৫৯. গমিকাদিনিস্সযৱত্থূনি

১২১. তেন খো পন সমযেন অঞ্ঞতৰো ভিক্খু কোসলেসু জনপদে অদ্ধানমগ্গপ্পটিপন্নো হোতি. অথ খো তস্স ভিক্খুনো এতদহোসি – ‘‘ভগৱতা পঞ্ঞত্তং ‘ন অনিস্সিতেন ৱত্থব্ব’ন্তি. অহঞ্চম্হি নিস্সযকৰণীযো অদ্ধানমগ্গপ্পটিপন্নো, কথং নু খো মযা পটিপজ্জিতব্ব’’ন্তি? ভগৱতো এতমত্থং আৰোচেসুং. অনুজানামি, ভিক্খৱে, অদ্ধানমগ্গপ্পটিপন্নেন ভিক্খুনা নিস্সযং অলভমানেন অনিস্সিতেন ৱত্থুন্তি.

তেন খো পন সমযেন দ্ৱে ভিক্খূ কোসলেসু জনপদে অদ্ধানমগ্গপ্পটিপন্না হোন্তি. তে অঞ্ঞতৰং আৱাসং উপগচ্ছিংসু. তত্থ একো ভিক্খু গিলানো হোতি. অথ খো তস্স গিলানস্স ভিক্খুনো এতদহোসি – ‘‘ভগৱতা পঞ্ঞত্তং ‘ন অনিস্সিতেন ৱত্থব্ব’ন্তি. অহঞ্চম্হি নিস্সযকৰণীযো গিলানো, কথং নু খো মযা পটিপজ্জিতব্ব’’ন্তি? ভগৱতো এতমত্থং আৰোচেসুং. অনুজানামি, ভিক্খৱে, গিলানেন ভিক্খুনা নিস্সযং অলভমানেন অনিস্সিতেন ৱত্থুন্তি.

অথ খো তস্স গিলানুপট্ঠাকস্স ভিক্খুনো এতদহোসি – ‘‘ভগৱতা পঞ্ঞত্তং ‘ন অনিস্সিতেন ৱত্থব্ব’ন্তি. অহঞ্চম্হি নিস্সযকৰণীযো, অযঞ্চ ভিক্খু গিলানো, কথং নু খো মযা পটিপজ্জিতব্ব’’ন্তি? ভগৱতো এতমত্থং আৰোচেসুং. অনুজানামি, ভিক্খৱে, গিলানুপট্ঠাকেন ভিক্খুনা নিস্সযং অলভমানেন যাচিযমানেন অনিস্সিতেন ৱত্থুন্তি.

তেন খো পন সমযেন অঞ্ঞতৰো ভিক্খু অৰঞ্ঞে ৱিহৰতি. তস্স চ তস্মিং সেনাসনে ফাসু হোতি. অথ খো তস্স ভিক্খুনো এতদহোসি – ‘‘ভগৱতা পঞ্ঞত্তং ‘ন অনিস্সিতেন ৱত্থব্ব’ন্তি. অহঞ্চম্হি নিস্সযকৰণীযো অৰঞ্ঞে ৱিহৰামি, ময্হঞ্চ ইমস্মিং সেনাসনে ফাসু হোতি, কথং নু খো মযা পটিপজ্জিতব্ব’’ন্তি? ভগৱতো এতমত্থং আৰোচেসুং. অনুজানামি, ভিক্খৱে, আৰঞ্ঞিকেন ভিক্খুনা ফাসুৱিহাৰং সল্লক্খেন্তেন নিস্সযং অলভমানেন অনিস্সিতেন ৱত্থুং – যদা পতিৰূপো নিস্সযদাযকো আগচ্ছিস্সতি, তদা তস্স নিস্সায ৱসিস্সামীতি.