেন কিলমন্তি. এসেৱ অন্তৰাযোতি পক্কমিতব্বং. অনাপত্তি ৱস্সচ্ছেদস্সাতি.

২০১. তেন খো পন সমযেন অঞ্ঞতৰস্মিং আৱাসে ৱস্সূপগতানং ভিক্খূনং গামো চোৰেহি ৱুট্ঠাসি. ভগৱতো এতমত্থং আৰোচেসুং. অনুজানামি, ভিক্খৱে, যেন গামো তেন গন্তুন্তি.

গামো দ্ৱেধা ভিজ্জিত্থ. ভগৱতো এতমত্থং আৰোচেসুং. অনুজানামি, ভিক্খৱে, যেন বহুতৰা তেন গন্তুন্তি.

বহুতৰা অস্সদ্ধা হোন্তি অপ্পসন্না. ভগৱতো এতমত্থং আৰোচেসুং. অনুজানামি, ভিক্খৱে, যেন সদ্ধা পসন্না তেন গন্তুন্তি.

তেন খো পন সমযেন কোসলেসু জনপদে অঞ্ঞতৰস্মিং আৱাসে ৱস্সূপগতা ভিক্খূ ন লভিংসু লূখস্স ৱা পণীতস্স ৱা ভোজনস্স যাৱদত্থং পাৰিপূৰিং. ভগৱতো এতমত্থং আৰোচেসুং.

ইধ পন, ভিক্খৱে, ৱস্সূপগতা ভিক্খূ ন লভন্তি লূখস্স ৱা পণীতস্স ৱা ভোজনস্স যাৱদত্থং পাৰিপূৰিং. এসেৱ অন্তৰাযোতি পক্কমিতব্বং. অনাপত্তি ৱস্সচ্ছেদস্স.

ইধ পন, ভিক্খৱে, ৱস্সূপগতা ভিক্খূ লভন্তি লূখস্স ৱা পণীতস্স ৱা ভোজনস্স যাৱদত্থং পাৰিপূৰিং, ন লভন্তি সপ্পাযানি ভোজনানি. এসেৱ অন্তৰাযোতি পক্কমিতব্বং. অনাপত্তি ৱস্সচ্ছেদস্স.

ইধ পন, ভিক্খৱে, ৱস্সূপগতা ভিক্খূ লভন্তি লূখস্স ৱা পণীতস্স ৱা ভোজনস্স যাৱদত্থং পাৰিপূৰিং, লভন্তি সপ্পাযানি ভোজনানি, ন লভন্তি সপ্পাযানি ভেসজ্জানি. এসেৱ অন্তৰাযোতি পক্কমিতব্বং. অনাপত্তি ৱস্সচ্ছেদস্স.

ইধ পন, ভিক্খৱে, ৱস্সূপগতা ভিক্খূ লভন্তি লূখস্স ৱা পণীতস্স ৱা ভোজনস্স যাৱদত্থং পাৰিপূৰিং, লভন্তি সপ্পাযানি ভোজনানি, লভন্তি সপ্পাযানি ভেসজ্জানি, ন লভন্তি পতিৰূপং উপট্ঠাকং. এসেৱ অন্তৰাযোতি পক্কমিতব্বং. অনাপত্তি ৱস্সচ্ছেদস্স.

ইধ পন, ভিক্খৱে, ৱস্সূপগতং ভিক্খুং ইত্থী নিমন্তেতি – ‘‘এহি, ভন্তে, হিৰঞ্ঞং ৱা তে দেমি, সুৱণ্ণং ৱা তে দেমি, খেত্তং ৱা তে দেমি, ৱত্থুং ৱা তে দেমি, গাৱুং ৱা তে দেমি, গাৱিং ৱা তে দেমি, দাসং ৱা তে দেমি, দাসিং ৱা তে দেমি, ধীতৰং ৱা তে দেমি ভৰিযত্থায, অহং ৱা তে ভৰিযা হোমি, অঞ্ঞং ৱা তে ভৰিযং আনেমী’’তি. তত্ৰ চে ভিক্খুনো এৱং হোতি, ‘লহুপৰিৱত্তং খো চিত্তং ৱুত্তং ভগৱতা, সিযাপি মে ব্ৰহ্মচৰিযস্স অন্তৰাযো’তি, পক্কমিতব্বং. অনাপত্তি ৱস্সচ্ছেদস্স.

ইধ পন, ভিক্খৱে, ৱস্সূপগতং ভিক্খুং ৱেসী নিমন্তেতি…পে… থুল্লকুমাৰী নিমন্তেতি… পণ্ডকো নিমন্তেতি… ঞাতকা নিমন্তেন্তি… ৰাজানো নিমন্তেন্তি… চোৰা নিমন্তেন্তি… ধুত্তা নিমন্তেন্তি – ‘‘এহি, ভন্তে, হিৰঞ্ঞং ৱা তে দেম, সুৱণ্ণং ৱা তে দেম, খেত্তং ৱা তে দেম, ৱত্থুং ৱা তে দেম, গাৱুং ৱা তে দেম, গাৱিং ৱা তে দেম, দাসং ৱা তে দেম, দাসিং ৱা তে দেম, ধীতৰং ৱা তে দেম ভৰিযত্থায, অঞ্ঞং ৱা তে ভৰিযং আনেমা’’তি. তত্ৰ চে ভিক্খুনো এৱং হোতি, ‘লহুপৰিৱত্তং খো চিত্তং ৱুত্তং ভগৱতা, সিযাপি মে ব্ৰহ্মচৰিযস্স অন্তৰাযো’তি, পক্কমিতব্বং. অনাপত্তি ৱস্সচ্ছেদস্স.

