১৮. আচৰিযৱত্তকথা

৭৪. তেন খো পন সমযেন অঞ্ঞতৰো মাণৱকো ভিক্খূ উপসঙ্কমিত্ৱা পব্বজ্জং যাচি. তস্স ভিক্খূ পটিকচ্চেৱ নিস্সযে আচিক্খিংসু. সো এৱমাহ – ‘‘সচে মে, ভন্তে, পব্বজিতে নিস্সযে আচিক্খেয্যাথ, অভিৰমেয্যামহং [অভিৰমেয্যঞ্চাহং (সী.), অভিৰমেয্যং স্ৱাহং (ক.)]. ন দানাহং, ভন্তে, পব্বজিস্সামি; জেগুচ্ছা মে নিস্সযা পটিকূলা’’তি. ভগৱতো এতমত্থং আৰোচেসুং. ন, ভিক্খৱে, পটিকচ্চেৱ নিস্সযা আচিক্খিতব্বা. যো আচিক্খেয্য, আপত্তি দুক্কটস্স. অনুজানামি, ভিক্খৱে, উপসম্পন্নসমনন্তৰা নিস্সযে আচিক্খিতুন্তি.

তেন খো পন সমযেন ভিক্খূ দুৱগ্গেনপি তিৱগ্গেনপি গণেন উপসম্পাদেন্তি. ভগৱতো এতমত্থং আৰোচেসুং. ন, ভিক্খৱে, ঊনদসৱগ্গেন গণেন উপসম্পাদেতব্বো. যো উপসম্পাদেয্য, আপত্তি দুক্কটস্স. অনুজানামি, ভিক্খৱে, দসৱগ্গেন ৱা অতিৰেকদসৱগ্গেন ৱা গণেন উপসম্পাদেতুন্তি.

৭৫. তেন খো পন সমযেন ভিক্খূ একৱস্সাপি দুৱস্সাপি সদ্ধিৱিহাৰিকং উপসম্পাদেন্তি. আযস্মাপি উপসেনো ৱঙ্গন্তপুত্তো একৱস্সো সদ্ধিৱিহাৰিকং উপসম্পাদেসি. সো ৱস্সংৱুট্ঠো দুৱস্সো একৱস্সং সদ্ধিৱিহাৰিকং আদায যেন ভগৱা তেনুপসঙ্কমি, উপসঙ্কমিত্ৱা ভগৱন্তং অভিৱাদেত্ৱা একমন্তং নিসীদি. আচিণ্ণং খো পনেতং বুদ্ধানং ভগৱন্তানং আগন্তুকেহি ভিক্খূহি সদ্ধিং পটিসম্মোদিতুং. অথ খো ভগৱা আযস্মন্তং উপসেনং ৱঙ্গন্তপুত্তং এতদৱোচ – ‘‘কচ্চি, ভিক্খু, খমনীযং, কচ্চি যাপনীযং, কচ্চি ত্ৱং অপ্পকিলমথেন অদ্ধানং আগতো’’তি? ‘‘খমনীযং, ভগৱা, যাপনীযং, ভগৱা. অপ্পকিলমথেন মযং, ভন্তে, অদ্ধানং আগতা’’তি. জানন্তাপি তথাগতা পুচ্ছন্তি, জানন্তাপি ন পুচ্ছন্তি, কালং ৱিদিত্ৱা পুচ্ছন্তি, কালং ৱিদিত্ৱা ন পুচ্ছন্তি; অত্থসংহিতং তথাগতা পুচ্ছন্তি; নো অনত্থসংহিতং. অনত্থসংহিতে সেতুঘাতো তথাগতানং. দ্ৱীহি আকাৰেহি বুদ্ধা ভগৱন্তো ভিক্খূ পটিপুচ্ছন্তি – ধম্মং ৱা দেসেস্সাম, সাৱকানং ৱা সিক্খাপদং পঞ্ঞপেস্সামাতি. অথ খো ভগৱা আযস্মন্তং উপসেনং ৱঙ্গন্তপুত্তং এতদৱোচ – ‘‘কতিৱস্সোসি ত্ৱং, ভিক্খূ’’তি? ‘‘দুৱস্সোহং, ভগৱা’’তি. ‘‘অযং পন ভিক্খু কতিৱস্সো’’তি? ‘‘একৱস্সো, ভগৱা’’তি. ‘‘কিং তাযং ভিক্খু হোতী’’তি? ‘‘সদ্ধিৱিহাৰিকো মে, ভগৱা’’তি. ৱিগৰহি বুদ্ধো ভগৱা – ‘‘অননুচ্ছৱিকং, মোঘপুৰিস, অননুলোমিকং অপ্পতিৰূপং অস্সামণকং অকপ্পিযং অকৰণীযং. কথঞ্হি নাম ত্ৱং, মোঘপুৰিস, অঞ্ঞেহি ওৱদিযো অনুসাসিযো অঞ্ঞং ওৱদিতুং অনুসাসিতুং মঞ্ঞিস্সসি. অতিলহুং খো ত্ৱং, মোঘপুৰিস, বাহুল্লায আৱত্তো, যদিদং গণবন্ধিকং. নেতং, মোঘপুৰিস, অপ্পসন্নানং ৱা পসাদায পসন্নানং ৱা ভিয্যোভাৱায’’…পে… ৱিগৰহিত্ৱা…পে… ধম্মিং কথং কত্ৱা ভিক্খূ আমন্তেসি – ‘‘ন, ভিক্খৱে, ঊনদসৱস্সেন উপসম্পাদেতব্বো. যো উপসম্পাদেয্য, আপত্তি দুক্কটস্স. অনুজানামি, ভিক্খৱে, দসৱস্সেন ৱা অতিৰেকদসৱস্সেন ৱা উপসম্পাদেতু’’ন্তি.

