৩৫. কম্মাৰভণ্ডুৱত্থু

৯৮. তেন খো পন সমযেন অঞ্ঞতৰো কম্মাৰভণ্ডু মাতাপিতূহি সদ্ধিং ভণ্ডিত্ৱা আৰামং গন্ত্ৱা ভিক্খূসু পব্বজিতো হোতি. অথ খো তস্স কম্মাৰভণ্ডুস্স মাতাপিতৰো তং কম্মাৰভণ্ডুং ৱিচিনন্তা আৰামং গন্ত্ৱা ভিক্খূ পুচ্ছিংসু – ‘‘অপি, ভন্তে, এৱৰূপং দাৰকং পস্সেয্যাথা’’তি? ভিক্খূ অজানংযেৱ আহংসু – ‘‘ন জানামা’’তি, অপস্সংযেৱ আহংসু – ‘‘ন পস্সামা’’তি. অথ খো তস্স কম্মাৰভণ্ডুস্স মাতাপিতৰো তং কম্মাৰভণ্ডুং ৱিচিনন্তা ভিক্খূসু পব্বজিতং দিস্ৱা উজ্ঝাযন্তি খিয্যন্তি ৱিপাচেন্তি – ‘‘অলজ্জিনো ইমে সমণা সক্যপুত্তিযা, দুস্সীলা মুসাৱাদিনো. জানংযেৱ আহংসু – ‘ন জানামা’তি, পস্সংযেৱ আহংসু – ‘ন পস্সামা’তি. অযং দাৰকো ভিক্খূসু পব্বজিতো’’তি. অস্সোসুং খো ভিক্খূ তস্স কম্মাৰভণ্ডুস্স মাতাপিতূনং উজ্ঝাযন্তানং খিয্যন্তানং ৱিপাচেন্তানং. অথ খো তে ভিক্খূ ভগৱতো এতমত্থং আৰোচেসুং. অনুজানামি, ভিক্খৱে, সঙ্ঘং অপলোকেতুং ভণ্ডুকম্মাযাতি.

কম্মাৰভণ্ডুৱত্থু নিট্ঠিতং.