২৪. উপসম্পাদেতব্বছক্কং

৮৫. ‘‘ছহি, ভিক্খৱে, অঙ্গেহি সমন্নাগতেন ভিক্খুনা ন উপসম্পাদেতব্বং, ন নিস্সযো দাতব্বো, ন সামণেৰো উপট্ঠাপেতব্বো. ন অসেক্খেন সীলক্খন্ধেন সমন্নাগতো হোতি, ন অসেক্খেন সমাধিক্খন্ধেন সমন্নাগতো হোতি, ন অসেক্খেন পঞ্ঞাক্খন্ধেন সমন্নাগতো হোতি, ন অসেক্খেন ৱিমুত্তিক্খন্ধেন সমন্নাগতো হোতি, ন অসেক্খেন ৱিমুত্তিঞাণদস্সনক্খন্ধেন সমন্নাগতো হোতি, ঊনদসৱস্সো হোতি – ইমেহি খো, ভিক্খৱে, ছহঙ্গেহি সমন্নাগতেন ভিক্খুনা ন উপসম্পাদেতব্বং, ন নিস্সযো দাতব্বো, ন সামণেৰো উপট্ঠাপেতব্বো.

‘‘ছহি, ভিক্খৱে, অঙ্গেহি সমন্নাগতেন ভিক্খুনা উপসম্পাদেতব্বং, নিস্সযো দাতব্বো, সামণেৰো উপট্ঠাপেতব্বো. অসেক্খেন সীলক্খন্ধেন সমন্নাগতো হোতি, অসেক্খেন সমাধিক্খন্ধেন সমন্নাগতো হোতি, অসেক্খেন পঞ্ঞাক্খন্ধেন সমন্নাগতো হোতি, অসেক্খেন ৱিমুত্তিক্খন্ধেন সমন্নাগতো হোতি, অসেক্খেন ৱিমুত্তিঞাণদস্সনক্খন্ধেন সমন্নাগতো হোতি, দসৱস্সো ৱা হোতি অতিৰেকদসৱস্সো ৱা – ইমেহি খো, ভিক্খৱে, ছহঙ্গেহি সমন্নাগতেন ভিক্খুনা উপসম্পাদেতব্বং, নিস্সযো দাতব্বো, সামণেৰো উপট্ঠাপেতব্বো.

‘‘অপৰেহিপি, ভিক্খৱে, ছহঙ্গেহি সমন্নাগতেন ভিক্খুনা ন উপসম্পাদেতব্বং, ন নিস্সযো দাতব্বো, ন সামণেৰো উপট্ঠাপেতব্বো. অত্তনা ন অসেক্খেন সীলক্খন্ধেন সমন্নাগতো হোতি, ন পৰং অসেক্খে সীলক্খন্ধে সমাদপেতা; অত্তনা ন অসেক্খেন সমাধিক্খন্ধেন সমন্নাগতো হোতি, ন পৰং অসেক্খে সমাধিক্খন্ধে সমাদপেতা; অত্তনা ন অসেক্খেন পঞ্ঞাক্খন্ধেন সমন্নাগতো হোতি, ন পৰং অসেক্খে পঞ্ঞাক্খন্ধে সমাদপেতা; অত্তনা ন অসেক্খেন ৱিমুত্তিক্খন্ধেন সমন্নাগতো হোতি, ন পৰং অসেক্খে ৱিমুত্তিক্খন্ধে সমাদপেতা; অত্তনা ন অসেক্খেন ৱিমুত্তিঞাণদস্সনক্খন্ধেন সমন্নাগতো হোতি, ন পৰং অসেক্খে ৱিমুত্তিঞাণদস্সনক্খন্ধে সমাদপেতা; ঊনদসৱস্সো হোতি – ইমেহি খো, ভিক্খৱে, ছহঙ্গেহি সমন্নাগতেন ভিক্খুনা ন উপসম্পাদেতব্বং, ন নিস্সযো দাতব্বো, ন সামণেৰো উপট্ঠাপেতব্বো.