৭৬. তেন খো পন সমযেন ভিক্খূ – দসৱস্সম্হা দসৱস্সম্হাতি – বালা অব্যত্তা উপসম্পাদেন্তি. দিস্সন্তি উপজ্ঝাযা বালা, সদ্ধিৱিহাৰিকা পণ্ডিতা. দিস্সন্তি উপজ্ঝাযা অব্যত্তা, সদ্ধিৱিহাৰিকা ব্যত্তা. দিস্সন্তি উপজ্ঝাযা অপ্পস্সুতা, সদ্ধিৱিহাৰিকা বহুস্সুতা. দিস্সন্তি উপজ্ঝাযা দুপ্পঞ্ঞা, সদ্ধিৱিহাৰিকা পঞ্ঞৱন্তো. অঞ্ঞতৰোপি অঞ্ঞতিত্থিযপুব্বো উপজ্ঝাযেন সহধম্মিকং ৱুচ্চমানো উপজ্ঝাযস্স ৱাদং আৰোপেত্ৱা তংযেৱ তিত্থাযতনং সঙ্কমি. যে তে ভিক্খূ অপ্পিচ্ছা…পে… তে উজ্ঝাযন্তি খিয্যন্তি ৱিপাচেন্তি – কথঞ্হি নাম ভিক্খূ – দসৱস্সম্হা দসৱস্সম্হাতি – বালা অব্যত্তা উপসম্পাদেস্সন্তি. দিস্সন্তি উপজ্ঝাযা বালা সদ্ধিৱিহাৰিকা পণ্ডিতা, দিস্সন্তি উপজ্ঝাযা অব্যত্তা সদ্ধিৱিহাৰিকা ব্যত্তা, দিস্সন্তি উপজ্ঝাযা অপ্পস্সুতা সদ্ধিৱিহাৰিকা বহুস্সুতা, দিস্সন্তি উপজ্ঝাযা দুপ্পঞ্ঞা, সদ্ধিৱিহাৰিকা পঞ্ঞৱন্তোতি. অথ খো তে ভিক্খূ ভগৱতো এতমত্থং আৰোচেসুং. ‘‘সচ্চং কিৰ, ভিক্খৱে, ভিক্খূ – দসৱস্সম্হা দসৱস্সম্হাতি – বালা অব্যত্তা উপসম্পাদেন্তি. দিস্সন্তি উপজ্ঝাযা বালা, সদ্ধিৱিহাৰিকা পণ্ডিতা, দিস্সন্তি উপজ্ঝাযা অব্যত্তা সদ্ধিৱিহাৰিকা ব্যত্তা, দিস্সন্তি উপজ্ঝাযা অপ্পস্সুতা, সদ্ধিৱিহাৰিকা বহুস্সুতা, দিস্সন্তি উপজ্ঝাযা দুপ্পঞ্ঞা, সদ্ধিৱিহাৰিকা পঞ্ঞৱন্তো’’তি? ‘‘সচ্চং, ভগৱা’’তি. ৱিগৰহি বুদ্ধো ভগৱা…পে… কথঞ্হি নাম তে, ভিক্খৱে, মোঘপুৰিসা – দসৱস্সম্হা দসৱস্সম্হাতি – বালা অব্যত্তা উপসম্পাদেস্সন্তি. দিস্সন্তি উপজ্ঝাযা বালা, সদ্ধিৱিহাৰিকা পণ্ডিতা, দিস্সন্তি উপজ্ঝাযা অব্যত্তা সদ্ধিৱিহাৰিকা ব্যত্তা, দিস্সন্তি উপজ্ঝাযা অপ্পস্সুতা, সদ্ধিৱিহাৰিকা বহুস্সুতা, দিস্সন্তি উপজ্ঝাযা দুপ্পঞ্ঞা, সদ্ধিৱিহাৰিকা পঞ্ঞৱন্তো. নেতং, ভিক্খৱে, অপ্পসন্নানং ৱা পসাদায…পে… ৱিগৰহিত্ৱা…পে… ধম্মিং কথং কত্ৱা ভিক্খূ আমন্তেসি – ‘‘ন, ভিক্খৱে, বালেন অব্যত্তেন উপসম্পাদেতব্বো. যো উপসম্পাদেয্য, আপত্তি দুক্কটস্স. অনুজানামি, ভিক্খৱে, ব্যত্তেন ভিক্খুনা পটিবলেন দসৱস্সেন ৱা অতিৰেকদসৱস্সেন ৱা উপসম্পাদেতু’’ন্তি.

