৯৮. কুক্কুচ্চপকতপন্নৰসকং

১৭৫. ইধ পন, ভিক্খৱে, অঞ্ঞতৰস্মিং আৱাসে তদহুপোসথে সম্বহুলা আৱাসিকা ভিক্খূ সন্নিপতন্তি চত্তাৰো ৱা অতিৰেকা ৱা. তে জানন্তি ‘‘অত্থঞ্ঞে আৱাসিকা ভিক্খূ অনাগতা’’তি. তে ‘‘কপ্পতেৱ অম্হাকং উপোসথো কাতুং নাম্হাকং ন কপ্পতী’’তি, কুক্কুচ্চপকতা উপোসথং কৰোন্তি, পাতিমোক্খং উদ্দিসন্তি. তেহি উদ্দিস্সমানে পাতিমোক্খে, অথঞ্ঞে আৱাসিকা ভিক্খূ আগচ্ছন্তি বহুতৰা. তেহি, ভিক্খৱে, ভিক্খূহি পুন পাতিমোক্খং উদ্দিসিতব্বং. উদ্দেসকানং আপত্তি দুক্কটস্স.

ইধ পন, ভিক্খৱে, অঞ্ঞতৰস্মিং আৱাসে তদহুপোসথে সম্বহুলা আৱাসিকা ভিক্খূ সন্নিপতন্তি চত্তাৰো ৱা অতিৰেকা ৱা. তে জানন্তি ‘‘অত্থঞ্ঞে আৱাসিকা ভিক্খূ অনাগতা’’তি. তে ‘‘কপ্পতেৱ অম্হাকং উপোসথো কাতুং নাম্হাকং ন কপ্পতী’’তি, কুক্কুচ্চপকতা উপোসথং কৰোন্তি, পাতিমোক্খং উদ্দিসন্তি. তেহি উদ্দিস্সমানে পাতিমোক্খে, অথঞ্ঞে আৱাসিকা ভিক্খূ আগচ্ছন্তি সমসমা. উদ্দিট্ঠং সুউদ্দিট্ঠং, অৱসেসং সোতব্বং. উদ্দেসকানং আপত্তি দুক্কটস্স.

ইধ পন, ভিক্খৱে, অঞ্ঞতৰস্মিং আৱাসে তদহুপোসথে সম্বহুলা আৱাসিকা ভিক্খূ সন্নিপতন্তি চত্তাৰো ৱা অতিৰেকা ৱা. তে জানন্তি ‘‘অত্থঞ্ঞে আৱাসিকা ভিক্খূ অনাগতা’’তি. তে ‘‘কপ্পতেৱ অম্হাকং উপোসথো কাতুং, নাম্হাকং ন কপ্পতী’’তি, কুক্কুচ্চপকতা উপোসথং কৰোন্তি, পাতিমোক্খং উদ্দিসন্তি. তেহি উদ্দিস্সমানে পাতিমোক্খে, অথঞ্ঞে আৱাসিকা ভিক্খূ আগচ্ছন্তি থোকতৰা. উদ্দিট্ঠং সুউদ্দিট্ঠং, অৱসেসং সোতব্বং. উদ্দেসকানং আপত্তি দুক্কটস্স.

ইধ পন, ভিক্খৱে, অঞ্ঞতৰস্মিং আৱাসে তদহুপোসথে সম্বহুলা আৱাসিকা ভিক্খূ সন্নিপতন্তি চত্তাৰো ৱা অতিৰেকা ৱা. তে জানন্তি ‘‘অত্থঞ্ঞে আৱাসিকা ভিক্খূ অনাগতা’’তি. তে ‘‘কপ্পতেৱ অম্হাকং উপোসথো কাতুং নাম্হাকং ন কপ্পতী’’তি, কুক্কুচ্চপকতা উপোসথং কৰোন্তি, পাতিমোক্খং উদ্দিসন্তি. তেহি উদ্দিট্ঠমত্তে পাতিমোক্খে,…পে… অৱুট্ঠিতায পৰিসায…পে… একচ্চায ৱুট্ঠিতায পৰিসায…পে… সব্বায ৱুট্ঠিতায পৰিসায, অথঞ্ঞে আৱাসিকা ভিক্খূ আগচ্ছন্তি বহুতৰা…পে… সমসমা …পে… থোকতৰা. উদ্দিট্ঠং সুউদ্দিট্ঠং, তেসং সন্তিকে পাৰিসুদ্ধি আৰোচেতব্বা. উদ্দেসকানং আপত্তি দুক্কটস্স.

কুক্কুচ্চপকতপন্নৰসকং নিট্ঠিতং.