‘‘ছহি, ভিক্খৱে, অঙ্গেহি সমন্নাগতেন ভিক্খুনা উপসম্পাদেতব্বং, নিস্সযো দাতব্বো, সামণেৰো উপট্ঠাপেতব্বো. অত্তনা অসেক্খেন সীলক্খন্ধেন সমন্নাগতো হোতি, পৰং অসেক্খে সীলক্খন্ধে সমাদপেতা অত্তনা অসেক্খেন সমাধিক্খন্ধেন সমন্নাগতো হোতি, পৰং অসেক্খে সমাধিক্খন্ধে সমাদপেতা. অত্তনা অসেক্খেন পঞ্ঞাক্খন্ধেন সমন্নাগতো হোতি, পৰং অসেক্খে পঞ্ঞাক্খন্ধে সমাদপেতা. অত্তনা অসেক্খেন ৱিমুত্তিক্খন্ধেন সমন্নাগতো হোতি, পৰং অসেক্খে ৱিমুত্তিক্খন্ধে সমাদপেতা. অত্তনা অসেক্খেন ৱিমুত্তিঞাণদস্সনক্খন্ধেন সমন্নাগতো হোতি, পৰং অসেক্খে ৱিমুত্তিঞাণদস্সনক্খন্ধে সমাদপেতা; দসৱস্সো ৱা হোতি অতিৰেকদসৱস্সো ৱা – ইমেহি খো, ভিক্খৱে, ছহঙ্গেহি সমন্নাগতেন ভিক্খুনা উপসম্পাদেতব্বং, নিস্সযো দাতব্বো, সামণেৰো উপট্ঠাপেতব্বো.

‘‘অপৰেহিপি, ভিক্খৱে, ছহঙ্গেহি সমন্নাগতেন ভিক্খুনা ন উপসম্পাদেতব্বং, ন নিস্সযো দাতব্বো, ন সামণেৰো উপট্ঠাপেতব্বো. অস্সদ্ধো হোতি, অহিৰিকো হোতি, অনোত্তপ্পী হোতি, কুসীতো হোতি, মুট্ঠস্সতি হোতি, ঊনদসৱস্সো হোতি – ইমেহি খো, ভিক্খৱে, ছহঙ্গেহি সমন্নাগতেন ভিক্খুনা ন উপসম্পাদেতব্বং, ন নিস্সযো দাতব্বো, ন সামণেৰো উপট্ঠাপেতব্বো.

‘‘ছহি, ভিক্খৱে, অঙ্গেহি সমন্নাগতেন ভিক্খুনা উপসম্পাদেতব্বং, নিস্সযো দাতব্বো, সামণেৰো উপট্ঠাপেতব্বো. সদ্ধো হোতি, হিৰিমা হোতি, ওত্তপ্পী হোতি, আৰদ্ধৱীৰিযো হোতি, উপট্ঠিতস্সতি হোতি, দসৱস্সো ৱা হোতি অতিৰেকদসৱস্সো ৱা – ইমেহি খো, ভিক্খৱে, ছহঙ্গেহি সমন্নাগতেন ভিক্খুনা উপসম্পাদেতব্বং, নিস্সযো দাতব্বো, সামণেৰো উপট্ঠাপেতব্বো.

‘‘অপৰেহিপি, ভিক্খৱে, ছহঙ্গেহি সমন্নাগতেন ভিক্খুনা ন উপসম্পাদেতব্বং, ন নিস্সযো দাতব্বো, ন সামণেৰো উপট্ঠাপেতব্বো. অধিসীলে সীলৱিপন্নো হোতি, অজ্ঝাচাৰে আচাৰৱিপন্নো হোতি, অতিদিট্ঠিযা দিট্ঠিৱিপন্নো হোতি, অপ্পস্সুতো হোতি, দুপ্পঞ্ঞো হোতি, ঊনদসৱস্সো হোতি – ইমেহি খো, ভিক্খৱে, ছহঙ্গেহি সমন্নাগতেন ভিক্খুনা ন উপসম্পাদেতব্বং, ন নিস্সযো দাতব্বো, ন সামণেৰো উপট্ঠাপেতব্বো.