৭৭. তেন খো পন সমযেন ভিক্খূ উপজ্ঝাযেসু পক্কন্তেসুপি ৱিব্ভন্তেসুপি কালঙ্কতেসুপি পক্খসঙ্কন্তেসুপি অনাচৰিযকা অনোৱদিযমানা অননুসাসিযমানা দুন্নিৱত্থা দুপ্পাৰুতা অনাকপ্পসম্পন্না পিণ্ডায চৰন্তি, মনুস্সানং ভুঞ্জমানানং উপৰিভোজনেপি উত্তিট্ঠপত্তং উপনামেন্তি, উপৰিখাদনীযেপি – উপৰিসাযনীযেপি – উপৰিপানীযেপি উত্তিট্ঠপত্তং উপনামেন্তি; সামং সূপম্পি ওদনম্পি ৱিঞ্ঞাপেত্ৱা ভুঞ্জন্তি; ভত্তগ্গেপি উচ্চাসদ্দা মহাসদ্দা ৱিহৰন্তি. মনুস্সা উজ্ঝাযন্তি খিয্যন্তি ৱিপাচেন্তি – ‘‘কথঞ্হি নাম সমণা সক্যপুত্তিযা দুন্নিৱত্থা দুপ্পাৰুতা অনাকপ্পসম্পন্না পিণ্ডায চৰিস্সন্তি; মনুস্সানং ভুঞ্জমানানং উপৰিভোজনেপি উত্তিট্ঠপত্তং উপনামেস্সন্তি, উপৰিখাদনীযেপি – উপৰিসাযনীযেপি – উপৰিপানীযেপি উত্তিট্ঠপত্তং উপনামেস্সন্তি; সামং সূপম্পি ওদনম্পি ৱিঞ্ঞাপেত্ৱা ভুঞ্জিস্সন্তি; ভত্তগ্গেপি উচ্চাসদ্দা মহাসদ্দা ৱিহৰিস্সন্তি, সেয্যথাপি ব্ৰাহ্মণা ব্ৰাহ্মণভোজনে’’তি. অস্সোসুং খো ভিক্খূ তেসং মনুস্সানং উজ্ঝাযন্তানং খিয্যন্তানং ৱিপাচেন্তানং …পে… অথ খো তে ভিক্খূ ভগৱতো এতমত্থং আৰোচেসুং. সচ্চং কিৰ, ভিক্খৱে…পে… সচ্চং, ভগৱাতি…পে… ৱিগৰহিত্ৱা ধম্মিং কথং কত্ৱা ভিক্খূ আমন্তেসি –