ইধ পন, ভিক্খৱে, ৱস্সূপগতো ভিক্খু অস্সামিকং নিধিং পস্সতি. তত্ৰ চে ভিক্খুনো এৱং হোতি, ‘লহুপৰিৱত্তং খো চিত্তং ৱুত্তং ভগৱতা, সিযাপি মে ব্ৰহ্মচৰিযস্স অন্তৰাযো’তি, পক্কমিতব্বং. অনাপত্তি ৱস্সচ্ছেদস্স.

অন্তৰাযে অনাপত্তিৱস্সচ্ছেদৱাৰো নিট্ঠিতো.

১১৪. সঙ্ঘভেদে অনাপত্তিৱস্সচ্ছেদৱাৰো

২০২. ইধ পন, ভিক্খৱে, ৱস্সূপগতো ভিক্খু পস্সতি সম্বহুলে ভিক্খূ সঙ্ঘভেদায পৰক্কমন্তে. তত্ৰ চে ভিক্খুনো এৱং হোতি, ‘গৰুকো খো সঙ্ঘভেদো ৱুত্তো ভগৱতা; মা মযি সম্মুখীভূতে সঙ্ঘো ভিজ্জী’তি, পক্কমিতব্বং. অনাপত্তি ৱস্সচ্ছেদস্স.

ইধ পন, ভিক্খৱে, ৱস্সূপগতো ভিক্খু সুণাতি – ‘‘অসুকস্মিং কিৰ আৱাসে সম্বহুলা ভিক্খূ সঙ্ঘভেদায পৰক্কমন্তী’’তি. তত্ৰ চে ভিক্খুনো এৱং হোতি, ‘গৰুকো খো সঙ্ঘভেদো ৱুত্তো ভগৱতা; মা মযি সম্মুখীভূতে সঙ্ঘো ভিজ্জী’তি, পক্কমিতব্বং. অনাপত্তি ৱস্সচ্ছেদস্স.

ইধ পন, ভিক্খৱে, ৱস্সূপগতো ভিক্খু সুণাতি – ‘‘অসুকস্মিং কিৰ আৱাসে সম্বহুলা ভিক্খূ সঙ্ঘভেদায পৰক্কমন্তী’’তি. তত্ৰ চে ভিক্খুনো এৱং হোতি – ‘‘তে খো মে ভিক্খূ মিত্তা. ত্যাহং ৱক্খামি ‘গৰুকো খো, আৱুসো, সঙ্ঘভেদো ৱুত্তো ভগৱতা; মাযস্মন্তানং সঙ্ঘভেদো ৰুচ্চিত্থা’তি. কৰিস্সন্তি মে ৱচনং, সুস্সূসিস্সন্তি, সোতং ওদহিস্সন্তী’’তি, পক্কমিতব্বং. অনাপত্তি ৱস্সচ্ছেদস্স.

ইধ পন, ভিক্খৱে, ৱস্সূপগতো ভিক্খু সুণাতি – ‘‘অসুকস্মিং কিৰ আৱাসে সম্বহুলা ভিক্খূ সঙ্ঘভেদায পৰক্কমন্তী’’তি. তত্ৰ চে ভিক্খুনো এৱং হোতি – ‘‘তে খো মে ভিক্খূ ন মিত্তা; অপি চ যে তেসং মিত্তা, তে মে মিত্তা. ত্যাহং ৱক্খামি. তে ৱুত্তা তে ৱক্খন্তি ‘গৰুকো খো, আৱুসো, সঙ্ঘভেদো ৱুত্তো ভগৱতা; মাযস্মন্তানং সঙ্ঘভেদো ৰুচ্চিত্থা’তি. কৰিস্সন্তি তেসং ৱচনং, সুস্সূসিস্সন্তি, সোতং ওদহিস্সন্তী’’তি, পক্কমিতব্বং. অনাপত্তি ৱস্সচ্ছেদস্স.

ইধ পন, ভিক্খৱে, ৱস্সূপগতো ভিক্খু সুণাতি – ‘‘অসুকস্মিং কিৰ আৱাসে সম্বহুলেহি ভিক্খূহি সঙ্ঘো ভিন্নো’’তি. তত্ৰ চে ভিক্খুনো এৱং হোতি – ‘‘তে খো মে ভিক্খূ মিত্তা. ত্যাহং ৱক্খামি ‘গৰুকো খো, আৱুসো, সঙ্ঘভেদো ৱুত্তো ভগৱতা; মাযস্মন্তানং সঙ্ঘভেদো ৰুচ্চিত্থা’তি. কৰিস্সন্তি মে ৱচনং, সুস্সূসিস্সন্তি, সোতং ওদহিস্সন্তী’’তি, পক্কমিতব্বং. অনাপত্তি ৱস্সচ্ছেদস্স.

ইধ পন, ভিক্খৱে, ৱস্সূপগতো ভিক্খু সুণাতি – ‘‘অসুকস্মিং কিৰ আৱাসে সম্বহুলেহি ভিক্খূহি সঙ্ঘো ভিন্নো’’তি. তত্ৰ চে ভিক্খুনো এৱং হোতি – ‘‘তে খো মে ভিক্খূ ন মিত্তা; অপি চ, যে তেসং মিত্তা তে মে মিত্তা. ত্যাহং ৱক্খামি. তে ৱুত্তা তে ৱক্খন্তি ‘গৰুকো খো, আৱুসো, সঙ্ঘভেদো ৱুত্তো ভগৱতা; মাযস্মন্তানং সঙ্ঘভেদো ৰুচ্চিত্থা’তি. কৰিস্সন্তি তেসং ৱচনং, সুস্সূসিস্সন্তি, সোতং ওদহিস্সন্তী’’তি, পক্কমিতব্বং. অনাপত্তি ৱস্সচ্ছেদস্স.