‘‘ছহি, ভিক্খৱে, অঙ্গেহি সমন্নাগতেন ভিক্খুনা উপসম্পাদেতব্বং, নিস্সযো দাতব্বো, সামণেৰো উপট্ঠাপেতব্বো. ন অধিসীলে সীলৱিপন্নো হোতি, ন অজ্ঝাচাৰে আচাৰৱিপন্নো হোতি, ন অতিদিট্ঠিযা দিট্ঠিৱিপন্নো হোতি, বহুস্সুতো হোতি, পঞ্ঞৱা হোতি, দসৱস্সো ৱা হোতি অতিৰেকদসৱস্সো ৱা – ইমেহি খো, ভিক্খৱে, ছহঙ্গেহি সমন্নাগতেন ভিক্খুনা উপসম্পাদেতব্বং, নিস্সযো দাতব্বো, সামণেৰো উপট্ঠাপেতব্বো.

‘‘অপৰেহিপি, ভিক্খৱে, ছহঙ্গেহি সমন্নাগতেন ভিক্খুনা ন উপসম্পাদেতব্বং, ন নিস্সযো দাতব্বো, ন সামণেৰো উপট্ঠাপেতব্বো. ন পটিবলো হোতি অন্তেৱাসিং ৱা সদ্ধিৱিহাৰিং ৱা গিলানং উপট্ঠাতুং ৱা উপট্ঠাপেতুং ৱা, অনভিৰতং ৱূপকাসেতুং ৱা ৱূপকাসাপেতুং ৱা, উপ্পন্নং কুক্কুচ্চং ধম্মতো ৱিনোদেতুং, আপত্তিং ন জানাতি, আপত্তিযা ৱুট্ঠানং ন জানাতি, ঊনদসৱস্সো হোতি – ইমেহি খো, ভিক্খৱে, ছহঙ্গেহি সমন্নাগতেন ভিক্খুনা ন উপসম্পাদেতব্বং, ন নিস্সযো দাতব্বো, ন সামণেৰো উপট্ঠাপেতব্বো.

‘‘ছহি, ভিক্খৱে, অঙ্গেহি সমন্নাগতেন ভিক্খুনা উপসম্পাদেতব্বং, নিস্সযো দাতব্বো, সামণেৰো উপট্ঠাপেতব্বো. পটিবলো হোতি অন্তেৱাসিং ৱা সদ্ধিৱিহাৰিং ৱা গিলানং উপট্ঠাতুং ৱা উপট্ঠাপেতুং ৱা, অনভিৰতং ৱূপকাসেতুং ৱা ৱূপকাসাপেতুং ৱা, উপ্পন্নং কুক্কুচ্চং ধম্মতো ৱিনোদেতুং, আপত্তিং জানাতি, আপত্তিযা ৱুট্ঠানং জানাতি, দসৱস্সো ৱা হোতি অতিৰেকদসৱস্সো ৱা – ইমেহি খো, ভিক্খৱে, ছহঙ্গেহি সমন্নাগতেন ভিক্খুনা উপসম্পাদেতব্বং, নিস্সযো দাতব্বো, সামণেৰো উপট্ঠাপেতব্বো.