‘‘অনুজানামি, ভিক্খৱে, আচৰিযং. আচৰিযো, ভিক্খৱে, অন্তেৱাসিকম্হি পুত্তচিত্তং উপট্ঠাপেস্সতি, অন্তেৱাসিকো আচৰিযম্হি পিতুচিত্তং উপট্ঠাপেস্সতি. এৱং তে অঞ্ঞমঞ্ঞং সগাৰৱা সপ্পতিস্সা সভাগৱুত্তিনো ৱিহৰন্তা ইমস্মিং ধম্মৱিনযে ৱুদ্ধিং ৱিৰুড়্হিং ৱেপুল্লং আপজ্জিস্সন্তি. অনুজানামি, ভিক্খৱে, দসৱস্সং নিস্সায ৱত্থুং, দসৱস্সেন নিস্সযং দাতুং. এৱঞ্চ পন, ভিক্খৱে, আচৰিযো গহেতব্বো. একংসং উত্তৰাসঙ্গং কৰিত্ৱা পাদে ৱন্দিত্ৱা উক্কুটিকং নিসীদিত্ৱা অঞ্জলিং পগ্গহেত্ৱা এৱমস্স ৱচনীযো – ‘আচৰিযো মে, ভন্তে, হোহি, আযস্মতো নিস্সায ৱচ্ছামি; আচৰিযো মে, ভন্তে, হোহি, আযস্মতো নিস্সায ৱচ্ছামি; আচৰিযো মে, ভন্তে, হোহি, আযস্মতো নিস্সায ৱচ্ছামী’তি. ‘সাহূতি’ ৱা ‘লহূতি’ ৱা ‘ওপাযিক’ন্তি ৱা ‘পতিৰূপ’ন্তি ৱা ‘পাসাদিকেন সম্পাদেহী’তি ৱা কাযেন ৱিঞ্ঞাপেতি, ৱাচায ৱিঞ্ঞাপেতি, কাযেন ৱাচায ৱিঞ্ঞাপেতি, গহিতো হোতি আচৰিযো; ন কাযেন ৱিঞ্ঞাপেতি, ন ৱাচায ৱিঞ্ঞাপেতি, ন কাযেন ৱাচায ৱিঞ্ঞাপেতি, ন গহিতো হোতি আচৰিযো.

৭৮. [চূড়ৱ. ৩৮০ আদযো] ‘‘অন্তেৱাসিকেন, ভিক্খৱে, আচৰিযম্হি সম্মা ৱত্তিতব্বং. তত্ৰাযং সম্মাৱত্তনা –

‘‘কালস্সেৱ উট্ঠায উপাহনং ওমুঞ্চিত্ৱা একংসং উত্তৰাসঙ্গং কৰিত্ৱা দন্তকট্ঠং দাতব্বং, মুখোদকং দাতব্বং, আসনং পঞ্ঞপেতব্বং. সচে যাগু হোতি, ভাজনং ধোৱিত্ৱা যাগু উপনামেতব্বা. যাগুং পীতস্স উদকং দত্ৱা ভাজনং পটিগ্গহেত্ৱা নীচং কত্ৱা সাধুকং অপ্পটিঘংসন্তেন ধোৱিত্ৱা পটিসামেতব্বং. আচৰিযম্হি ৱুট্ঠিতে আসনং উদ্ধৰিতব্বং. সচে সো দেসো উক্লাপো হোতি, সো দেসো সম্মজ্জিতব্বো.

‘‘সচে আচৰিযো গামং পৱিসিতুকামো হোতি, নিৱাসনং দাতব্বং, পটিনিৱাসনং পটিগ্গহেতব্বং, কাযবন্ধনং দাতব্বং, সগুণং কত্ৱা সঙ্ঘাটিযো দাতব্বা, ধোৱিত্ৱা পত্তো সোদকো দাতব্বো. সচে আচৰিযো পচ্ছাসমণং আকঙ্খতি, তিমণ্ডলং পটিচ্ছাদেন্তেন পৰিমণ্ডলং নিৱাসেত্ৱা কাযবন্ধনং বন্ধিত্ৱা সগুণং কত্ৱা সঙ্ঘাটিযো পাৰুপিত্ৱা গণ্ঠিকং পটিমুঞ্চিত্ৱা ধোৱিত্ৱা পত্তং গহেত্ৱা আচৰিযস্স পচ্ছাসমণেন হোতব্বং. নাতিদূৰে গন্তব্বং, নাচ্চাসন্নে গন্তব্বং, পত্তপৰিযাপন্নং পটিগ্গহেতব্বং. ন আচৰিযস্স ভণমানস্স অন্তৰন্তৰা কথা ওপাতেতব্বা. আচৰিযো আপত্তিসামন্তা ভণমানো নিৱাৰেতব্বো.

‘‘নিৱত্তন্তেন পঠমতৰং আগন্ত্ৱা আসনং পঞ্ঞপেতব্বং, পাদোদকং পাদপীঠং পাদকথলিকং উপনিক্খিপিতব্বং, পচ্চুগ্গন্ত্ৱা পত্তচীৱৰং পটিগ্গহেতব্বং, পটিনিৱাসনং দাতব্বং, নিৱাসনং পটিগ্গহেতব্বং. সচে চীৱৰং সিন্নং হোতি, মুহুত্তং উণ্হে ওতাপেতব্বং, ন চ উণ্হে চীৱৰং নিদহিতব্বং. চীৱৰং সঙ্ঘৰিতব্বং. চীৱৰং সঙ্ঘৰন্তেন চতুৰঙ্গুলং কণ্ণং উস্সাৰেত্ৱা চীৱৰং সঙ্ঘৰিতব্বং – মা মজ্ঝে ভঙ্গো অহোসীতি. ওভোগে কাযবন্ধনং কাতব্বং.

