৫৩. ভিক্খুনীদূসকৱত্থু

১১৫. তেন খো পন সমযেন সম্বহুলা ভিক্খুনিযো সাকেতা সাৱত্থিং অদ্ধানমগ্গপ্পটিপন্না হোন্তি. অন্তৰামগ্গে চোৰা নিক্খমিত্ৱা একচ্চা ভিক্খুনিযো অচ্ছিন্দিংসু, একচ্চা ভিক্খুনিযো দূসেসুং. সাৱত্থিযা ৰাজভটা নিক্খমিত্ৱা একচ্চে চোৰে অগ্গহেসুং, একচ্চে চোৰা পলাযিংসু. যে তে পলাযিংসু, তে ভিক্খূসু পব্বজিংসু. যে তে গহিতা, তে ৱধায ওনিয্যন্তি. অদ্দসংসু খো তে পলাযিত্ৱা পব্বজিতা তে চোৰে ৱধায ওনিয্যমানে, দিস্ৱান এৱমাহংসু ‘‘সাধু খো মযং পলাযিম্হা, সচা চ মযং গয্হেয্যাম, মযম্পি এৱমেৱ হঞ্ঞেয্যামা’’তি. ভিক্খূ এৱমাহংসু ‘‘কিং পন তুম্হে, আৱুসো, অকত্থা’’তি. অথ খো তে পব্বজিতা ভিক্খূনং এতমত্থং আৰোচেসুং. ভিক্খূ ভগৱতো এতমত্থং আৰোচেসুং. ভিক্খুনিদূসকো, ভিক্খৱে, অনুপসম্পন্নো ন উপসম্পাদেতব্বো, উপসম্পন্নো নাসেতব্বোতি. সঙ্ঘভেদকো, ভিক্খৱে, অনুপসম্পন্নো ন উপসম্পাদেতব্বো, উপসম্পন্নো নাসেতব্বোতি. লোহিতুপ্পাদকো, ভিক্খৱে, অনুপসম্পন্নো ন উপসম্পাদেতব্বো, উপসম্পন্নো নাসেতব্বোতি.