ইধ পন, ভিক্খৱে, ৱস্সূপগতো ভিক্খু সুণাতি – ‘‘অমুকস্মিং কিৰ আৱাসে সম্বহুলা ভিক্খুনিযো সঙ্ঘভেদায পৰক্কমন্তী’’তি. তত্ৰ চে ভিক্খুনো এৱং হোতি – ‘‘তা খো মে ভিক্খুনিযো মিত্তা. তাহং ৱক্খামি ‘গৰুকো খো, ভগিনিযো, সঙ্ঘভেদো ৱুত্তো ভগৱতা; মা ভগিনীনং সঙ্ঘভেদো ৰুচ্চিত্থা’তি. কৰিস্সন্তি মে ৱচনং, সুস্সূসিস্সন্তি, সোতং ওদহিস্সন্তী’’তি, পক্কমিতব্বং. অনাপত্তি ৱস্সচ্ছেদস্স.

ইধ পন, ভিক্খৱে, ৱস্সূপগতো ভিক্খু সুণাতি – ‘‘অমুকস্মিং কিৰ আৱাসে সম্বহুলা ভিক্খুনিযো সঙ্ঘভেদায পৰক্কমন্তী’’তি. তত্ৰ চে ভিক্খুনো এৱং হোতি – ‘‘তা খো মে ভিক্খুনিযো ন মিত্তা. অপি চ, যা তাসং মিত্তা, তা মে মিত্তা. তাহং ৱক্খামি. তা ৱুত্তা তা ৱক্খন্তি ‘গৰুকো খো, ভগিনিযো, সঙ্ঘভেদো ৱুত্তো ভগৱতা. মা ভগিনীনং সঙ্ঘভেদো ৰুচ্চিত্থা’তি. কৰিস্সন্তি তাসং ৱচনং, সুস্সূসিস্সন্তি, সোতং ওদহিস্সন্তী’’তি, পক্কমিতব্বং. অনাপত্তি ৱস্সচ্ছেদস্সতি.

ইধ পন, ভিক্খৱে, ৱস্সূপগতো ভিক্খু সুণাতি – ‘‘অমুকস্মিং কিৰ আৱাসে সম্বহুলাহি ভিক্খুনীহি সঙ্ঘো ভিন্নো’’তি. তত্ৰ চে ভিক্খুনো এৱং হোতি – ‘‘তা খো মে ভিক্খুনিযো মিত্তা. তাহং ৱক্খামি ‘গৰুকো খো, ভগিনিযো, সঙ্ঘভেদো ৱুত্তো ভগৱতা. মা ভগিনীনং সঙ্ঘভেদো ৰুচ্চিত্থা’তি. কৰিস্সন্তি মে ৱচনং, সুস্সূসিস্সন্তি, সোতং ওদহিস্সন্তী’’তি, পক্কমিতব্বং. অনাপত্তি ৱস্সচ্ছেদস্সতি.

ইধ পন, ভিক্খৱে, ৱস্সূপগতো ভিক্খু সুণাতি – ‘‘অমুকস্মিং কিৰ আৱাসে সম্বহুলাহি ভিক্খুনীহি সঙ্ঘো ভিন্নো’’তি. তত্ৰ চে ভিক্খুনো এৱং হোতি – ‘‘তা খো মে ভিক্খুনিযো ন মিত্তা. অপি চ, যা তাসং মিত্তা তা মে মিত্তা. তাহং ৱক্খামি. তা ৱুত্তা তা ৱক্খন্তি ‘গৰুকো খো, ভগিনিযো [অয্যাযো (সী.)], সঙ্ঘভেদো ৱুত্তো ভগৱতা; মা ভগিনীনং [অয্যানং (সী.)] সঙ্ঘভেদো ৰুচ্চিত্থা’তি. কৰিস্সন্তি তাসং ৱচনং, সুস্সূসিস্সন্তি, সোতং ওদহিস্সন্তী’’তি, পক্কমিতব্বং. অনাপত্তি ৱস্সচ্ছেদস্সাতি.

সঙ্ঘভেদে অনাপত্তিৱস্সচ্ছেদৱাৰো নিট্ঠিতো.

১১৫. ৱজাদীসু ৱস্সূপগমনং

২০৩. তেন খো পন সমযেন অঞ্ঞতৰো ভিক্খু ৱজে ৱস্সং উপগন্তুকামো হোতি. ভগৱতো এতমত্থং আৰোচেসুং. অনুজানামি, ভিক্খৱে, ৱজে ৱস্সং উপগন্তুন্তি. ৱজো ৱুট্ঠাসি. ভগৱতো এতমত্থং আৰোচেসুং. অনুজানামি, ভিক্খৱে, যেন ৱজো তেন গন্তুন্তি.

তেন খো পন সমযেন অঞ্ঞতৰো ভিক্খু উপকট্ঠায ৱস্সূপনাযিকায সত্থেন গন্তুকামো হোতি. ভগৱতো এতমত্থং আৰোচেসুং. অনুজানামি, ভিক্খৱে, সত্থে ৱস্সং উপগন্তুন্তি.