‘‘সচে পিণ্ডপাতো হোতি, আচৰিযো চ ভুঞ্জিতুকামো হোতি, উদকং দত্ৱা পিণ্ডপাতো উপনামেতব্বো. আচৰিযো পানীযেন পুচ্ছিতব্বো. ভুত্তাৱিস্স উদকং দত্ৱা পত্তং পটিগ্গহেত্ৱা নীচং কত্ৱা সাধুকং অপ্পটিঘংসন্তেন ধোৱিত্ৱা ৱোদকং কত্ৱা মুহুত্তং উণ্হে ওতাপেতব্বো, ন চ উণ্হে পত্তো নিদহিতব্বো. পত্তচীৱৰং নিক্খিপিতব্বং. পত্তং নিক্খিপন্তেন একেন হত্থেন পত্তং গহেত্ৱা একেন হত্থেন হেট্ঠামঞ্চং ৱা হেট্ঠাপীঠং ৱা পৰামসিত্ৱা পত্তো নিক্খিপিতব্বো. ন চ অনন্তৰহিতায ভূমিযা পত্তো নিক্খিপিতব্বো. চীৱৰং নিক্খিপন্তেন একেন হত্থেন চীৱৰং গহেত্ৱা একেন হত্থেন চীৱৰৱংসং ৱা চীৱৰৰজ্জুং ৱা পমজ্জিত্ৱা পাৰতো অন্তং ওৰতো ভোগং কত্ৱা চীৱৰং নিক্খিপিতব্বং. আচৰিযম্হি ৱুট্ঠিতে আসনং উদ্ধৰিতব্বং, পাদোদকং পাদপীঠং পাদকথলিকং পটিসামেতব্বং. সচে সো দেসো উক্লাপো হোতি, সো দেসো সম্মজ্জিতব্বো.

‘‘সচে আচৰিযো নহাযিতুকামো হোতি, নহানং পটিযাদেতব্বং. সচে সীতেন অত্থো হোতি, সীতং পটিযাদেতব্বং. সচে উণ্হেন অত্থো হোতি, উণ্হং পটিযাদেতব্বং.

‘‘সচে আচৰিযো জন্তাঘৰং পৱিসিতুকামো হোতি, চুণ্ণং সন্নেতব্বং, মত্তিকা তেমেতব্বা, জন্তাঘৰপীঠং আদায আচৰিযস্স পিট্ঠিতো পিট্ঠিতো গন্ত্ৱা জন্তাঘৰপীঠং দত্ৱা চীৱৰং পটিগ্গহেত্ৱা একমন্তং নিক্খিপিতব্বং, চুণ্ণং দাতব্বং, মত্তিকা দাতব্বা. সচে উস্সহতি, জন্তাঘৰং পৱিসিতব্বং. জন্তাঘৰং পৱিসন্তেন মত্তিকায মুখং মক্খেত্ৱা পুৰতো চ পচ্ছতো চ পটিচ্ছাদেত্ৱা জন্তাঘৰং পৱিসিতব্বং. ন থেৰে ভিক্খূ অনুপখজ্জ নিসীদিতব্বং. ন নৱা ভিক্খূ আসনেন পটিবাহিতব্বা. জন্তাঘৰে আচৰিযস্স পৰিকম্মং কাতব্বং. জন্তাঘৰা নিক্খমন্তেন জন্তাঘৰপীঠং আদায পুৰতো চ পচ্ছতো চ পটিচ্ছাদেত্ৱা জন্তাঘৰা নিক্খমিতব্বং.

‘‘উদকেপি আচৰিযস্স পৰিকম্মং কাতব্বং. নহাতেন পঠমতৰং উত্তৰিত্ৱা অত্তনো গত্তং ৱোদকং কত্ৱা নিৱাসেত্ৱা আচৰিযস্স গত্ততো উদকং পমজ্জিতব্বং, নিৱাসনং দাতব্বং, সঙ্ঘাটি দাতব্বা, জন্তাঘৰপীঠং আদায পঠমতৰং আগন্ত্ৱা আসনং পঞ্ঞপেতব্বং, পাদোদকং পাদপীঠং পাদকথলিকং উপনিক্খিপিতব্বং. আচৰিযো পানীযেন পুচ্ছিতব্বো. সচে উদ্দিসাপেতুকামো হোতি, উদ্দিসাপেতব্বো. সচে পৰিপুচ্ছিতুকামো হোতি, পৰিপুচ্ছিতব্বো.