‘‘অপৰেহিপি, ভিক্খৱে, ছহঙ্গেহি সমন্নাগতেন ভিক্খুনা ন উপসম্পাদেতব্বং, ন নিস্সযো দাতব্বো, ন সামণেৰো উপট্ঠাপেতব্বো. ন পটিবলো হোতি অন্তেৱাসিং ৱা সদ্ধিৱিহাৰিং ৱা অভিসমাচাৰিকায সিক্খায সিক্খাপেতুং, আদিব্ৰহ্মচৰিযকায সিক্খায ৱিনেতুং, অভিধম্মে ৱিনেতুং, অভিৱিনযে ৱিনেতুং, উপ্পন্নং দিট্ঠিগতং ধম্মতো ৱিৱেচেতুং, ঊনদসৱস্সো হোতি – ইমেহি খো, ভিক্খৱে, ছহঙ্গেহি সমন্নাগতেন ভিক্খুনা ন উপসম্পাদেতব্বং, ন নিস্সযো দাতব্বো, ন সামণেৰো উপট্ঠাপেতব্বো.

‘‘ছহি, ভিক্খৱে, অঙ্গেহি সমন্নাগতেন ভিক্খুনা উপসম্পাদেতব্বং, নিস্সযো দাতব্বো, সামণেৰো উপট্ঠাপেতব্বো. পটিবলো হোতি অন্তেৱাসিং ৱা সদ্ধিৱিহাৰিং ৱা অভিসমাচাৰিকায সিক্খায সিক্খাপেতুং আদিব্ৰহ্মচৰিযকায সিক্খায ৱিনেতুং, অভিধম্মে ৱিনেতুং, অভিৱিনযে ৱিনেতুং, উপ্পন্নং দিট্ঠিগতং ধম্মতো ৱিৱেচেতুং, দসৱস্সো ৱা হোতি অতিৰেকদসৱস্সো ৱা – ইমেহি খো, ভিক্খৱে, ছহঙ্গেহি সমন্নাগতেন ভিক্খুনা উপসম্পাদেতব্বং, নিস্সযো দাতব্বো, সামণেৰো উপট্ঠাপেতব্বো.

‘‘অপৰেহিপি, ভিক্খৱে, ছহঙ্গেহি সমন্নাগতেন ভিক্খুনা ন উপসম্পাদেতব্বং, ন নিস্সযো দাতব্বো, ন সামণেৰো উপট্ঠাপেতব্বো. আপত্তিং ন জানাতি, অনাপত্তিং ন জানাতি, লহুকং আপত্তিং ন জানাতি, গৰুকং আপত্তিং ন জানাতি, উভযানি খো পনস্স পাতিমোক্খানি ৱিত্থাৰেন ন স্ৱাগতানি হোন্তি ন সুৱিভত্তানি ন সুপ্পৱত্তীনি ন সুৱিনিচ্ছিতানি সুত্তসো অনুব্যঞ্জনসো, ঊনদসৱস্সো হোতি – ইমেহি খো, ভিক্খৱে, ছহঙ্গেহি সমন্নাগতেন ভিক্খুনা ন উপসম্পাদেতব্বং, ন নিস্সযো দাতব্বো, ন সামণেৰো উপট্ঠাপেতব্বো.

‘‘ছহি, ভিক্খৱে, অঙ্গেহি সমন্নাগতেন ভিক্খুনা উপসম্পাদেতব্বং, নিস্সযো দাতব্বো, সামণেৰো উপট্ঠাপেতব্বো. আপত্তিং জানাতি, অনাপত্তিং জানাতি, লহুকং আপত্তিং জানাতি, গৰুকং আপত্তিং জানাতি, উভযানি খো পনস্স পাতিমোক্খানি ৱিত্থাৰেন স্ৱাগতানি হোন্তি সুৱিভত্তানি সুপ্পৱত্তীনি সুৱিনিচ্ছিতানি সুত্তসো অনুব্যঞ্জনসো, দসৱস্সো ৱা হোতি অতিৰেকদসৱস্সো ৱা – ইমেহি খো, ভিক্খৱে, ছহঙ্গেহি সমন্নাগতেন ভিক্খুনা উপসম্পাদেতব্বং, নিস্সযো দাতব্বো, সামণেৰো উপট্ঠাপেতব্বো’’তি.

উপসম্পাদেতব্বছক্কং নিট্ঠিতং.