তেন খো পন সমযেন অঞ্ঞতৰো ভিক্খু উপকট্ঠায ৱস্সূপনাযিকায নাৱায গন্তুকামো হোতি. ভগৱতো এতমত্থং আৰোচেসুং. অনুজানামি, ভিক্খৱে, নাৱায ৱস্সং উপগন্তুন্তি.

ৱজাদীসু ৱস্সূপগমনং নিট্ঠিতং.

১১৬. ৱস্সং অনুপগন্তব্বট্ঠানানি

২০৪. তেন খো পন সমযেন ভিক্খূ ৰুক্খসুসিৰে ৱস্সং উপগচ্ছন্তি. মনুস্সা উজ্ঝাযন্তি খিয্যন্তি ৱিপাচেন্তি – ‘‘সেয্যথাপি পিসাচিল্লিকা’’তি. ভগৱতো এতমত্থং আৰোচেসুং. ন, ভিক্খৱে, ৰুক্খসুসিৰে ৱস্সং উপগন্তব্বং. যো উপগচ্ছেয্য, আপত্তি দুক্কটস্সাতি.

তেন খো পন সমযেন ভিক্খূ ৰুক্খৱিটভিযা ৱস্সং উপগচ্ছন্তি. মনুস্সা উজ্ঝাযন্তি খিয্যন্তি ৱিপাচেন্তি – ‘‘সেয্যথাপি মিগলুদ্দকা’’তি. ভগৱতো এতমত্থং আৰোচেসুং. ন, ভিক্খৱে, ৰুক্খৱিটভিযা ৱস্সং উপগন্তব্বং. যো উপগচ্ছেয্য, আপত্তি দুক্কটস্সাতি.

তেন খো পন সমযেন ভিক্খূ অজ্ঝোকাসে ৱস্সং উপগচ্ছন্তি. দেৱে ৱস্সন্তে ৰুক্খমূলম্পি নিব্বকোসম্পি উপধাৱন্তি. ভগৱতো এতমত্থং আৰোচেসুং. ন, ভিক্খৱে, অজ্ঝোকাসে ৱস্সং উপগন্তব্বং. যো উপগচ্ছেয্য, আপত্তি দুক্কটস্সাতি.

তেন খো পন সমযেন ভিক্খূ অসেনাসনিকা ৱস্সং উপগচ্ছন্তি. সীতেনপি কিলমন্তি, উণ্হেনপি কিলমন্তি. ভগৱতো এতমত্থং আৰোচেসুং. ন, ভিক্খৱে, অসেনাসনিকেন ৱস্সং উপগন্তব্বং. যো উপগচ্ছেয্য, আপত্তি দুক্কটস্সাতি.

তেন খো পন সমযেন ভিক্খূ ছৱকুটিকায ৱস্সং উপগচ্ছন্তি. মনুস্সা উজ্ঝাযন্তি খিয্যন্তি ৱিপাচেন্তি – ‘‘সেয্যথাপি ছৱডাহকা’’তি. ভগৱতো এতমত্থং আৰোচেসুং. ন, ভিক্খৱে, ছৱকুটিকায ৱস্সং উপগন্তব্বং. যো উপগচ্ছেয্য, আপত্তি দুক্কটস্সাতি.

তেন খো পন সমযেন ভিক্খূ ছত্তে ৱস্সং উপগচ্ছন্তি. মনুস্সা উজ্ঝাযন্তি খিয্যন্তি ৱিপাচেন্তি – ‘‘সেয্যথাপি গোপালকা’’তি. ভগৱতো এতমত্থং আৰোচেসুং. ন, ভিক্খৱে, ছত্তে ৱস্সং উপগন্তব্বং. যো উপগচ্ছেয্য, আপত্তি দুক্কটস্সাতি.

তেন খো পন সমযেন ভিক্খূ চাটিযা ৱস্সং উপগচ্ছন্তি. মনুস্সা উজ্ঝাযন্তি খিয্যন্তি ৱিপাচেন্তি – ‘‘সেয্যথাপি তিত্থিযা’’তি. ভগৱতো এতমত্থং আৰোচেসুং. ন, ভিক্খৱে, চাটিযা ৱস্সং উপগন্তব্বং. যো উপগচ্ছেয্য, আপত্তি দুক্কটস্সাতি.

ৱস্সং অনুপগন্তব্বট্ঠানানি নিট্ঠিতা.

১১৭. অধম্মিককতিকা

২০৫. তেন খো পন সমযেন সাৱত্থিযা সঙ্ঘেন এৱৰূপা কতিকা কতা হোতি – অন্তৰাৱস্সং ন পব্বাজেতব্বন্তি. ৱিসাখায মিগাৰমাতুযা নত্তা ভিক্খূ উপসঙ্কমিত্ৱা পব্বজ্জং যাচি. ভিক্খূ এৱমাহংসু – ‘‘সঙ্ঘেন খো, আৱুসো, এৱৰূপা কতিকা কতা ‘অন্তৰাৱস্সং ন পব্বাজেতব্ব’ন্তি. আগমেহি, আৱুসো, যাৱ ভিক্খূ ৱস্সং ৱসন্তি. ৱস্সংৱুট্ঠা পব্বাজেস্সন্তী’’তি. অথ খো তে ভিক্খূ ৱস্সংৱুট্ঠা ৱিসাখায মিগাৰমাতুযা নত্তাৰং এতদৱোচুং – ‘‘এহি, দানি, আৱুসো, পব্বজাহী’’তি. সো এৱমাহ – ‘‘সচাহং, ভন্তে, পব্বজিতো অস্সং, অভিৰমেয্যামহং [অভিৰমেয্যং চাহং (সী.)]. ন দানাহং, ভন্তে, পব্বজিস্সামী’’তি. ৱিসাখা মিগাৰমাতা উজ্ঝাযতি খিয্যতি ৱিপাচেতি – ‘‘কথঞ্হি নাম অয্যা এৱৰূপং কতিকং কৰিস্সন্তি ‘ন অন্তৰাৱস্সং পব্বাজেতব্ব’ন্তি. কং কালং ধম্মো ন চৰিতব্বো’’তি? অস্সোসুং খো ভিক্খূ ৱিসাখায মিগাৰমাতুযা উজ্ঝাযন্তিযা খিয্যন্তিযা ৱিপাচেন্তিযা. অথ খো তে ভিক্খূ ভগৱতো এতমত্থং আৰোচেসুং. ন, ভিক্খৱে, এৱৰূপা কতিকা কাতব্বা – ‘ন অন্তৰাৱস্সং পব্বাজেতব্ব’ন্তি. যো কৰেয্য, আপত্তি দুক্কটস্সাতি.

