৫৬. অপত্তকাদিৱত্থু

১১৮. তেন খো পন সমযেন ভিক্খূ অপত্তকং উপসম্পাদেন্তি. হত্থেসু পিণ্ডায চৰন্তি. মনুস্সা উজ্ঝাযন্তি খিয্যন্তি ৱিপাচেন্তি – সেয্যথাপি তিত্থিযাতি. ভগৱতো এতমত্থং আৰোচেসুং. ন, ভিক্খৱে, অপত্তকো উপসম্পাদেতব্বো. যো উপসম্পাদেয্য, আপত্তি দুক্কটস্সাতি.

তেন খো পন সমযেন ভিক্খূ অচীৱৰকং উপসম্পাদেন্তি. নগ্গা পিণ্ডায চৰন্তি. মনুস্সা উজ্ঝাযন্তি খিয্যন্তি ৱিপাচেন্তি – সেয্যথাপি তিত্থিযাতি. ভগৱতো এতমত্থং আৰোচেসুং. ন, ভিক্খৱে, অচীৱৰকো উপসম্পাদেতব্বো. যো উপসম্পাদেয্য, আপত্তি দুক্কটস্সাতি.

তেন খো পন সমযেন ভিক্খূ অপত্তচীৱৰকং উপসম্পাদেন্তি. নগ্গা হত্থেসু পিণ্ডায চৰন্তি. মনুস্সা উজ্ঝাযন্তি খিয্যন্তি ৱিপাচেন্তি – সেয্যথাপি তিত্থিযাতি. ভগৱতো এতমত্থং আৰোচেসুং. ন, ভিক্খৱে, অপত্তচীৱৰকো উপসম্পাদেতব্বো. যো উপসম্পাদেয্য, আপত্তি দুক্কটস্সাতি.

তেন খো পন সমযেন ভিক্খূ যাচিতকেন পত্তেন উপসম্পাদেন্তি. উপসম্পন্নে পত্তং পটিহৰন্তি. হত্থেসু পিণ্ডায চৰন্তি. মনুস্সা উজ্ঝাযন্তি খিয্যন্তি ৱিপাচেন্তি – সেয্যথাপি তিত্থিযাতি. ভগৱতো এতমত্থং আৰোচেসুং. ন, ভিক্খৱে, যাচিতকেন পত্তেন উপসম্পাদেতব্বো. যো উপসম্পাদেয্য, আপত্তি দুক্কটস্সাতি.

তেন খো পন সমযেন ভিক্খূ যাচিতকেন চীৱৰেন উপসম্পাদেন্তি. উপসম্পন্নে চীৱৰং পটিহৰন্তি. নগ্গা পিণ্ডায চৰন্তি. মনুস্সা উজ্ঝাযন্তি খিয্যন্তি ৱিপাচেন্তি – সেয্যথাপি তিত্থিযাতি. ভগৱতো এতমত্থং আৰোচেসুং. ন, ভিক্খৱে, যাচিতকেন চীৱৰেন উপসম্পাদেতব্বো. যো উপসম্পাদেয্য, আপত্তি দুক্কটস্সাতি.

তেন খো পন সমযেন ভিক্খূ যাচিতকেন পত্তচীৱৰেন উপসম্পাদেন্তি. উপসম্পন্নে পত্তচীৱৰং পটিহৰন্তি. নগ্গা হত্থেসু পিণ্ডায চৰন্তি. মনুস্সা উজ্ঝাযন্তি খিয্যন্তি ৱিপাচেন্তি – সেয্যথাপি তিত্থিযাতি. ভগৱতো এতমত্থং আৰোচেসুং. ন, ভিক্খৱে, যাচিতকেন পত্তচীৱৰেন উপসম্পাদেতব্বো. যো উপসম্পাদেয্য, আপত্তি দুক্কটস্সাতি.

নউপসম্পাদেতব্বেকৱীসতিৱাৰো নিট্ঠিতো.