৪৯. তিৰচ্ছানগতৱত্থু

১১১. তেন খো পন সমযেন অঞ্ঞতৰো নাগো নাগযোনিযা অট্টীযতি হৰাযতি জিগুচ্ছতি. অথ খো তস্স নাগস্স এতদহোসি – ‘‘কেন নু খো অহং উপাযেন নাগযোনিযা চ পৰিমুচ্চেয্যং খিপ্পঞ্চ মনুস্সত্তং পটিলভেয্য’’ন্তি. অথ খো তস্স নাগস্স এতদহোসি – ‘‘ইমে খো সমণা সক্যপুত্তিযা ধম্মচাৰিনো সমচাৰিনো ব্ৰহ্মচাৰিনো সচ্চৱাদিনো সীলৱন্তো কল্যাণধম্মা. সচে খো অহং সমণেসু সক্যপুত্তিযেসু পব্বজেয্যং, এৱাহং নাগযোনিযা চ পৰিমুচ্চেয্যং, খিপ্পঞ্চ মনুস্সত্তং পটিলভেয্য’’ন্তি. অথ খো সো নাগো মাণৱকৱণ্ণেন ভিক্খূ উপসঙ্কমিত্ৱা পব্বজ্জং যাচি. তং ভিক্খূ পব্বাজেসুং, উপসম্পাদেসুং. তেন খো পন সমযেন সো নাগো অঞ্ঞতৰেন ভিক্খুনা সদ্ধিং পচ্চন্তিমে ৱিহাৰে পটিৱসতি. অথ খো সো ভিক্খু ৰত্তিযা পচ্চূসসমযং পচ্চুট্ঠায অজ্ঝোকাসে চঙ্কমতি. অথ খো সো নাগো তস্স ভিক্খুনো নিক্খন্তে ৱিস্সট্ঠো নিদ্দং ওক্কমি. সব্বো ৱিহাৰো অহিনা পুণ্ণো, ৱাতপানেহি ভোগা নিক্খন্তা হোন্তি. অথ খো সো ভিক্খু ৱিহাৰং পৱিসিস্সামীতি কৱাটং পণামেন্তো অদ্দস সব্বং ৱিহাৰং অহিনা পুণ্ণং, ৱাতপানেহি ভোগে নিক্খন্তে, দিস্ৱান ভীতো ৱিস্সৰমকাসি. ভিক্খূ উপধাৱিত্ৱা তং ভিক্খুং এতদৱোচুং – ‘‘কিস্স ত্ৱং, আৱুসো, ৱিস্সৰমকাসী’’তি? ‘‘অযং, আৱুসো, সব্বো ৱিহাৰো অহিনা পুণ্ণো, ৱাতপানেহি ভোগা নিক্খন্তা’’তি. অথ খো সো নাগো তেন সদ্দেন পটিবুজ্ঝিত্ৱা সকে আসনে নিসীদি. ভিক্খূ এৱমাহংসু – ‘‘কোসি ত্ৱং, আৱুসো’’তি? ‘‘অহং, ভন্তে, নাগো’’তি. ‘‘কিস্স পন ত্ৱং, আৱুসো, এৱৰূপং অকাসী’’তি? অথ খো সো নাগো ভিক্খূনং এতমত্থং আৰোচেসি. ভিক্খূ ভগৱতো এতমত্থং আৰোচেসুং. অথ খো ভগৱা এতস্মিং নিদানে এতস্মিং পকৰণে ভিক্খুসঙ্ঘং সন্নিপাতাপেত্ৱা তং নাগং এতদৱোচ – ‘‘তুম্হে খোত্থ নাগা অৱিৰুড়্হিধম্মা ইমস্মিং ধম্মৱিনযে. গচ্ছ ত্ৱং, নাগ, তত্থেৱ চাতুদ্দসে পন্নৰসে অট্ঠমিযা চ পক্খস্স উপোসথং উপৱস, এৱং ত্ৱং নাগযোনিযা চ পৰিমুচ্চিস্সসি, খিপ্পঞ্চ মনুস্সত্তং পটিলভিস্সসী’’তি. অথ খো সো নাগো অৱিৰুড়্হিধম্মো কিৰাহং ইমস্মিং ধম্মৱিনযেতি দুক্খী দুম্মনো অস্সূনি পৱত্তযমানো ৱিস্সৰং কত্ৱা পক্কামি. অথ খো ভগৱা ভিক্খূ আমন্তেসি – ‘‘দ্ৱেমে, ভিক্খৱে, পচ্চযা নাগস্স সভাৱপাতুকম্মায. যদা চ সজাতিযা মেথুনং ধম্মং পটিসেৱতি, যদা চ ৱিস্সট্ঠো নিদ্দং ওক্কমতি – ইমে খো, ভিক্খৱে, দ্ৱে পচ্চযা নাগস্স সভাৱপাতুকম্মায. তিৰচ্ছানগতো, ভিক্খৱে, অনুপসম্পন্নো ন উপসম্পাদেতব্বো, উপসম্পন্নো নাসেতব্বো’’তি.