অধম্মিককতিকা নিট্ঠিতা.

১১৮. পটিস্সৱদুক্কটাপত্তি

২০৬. তেন খো পন সমযেন আযস্মতা উপনন্দেন সক্যপুত্তেন ৰঞ্ঞো পসেনদিস্স কোসলস্স ৱস্সাৱাসো পটিস্সুতো হোতি পুৰিমিকায. সো তং আৱাসং গচ্ছন্তো অদ্দস অন্তৰামগ্গে দ্ৱে আৱাসে বহুচীৱৰকে. তস্স এতদহোসি – ‘‘যংনূনাহং ইমেসু দ্ৱীসু আৱাসেসু ৱস্সং ৱসেয্যং. এৱং মে বহুং চীৱৰং [বহুচীৱৰং (ক.)] উপ্পজ্জিস্সতী’’তি. সো তেসু দ্ৱীসু আৱাসেসু ৱস্সং ৱসি. ৰাজা পসেনদি কোসলো উজ্ঝাযতি খিয্যতি ৱিপাচেতি – ‘‘কথঞ্হি নাম অয্যো উপনন্দো সক্যপুত্তো অম্হাকং ৱস্সাৱাসং পটিস্সুণিত্ৱা ৱিসংৱাদেস্সতি. ননু ভগৱতা অনেকপৰিযাযেন মুসাৱাদো গৰহিতো, মুসাৱাদা ৱেৰমণী পসত্থা’’তি. অস্সোসুং খো ভিক্খূ ৰঞ্ঞো পসেনদিস্স কোসলস্স উজ্ঝাযন্তস্স খিয্যন্তস্স ৱিপাচেন্তস্স. যে তে ভিক্খূ অপ্পিচ্ছা…পে… তে উজ্ঝাযন্তি খিয্যন্তি ৱিপাচেন্তি – ‘‘কথঞ্হি নাম আযস্মা উপনন্দো সক্যপুত্তো ৰঞ্ঞো পসেনদিস্স কোসলস্স ৱস্সাৱাসং পটিস্সুণিত্ৱা ৱিসংৱাদেস্সতি. ননু ভগৱতা অনেকপৰিযাযেন মুসাৱাদো গৰহিতো, মুসাৱাদা ৱেৰমণী পসত্থা’’তি. অথ খো তে ভিক্খূ ভগৱতো এতমত্থং আৰোচেসুং…পে… অথ খো ভগৱা এতস্মিং নিদানে এতস্মিং পকৰণে ভিক্খুসঙ্ঘং সন্নিপাতাপেত্ৱা আযস্মন্তং উপনন্দং সক্যপুত্তং পটিপুচ্ছি – ‘‘সচ্চং কিৰ ত্ৱং, উপনন্দ, ৰঞ্ঞো পসেনদিস্স কোসলস্স ৱস্সাৱাসং পটিস্সুণিত্ৱা ৱিসংৱাদেসী’’তি? ‘‘সচ্চং, ভগৱা’’তি. ৱিগৰহি বুদ্ধো ভগৱা…পে… কথঞ্হি নাম ত্ৱং, মোঘপুৰিস, ৰঞ্ঞো পসেনদিস্স কোসলস্স ৱস্সাৱাসং পটিস্সুণিত্ৱা ৱিসংৱাদেস্সসি. ননু মযা, মোঘপুৰিস, অনেকপৰিযাযেন মুসাৱাদো গৰহিতো, মুসাৱাদা ৱেৰমণী পসত্থা. নেতং, মোঘপুৰিস, অপ্পসন্নানং ৱা পসাদায…পে… ৱিগৰহিত্ৱা…পে… ধম্মিং কথং কত্ৱা ভিক্খূ আমন্তেসি –

২০৭. ইধ পন, ভিক্খৱে, ভিক্খুনা ৱস্সাৱাসো পটিস্সুতো হোতি পুৰিমিকায. সো তং আৱাসং গচ্ছন্তো পস্সতি অন্তৰামগ্গে দ্ৱে আৱাসে বহুচীৱৰকে. তস্স এৱং হোতি – ‘‘যংনূনাহং ইমেসু দ্ৱীসু আৱাসেসু ৱস্সং ৱসেয্যং. এৱং মে বহুং চীৱৰং উপ্পজ্জিস্সতী’’তি. সো তেসু দ্ৱীসু আৱাসেসু ৱস্সং ৱসতি. তস্স, ভিক্খৱে, ভিক্খুনো পুৰিমিকা চ ন পঞ্ঞাযতি, পটিস্সৱে চ আপত্তি দুক্কটস্স.

