৪৩. দণ্ডকম্মৱত্থু

১০৭. তেন খো পন সমযেন সামণেৰা ভিক্খূসু অগাৰৱা অপ্পতিস্সা অসভাগৱুত্তিকা ৱিহৰন্তি. ভিক্খূ উজ্ঝাযন্তি খিয্যন্তি ৱিপাচেন্তি – ‘‘কথঞ্হি নাম সামণেৰা ভিক্খূসু অগাৰৱা অপ্পতিস্সা অসভাগৱুত্তিকা ৱিহৰিস্সন্তী’’তি. ভগৱতো এতমত্থং আৰোচেসুং…পে… অনুজানামি, ভিক্খৱে, পঞ্চহঙ্গেহি সমন্নাগতস্স সামণেৰস্স দণ্ডকম্মং কাতুং. ভিক্খূনং অলাভায পৰিসক্কতি, ভিক্খূনং অনত্থায পৰিসক্কতি, ভিক্খূনং অৱাসায পৰিসক্কতি, ভিক্খূ অক্কোসতি পৰিভাসতি, ভিক্খূ ভিক্খূহি ভেদেতি – অনুজানামি, ভিক্খৱে, ইমেহি পঞ্চহঙ্গেহি সমন্নাগতস্স সামণেৰস্স দণ্ডকম্মং কাতুন্তি.

অথ খো ভিক্খূনং এতদহোসি – ‘‘কিং নু খো দণ্ডকম্মং কাতব্ব’’ন্তি? ভগৱতো এতমত্থং আৰোচেসুং. অনুজানামি, ভিক্খৱে, আৱৰণং কাতুন্তি.

তেন খো পন সমযেন ভিক্খূ সামণেৰানং সব্বং সঙ্ঘাৰামং আৱৰণং কৰোন্তি. সামণেৰা আৰামং পৱিসিতুং অলভমানা পক্কমন্তিপি, ৱিব্ভমন্তিপি, তিত্থিযেসুপি সঙ্কমন্তি. ভগৱতো এতমত্থং আৰোচেসুং. ন, ভিক্খৱে, সব্বো সঙ্ঘাৰামো আৱৰণং কাতব্বো. যো কৰেয্য, আপত্তি দুক্কটস্স. অনুজানামি, ভিক্খৱে, যত্থ ৱা ৱসতি, যত্থ ৱা পটিক্কমতি, তত্থ আৱৰণং কাতুন্তি.

তেন খো পন সমযেন ভিক্খূ সামণেৰানং মুখদ্ৱাৰিকং আহাৰং আৱৰণং কৰোন্তি. মনুস্সা যাগুপানম্পি সঙ্ঘভত্তম্পি কৰোন্তা সামণেৰে এৱং ৱদেন্তি – ‘‘এথ, ভন্তে, যাগুং পিৱথ; এথ, ভন্তে, ভত্তং ভুঞ্জথা’’তি. সামণেৰা এৱং ৱদেন্তি – ‘‘নাৱুসো, লব্ভা. ভিক্খূহি আৱৰণং কত’’ন্তি. মনুস্সা উজ্ঝাযন্তি খিয্যন্তি ৱিপাচেন্তি – ‘‘কথঞ্হি নাম ভদন্তা সামণেৰানং মুখদ্ৱাৰিকং আহাৰং আৱৰণং কৰিস্সন্তী’’তি. ভগৱতো এতমত্থং আৰোচেসুং. ন, ভিক্খৱে, মুখদ্ৱাৰিকো আহাৰো আৱৰণং কাতব্বো. যো কৰেয্য, আপত্তি দুক্কটস্সাতি.

দণ্ডকম্মৱত্থু নিট্ঠিতং.