‘‘যস্মিং ৱিহাৰে আচৰিযো ৱিহৰতি, সচে সো ৱিহাৰো উক্লাপো হোতি, সচে উস্সহতি, সোধেতব্বো. ৱিহাৰং সোধেন্তেন পঠমং পত্তচীৱৰং নীহৰিত্ৱা একমন্তং নিক্খিপিতব্বং; নিসীদনপচ্চত্থৰণং নীহৰিত্ৱা একমন্তং নিক্খিপিতব্বং; ভিসিবিব্বোহনং নীহৰিত্ৱা একমন্তং নিক্খিপিতব্বং; মঞ্চো নীচং কত্ৱা সাধুকং অপ্পটিঘংসন্তেন, অসঙ্ঘট্টেন্তেন কৱাটপিট্ঠং, নীহৰিত্ৱা একমন্তং নিক্খিপিতব্বো; পীঠং নীচং কত্ৱা সাধুকং অপ্পটিঘংসন্তেন, অসঙ্ঘট্টেন্তেন কৱাটপিট্ঠং, নীহৰিত্ৱা একমন্তং নিক্খিপিতব্বং; মঞ্চপটিপাদকা নীহৰিত্ৱা একমন্তং নিক্খিপিতব্বা; খেড়মল্লকো নীহৰিত্ৱা একমন্তং নিক্খিপিতব্বো; অপস্সেনফলকং নীহৰিত্ৱা একমন্তং নিক্খিপিতব্বং; ভূমত্থৰণং যথাপঞ্ঞত্তং সল্লক্খেত্ৱা নীহৰিত্ৱা একমন্তং নিক্খিপিতব্বং. সচে ৱিহাৰে সন্তানকং হোতি, উল্লোকা পঠমং ওহাৰেতব্বং, আলোকসন্ধিকণ্ণভাগা পমজ্জিতব্বা. সচে গেৰুকপৰিকম্মকতা ভিত্তি কণ্ণকিতা হোতি, চোড়কং তেমেত্ৱা পীড়েত্ৱা পমজ্জিতব্বা. সচে কাড়ৱণ্ণকতা ভূমি কণ্ণকিতা হোতি, চোড়কং তেমেত্ৱা পীড়েত্ৱা পমজ্জিতব্বা. সচে অকতা হোতি ভূমি, উদকেন পৰিপ্ফোসিত্ৱা সম্মজ্জিতব্বা – মা ৱিহাৰো ৰজেন উহঞ্ঞীতি. সঙ্কাৰং ৱিচিনিত্ৱা একমন্তং ছড্ডেতব্বং.

‘‘ভূমত্থৰণং ওতাপেত্ৱা সোধেত্ৱা পপ্ফোটেত্ৱা অতিহৰিত্ৱা যথাপঞ্ঞত্তং পঞ্ঞপেতব্বং. মঞ্চপটিপাদকা ওতাপেত্ৱা পমজ্জিত্ৱা অতিহৰিত্ৱা যথাঠানে ঠপেতব্বা. মঞ্চো ওতাপেত্ৱা সোধেত্ৱা পপ্ফোটেত্ৱা নীচং কত্ৱা সাধুকং অপ্পটিঘংসন্তেন, অসঙ্ঘট্টেন্তেন কৱাটপিট্ঠং, অতিহৰিত্ৱা যথাপঞ্ঞত্তং পঞ্ঞপেতব্বো. পীঠং ওতাপেত্ৱা সোধেত্ৱা পপ্ফোটেত্ৱা নীচং কত্ৱা সাধুকং অপ্পটিঘংসন্তেন, অসঙ্ঘট্টেন্তেন কৱাটপিট্ঠং, অতিহৰিত্ৱা যথাপঞ্ঞত্তং পঞ্ঞপেতব্বং. ভিসিবিব্বোহনং ওতাপেত্ৱা সোধেত্ৱা পপ্ফোটেত্ৱা অতিহৰিত্ৱা যথাপঞ্ঞত্তং পঞ্ঞপেতব্বং. নিসীদনপচ্চত্থৰণং ওতাপেত্ৱা সোধেত্ৱা পপ্ফোটেত্ৱা অতিহৰিত্ৱা যথাপঞ্ঞত্তং পঞ্ঞপেতব্বং. খেড়মল্লকো ওতাপেত্ৱা পমজ্জিত্ৱা অতিহৰিত্ৱা যথাঠানে ঠপেতব্বো. অপস্সেনফলকং ওতাপেত্ৱা পমজ্জিত্ৱা অতিহৰিত্ৱা যথাঠানে ঠপেতব্বং. পত্তচীৱৰং নিক্খিপিতব্বং. পত্তং নিক্খিপন্তেন একেন হত্থেন পত্তং গহেত্ৱা একেন হত্থেন হেট্ঠামঞ্চং ৱা হেট্ঠাপীঠং ৱা পৰামসিত্ৱা পত্তো নিক্খিপিতব্বো. ন চ অনন্তৰহিতায ভূমিযা পত্তো নিক্খিপিতব্বো. চীৱৰং নিক্খিপন্তেন একেন হত্থেন চীৱৰং গহেত্ৱা একেন হত্থেন চীৱৰৱংসং ৱা চীৱৰৰজ্জুং ৱা পমজ্জিত্ৱা পাৰতো অন্তং ওৰতো ভোগং কত্ৱা চীৱৰং নিক্খিপিতব্বং.