ইধ পন, ভিক্খৱে, ভিক্খুনা ৱস্সাৱাসো পটিস্সুতো হোতি পুৰিমিকায. সো তং আৱাসং গচ্ছন্তো বহিদ্ধা উপোসথং কৰোতি, পাটিপদে [পাটিপদেন (ক.)] ৱিহাৰং উপেতি, সেনাসনং পঞ্ঞপেতি, পানীযং পৰিভোজনীযং উপট্ঠাপেতি, পৰিৱেণং সম্মজ্জতি. সো তদহেৱ অকৰণীযো পক্কমতি. তস্স, ভিক্খৱে, ভিক্খুনো পুৰিমিকা চ ন পঞ্ঞাযতি, পটিস্সৱে চ আপত্তি দুক্কটস্স.

ইধ পন, ভিক্খৱে, ভিক্খুনা ৱস্সাৱাসো পটিস্সুতো হোতি পুৰিমিকায. সো তং আৱাসং গচ্ছন্তো বহিদ্ধা উপোসথং কৰোতি, পাটিপদে ৱিহাৰং উপেতি, সেনাসনং পঞ্ঞপেতি, পানীযং পৰিভোজনীযং উপট্ঠাপেতি, পৰিৱেণং সম্মজ্জতি. সো তদহেৱ সকৰণীযো পক্কমতি. তস্স, ভিক্খৱে, ভিক্খুনো পুৰিমিকা চ ন পঞ্ঞাযতি, পটিস্সৱে চ আপত্তি দুক্কটস্স.

ইধ পন, ভিক্খৱে, ভিক্খুনা ৱস্সাৱাসো পটিস্সুতো হোতি পুৰিমিকায. সো তং আৱাসং গচ্ছন্তো বহিদ্ধা উপোসথং কৰোতি, পাটিপদে ৱিহাৰং উপেতি, সেনাসনং পঞ্ঞপেতি, পানীযং পৰিভোজনীযং উপট্ঠাপেতি, পৰিৱেণং সম্মজ্জতি. সো দ্ৱীহতীহং ৱসিত্ৱা অকৰণীযো পক্কমতি. তস্স, ভিক্খৱে, ভিক্খুনো পুৰিমিকা চ ন পঞ্ঞাযতি, পটিস্সৱে চ আপত্তি দুক্কটস্স.

ইধ পন, ভিক্খৱে, ভিক্খুনা ৱস্সাৱাসো পটিস্সুতো হোতি পুৰিমিকায. সো তং আৱাসং গচ্ছন্তো বহিদ্ধা উপোসথং কৰোতি, পাটিপদে ৱিহাৰং উপেতি, সেনাসনং পঞ্ঞপেতি, পানীযং পৰিভোজনীযং উপট্ঠাপেতি, পৰিৱেণং সম্মজ্জতি. সো দ্ৱীহতীহং ৱসিত্ৱা সকৰণীযো পক্কমতি. তস্স, ভিক্খৱে, ভিক্খুনো পুৰিমিকা চ ন পঞ্ঞাযতি, পটিস্সৱে চ আপত্তি দুক্কটস্স.

ইধ পন, ভিক্খৱে, ভিক্খুনা ৱস্সাৱাসো পটিস্সুতো হোতি পুৰিমিকায. সো তং আৱাসং গচ্ছন্তো বহিদ্ধা উপোসথং কৰোতি, পাটিপদে ৱিহাৰং উপেতি, সেনাসনং পঞ্ঞপেতি, পানীযং পৰিভোজনীযং উপট্ঠাপেতি, পৰিৱেণং সম্মজ্জতি. সো দ্ৱীহতীহং ৱসিত্ৱা সত্তাহকৰণীযেন পক্কমতি. সো তং সত্তাহং বহিদ্ধা ৱীতিনামেতি. তস্স, ভিক্খৱে, ভিক্খুনো পুৰিমিকা চ ন পঞ্ঞাযতি, পটিস্সৱে চ আপত্তি দুক্কটস্স.

ইধ পন, ভিক্খৱে, ভিক্খুনা ৱস্সাৱাসো পটিস্সুতো হোতি পুৰিমিকায. সো তং আৱাসং গচ্ছন্তো বহিদ্ধা উপোসথং কৰোতি, পাটিপদে ৱিহাৰং উপেতি, সেনাসনং পঞ্ঞপেতি, পানীযং পৰিভোজনীযং উপট্ঠাপেতি, পৰিৱেণং সম্মজ্জতি. সো দ্ৱীহতীহং ৱসিত্ৱা সত্তাহকৰণীযেন পক্কমতি. সো তং সত্তাহং অন্তো সন্নিৱত্তং কৰোতি. তস্স, ভিক্খৱে, ভিক্খুনো পুৰিমিকা চ পঞ্ঞাযতি, পটিস্সৱে চ অনাপত্তি.

ইধ পন, ভিক্খৱে, ভিক্খুনা ৱস্সাৱাসো পটিস্সুতো হোতি পুৰিমিকায. সো তং আৱাসং গচ্ছন্তো বহিদ্ধা উপোসথং কৰোতি, পাটিপদে ৱিহাৰং উপেতি, সেনাসনং পঞ্ঞপেতি, পানীযং পৰিভোজনীযং উপট্ঠাপেতি, পৰিৱেণং সম্মজ্জতি. সো সত্তাহং অনাগতায পৱাৰণায সকৰণীযো পক্কমতি. আগচ্ছেয্য ৱা সো, ভিক্খৱে, ভিক্খু তং আৱাসং ন ৱা আগচ্ছেয্য, তস্স, ভিক্খৱে, ভিক্খুনো পুৰিমিকা চ পঞ্ঞাযতি, পটিস্সৱে চ অনাপত্তি.

