৯. পব্বজ্জূপসম্পদাকথা

৩৪. তেন খো পন সমযেন ভিক্খূ নানাদিসা নানাজনপদা পব্বজ্জাপেক্খে চ উপসম্পদাপেক্খে চ আনেন্তি – ভগৱা নে পব্বাজেস্সতি উপসম্পাদেস্সতীতি. তত্থ ভিক্খূ চেৱ কিলমন্তি পব্বজ্জাপেক্খা চ উপসম্পদাপেক্খা চ. অথ খো ভগৱতো ৰহোগতস্স পটিসল্লীনস্স এৱং চেতসো পৰিৱিতক্কো উদপাদি – ‘‘এতৰহি খো ভিক্খূ নানাদিসা নানাজনপদা পব্বজ্জাপেক্খে চ উপসম্পদাপেক্খে চ আনেন্তি – ভগৱা নে পব্বাজেস্সতি উপসম্পাদেস্সতীতি. তত্থ ভিক্খূ চেৱ কিলমন্তি পব্বজ্জাপেক্খা চ উপসম্পদাপেক্খা চ. যংনূনাহং ভিক্খূনং অনুজানেয্যং – তুম্হেৱ দানি, ভিক্খৱে, তাসু তাসু দিসাসু তেসু তেসু জনপদেসু পব্বাজেথ উপসম্পাদেথা’’তি. অথ খো ভগৱা সাযন্হসমযং পটিসল্লানা ৱুট্ঠিতো এতস্মিং নিদানে এতস্মিং পকৰণে ধম্মিং কথং কত্ৱা ভিক্খূ আমন্তেসি – ‘‘ইধ ময্হং, ভিক্খৱে, ৰহোগতস্স পটিসল্লীনস্স এৱং চেতসো পৰিৱিতক্কো উদপাদি – ‘এতৰহি খো ভিক্খূ নানাদিসা নানাজনপদা পব্বজ্জাপেক্খে চ উপসম্পদাপেক্খে চ আনেন্তি ভগৱা নে পব্বাজেস্সতি উপসম্পাদেস্সতীতি, তত্থ ভিক্খূ চেৱ কিলমন্তি পব্বজ্জাপেক্খা চ উপসম্পদাপেক্খা চ, যংনূনাহং ভিক্খূনং অনুজানেয্যং তুম্হেৱ দানি, ভিক্খৱে, তাসু তাসু দিসাসু তেসু তেসু জনপদেসু পব্বাজেথ উপসম্পাদেথা’’’তি, অনুজানামি, ভিক্খৱে, তুম্হেৱ দানি তাসু তাসু দিসাসু তেসু তেসু জনপদেসু পব্বাজেথ উপসম্পাদেথ. এৱঞ্চ পন, ভিক্খৱে, পব্বাজেতব্বো উপসম্পাদেতব্বো –

পঠমং কেসমস্সুং ওহাৰাপেত্ৱা [ওহাৰেত্ৱা (ক.)], কাসাযানি ৱত্থানি অচ্ছাদাপেত্ৱা, একংসং উত্তৰাসঙ্গং কাৰাপেত্ৱা, ভিক্খূনং পাদে ৱন্দাপেত্ৱা, উক্কুটিকং নিসীদাপেত্ৱা, অঞ্জলিং পগ্গণ্হাপেত্ৱা, এৱং ৱদেহীতি ৱত্তব্বো – বুদ্ধং সৰণং গচ্ছামি, ধম্মং সৰণং গচ্ছামি, সঙ্ঘং সৰণং গচ্ছামি; দুতিযম্পি বুদ্ধং সৰণং গচ্ছামি, দুতিযম্পি ধম্মং সৰণং গচ্ছামি, দুতিযম্পি সঙ্ঘং সৰণং গচ্ছামি; ততিযম্পি বুদ্ধং সৰণং গচ্ছামি, ততিযম্পি ধম্মং সৰণং গচ্ছামি, ততিযম্পি সঙ্ঘং সৰণং গচ্ছামী’’তি. ‘‘অনুজানামি, ভিক্খৱে, ইমেহি তীহি সৰণগমনেহি পব্বজ্জং উপসম্পদ’’ন্তি.

তীহি সৰণগমনেহি উপসম্পদাকথা নিট্ঠিতা.