‘‘সচে পুৰত্থিমা সৰজা ৱাতা ৱাযন্তি, পুৰত্থিমা ৱাতপানা থকেতব্বা. সচে পচ্ছিমা সৰজা ৱাতা ৱাযন্তি, পচ্ছিমা ৱাতপানা থকেতব্বা. সচে উত্তৰা সৰজা ৱাতা ৱাযন্তি, উত্তৰা ৱাতপানা থকেতব্বা. সচে দক্খিণা সৰজা ৱাতা ৱাযন্তি, দক্খিণা ৱাতপানা থকেতব্বা. সচে সীতকালো হোতি, দিৱা ৱাতপানা ৱিৱৰিতব্বা, ৰত্তিং থকেতব্বা. সচে উণ্হকালো হোতি, দিৱা ৱাতপানা থকেতব্বা, ৰত্তিং ৱিৱৰিতব্বা.

‘‘সচে পৰিৱেণং উক্লাপং হোতি, পৰিৱেণং সম্মজ্জিতব্বং. সচে কোট্ঠকো উক্লাপো হোতি, কোট্ঠকো সম্মজ্জিতব্বো. সচে উপট্ঠানসালা উক্লাপা হোতি, উপট্ঠানসালা সম্মজ্জিতব্বা. সচে অগ্গিসালা উক্লাপা হোতি, অগ্গিসালা সম্মজ্জিতব্বা. সচে ৱচ্চকুটি উক্লাপা হোতি, ৱচ্চকুটি সম্মজ্জিতব্বা. সচে পানীযং ন হোতি, পানীযং উপট্ঠাপেতব্বং. সচে পৰিভোজনীযং ন হোতি, পৰিভোজনীযং উপট্ঠাপেতব্বং. সচে আচমনকুম্ভিযং উদকং ন হোতি, আচমনকুম্ভিযা উদকং আসিঞ্চিতব্বং.