ইধ পন, ভিক্খৱে, ভিক্খুনা ৱস্সাৱাসো পটিস্সুতো হোতি পুৰিমিকায. সো তং আৱাসং গন্ত্ৱা উপোসথং কৰোতি, পাটিপদে ৱিহাৰং উপেতি, সেনাসনং পঞ্ঞপেতি, পানীযং পৰিভোজনীযং উপট্ঠাপেতি, পৰিৱেণং সম্মজ্জতি. সো তদহেৱ সকৰণীযো পক্কমতি…পে… সো দ্ৱীহতীহং ৱসিত্ৱা অকৰণীযো পক্কমতি…পে… সো দ্ৱীহতীহং ৱসিত্ৱা সকৰণীযো পক্কমতি…পে… সো দ্ৱীহতীহং ৱসিত্ৱা সত্তাহকৰণীযেন পক্কমতি. সো তং সত্তাহং বহিদ্ধা ৱীতিনামেতি. তস্স, ভিক্খৱে, ভিক্খুনো পুৰিমিকা চ ন পঞ্ঞাযতি, পটিস্সৱে চ আপত্তি দুক্কটস্স…পে… সো দ্ৱীহতীহং ৱসিত্ৱা সত্তাহকৰণীযেন পক্কমতি. সো তং সত্তাহং অন্তো সন্নিৱত্তং কৰোতি. তস্স, ভিক্খৱে, ভিক্খুনো পুৰিমিকা চ পঞ্ঞাযতি, পটিস্সৱে চ অনাপত্তি…পে… সো সত্তাহং অনাগতায পৱাৰণায সকৰণীযো পক্কমতি. আগচ্ছেয্য ৱা সো, ভিক্খৱে, ভিক্খু তং আৱাসং ন ৱা আগচ্ছেয্য, তস্স, ভিক্খৱে, ভিক্খুনো পুৰিমিকা চ পঞ্ঞাযতি, পটিস্সৱে চ অনাপত্তি.

২০৮. ইধ পন, ভিক্খৱে, ভিক্খুনা ৱস্সাৱাসো পটিস্সুতো হোতি পচ্ছিমিকায. সো তং আৱাসং গচ্ছন্তো বহিদ্ধা উপোসথং কৰোতি, পাটিপদে ৱিহাৰং উপেতি, সেনাসনং পঞ্ঞপেতি, পানীযং পৰিভোজনীযং উপট্ঠাপেতি, পৰিৱেণং সম্মজ্জতি. সো তদহেৱ অকৰণীযো পক্কমতি. তস্স, ভিক্খৱে, ভিক্খুনো পচ্ছিমিকা চ ন পঞ্ঞাযতি, পটিস্সৱে চ আপত্তি দুক্কটস্স.

ইধ পন, ভিক্খৱে, ভিক্খুনা ৱস্সাৱাসো পটিস্সুতো হোতি পচ্ছিমিকায. সো তং আৱাসং গচ্ছন্তো বহিদ্ধা উপোসথং কৰোতি, পাটিপদে ৱিহাৰং উপেতি, সেনাসনং পঞ্ঞপেতি, পানীযং পৰিভোজনীযং উপট্ঠাপেতি, পৰিৱেণং সম্মজ্জতি. সো তদহেৱ সকৰণীযো পক্কমতি. তস্স, ভিক্খৱে, ভিক্খুনো পচ্ছিমিকা চ ন পঞ্ঞাযতি, পটিস্সৱে চ আপত্তি দুক্কটস্স.

ইধ পন, ভিক্খৱে, ভিক্খুনা ৱস্সাৱাসো পটিস্সুতো হোতি পচ্ছিমিকায. সো তং আৱাসং গচ্ছন্তো বহিদ্ধা উপোসথং কৰোতি, পাটিপদে ৱিহাৰং উপেতি, সেনাসনং পঞ্ঞপেতি, পানীযং পৰিভোজনীযং উপট্ঠাপেতি, পৰিৱেণং সম্মজ্জতি. সো দ্ৱীহতীহং ৱসিত্ৱা অকৰণীযো পক্কমতি. তস্স, ভিক্খৱে, ভিক্খুনো পচ্ছিমিকা চ ন পঞ্ঞাযতি, পটিস্সৱে চ আপত্তি দুক্কটস্স.

ইধ পন, ভিক্খৱে, ভিক্খুনা ৱস্সাৱাসো পটিস্সুতো হোতি পচ্ছিমিকায. সো তং আৱাসং গচ্ছন্তো বহিদ্ধা উপোসথং কৰোতি, পাটিপদে ৱিহাৰং উপেতি, সেনাসনং পঞ্ঞপেতি, পানীযং পৰিভোজনীযং উপট্ঠাপেতি, পৰিৱেণং সম্মজ্জতি. সো দ্ৱীহতীহং ৱসিত্ৱা সকৰণীযো পক্কমতি. তস্স, ভিক্খৱে, ভিক্খুনো পচ্ছিমিকা চ ন পঞ্ঞাযতি, পটিস্সৱে চ আপত্তি দুক্কটস্স.

