১০২. নানাসংৱাসকাদীহি উপোসথকৰণং

১৮০. ইধ পন, ভিক্খৱে, আগন্তুকা ভিক্খূ পস্সন্তি আৱাসিকে ভিক্খূ নানাসংৱাসকে. তে সমানসংৱাসকদিট্ঠিং পটিলভন্তি; সমানসংৱাসকদিট্ঠিং পটিলভিত্ৱা ন পুচ্ছন্তি; অপুচ্ছিত্ৱা একতো উপোসথং কৰোন্তি. অনাপত্তি. তে পুচ্ছন্তি; পুচ্ছিত্ৱা নাভিৱিতৰন্তি; অনভিৱিতৰিত্ৱা একতো উপোসথং কৰোন্তি. আপত্তি দুক্কটস্স. তে পুচ্ছন্তি; পুচ্ছিত্ৱা নাভিৱিতৰন্তি; অনভিৱিতৰিত্ৱা পাটেক্কং উপোসথং কৰোন্তি. অনাপত্তি.

ইধ পন, ভিক্খৱে, আগন্তুকা ভিক্খূ পস্সন্তি আৱাসিকে ভিক্খূ সমানসংৱাসকে. তে নানাসংৱাসকদিট্ঠিং পটিলভন্তি; নানাসংৱাসকদিট্ঠিং পটিলভিত্ৱা ন পুচ্ছন্তি; অপুচ্ছিত্ৱা একতো উপোসথং কৰোন্তি. আপত্তি দুক্কটস্স. তে পুচ্ছন্তি; পুচ্ছিত্ৱা অভিৱিতৰন্তি; অভিৱিতৰিত্ৱা পাটেক্কং উপোসথং কৰোন্তি. আপত্তি দুক্কটস্স. তে পুচ্ছন্তি; পুচ্ছিত্ৱা অভিৱিতৰন্তি; অভিৱিতৰিত্ৱা একতো উপোসথং কৰোন্তি. অনাপত্তি.

ইধ পন, ভিক্খৱে, আৱাসিকা ভিক্খূ পস্সন্তি আগন্তুকে ভিক্খূ নানাসংৱাসকে. তে সমানসংৱাসকদিট্ঠিং পটিলভন্তি; সমানসংৱাসকদিট্ঠিং পটিলভিত্ৱা ন পুচ্ছন্তি; অপুচ্ছিত্ৱা একতো উপোসথং কৰোন্তি. অনাপত্তি. তে পুচ্ছন্তি; পুচ্ছিত্ৱা নাভিৱিতৰন্তি; অনভিৱিতৰিত্ৱা একতো উপোসথং কৰোন্তি. আপত্তি দুক্কটস্স. তে পুচ্ছন্তি; পুচ্ছিত্ৱা নাভিৱিতৰন্তি; অনভিৱিতৰিত্ৱা পাটেক্কং উপোসথং কৰোন্তি. অনাপত্তি.

ইধ পন, ভিক্খৱে, আৱাসিকা ভিক্খূ পস্সন্তি আগন্তুকে ভিক্খূ সমানসংৱাসকে. তে নানাসংৱাসকদিট্ঠিং পটিলভন্তি; নানাসংৱাসকদিট্ঠিং পটিলভিত্ৱা ন পুচ্ছন্তি; অপুচ্ছিত্ৱা একতো উপোসথং কৰোন্তি. আপত্তি দুক্কটস্স. তে পুচ্ছন্তি; পুচ্ছিত্ৱা অভিৱিতৰন্তি; অভিৱিতৰিত্ৱা পাটেক্কং উপোসথং কৰোন্তি. আপত্তি দুক্কটস্স. তে পুচ্ছন্তি; পুচ্ছিত্ৱা অভিৱিতৰন্তি; অভিৱিতৰিত্ৱা একতো উপোসথং কৰোন্তি. অনাপত্তি.

নানাসংৱাসকাদীহি উপোসথকৰণং নিট্ঠিতং.