‘‘সচে আচৰিযস্স অনভিৰতি উপ্পন্না হোতি, অন্তেৱাসিকেন ৱূপকাসেতব্বো, ৱূপকাসাপেতব্বো, ধম্মকথা ৱাস্স কাতব্বা. সচে আচৰিযস্স কুক্কুচ্চং উপ্পন্নং হোতি, অন্তেৱাসিকেন ৱিনোদেতব্বং, ৱিনোদাপেতব্বং, ধম্মকথা ৱাস্স কাতব্বা. সচে আচৰিযস্স দিট্ঠিগতং উপ্পন্নং হোতি, অন্তেৱাসিকেন ৱিৱেচেতব্বং, ৱিৱেচাপেতব্বং, ধম্মকথা ৱাস্স কাতব্বা. সচে আচৰিযো গৰুধম্মং অজ্ঝাপন্নো হোতি পৰিৱাসাৰহো, অন্তেৱাসিকেন উস্সুক্কং কাতব্বং – কিন্তি নু খো সঙ্ঘো আচৰিযস্স পৰিৱাসং দদেয্যাতি. সচে আচৰিযো মূলায পটিকস্সনাৰহো হোতি, অন্তেৱাসিকেন উস্সুক্কং কাতব্বং – কিন্তি নু খো সঙ্ঘো আচৰিযং মূলায পটিকস্সেয্যাতি. সচে আচৰিযো মানত্তাৰহো হোতি, অন্তেৱাসিকেন উস্সুক্কং কাতব্বং – কিন্তি নু খো সঙ্ঘো আচৰিযস্স মানত্তং দদেয্যাতি. সচে আচৰিযো অব্ভানাৰহো হোতি, অন্তেৱাসিকেন উস্সুক্কং কাতব্বং – কিন্তি নু খো সঙ্ঘো আচৰিযং অব্ভেয্যাতি. সচে সঙ্ঘো আচৰিযস্স কম্মং কত্তুকামো হোতি, তজ্জনীযং ৱা নিযস্সং ৱা পব্বাজনীযং ৱা পটিসাৰণীযং ৱা উক্খেপনীযং ৱা, অন্তেৱাসিকেন উস্সুক্কং কাতব্বং – কিন্তি নু খো সঙ্ঘো আচৰিযস্স কম্মং ন কৰেয্য, লহুকায ৱা পৰিণামেয্যাতি. কতং ৱা পনস্স হোতি সঙ্ঘেন কম্মং, তজ্জনীযং ৱা নিযস্সং ৱা পব্বাজনীযং ৱা পটিসাৰণীযং ৱা উক্খেপনীযং ৱা, অন্তেৱাসিকেন উস্সুক্কং কাতব্বং – কিন্তি নু খো আচৰিযো সম্মা ৱত্তেয্য, লোমং পাতেয্য, নেত্থাৰং ৱত্তেয্য, সঙ্ঘো তং কম্মং পটিপ্পস্সম্ভেয্যাতি.

‘‘সচে আচৰিযস্স চীৱৰং ধোৱিতব্বং হোতি, অন্তেৱাসিকেন ধোৱিতব্বং, উস্সুক্কং ৱা কাতব্বং – কিন্তি নু খো আচৰিযস্স চীৱৰং ধোৱিযেথাতি. সচে আচৰিযস্স চীৱৰং কাতব্বং হোতি, অন্তেৱাসিকেন কাতব্বং, উস্সুক্কং ৱা কাতব্বং – কিন্তি নু খো আচৰিযস্স চীৱৰং কৰিযেথাতি. সচে আচৰিযস্স ৰজনং পচিতব্বং হোতি, অন্তেৱাসিকেন পচিতব্বং, উস্সুক্কং ৱা কাতব্বং – কিন্তি নু খো আচৰিযস্স ৰজনং পচিযেথাতি. সচে আচৰিযস্স চীৱৰং ৰজিতব্বং হোতি, অন্তেৱাসিকেন ৰজিতব্বং, উস্সুক্কং ৱা কাতব্বং – কিন্তি নু খো আচৰিযস্স চীৱৰং ৰজিযেথাতি. চীৱৰং ৰজন্তেন সাধুকং সম্পৰিৱত্তকং সম্পৰিৱত্তকং ৰজিতব্বং, ন চ অচ্ছিন্নে থেৱে পক্কমিতব্বং.

‘‘ন আচৰিযং অনাপুচ্ছা একচ্চস্স পত্তো দাতব্বো, ন একচ্চস্স পত্তো পটিগ্গহেতব্বো; ন একচ্চস্স চীৱৰং দাতব্বং; ন একচ্চস্স চীৱৰং পটিগ্গহেতব্বং; ন একচ্চস্স পৰিক্খাৰো দাতব্বো; ন একচ্চস্স পৰিক্খাৰো পটিগ্গহেতব্বো; ন একচ্চস্স কেসা ছেদেতব্বা; ন একচ্চেন কেসা ছেদাপেতব্বা; ন একচ্চস্স পৰিকম্মং কাতব্বং; ন একচ্চেন পৰিকম্মং কাৰাপেতব্বং; ন একচ্চস্স ৱেয্যাৱচ্চো কাতব্বো; ন একচ্চেন ৱেয্যাৱচ্চো কাৰাপেতব্বো; ন একচ্চস্স পচ্ছাসমণেন হোতব্বং; ন একচ্চো পচ্ছাসমণো আদাতব্বো; ন একচ্চস্স পিণ্ডপাতো নীহৰিতব্বো; ন একচ্চেন পিণ্ডপাতো নীহৰাপেতব্বো. ন আচৰিযং অনাপুচ্ছা গামো পৱিসিতব্বো, ন সুসানং গন্তব্বং, ন দিসা পক্কমিতব্বা. সচে আচৰিযো গিলানো হোতি, যাৱজীৱং উপট্ঠাতব্বো, ৱুট্ঠানমস্স আগমেতব্ব’’ন্তি.

আচৰিযৱত্তং নিট্ঠিতং.