ইধ পন, ভিক্খৱে, ভিক্খুনা ৱস্সাৱাসো পটিস্সুতো হোতি পচ্ছিমিকায. সো তং আৱাসং গচ্ছন্তো বহিদ্ধা উপোসথং কৰোতি, পাটিপদে ৱিহাৰং উপেতি, সেনাসনং পঞ্ঞপেতি, পানীযং পৰিভোজনীযং উপট্ঠাপেতি, পৰিৱেণং সম্মজ্জতি. সো দ্ৱীহতীহং ৱসিত্ৱা সত্তাহকৰণীযেন পক্কমতি. সো তং সত্তাহং বহিদ্ধা ৱীতিনামেতি. তস্স, ভিক্খৱে, ভিক্খুনো পচ্ছিমিকা চ ন পঞ্ঞাযতি, পটিস্সৱে চ আপত্তি দুক্কটস্স.

ইধ পন, ভিক্খৱে, ভিক্খুনা ৱস্সাৱাসো পটিস্সুতো হোতি পচ্ছিমিকায. সো তং আৱাসং গচ্ছন্তো বহিদ্ধা উপোসথং কৰোতি, পাটিপদে ৱিহাৰং উপেতি, সেনাসনং পঞ্ঞপেতি, পানীযং পৰিভোজনীযং উপট্ঠাপেতি, পৰিৱেণং সম্মজ্জতি. সো দ্ৱীহতীহং ৱসিত্ৱা সত্তাহকৰণীযেন পক্কমতি. সো তং সত্তাহং অন্তো সন্নিৱত্তং কৰোতি. তস্স, ভিক্খৱে, ভিক্খুনো পচ্ছিমিকা চ পঞ্ঞাযতি, পটিস্সৱে চ অনাপত্তি.

ইধ পন, ভিক্খৱে, ভিক্খুনা ৱস্সাৱাসো পটিস্সুতো হোতি পচ্ছিমিকায. সো তং আৱাসং গচ্ছন্তো বহিদ্ধা উপোসথং কৰোতি, পাটিপদে ৱিহাৰং উপেতি, সেনাসনং পঞ্ঞপেতি, পানীযং পৰিভোজনীযং উপট্ঠাপেতি, পৰিৱেণং সম্মজ্জতি. সো সত্তাহং অনাগতায কোমুদিযা চাতুমাসিনিযা সকৰণীযো পক্কমতি. আগচ্ছেয্য ৱা সো, ভিক্খৱে, ভিক্খু তং আৱাসং ন ৱা আগচ্ছেয্য, তস্স, ভিক্খৱে, ভিক্খুনো পচ্ছিমিকা চ পঞ্ঞাযতি, পটিস্সৱে চ অনাপত্তি.

ইধ পন, ভিক্খৱে, ভিক্খুনা ৱস্সাৱাসো পটিস্সুতো হোতি পচ্ছিমিকায. সো তং আৱাসং গন্ত্ৱা উপোসথং কৰোতি, পাটিপদে ৱিহাৰং উপেতি, সেনাসনং পঞ্ঞপেতি, পানীযং পৰিভোজনীযং উপট্ঠাপেতি, পৰিৱেণং সম্মজ্জতি. সো তদহেৱ সকৰণীযো পক্কমতি…পে… সো দ্ৱীহতীহং ৱসিত্ৱা অকৰণীযো পক্কমতি …পে… সো দ্ৱীহতীহং ৱসিত্ৱা সকৰণীযো পক্কমতি…পে… সো দ্ৱীহতীহং ৱসিত্ৱা সত্তাহকৰণীযেন পক্কমতি. সো তং সত্তাহং বহিদ্ধা ৱীতিনামেতি. তস্স, ভিক্খৱে, ভিক্খুনো পচ্ছিমিকা চ ন পঞ্ঞাযতি, পটিস্সৱে চ আপত্তি দুক্কটস্স…পে… সো দ্ৱীহতীহং ৱসিত্ৱা সত্তাহকৰণীযেন পক্কমতি. সো তং সত্তাহং অন্তো সন্নিৱত্তং কৰোতি. তস্স ভিক্খৱে, ভিক্খুনো পচ্ছিমিকা চ পঞ্ঞাযতি, পটিস্সৱে চ অনাপত্তি.

ইধ পন, ভিক্খৱে, ভিক্খুনা ৱস্সাৱাসো পটিস্সুতো হোতি পচ্ছিমিকায. সো তং আৱাসং গন্ত্ৱা উপোসথং কৰোতি, পাটিপদে ৱিহাৰং উপেতি, সেনাসনং পঞ্ঞপেতি, পানীযং পৰিভোজনীযং উপট্ঠাপেতি, পৰিৱেণং সম্মজ্জতি. সো সত্তাহং অনাগতায কোমুদিযা চাতুমাসিনিযা সকৰণীযো পক্কমতি. আগচ্ছেয্য ৱা সো, ভিক্খৱে, ভিক্খু তং আৱাসং ন ৱা আগচ্ছেয্য, তস্স, ভিক্খৱে, ভিক্খুনো পচ্ছিমিকা চ পঞ্ঞাযতি, পটিস্সৱে চ অনাপত্তীতি.

পটিস্সৱদুক্কটাপত্তি নিট্ঠিতা.

ৱস্সূপনাযিকক্খন্ধকো ততিযো.

১১৯. তস্সুদ্দানং

উপগন্তুং কদা চেৱ, কতি অন্তৰাৱস্স চ;

ন ইচ্ছন্তি চ সঞ্চিচ্চ, উক্কড্ঢিতুং উপাসকো.

গিলানো মাতা চ পিতা, ভাতা চ অথ ঞাতকো;

ভিক্খুগতিকো ৱিহাৰো, ৱাড়া চাপি সৰীসপা.